ɄPeteli nʉ Yohani vitwalua pa vʉhɨghi
4
ɄPeteli nʉ Yohani ye vifijova kʉ vaanhu vala,
ʉnsiki ghʉghuo vakiisa avatekesi,
aVasadukayi,a
palɨkɨmo nʉ mʼbaha ghwa vasikali avaloleleli va nyumba ɨnyɨmɨke ɨja kufunyila.
2 Avalongosi avuo vakiisa vakaliile,
ʉlwakʉva ʉPeteli nʉ Yohani valyale vivʉlanɨsia na kupʉlɨsia avaanhu kuuti ʉYesu alyasyʉkile,
neke vwɨmɨla kusyʉka kwa mwene,
avafue vilisyʉka.
3 Pe vakankola ʉPeteli nʉ Yohani.
Neke ʉlwakʉva jɨlyale vwilile,
vakavadindila mʉ ndinde kuhanga kufika palwakɨlo.
4 Neke vinga mʉ lɨpʉgha lɨla,
vano valyapʉliike imbʉlanɨsio sa Peteli nʉ Yohani,
vakamwɨtɨka ʉNgʉlʉve.
Avaanhu vano valyɨtiike,
avakɨnhaata veene valyale imbilima ihaano ndɨɨkɨ.
5 Ye kʉkiile,
avatekesi,
avagojo na vavʉlanɨsi va ndaghɨlob vakakongʼhaana pa Yelusalemu.
6 Mʉ valongosi avuo,
mwealyale ʉHanasi ʉntekesi ʉmʼbaha,
palɨkɨmo nʉ Kayafa,
nʉ Yohani ʉjʉnge,
ʉAlekisanda,
na vanyalʉkolo avange ava ntekesi ʉmʼbaha ʉHanasi.
7 Pe ʉPeteli nʉ Yohani,
vakaletua pavʉlongolo pa veene.
Pepano avalongosi vala vakavaposia vakati,
“Isio sino mʉvombile,
mʉvombile mʉ ngʉfu nyɨki na mʉ vʉtavʉlɨlua vwani?”
8 Pe ʉPeteli mʉ ngʉfu isa Mhepo ʉMwɨmɨke akavamʉla akati,
“Ʉmue mwe valongosi,
numue mwe vagojo!
9 Nave ʉmʉsyʉghʉ mʉkʉtʉposia ʉsue vwɨmɨla inofu sino avombilue ʉmuunhu ʉjʉ jʉno alyale mʉlema na vʉle asokile,
10 lɨno lʉkagʉlɨke kʉlyʉmue mweni palɨkɨmo na Vaisilaeli avange vooni kuuti,
ʉmuunhu ʉjʉ,
jʉno ɨmile pamaaso ghiinu,
asokile vwɨmɨla ingʉfu sa Yesu Kɨlɨsite ʉMʉnasaleti.
ɄYesu ʉjuo ghwe jʉno mʉkamʼbudile pa kɨkovekano,
neke ʉNgʉlʉve akansyʉsia kuhʉma kʉ vafue.
11 ɄYesu ʉjuo ghwe jʉno aMalembe aMɨmɨke ghalyalembilue vwɨmɨla ʉmwene kuuti,
‘Ɨlɨvue lɨno ʉmue mwe vajengi mʉlyalɨkanile,
lye lɨvue ɨlɨvaha ɨlya pa nguto.’cd
12 “Kwekʉti nakwale ʉjʉnge mʉ ɨɨsi muno,
jʉno anoghiile kʉkʉtʉpoka,
looli jʉ Yesu mwene.
Ʉjuo ghwe jʉno ʉNgʉlʉve ansungʼhile kʉkʉvapoka avaanhu.”
13 Avalongosi vala valyammanyile ʉPeteli nʉ Yohani kuuti navɨmbi,
kange vasila vʉkagʉsi.
Neke vakadegha kyongo vʉle vikwamʉla kɨsila vwoghofi.
Apuo vakakagʉla kuuti,
avaanhu ava vakavisagha lʉmo nʉ Yesu.
14 Neke avalongosi vala ye vikʉmwagha ʉmʉkɨnhaata jʉno asokile ɨmile palɨkɨmo nʉ Peteli nʉ Yohani,
vakakunua ɨkya kʉjova.
15 Pe vakamʼbʉʉla ʉPeteli nʉ Yohani nʉ muunhu jʉla kuuti vavʉʉke pa vʉhɨghi pala,
valʉte kʉnji.
Neke aveene avalongosi vakajigha viposania
16 viiti,
“Tʉsivombe kɨki avaanhu ava?
Lolagha,
avaanhu vooni vano vikukala mʉ Yelusalemu muno,
vakagwile kuuti,
avaanhu ava vavombile ɨkɨdegho ɨkɨkome,
na jʉsue natʉngaghele kukaana.
17 Lɨno,
tʉvoghofie valeke kupʉlɨsia kange imhola isa Yesu,
neke ɨmhola ɨjɨ ɨja kɨdegho,
jɨleke kupʉlɨkɨka kʉ vaanhu.”
18 Pepano avalongosi vala vakankemeela ʉPeteli nʉ Yohani,
vakavavʉʉla kuuti navangaghelaghe kujova nambe kuvʉlanɨsia mʉ lɨtavua lya Yesu.
19 Neke ʉPeteli nʉ Yohani vakamʉla vakati,
“Mʉlamʉle jʉmue,
nave lʉnoghiile pamaaso gha Ngʉlʉve kuuti,
tʉvakʉnde ʉmue tʉleke kʉkʉnkʉnda ʉNgʉlʉve.
20 Ʉlwakʉva ʉsue natʉngavʉhɨɨle kupʉlɨsia sino tʉsivwene na sino tʉpʉliike.”
21 Avalongosi vala vakakunua ɨsɨla ɨja kʉmhɨghɨla ʉPeteli nʉ Yohani,
pe vakavoghofia kuuti,
nave vigomokela kange kupʉlɨsia imhola sa Yesu vihɨghua.
Pe vakavalekesia valʉtaghe.
Valyakunilue kʉkʉvahɨgha,
ʉlwakʉva avaanhu vooni valyale vikʉmʉghinia kyongo ʉNgʉlʉve,
vwɨmɨla sino silyavombiike.
22 Ʉmuunhu ʉjuo jʉno vakansosisie alyale mʉlema amaghʉlʉ kuhʉma iholua.e
Ʉnsiki ʉghuo alyale na maaka kukila ifijigho fine.
Ʉlufuunyo lwa vɨtɨki
23 ɄPeteli nʉ Yohani ye valekesivue,
vakagomoka kʉ vɨtɨki avajanave,
vakoleka sooni sino vavʉlilue na vavaha va vatekesi na vagojo.
24 Avajanave avuo ye vapʉliike isio,
vooni vakansʉʉma ʉNgʉlʉve nʉ mwojo ghʉmo vakati,
“Ghwe Ntwa ghwa fyoni,
ʉve veeve ʉpelile ʉvʉlanga nɨ ɨɨsi,
nɨ nyanja,
ni fiinu fyoni fino mwefili ʉmuo.
25 Vwɨmɨla ʉMhepo ʉMwɨmɨke ʉve ʉlyajovile kukilila ʉnkʉʉlʉ ghwitu ʉDavɨdi,
ʉmʼbombi ghwako kuuti,
‘Kɨki avaanhu vano naVaisilaeli vikalala,
kange aVaisilaeli visaagha kuvomba isila lʉvʉmbʉlɨlo?
26 Avatwa va ɨɨsi na valongosi va vaanhu
vakongʼhanile palɨkɨmo,
kuuti vankaane ʉMʉtwa ʉNgʉlʉve
nʉ Kɨlɨsite ghwake jʉno ansalwile.’f
27 “Luvoneka pa vʉvalafu kuuti ʉntwa ʉHelodeg nʉ Pontio Pilatoh palɨkɨmo na Vaisilaeli na vano naVaisilaeli voope valyakongʼhanile mʉ lɨkaaja ɨlɨ,
kuuti vankaane ʉYesu ʉMʼbombi ghwako ʉMwɨmɨke,
jʉno ʉlyansalwile kuuti aave ghwe Kɨlɨsite.
28 Isio sino avaanhu avuo valyavombile,
se sino ʉve kuhʉma mʼbʉkʉʉlʉ ʉlyafumbilue kuuti sivombeke mʉ ngʉfu saako na mʉ vughane vwako.
29 Lɨno ʉve Mʉtwa Ngʉlʉve,
lola vʉle vikʉtwoghofia!
Ʉtʉtange,
ʉsue twe vavombi vaako,
tʉdalɨkɨle ɨlɨsio lyako kɨsila vwoghofi.
30 Ʉhʉfie ingʉfu saako kusosia avatamu,
ʉtʉtange kuuti tʉvombaghe ifidegho ni fivalɨlo fino fili papinga mʉ ngʉfu isa Yesu,
ʉmʼbombi ghwako ʉMwɨmɨke.”
31 Avaanhu avuo ye vamalile kʉkʉnsʉʉma ʉNgʉlʉve,
pano valyakongʼhanile pakasenyeneka.
Avaanhu vooni vakʉpɨla ʉMhepo ʉMwɨmɨke,
vakatengʉla kupʉlɨsia ɨlɨsio lya Ngʉlʉve kɨsila vwoghofi.
Ʉvʉhangɨlanɨsi vwa vɨtɨki
32 Avaanhu vooni vano valyamwɨtiike ʉYesu valyale nʉ mwojo ghʉmo,
nʉ vʉfumbue vʉmo.
Kange,
nakwealyale nambe jʉmo jʉno akatisagha ifiinu fino alɨ nafyo fyake mwene,
looli ifiinu fyoni vakahangɨlanɨlagha.
33 Avasungʼhua va Yesu vakolekagha kʉ ngʉfu sooni kusyʉka kwa Mʉtwa ʉYesu kuhʉma kʉ vafue.
ɄNgʉlʉve akava ɨkʉvafuunya avɨtɨki vooni.
34 Nakwealyale nambe jʉmo mʉ veene jʉno akaghɨlwagha kɨmonga,
ʉlwakʉva vano valyale na maghʉnda nambe inyumba,
vakaghʉsyagha.
Indalama sino vakavile,
35 vakavapelagha avasungʼhua va Yesu,
pe avasungʼhua vakavaghavɨlagha avɨtɨki kulɨngʼhana nʉ vʉfumbue vwa muunhu.