ɄPeteli ɨkʉnsosia ʉmʉlema amaghʉlʉ
3
Ɨkɨghono kɨmonga,
akavalɨlo aka budikalʉbale pamwisi,
ʉnsiki ghʉno ghwale ghwa kufuunya,
ʉPeteli nʉ Yohani vakava vilʉta mʉ nyumba ɨnyɨmɨke ɨja kufunyila.
2 Neke kwealyale ʉmuunhu jʉmonga jʉno alyale mʉlema amaghʉlʉ kuhʉma iholua.
Jaatu avaanhu vakampɨndagha ʉmuunhu ʉjuo na kʉkʉmʼbɨɨka piipi nʉ mʉlyango ghwa kwingilila mʉ nyumba ɨnyɨmɨke ɨja kufunyila.
Ʉmʉlyango ʉghuo ghʉkatambʉlwagha Mʉlyango Nnono.
Vakamʼbɨkagha apuo kuuti asʉmaghe ifiinu kʉ vaanhu vano vikwingila mula.
3 Ʉmuunhu ʉjuo ye amwaghile ʉPeteli nʉ Yohani vikwingila mʉ nyumba ɨnyɨmɨke ɨja kufunyila,
akasʉʉma vampeele indalama.
4 ɄPeteli nʉ Yohani vakamʉlʉngʉvalɨla,
pe ʉPeteli akamʼbʉʉla akati,
“Ʉtʉlole ʉsue!”
5 Pepano ʉmuunhu jʉla akavalola,
kʉmo ihʉvɨɨla kuuti itapipelua kɨmonga na veene.
6 Neke ʉPeteli akamʼbʉʉla akati,
“Ʉne nɨlɨ nsila ndalama,a
looli kɨno nɨlɨ nakyo kye kɨno nɨkʉkʉpeela.
Mʉ lɨtavua lya Yesu Kɨlɨsite ʉMʉnasaleti,
ɨma ʉghendaghe!”
7 Pe akankola ʉlʉvoko ʉlwa ndio,
akamwɨmia.
Pala pala isajo ni fifundo fya maghʉlʉ gha muunhu jʉla fikava ni ngʉfu.
8 Akakima,
akatengʉla kughendaghenda.
Pe akingila mʉ nyumba ɨnyɨmɨke ɨja kufunyila palɨkɨmo nʉ Peteli nʉ Yohani,
kʉmo ighenda na kukima ɨkʉmʉghinia ʉNgʉlʉve.
9 Avaanhu vooni vakamwagha ighenda jʉjuo kʉmo ɨkʉmʉghinia ʉNgʉlʉve.
10 Vakankagʉla kuuti,
ghwe jʉno ikalagha na kusʉʉma ifiinu pa Mʉlyango ʉNnono ʉghwa nyumba ɨnyɨmɨke ɨja kufunyila.
Avaanhu vala vakava videgha kyongo kʉ sino sivombiike kwa muunhu jʉla.
ɄPeteli ikwoleka kuuti ʉYesu isosia
11 Ʉnsiki ʉghuo,
ʉmuunhu jʉla ye avakolile ɨkʉvavɨngɨlɨla ʉPeteli nʉ Yohani,
valɨ pa Lʉgono lwa Solomoni,b
mʉ nyumba ɨnyɨmɨke ɨja kufunyila,
avaanhu vooni vakaguuna vilʉta pa veene kʉmo videgha.
12 ɄPeteli ye asivwene isio,
akavavʉʉla avaanhu vala akati,
“Ʉmue mwe Vaisilaeli,
kɨki mudegha isi?
Kɨki mʉtʉlʉngʉvaliile?
Pamo mwiti ingʉfu siitu,
nambe ʉvʉgholofu vwitu pamaaso gha Ngʉlʉve fye fino fimpeleliile ʉmuunhu ʉjʉ kuuti aghendaghe!
13 ɄNgʉlʉve ghwa Abulahamu,
ʉNgʉlʉve ghwa Isaka,
ʉNgʉlʉve ghwa Yakovo,
amʉghinisie ʉmʼbombi ghwake ʉYesu vwɨmɨla kʉkʉnsosia ʉmuunhu ʉjʉ.
ɄYesu ʉjuo ghwe jʉno ʉmue mʉkantavwile kuuti abudue.
Kange,
ʉPilato ye alamwile kuuti amʉlekesie,
ʉmue mʉkakaana.
14 Mʉkasʉʉma amʉlekesie ʉmuunhu jʉno alyale mʼbudi,
na kukaana kuuti aleke kʉkʉmʉlekesia ʉYesu ʉMwɨmɨke kange Ghwa Kyangʼhaani.
15 Mʉkamʼbuda ʉmpela vwʉmi,
neke ʉNgʉlʉve akansyʉsia kuhʉma kʉ vafue,
na jʉsue tʉlɨ volesi va mhola ɨja kʉsyʉka kwa mwene.
16 Lɨno mʉkagʉlaghe vʉnofu kuuti,
ʉmuunhu ʉjʉ jʉno mʉkʉmʼbona apa kange mʉnkagwile,
asokile ɨnhamu jaake vwɨmɨla ʉlwɨtɨko mʉ lɨtavua lya Yesu.
Ʉlwɨtɨko mwa Kɨlɨsite lwe lʉno lʉmpeliile ʉmuunhu ʉjʉ kuuva nkafu,
ndavʉle mʉkʉmwagha mweni.
17 “Lɨno vanyalʉkolo vango,
nɨkagwile kuuti ʉmue na valongosi viinu mʉlyamʼbudile ʉYesu Kɨlɨsite,
ʉlwakʉva namʉlyakagwile sino muvomba.
18 Neke ʉNgʉlʉve avombile sino alyajovile kuhʉma mʼbʉkʉʉlʉ kukilila kʉ vavɨli vaake vooni,
kuuti ʉKɨlɨsite ghwake ilipumusivua.
19 Lɨno,
mʉlataghe na kʉkʉnsyetʉkɨla ʉNgʉlʉve,
neke avapyanɨle inyɨvi siinu.
20 Mʉ ʉluo ʉMʉtwa ʉNgʉlʉve ɨkʉvapeela amasiki agha kʉtengaana,
na kʉkʉvaletela kange ʉKɨlɨsite.
ɄKɨlɨsite ʉjuo ghwe Yesu jʉno alyansalwile pihʉma mʼbʉkʉʉlʉ kʉkʉvapoka na kʉkʉvalongosia ʉmue.
21 ɄYesu ijigha kʉkyanya kuhanga kufika ʉnsiki ghʉno ʉNgʉlʉve ihambʉsia ifiinu fyoni fiive fipia,
ndavʉle alyajovile kuhʉma mʼbʉkʉʉlʉ kukilila kʉ vavɨli vaake avɨmɨke.
22 Fye nambe ʉMoose alyatiile,
‘ɄMʉtwa ʉNgʉlʉve ghwinu ilikʉvasalʉlɨla ʉmʼbɨli,
kuhʉma nkate mʉ kɨsina kiinu,
ndavʉle akasalwile ʉne.
Mʉpʉlɨkɨsyaghe sooni sino ʉmʼbɨli ghwake ʉjuo ɨkʉvavʉʉla.
23 Neke ʉmuunhu ghweni jʉno naɨkʉmpʉlɨkɨsia ʉmʼbɨli ʉjuo,
ʉNgʉlʉve ilikʉmʼbʉsia pakate pa vaanhu vaake na kʉkʉntipula lwoni.’c
24 Na vavɨli avange vooni kutengʉla ʉSamueli na vano valisile pambele,
voope valyapʉlisie vwɨmɨla sino sivombeka ifighono ifi.
25 “Sino ʉNgʉlʉve alyalaghile kukilila avavɨli,
siinu ʉmue.
Kange,
na jʉmue mukwʉpɨla ʉlʉfingod lʉno ʉNgʉlʉve alyamʼbʉlile ʉAbulahamue kuuti,
‘Vwɨmɨla ɨkɨsina kyako avaanhu vooni ava mʉ ɨɨsi vilifunyua.’f
26 Pepano ʉNgʉlʉve akansalʉla ʉmʼbombi ghwake ʉYesu,
akansuungʼha taasi kʉlyʉmue,
kuuti avafuunye mweni mʉlwa kʉvahʉmia mʉ vʉhosi vwinu.”