ɄNgʉlʉve ilikʉvahɨgha avaanhu vooni kɨsila kʉsalʉla
2
Lɨno,
ʉve ghwe jʉno ghʉkʉvahɨgha avange,
nʉngati ʉNgʉlʉve nailikʉkʉhɨgha ʉve,
nambe ʉve ndaani.
Pano ʉkʉmhɨgha ʉnʼjaako ʉkagʉlaghe kuuti,
ghukuhɨgha ghwe mwene,
ʉlwakʉva ʉvʉhosi vʉno ivomba ʉmwene,
vwe vʉno ghuvomba na jʉʉve.
2 Tʉkagwile kuuti,
ʉvʉhɨghi vwa Ngʉlʉve vwa kyangʼhaani kʉ vaanhu vooni vano vivomba ʉvʉhosi ndavʉle ʉvuo.
3 Lɨno,
ʉve ghwe jʉno ghʉkʉvahɨgha avange vano vivomba ʉvʉhosi vʉno na jʉʉve ghuvomba,
ghusaagha kuuti ʉve ghulikuluka ʉvʉhɨghi vwa Ngʉlʉve?
4 Pamo ghubenapʉla vʉle ʉNgʉlʉve nkoola fiijo na pano ihʉfia ʉvʉhʉʉgʉ nʉ lugudo lwake.
Asi,
naghukagʉla piiti ʉmwene ɨkʉkʉkolopalɨla kuuti ʉlaate ʉvʉhosi vwako?
5 Lɨno,
ʉlwakʉva ʉlɨ nsiiti kukwɨtɨka,
naghulonda kulaata ʉvʉhosi vwako,
apuo ghukulɨngʼhanɨkɨsia jʉʉve ʉlʉpumuko ʉlʉvaha ɨkɨghono kɨno ʉNgʉlʉve ilihʉfia ɨngʼhalaasi jaake na kuhɨgha mʉ vwakyangʼhaani.
6 Ɨkɨghono ɨkio,
“ɄNgʉlʉve ilikʉmhomba nʉjʉnge kulɨngʼhana ni mbombo saake.”a
7 Avaanhu vano vivomba inofu kɨsila kʉkatala,
vwɨmɨla kulonda ʉvʉvaha nʉ vwoghopua nʉ vwʉmi vʉno navunangɨka kuhʉma kwa Ngʉlʉve,
ʉmwene ilikʉvapeela ʉvwʉmi ʉvwa kʉvʉsila kʉsila.
8 Neke avafinyi vano navisaagha avange,
avaanhu vano vikaana ʉvwakyangʼhaani na kuvomba ʉvʉhosi,
ɨngʼhalaasi nʉ lʉkwegho lwa Ngʉlʉve filikʉvisila.
9 Ʉmuunhu ghweni jʉno ivomba ʉvʉhosi lulikʉmwagha ʉlʉpumuko ni nhalamu nyinga.
Ʉluo luliiva kʉ vaanhu vooni,
taasi aVayahudi,
neke vano naVayahudi.
10 Looli avaanhu vano vivomba inofu,
ʉNgʉlʉve ilikʉvapeela ʉvʉvaha nʉ vwoghopua nʉ lʉtengaano.
Ilikʉvapeela taasi aVayahudi,
neke vano naVayahudi.
11 Nijova ʉluo,
ʉlwakʉva ʉNgʉlʉve nailola pa maaso,
ilikʉvahomba vooni mʉ vwakyangʼhaani.
12 Avaanhu vooni vano vivomba inyɨvi kɨsila kʉkagʉla indaghɨlo sa Moose,
ʉNgʉlʉve ilikʉvatipula kɨsila kwɨmɨla indaghɨlo isio.
Voope vano vivomba inyɨvi kʉmo vasikagwile indaghɨlo sa Moose,
ʉNgʉlʉve ilikʉvatipula vwɨmɨla indaghɨlo isio.
13 Vilihɨghua,
ʉlwakʉva ʉNgʉlʉve naɨkʉmʼbalɨla ʉmuunhu kuuva mʉgholofu vwɨmɨla kukupʉlɨka kwene indaghɨlo sa Moose,
looli vwɨmɨla kuvɨngɨlɨla indaghɨlo isio.
14 Avaanhu vano naVayahudi vasila ndaghɨlo sa Moose.
Pano vivomba inofu sino silɨngʼhiine na sino silʉngɨka indaghɨlo sa Moose,
luhʉfia kuuti valɨ ni ndaghɨlo mʉ moojo ghaave,
nambe navasikagwile indaghɨlo sa Moose.
15 Amaghendele ghaave ghihʉfia kuuti indaghɨlo silembilue mʉ moojo ghaave.b
Amoojo ghaave ghikʉvoleka,
kange amasaaghe ghaave ghikʉvahɨgha pamonga ghikʉvatanga.
16 Ɨjɨ je Mhola ɨNofu jɨno nipʉlɨsia kuuti,
ɨkɨghono kɨla ɨkya vʉhɨghi,
ʉNgʉlʉve ilihɨgha avaanhu kukilila ʉYesu Kɨlɨsite vwɨmɨla amasaaghe ghaave agha mʉ moojo.
AVayahudi ni ndaghɨlo sa Moose
17 Ʉve ghwe jʉno ghukutambʉla kuuti ʉlɨ Mʉyahudi,
ghuhʉvɨɨla kuvalɨlua ʉvʉgholofu vwɨmɨla indaghɨlo sa Moose,
ghukughinia kuuti ʉve ʉlɨ muunhu ghwa Ngʉlʉve.
18 Ghukuvona kuuti ʉkagwile sino ʉNgʉlʉve ikeela na sino sinoghiile kuvombua,
ʉlwakʉva ʉvʉlanɨsivue indaghɨlo sa Moose.
19 Ghukuvona kuuti ʉnoghiile kulongosia avaanhu vano naVayahudi,
ndavʉle ʉmuunhu kulongosia avabofu amaaso,
nambe ndavʉle ɨtaala vʉle jimulika avaanhu vano valɨ mʉ ngʼhiisi.
20 Ʉve ghwe mʼbʉlanɨsi ghwa vaanhu avasila vʉkagʉsi,
ghwe mʼbʉlanɨsi ghwa vaana avafyele,
ghukuvona kuuti indaghɨlo sikʉpeleliile kuuva nʉ vʉkagʉsi nʉ vwakyangʼhaani.
21 Lɨno,
ʉve ghuvʉlanɨsia avange,
kɨki naghuvomba sino ghuvʉlanɨsia?
Ghuvʉlanɨsia ghwiti,
“Nʉngahɨjaghe!”
Ongo ʉve ghuhɨɨja?
22 Ʉkʉvavʉʉla avaanhu ghwiti,
“Nʉngavwafukaghe!”
Ongo ʉve ghuvwafuka?
Kange,
ghʉkʉvakalalɨla vano vikwɨmɨka amangʉlʉve,
ongo jʉʉve ghuhɨɨja ifiinu ifya mʉ nyumba sino vikwɨmɨka amangʉlʉve?c
23 Ghukughinia kuuti ʉkagwile indaghɨlo sa Ngʉlʉve,
neke kɨki ghʉkʉmʼbenapʉla ʉNgʉlʉve mʉlwa kʉdeenya indaghɨlo saake?
24 Ʉluo lʉlɨngʼhiine na Malembe aMɨmɨke ghano ghiiti,
“Vwɨmɨla ʉvʉhosi vʉno muvomba ʉmue,
avaanhu va ɨɨsi isingi vikʉnʼjova fivi ʉNgʉlʉve.”d
25 Kuvombelua ɨkɨvʉngo ɨkya kʉdumulua ɨngola ɨja kɨdɨɨmi,e
kʉlɨ nʉ lʉvʉmbʉlɨlo nave ghuvɨngɨlɨla indaghɨlo.
Neke nave ghudeenya indaghɨlo,
kuvombelua ɨkɨvʉngo ɨkio kuuva kʉsila lʉvʉmbʉlɨlo,
ghuuva ʉlɨngʼhiine na jʉno naavombilue ɨkɨvʉngo.
26 Lɨno,
ʉmuunhu jʉno naavombilue ɨkɨvʉngo ɨkio nave ivɨngɨlɨla indaghɨlo,
ʉNgʉlʉve ɨkʉmwɨtɨka ndavʉle jʉno avombilue ɨkɨvʉngo.
27 Kange,
ʉmuunhu jʉno naavombilue ɨkɨvʉngo ɨkio,
neke ivɨngɨlɨla indaghɨlo,
amaghendele ghaake ghikʉkʉhʉfia ʉve ghwe Mʉyahudi kuuti ʉlɨ mhosi.
Luuva enendɨɨkɨ,
ʉlwakʉva ʉve ʉvombilue ɨkɨvʉngo ɨkio,
na kukagʉla indaghɨlo,
neke ghudeenya indaghɨlo isio.
28 Lɨno,
nakwekʉti ʉmuunhu ghweni jʉno aholilue Mʉyahudi iiva muunhu ghwa Ngʉlʉve.
Kange,
ʉmuunhu naiiva muunhu ghwa Ngʉlʉve vwɨmɨla kuvombelua ɨkɨvʉngo ɨkio.
29 Looli ʉmuunhu ghwa Ngʉlʉve ghwe jʉno ɨkʉnkʉnda ʉNgʉlʉve.
Kange,
kuvombelua ɨkɨvʉngo ɨkio kʉno kʉnoghiile,
kwe kʉnosivua mʉ mwojo nʉ Mhepo ʉMwɨmɨke,
nakwekʉti mʉlwa kʉvɨngɨlɨla ʉvʉtavɨke ʉvwa ndaghɨlo.
Ʉmuunhu ndavʉle ʉjuo ighinisivua,
nakwekʉti ighinisivua na vaanhu,
looli ighinisivua nʉ Ngʉlʉve.