Mbombo sa Vasungʼhua 7

ɄSitefani ikwoleka pa vahɨghi

Pe ʉntekesi ʉmʼbaha akamposia ʉSitefani akati, “Sino vikwoleka isi vwɨmɨla ʉve sa kyangʼhaani?” 2 Ʉmwene akamʉla akati, “Mwe vanyalʉkolo vango, numue vanhaata vango, mʉmhʉlɨkɨsie! ɄNgʉlʉve ʉMʼbaha akihʉfia kwa nkʉʉlʉ ghwitu ʉAbulahamu mʉ ɨɨsi jaake ɨja Mesopotamia, ye akyale pihamɨla mʉ lɨkaaja ɨlya Halani. 3 ɄNgʉlʉve akamʼbʉʉla akati, ‘Vʉʉka mʉ ɨɨsi jaako ʉvaleke avanyalʉkolo vaako, ʉlʉte mʉ ɨɨsi jɨno kyanɨkʉkʉsoona.’ 4 Pe ʉAbulahamu akavʉʉka mʉ ɨɨsi jaake ɨja Vakalidayo, akalʉta kukukala kʉ Halani. Ʉviise ye afwile, ʉNgʉlʉve akamhamia kʉ Halani, akiisa kukukala mʉ ɨɨsi ɨjɨ jɨno mukukala ʉmue lɨno.

5 “Neke ʉNgʉlʉve naalyampeliile ʉAbulahamu nambe akeegha kamo mʉ ɨɨsi ɨjɨ ɨja Isilaeli, kuuti vʉʉve vʉhaasi vwake. Looli alyamʉlaghile kʉkʉmpeela ɨɨsi ɨjɨ jɨɨve jaake nɨ kɨsina kyake, napano ʉnsiki ʉghuo ʉAbulahamu alyale nsila mwana. 6 ɄNgʉlʉve akamʼbʉʉla akati, ‘Avaanhu ava kɨsina kyako viliiva vahesia mʉ ɨɨsi ɨja vaanhu avange. Ʉkuo avaanhu avuo vilikʉvavɨɨka kuuva vakami na kʉkʉvapumusia amaaka ifilʉndo fine. 7 Looli avaanhu vano vilikʉvavɨɨka kuuva vakami, lulikʉvavona ʉlʉkwegho lwango. Apuo pe nilikʉvavʉsia avaanhu ava kɨsina kyako mʉ ɨɨsi ɨjio, neke viise apa kʉkʉnyɨmɨka ʉne.’ 8 Pe ʉNgʉlʉve akavɨɨka ʉlʉfingo nʉ Abulahamu mʉlwa kʉdumula ɨngola ɨja kɨdɨɨmi, kuuti kɨɨve kye kɨvalɨlo kya lʉfingo ʉluo. Pepano ʉAbulahamu akampaapa ʉIsaka. Ye alɨ ni fighono lekelakwoni, akanʼdumula ɨngola ɨja kɨdɨɨmi. Ghwope ʉIsaka ye ampapile ʉYakovo, akanʼdumula ɨngola ɨja kɨdɨɨmi. Najʉ Yakovo ye apapile avadɨɨmi kɨjigho na vavɨlɨ vano ve vakʉʉlʉ viitu, akavavombela ʉluo.

9 “Avakʉʉlʉ viitu avuo valyale nɨ kɨvini kwa nnuuna ghwave ʉYosefu, vakamʉghʉsia akava nkami mʉ ɨɨsi ɨja Misili. Looli ʉNgʉlʉve akava palɨkɨmo nʉ mwene. 10 Akampoka mʉ mhumuko saake sooni, kange akampeela ʉvʉkagʉsi, vʉno vʉkampelela ʉFalao ʉntwa ʉghwa ɨɨsi ɨja Misili amʉghane. Pe ʉntwa ʉjuo akamʼbɨɨka kuuva mʼbaha ghwa ɨɨsi jaake nɨ nyumba jaake jooni ɨja kɨtwa.

11 “Pambele ɨnjala jɨkaghua mʉ ɨɨsi jooni ɨja Misili na mʉ ɨɨsi ɨja Kanaani, avaanhu vakatengʉla kupumuka kyongo. Voope avakʉʉlʉ viitu vakava vasila kyakʉlia. 12 ɄYakovo akapʉlɨka kuuti kʉ ɨɨsi ɨja Misili kwekɨlɨ ɨkyakʉlia. Pe akavasuungʼha kʉ ɨɨsi ɨjio avaswambe, vano ve vakʉʉlʉ viitu. Ʉluo lwale lwa kwanda kʉ veene kufika kʉ Misili. 13 Ye valʉtile ʉlwa vʉvɨlɨ, ʉYosefu akijoleka kʉ vakʉlʉ vaake, najʉ Falao akavamanya avakʉlʉ va Yosefu. 14 Pe ʉYosefu akasuungʼha avaanhu kʉkʉntoola ʉviise ʉYakovo na vanyalʉkolo vaake vooni. Avaanhu vooni avuo valyale fijigho lekelalʉbale na vahaano. 15 Pepano ʉYakovo akalʉta kʉ Misili. Ʉkuo kwe kʉno ʉmwene na vakʉʉlʉ viitu avange valyafwɨliile, 16 vakatwalua kʉ lɨkaaja lyave ɨlya Shekemu, na kusyɨlua mʉ mbiipa jɨla jɨno ʉAbulahamu alyaghʉlile kʉ vaana va Hamoli.

17 “Ʉnsiki ye ghʉlɨ piipi ghʉno ʉNgʉlʉve alyataviike kuvomba sino alyamʉlaghile ʉAbulahamu, avakʉʉlʉ viitu kʉ Misili vakava vifikwongelela kuuva vinga fiijo. 18 Pambele mʉ ɨɨsi ɨjio ʉntwa ʉjʉnge jʉno naakakagwile kɨmonga vwɨmɨla ʉYosefu, akatema. 19 Ʉntwa ʉjuo alyale nɨ giila kʉ vakʉʉlʉ viitu, kange akavapumusyagha na kʉkʉvʉmɨlɨsia kutaagha avaana vaave avafyele kuuti vafue.

20 “Ʉnsiki ʉghuo ghwe ghʉno ʉMoose alyapapilue, alyale mwana nnono fiijo pamaaso gha Ngʉlʉve. Avapaafi vaake vakansʉnga mʉ nyumba ameesi ghatatu. 21 Pambele vakamfisa kʉnji. Ʉmwalɨve ghwa Falao akamwagha, akantoola na kʉkʉnsʉnga hwene mwanaake. 22 ɄMoose akavʉlanɨsɨvua ʉvʉkagʉsi vwoni ʉvwa Vamisili, akava muunhu nya ngʉfu kujova vʉnofu na kuvomba.

23 “Ye alɨ na maaka fijigho fine, akalamʉla mʉ mwojo ghwake kulʉta kʉkʉvalola avanyalʉkolo vaake aVaisilaeli. 24 Ʉkuo akamwagha ʉMʉisilaeli jʉmonga itovua fiijo nʉ Mʉmisili, akantanga ʉMʉisilaeli jʉla, akavangɨla mʉlwa kʉmʼbuda ʉMʉmisili jʉla. 25 ɄMoose akasaghagha kuuti avanyalʉkolo vaake aVaisilaeli vikʉlʉtangʼhania kuuti, ʉNgʉlʉve ansungʼhile ʉmwene kʉkʉvapoka, neke aveene navakalʉtangʼhinie ʉluo.

26 “Ɨkɨghono ɨkya vʉvɨlɨ, akavavona aVaisilaeli vavɨlɨ vilua, akalondagha kʉkʉvasambania, akavavʉʉla akati, ‘Ʉmue mʉlɨ lʉkolo, kɨki mulemasania?’ 27 Neke jʉno alyale ɨkʉntova ʉnnine, akankungʼilisia ʉMoose na kʉkʉmʼbʉʉla kuuti, ‘Ghwe veeni jʉno akʉvɨkile ʉve kuuva mʉlongosi na kuuva mhɨghi ghwitu? 28 Ghulonda pikʉmbuda ndavʉle ghwamʼbuda ʉMʉmisili jʉla pamihe?’ 29 ɄMoose ye apʉliike amasio aghuo akakɨmbɨla, akalʉta kʉ ɨɨsi ɨja Midiani. Ʉkuo akava mpooma, akapaapa avaana vavɨlɨ.

30 “Amaaka fijigho fine ye ghakilile, ʉMoose alyale kʉ lɨhaka piipi nɨ kɨdunda ɨkya Sinai. Pe ʉnyamhola ghwa Mʉtwa ʉNgʉlʉve akamʼbonekela mʉ kɨhanji, kɨno kɨkava kiviika. 31 Ye alʉvwene ʉluo, akadegha kyongo, pe akaveela kuuti alole vʉnono. Apuo akapʉlɨka ɨlɨsio lya Mʉtwa ʉNgʉlʉve liiti, 32 ‘Ʉne neene Ngʉlʉve ghwa vakʉʉlʉ vaako: Ngʉlʉve ghwa Abulahamu, Ngʉlʉve ghwa Isaka, Ngʉlʉve ghwa Yakovo.’ Neke ʉMoose ye apʉliike amasio aghuo, akoghopa na kutetema, naakaghela kulola kange. 33 Pe ʉMʉtwa ʉNgʉlʉve akamʼbʉʉla akati, ‘Fuula ifilatu fyako, ʉlwakʉva apa pano ghwɨmile pɨmɨke. 34 Nɨsaghile imhumuko isa vaanhu vango mʉ ɨɨsi ɨja Misili, nɨpʉliike ʉlʉngʼuulo lwave, nisile kʉkʉvapoka mʉ vʉkami. Lɨno, nɨkʉkʉsuungʼha ʉlʉte ʉkuo.’ ”

35 ɄSitefani akava ifijova iiti, “ɄMoose ʉjuo ghwe mwene avakʉʉlʉ viitu valyankanile vakati, ‘Ghwe veeni jʉno akʉvɨkile ʉve kuuva mʉlongosi na kuuva mhɨghi ghwitu?’ Ʉjuo ghwe mwene ʉNgʉlʉve alyansungʼhile kuuti aave mʼbaha na kuuva mpoki ghwave. Alyansungʼhile kʉ sɨla ja nyamhola jʉno akihʉfia pa kɨhanji kɨla. 36 Ʉjuo ghwe alyavalongwisie avakʉʉlʉ viitu vahʉme mʉ ɨɨsi ɨja Misili. Alyavalongwisie vwɨmɨla kuvomba ifidegho ni fivalɨlo mʉ ɨɨsi ɨja Misili, na mʉ nyanja ɨja Shamu, na kʉ lʉkʉve amaaka fijigho fine.

37 “ɄMoose ʉjuo ghwe mwene alyavavʉlile aVaisilaeli kuuti, ‘ɄNgʉlʉve ilikʉvasalʉlɨla ʉmʼbɨli, kuhʉma nkate mʉ kɨsina kiinu, ndavʉle akasalwile ʉne.’ 38 Ʉjuo ghwe mwene alyale nɨ lɨpʉgha ɨlya vakʉʉlʉ viitu kʉ lʉkʉve, ghwe mwene akajova nʉ nyamhola kʉ kɨdunda ɨkya Sinai, akapelua amasio amapela vwʉmi kuhʉma kwa Ngʉlʉve, kuuti atʉpeele ʉsue.

39 “Neke avakʉʉlʉ viitu, navakalondagha kʉkʉmpʉlɨkɨsia ʉMoose, vakansitile, neke mʉ moojo ghaave vakasyʉkwagha kugomoka kʉ Misili. 40 ɄMoose ye adɨlile pigomoka kuhʉma kʉ kɨdunda, vakamʼbʉʉla ʉAloni vakati, ‘Ʉtʉtendele amangʉlʉve ghano ghikʉtʉlongosyagha, ʉlwakʉva ʉMoose jʉno atʉlongwisie kuhʉma kʉ ɨɨsi ɨja Misili, natukagʉla kɨno kɨmwaghile ʉkuo.’ 41 Ʉnsiki ʉghuo vakatenda ɨkɨhwani ɨkya ngwada. Pe vakatengʉla kutekela kʉ kɨhwani kɨla, vakɨmba na kuseeja kʉkʉkyɨmɨka ɨkɨɨnu kɨno vatendile na mavoko ghaave! 42 Ʉluo lʉkankalasia ʉNgʉlʉve, akavaleka vifunyaghe kʉ nhondue, kʉ lɨjʉva nʉ mwesi ndavʉle lɨlembilue mʉ kɨtabu ɨkya vavɨli kuuti,

‘Ʉmue mwe Vaisilaeli, ye mʉlɨ kʉ lʉkʉve amaaka fijigho fine,

pano mwahɨnjagha ifidɨmua fiinu kutekela,

mwanyɨmɨkagha ʉne? Jeeje!

43 Mwapɨndagha ɨlɨheema ɨlya ngʉlʉve ghwinu ʉMoloki,

nakɨ kɨhwani ɨkya nhondue ɨja ngʉlʉve ghwinu ʉLefani.

Mʉkatendile ifihwani ifio, kuuti mufunyaghe kʉ fyene.

Lɨno, nɨkʉvatwala kʉ vʉkami kʉ ɨɨsi ɨja kʉ vʉtali

kukila ɨlɨkaaja ɨlya Babeli.’ ”

44 ɄSitefani akajova kange akati, “Avakʉʉlʉ viitu ye valɨ kʉ lʉkʉve kʉla, valyale nɨ lɨheema lɨno lɨkahʉfyagha kuuti ʉNgʉlʉve alɨ palɨkɨmo na veene. Ɨlɨheema ɨlio valyatendile ndavʉle ʉNgʉlʉve alyamʉlaghiile ʉMoose, kulɨngʼhana nɨ kɨhwani kɨno akamhʉfisie. 45 Pambele avakʉʉlʉ viitu vano vakalongosivwagha nʉ Yoshua, valyʉpiile ɨlɨheema ɨlio kuhʉma kʉ vapaafi vaave, kuhanga vikuunya ɨɨsi jɨno ʉNgʉlʉve alyavadagile avaanhu ava fisina ifingi, kuuti jɨɨve jaave. Ɨlɨheema ɨlio lɨkajigha mʉ ɨɨsi ɨjio kuhanga kufika ʉnsiki ʉghwa ntwa ʉDavɨdi. 46 ɄDavɨdi ʉjuo alyavombile sino ʉNgʉlʉve ikeela, akasʉʉma akati, ‘Ghwe Ngʉlʉve ghwa Yakovo, nɨkʉkʉsʉʉma nɨkʉjengele ɨnyumba.’ 47 Neke ʉmwanaake ʉSolomoni ghwe mwene akanʼjengela ʉNgʉlʉve ɨnyumba ɨjio.

48 “Neke lɨno ʉNgʉlʉve ʉMʼbaha ghwa fyoni, naikukala mʉ nyumba sino sijengilue na vaanhu, ndavʉle ʉmʼbɨli vʉle alyajovile kuuti,

49 ‘ɄMʉtwa ʉNgʉlʉve iiti,

“Kʉkyanya kye kɨtengo kyango ɨkya Vʉtwa,

pa ɨɨsi pe pa kʉvɨɨka amaghʉlʉ ghango.

Ndepoonu mʉkʉnjengela ɨnyumba jɨno jɨlɨ ndaani?

Ndepoonu mutendanɨsia ndaani apa kʉpʉʉma ʉne?

50 Ifio fyoni nanɨpelile jʉʉne?” ’ ”

51 ɄSitefani akava ifijova iiti, “Ʉmue mwe vasiiti kukwɨtɨka! Mwe vano namʉkʉnkʉnda ʉNgʉlʉve nambe kʉkʉmpʉlɨkɨsia. Ifighono fyoni mukaana ʉMhepo ʉMwɨmɨke ndavʉle vakavombagha avapaafi viinu. 52 Asi, ndepoonu ghwe mʼbɨli alɨku jʉno avakʉʉlʉ viinu navalyampumwisie? Lolagha, vakavabudagha na vavɨli vano vakavɨlagha kukwisa kwa Kɨlɨsite, jʉno Ghwa Kyangʼhaani. ɄKɨlɨsite ʉjuo, ghwe jʉno ʉmue mʉmwohiile na kʉkʉmʼbuda. 53 Avanyamhola vakavaletiile ʉmue indaghɨlo kuhʉma kwa Ngʉlʉve, neke mʉkasitile kʉkʉsivɨngɨlɨla.”

ɄSitefani ibudua

54 Avalongosi vala ava Vayahudi ye vapʉliike amasio aghuo, vakakalala kyongo, vakamwʉmanɨla. 55 Neke ʉSitefani akava ilongosivua nʉ Mhepo ʉMwɨmɨke, akalola kʉkyanya, akavwagha ʉvʉvaha vwa Ngʉlʉve, nʉ Yesu ɨmile ʉlʉbale ʉlwa kʉndio ʉlwa Ngʉlʉve. 56 Pe akajova akati, “Lolagha, nɨkʉvwagha ʉvʉlanga vʉdindwike, najʉ Mwana ghwa Muunhu ɨmile ʉlʉbale ʉlwa kʉndio ʉlwa Ngʉlʉve.”

57 Pe avaanhu vooni pa vʉhɨghi pala navakalondagha kʉkʉmpʉlɨkɨsia, vakadinda imbulughutu saave kʉmo vikwova, vooni vakamwalʉkɨla. 58 Vakamhʉmia mʉ lɨkaaja lɨla. Ʉkuo vakatengʉla kʉkʉntova na mavue. Avaanhu vano valyale volesi kʉkʉmhɨgha ʉSitefani vakafuula amakooti ghaave na kʉkʉmpeela ʉnsoleka jʉmonga kuuti alolelelaghe. Ʉnsoleka ʉjuo akatambʉlwagha Savʉli. 59 ɄSitefani ye itovua na mavue, akifuunya akati, “Ghwe Yesu Mʉtwa, ghwʉpɨle ʉmwojo ghwango.” 60 Pe akafughama, akalɨla fiijo akati, “Ghwe Mʉtwa, nʉngavahɨghaghe vwɨmɨla ʉvʉhosi ʉvʉ vʉno vavombile.” Ye ajovile amasio aghuo, akafua. ɄSavʉli alyale ʉmo mʉ vano valyakeliile kubudua kwa Sitefani.