Kʉkʉmʼbombela ʉNgʉlʉve
12
Lɨno vanyalʉkolo vango,
ʉlwakʉva ʉNgʉlʉve ahʉfisie ʉlʉsʉngʉ lwake kʉlyʉsue,
mutavʉle kuuva lɨtekelo ɨlyʉmi,a
ɨlɨtekelo ɨlyɨmɨke lɨno lɨkʉmhovosia ʉmwene.
Kuvomba ʉluo kwe kʉmwɨmɨka ʉNgʉlʉve kʉno kʉnoghiile.
2 Namʉngɨghaghe inyiiho isa mʉ ɨɨsi,
looli ʉNgʉlʉve avandʉle amoojo ghiinu,
mʉʉve na masaaghe amapia.
Apuo pe mukagʉla ʉvughane vwa Ngʉlʉve,
kwekʉti mukagʉla inofu pamaaso ghaake,
mukagʉla sino ikeela na sino ngʼhwɨlanifu.
3 Lɨno,
ʉlwakʉva ʉKɨlɨsite asʉngʉkiile kuuva nsungʼhua ghwake,
nɨkʉvavʉʉla ʉmue mweni kuuti,
ʉmuunhu ghweni kʉlyʉmue alekaghe kukuvona anoghiile kukila vʉle alɨvuo,
ʉlwene asaghaghe vʉnono kulɨngʼhana nʉ lwɨtɨko lʉno apelilue nʉ Ngʉlʉve.
4 Ndavʉle mʉkagwile,
ʉmʼbɨlɨ ghʉmo ghʉlɨ ni filʉngo finga,
neke kɨla kɨlʉngo kɨlɨ nɨ mbombo jaake.
5 Fye lʉlɨvuo,
na jʉsue nambe tʉlɨ vinga,
tʉlʉngiine hwene filʉngo mʉ mʼbɨlɨ ghʉmo mwa Kɨlɨsite.
Mʉ mʼbɨlɨ ʉghuo nʉjʉnge kɨlʉngo kwa jʉnge.
6 ɄNgʉlʉve mʉ lʉsʉngʉ lwake ampeliile nʉjʉnge ɨkɨpelua kyake.
Ʉnya kʉpʉlɨsia ɨmhola kuhʉma kwa Ngʉlʉve,
apʉlɨsyaghe kulɨngʼhana nʉ lwɨtɨko lwake.
7 Ʉnya kʉvomba ɨmbombo ɨja kʉvatanga avange,
avatangaghe;
ʉnya kʉvʉlanɨsia,
avʉlanɨsyaghe;
8 ʉnya kʉvakangasia avange,
avakangasyaghe;
ʉmpeesi,
avapelaghe avange nʉ mwojo ʉmʼbalafu;
ʉnya kʉlolelela avange,
alolelelaghe vʉnofu;
ʉnkoola,
ahʉfyaghe ʉvʉkoola vwake nʉ lʉkeelo.
Kughanana
9 Mʉvaghanaghe avajiinu kɨsila vʉkedʉsi,
mʉkalalɨlaghe ʉvʉhosi,
mʉgadɨlɨlaghe inofu.
10 Mʉghananaghe hwene vanamuunhu,
nʉjʉnge amʼbonaghe ʉnʼjaake kuuti anoghiile kukila ʉmwene.
11 Mʉlekaghe kuuva voolo,
mʉghimbaghe mʉ ngʉfu sa Mhepo ʉMwɨmɨke kʉkʉmʼbombela ʉMʉtwa ʉNgʉlʉve.
12 Ʉlʉhʉvɨɨlo lwinu lʉvapelelaghe kuuva nʉ lʉkeelo,
mʉ mhumuko mʉvisaghe nʉ lugudo,
kange namʉngakatalaghe kʉkʉnsʉʉma ʉNgʉlʉve.
13 Mʉvatangaghe avɨmɨke mʉ fino vaghilue,
mʉvʉpɨlaghe na kʉkʉvatengelela avahesia.
14 Mʉvasʉmɨlaghe kwa Ngʉlʉve vano vikʉvapumusia.
Mʉvasʉmɨlaghe kuuti ʉNgʉlʉve avafuunye,
namʉngavasʉmɨlaghe kuuti vaghunue.
15 Mʉhovokaghe palɨkɨmo na vano vihovoka,
mʉlɨlaghe palɨkɨmo na vano vilɨla.
16 Mʉpʉlɨngʼhanaghe,
namʉngighiniaghe,
looli mujisyaghe.
Mʉvisaghe palɨkɨmo na vano navatambʉlɨke,
mʉlekaghe kukuvona mʉlɨ vakagʉsi.
17 Avaanhu vangavavombele ʉvʉviivi,
namʉngagomosyaghe kʉkʉvavombela ʉvʉviivi,
looli mʉsaghaghe kuvomba inofu pamaaso gha vaanhu vooni.
18 Mʉ mikalɨle ghiinu na vange,
mutangaghe kukukala nʉ lʉtengaano na vaanhu vooni.
19 Vaghanɨke vango,
namʉngavangɨlaghe.
Kuvangɨla mbombo ja Ngʉlʉve,
ʉlwakʉva lɨlembilue mʉ Malembe aMɨmɨke kuuti,
“Kuvangɨla mbombo jango,
ʉne nivangɨla.”b
20 Kange,
aMalembe aMɨmɨke ghiiti,
“Ʉmʉlʉgʉ ghwako angave nɨ njala mpeele ɨkyakʉlia,
angave nɨ kyʉmɨlua mpeele amalenga.
Ʉlwakʉva ʉngavombe enendɨɨkɨ,
ghʉkʉmpelela kulemala mʉ mwojo vwɨmɨla isoni,
ghuuva hwene ʉntwɨkile ʉmwoto pa mutu.”
21 Nʉngalemwaghe nʉ vʉhosi,
looli ʉvʉlemaghe ʉvʉhosi mʉlwa kʉvomba inofu.