Kusalʉlua avatangɨli lekelalʉbale
6
Ifighono fila avavɨngɨlɨli va Yesu valyale vifikwongelela.
Mʉ vavɨngɨlɨli avuo mwevalyale aVayahudi vano vakajovagha ɨnjovele ɨja Kɨyunaani,
na vano vakajovagha ɨnjovele jaave ɨja Kɨebulania.
Lɨno,
vano vakajovagha ɨKɨyunaani vakangʼulagha,
ʉlwakʉva avafwɨle vaave navakapelwagha jaatu ɨkyakʉlia.
2 Avasungʼhua vala kɨjigho na vavɨlɨ vakakongʼhania ɨkɨpʉgha ɨkya vavɨngɨlɨli,
vakavavʉʉla vakati,
“Nalʉnoghiile ʉsue kuvʉhɨɨla kupʉlɨsia ɨlɨsio lya Ngʉlʉve,
neke tʉvombaghe ɨmbombo ɨja kʉvaghavɨla avaanhu ifyakʉlia.
3 Lɨno vanyalʉkolo viitu,
kuhʉma mʉlyʉmue mʉsalʉle avaanhu lekelalʉbale,
vano valɨ nʉ lʉveelo ʉlʉnono,
kange vilongosivua nʉ Mhepo ʉMwɨmɨke.
Avaanhu avuo ve tʉvapeele ɨmbombo ɨja kʉghava ɨkyakʉlia,
4 neke ʉsue ʉnsiki ghwoni tʉvombaghe ɨmbombo ɨja kʉnsʉʉma ʉNgʉlʉve na kupʉlɨsia ɨlɨsio lyake.”
5 Avaanhu va kɨpʉgha kɨla ye vapʉliike amasio aghuo,
ghakavapelela vooni kuuva nʉ lʉkeelo.
Pe vakansalʉla ʉSitefani,
ʉmuunhu jʉno akamwɨtɨkagha ʉNgʉlʉve kɨsila nganighani,
kange akalongosivwagha nʉ Mhepo ʉMwɨmɨke.
Vakansalʉla nʉ Filipo,
nʉ Polokolo,
nʉ Nikanoli,
nʉ Timoni,
nʉ Palimena nʉ Nikolao ʉmhʉma kʉ Antiokia jʉno naMʉyahudi,
neke ʉlʉtasi akavɨngɨlɨlagha ʉlwɨtɨko ʉlwa Kɨyahudi.
6 Pepano avakɨnhaata avuo lekelalʉbale vakavɨkua pamaaso gha vasungʼhua,
pe avasungʼhua vakavasʉmɨla na kuvɨɨka amavoko ghaave pa veene kʉkʉvɨmɨka mʉ mbombo.
7 Ɨlɨsio lya Ngʉlʉve lɨkava lifikwɨla imbale ni mbale,
najɨ mbalɨlo ɨja vavɨngɨlɨli mʉ Yelusalemu jɨkafikwongelelagha,
nava vatekesi vinga vakakʉnda kʉkʉmwɨtɨka ʉYesu.
ɄSitefani ikolua
8 ɄNgʉlʉve akansʉngʉkɨlagha kyongo ʉSitefani na kʉkʉmpeela ingʉfu nyinga.
Mʉ ʉluo akavombagha ifidegho ni fivalɨlo finga kʉ vaanhu.
9 Neke aVayahudi vamonga vakatengʉla kukanɨngʼhana nʉ Sitefani.
Avaanhu avuo valyale va kɨpʉgha kɨno kikifunyagha mʉ sinagogi,a
jɨno jɨkatambʉlwagha Ja Vavʉke.
Avaanhu ava valyahʉmile kʉ Kileene na kʉ Alekisandilia,
avange valyahʉmile kʉ Kilikia na kʉ Asia.
10 Lɨno,
ʉlwakʉva ʉSitefani alyale nʉ vʉkagʉsi,
kange ʉMhepo ʉMwɨmɨke akamʉlongosyagha kujova,
akavatola.
11 Pe aVayahudi vala vakavafunda avaanhu vamonga,
vajove kuuti vampʉliike ʉSitefani ijova amasio agha kʉmʉligha kyongo ʉMoose nʉ Ngʉlʉve.
12 Amasio aghuo ghakavapelela avaanhu,
na vagojo na vavʉlanɨsi va ndaghɨlob vakalale.
Pe vakamʉlʉtɨla ʉSitefani,
vakankola,
vakantwala pa vʉhɨghi,
pa kɨpʉgha ɨkya valongosi va Vayahudi.
13 Neke vakatwalua avolesi va vʉdesi.
Avolesi avuo vakajova vakati,
“Ʉmuunhu ʉjʉ jaatu ijova fivi vwɨmɨla ɨnyumba ɨnyɨmɨke ɨja Ngʉlʉve ni ndaghɨlo sa Moose.
14 Ʉlwakʉva tʉkampʉliike ijova kuuti,
ʉYesu ʉMʉnasaleti ilimemʉla ɨnyumba ɨnyɨmɨke ɨja Ngʉlʉve,
na kukwandʉla indaghɨlo sino tʉlyapelilue nʉ Moose.”
15 Avaanhu vooni vano valyale pa vʉhɨghi pala vakamʉlʉngʉvalɨla ʉSitefani,
vakavona kʉ maaso kwa mwene ivalatɨka hwene nyamhola.