Ɨkalata ɨja Paulo kʉ
Valooma
Ʉlʉhʉngɨlo
1
Ɨkalata ɨjɨ jɨhʉmile kʉlyʉne ne Paulo,
ne mʼbombi ghwa Yesu Kɨlɨsite.
Ʉne nɨkemelilue kuuva nsungʼhua na kuvɨkua kuuva mʼbombi ghwa kʉpʉlɨsia ɨMhola ɨNofu ɨja Ngʉlʉve.
2 ƗMhola ɨjio je jɨno ʉNgʉlʉve alyavalaghile avaanhu kuhʉma mʼbʉkʉʉlʉ.
Alyavalaghile kukilila avavɨli vaake vano valyalembile ɨMhola ɨjio mʉ Malembe aMɨmɨke.
3 ƗMhola ɨjio jɨkʉmwoleka ʉMwanaake,
jʉno kɨmʼbɨlɨ alyaholilue mʉ kɨsina ɨkya ntwa ʉDavɨdi.a
4 Ʉjuo ghwe jʉno ʉNgʉlʉve mʉ ngʉfu sa Mhepo ʉMwɨmɨke akansyʉsia kuhʉma kʉ vafue.
Mʉ ʉluo ʉNgʉlʉve ɨkʉtʉhʉfia kuuti ʉjuo ghwe Mwanaakeb ʉnya ngʉfu sooni.
Ʉjuo ghwe Mʉtwa ghwitu ʉYesu Kɨlɨsite.
5 Vwɨmɨla ʉYesu ʉjuo,
ʉNgʉlʉve asʉngʉkiile ʉne kuuva nsungʼhua.
Alyavombile ʉluo kuuti,
nɨlongosie avaanhu vooni vano naVayahudi kʉkʉmwɨtɨka ʉMʉtwa ʉYesu na kʉkʉnkʉnda,
neke ɨlɨtavua lyake lɨghinisivwaghe.
6 Na jʉmue mwe vano mʉlɨ mʉ lɨkaaja ɨlya Looma,
mʉlɨ mʉ kɨpʉgha ɨkio,
mʉkemelilue nʉ Ngʉlʉve mʉʉve vaanhu va Yesu Kɨlɨsite.
7 Lɨno,
nɨkʉvalembela ʉmue mweni mwe vano mukukala mʉ lɨkaaja ɨlio,
mwe vaghanɨke va Ngʉlʉve,
mwe vano mʉkemelilue kuuva vaanhu vaake vɨmɨke.
Ʉlʉsʉngʉ nʉ lʉtengaano kuhʉma kwa Ngʉlʉve ʉNhaata ghwitu,
na kwa Mʉtwa ʉYesu Kɨlɨsite,
fivisaghe numue.
ɄPaulo itavɨka kʉghendela ɨlɨkaaja ɨlya Looma
8 Ɨkya kwanda mʉ sooni,
nɨkʉmhongesia ʉNgʉlʉve ghwango kukilila ʉYesu Kɨlɨsite vwɨmɨla ʉmue mweni,
ʉlwakʉva imhola isa lwɨtɨko lwinu sipʉlɨkɨka mʉ ɨɨsi jooni.
9 ɄNgʉlʉve jʉno nɨkʉmʼbombela nʉ mwojo ghwango ghwoni mʉlwa kʉpʉlɨsia ɨMhola ɨNofu ɨja Mwanaake,
akagwile kuuti nɨkʉvasʉmɨla jaatu.
10 Jaatu mʉ nyifuunyo sango nisʉʉma kuuti ʉNgʉlʉve nave akeele,
amheele ʉnsiki ʉghwa kʉvaghendela lɨno.
11 Nijova ʉluo,
ʉlwakʉva nilonda fiijo kutangʼhana numue,
kuuti nɨvapeele ʉlʉvonolo kuhʉma kwa Mhepo ʉMwɨmɨke,
neke mʉkangale mʉ moojo.
12 Kwekʉti ʉne numue,
tʉkangasanie mʉ lwɨtɨko.
13 Vanyalʉkolo vango,
nilonda mʉkagʉle kuuti,
kekinga nifumbua kʉkʉvaghendela,
neke ʉnsiki ghwoni kuhanga kufika lɨno nɨsighilue.
Nilonda kukwisa kuvomba ɨmbombo kʉlyʉmue kuuti avaanhu vamwɨtɨke ʉYesu,
ndavʉle nɨvombile kʉ vaanhu avange vano naVayahudi.
14 Nilondua kupʉlɨsia ɨMhola ɨNofu kʉ vaanhu vooni:
kʉ Vayunaani na kʉ vano naVayunaani,
kʉ vanya vʉkagʉsi na kʉ vasila vʉkagʉsi.
15 Fye nambe nilonda fiijo kupʉlɨsia ɨMhola ɨNofu na kʉlyʉmue mwe vano mukukala mʉ lɨkaaja ɨlya Looma.
16 ƗMhola ɨNofu se ngʉfu sa Ngʉlʉve,
sino sikʉvapoka avaanhu vooni vano vikʉmwɨtɨka ʉYesu,
taasi aVayahudi,
neke vano naVayahudi.
Mʉ ʉluo nanivona soni kupʉlɨsia ɨMhola ɨjio,
17 ʉlwakʉva jihʉfia vʉle ʉNgʉlʉve ɨkʉvavalɨla avaanhu kuuva vagholofu.
Ʉluo luvombeka vwɨmɨla ʉlwɨtɨko,
kuhʉma kʉvʉtengʉlɨlo kuhanga kufika kʉvʉsililo,
ndavʉle lɨlembilue mʉ Malembe aMɨmɨke kuuti,
“Avaanhu vango avagholofu vikukalagha vwɨmɨla kʉkʉnyɨtɨka ʉne.”c
ɄNgʉlʉve ɨkʉvapeela avaanhu ʉlʉpumuko vwɨmɨla inyɨvi saave
18 ɄNgʉlʉve ihʉfia ɨngʼhalaasi jaake kuhʉma kʉkyanya vwɨmɨla avaanhu vooni vano vikʉnkaana na kuvomba ʉvʉhosi,
ʉlwakʉva vwɨmɨla ʉvʉhosi vwave,
visigha ʉvwakyangʼhaani vʉleke kukagʉlɨka.
19 Nakwekʉti navakagwile kɨmonga vwɨmɨla ʉNgʉlʉve,
jeeje.
Sooni sino vanoghiile kukagʉla vwɨmɨla ʉNgʉlʉve vasikagwile,
ʉlwakʉva ʉNgʉlʉve avahʉfisie.
20 Kʉvʉtengʉlɨlo ʉNgʉlʉve alyapelile ifiinu fyoni.
Kutengʉlɨla ʉnsiki ʉghuo vwɨmɨla ifiinu fino apelile,
avaanhu vikʉnkagʉla ʉNgʉlʉve vʉle alɨvuo,
napano navikʉmwagha na maaso.
Ifiinu fino alyapelile fihʉfia kuuti ʉNgʉlʉve alɨ ni ngʉfu ifighono fyoni,
kange ghwe Ngʉlʉve mwene nakwale ʉjʉnge.
Mʉ ʉluo avaanhu navangivavɨle kuuti navankagwile ʉNgʉlʉve.
21 Napano vankagwile ʉNgʉlʉve,
navikʉmʉghinia nambe kʉkʉmhongesia ndavʉle lʉnoghiile,
ʉlwene visaagha mʉ moojo ghaave kuvomba sino nasinoghiile,
vamemile ʉvʉjasu,
valɨ mʉ ngʼhiisi mʉ sino vanoghiile kʉkʉsikagʉla.
22 Vikughinia kuuti vanya lʉhala,
hɨmbe vajasu.
23 Valekile kʉkʉmwɨmɨka ʉNgʉlʉve jʉno naifua,
vikʉfyɨmɨka ifihwani fino fili ndavʉle ʉmuunhu,
ndavʉle ifikanu,
ndavʉle injuni,
ndavʉle ifikanu fino fighenda vwafula.
Ifio fyoni fihwani fya fipelua fino fifua.
24 Mʉ ʉluo ʉNgʉlʉve avalekile vavombaghe isa vʉnoghelua vwave ʉvʉviivi,
vavombaghe isa vʉvwafu kuhanga kupelela isoni vwɨmɨla amavɨlɨ ghaave.
25 Vavʉlekile ʉvwakyangʼhaani vwa Ngʉlʉve,
vivɨngɨlɨla isa vʉdesi.
Vikʉfyɨmɨka na kʉkʉfivombela fino fipelilue nʉ Ngʉlʉve,
vileka kʉkʉmwɨmɨka ʉNgʉlʉve ʉMpeli jʉno anoghiile kughinisivua ifighono fyoni!
Ameni.
26 Mʉ ʉluo,
ʉNgʉlʉve avalekile vavombaghe isa vʉnoghelua vwave ʉvʉviivi vʉno vupelela isoni.
Avadala valekile kuvomba lʉno lʉnoghiile kughona na vaghoosi vaave,
aveene vighona vadala na vadala vanine.
27 Voope avaghoosi vivʉhɨɨla lʉno lʉnoghiile kughona na vadala vaave,
vinoghelua kughona vaghoosi na vaghoosi vanine,
vivombelanɨla sino sipela isoni.
Mʉ ʉluo vasalwile vavuo ʉlʉkwegho lwa Ngʉlʉve lʉno vanoghiile vwɨmɨla imbombo saave imbiivi.
28 Neke ʉlwakʉva avaanhu avuo valyakanile kʉkʉnkagʉla ʉNgʉlʉve,
ghwope ʉNgʉlʉve avalekile vavɨngɨlɨlaghe amasaaghe ghaave amaviivi.
Vivomba sino nasinoghiile kuvombua.
29 Vamemile ʉvʉviivi vʉno vʉlɨ papinga palɨkɨmo nʉ vʉhosi,
ʉvʉhojofu nɨ lyojo.
Kange vamemile ɨkɨvini,
ʉvʉbudi,
amabaatu,
ʉvʉsyangi,
amasaaghe amaviivi nʉ vʉheehi.
30 Avaanhu avuo videsela avange,
valʉgʉ va Ngʉlʉve,
vanya mbedo,
vanya lughinio,
vanya matuupa,
ʉnsiki ghwoni vilonda ɨsɨla ɨmhia ɨja kʉvomba ʉvʉhosi,
navakʉndi kʉ vapaafi vaave,
31 vajasu,
navivomba sino valaghile kuvomba,
vasila lʉghano nambe ɨkɨsa kʉ vange.
32 Avaanhu avuo vakagwile kuuti ʉlʉlaghɨlo lwa Ngʉlʉve luuti,
ʉmuunhu angavombe inyɨvi ndavʉle isi,
ʉNgʉlʉve ɨkʉntipula.
Nambe vakagwile ʉluo,
navivɨkɨla mwojo!
Aveene vifivomba inyɨvi kɨsila kwoghopa,
kange vikʉvapaala vano vivomba isio.