ɄYoona ikʉnda ʉlʉlaghɨlo lwa Mʉtwa ʉNgʉlʉve
3
ɄMʉtwa ʉNgʉlʉve akamʼbʉʉla ʉYoona ʉlwa vʉvɨlɨ akati, 2 “Yoona, vʉʉka ʉlʉte kʉ lɨkaaja lɨla ɨlɨvaha ɨlya Ninaawi, ʉvapavɨle ndavʉle nɨkakʉlaghiile.” 3 Pepano ʉYoona akavʉʉka ilʉta kʉ Ninaawi ndavʉle avʉlilue nʉ Mʉtwa ʉNgʉlʉve. Ɨlɨkaaja ɨlio lɨlyale lɨvaha lya lʉghendo ʉlwa fighono fitatu.a 4 ɄYoona ye aghendile ʉlʉghendo ʉlwa kɨghono kɨmo mʉ lɨkaaja ɨlya Ninaawi, akatengʉla kupʉlɨsia akati, “Fisighiile ifighono fijigho fine, ɨlɨkaaja ɨlya Ninaawi litipulua.”5 AVaninaawi ye vapʉliike ɨmhola ɨjio, vakamwɨtɨka ʉMʉtwa ʉNgʉlʉve, vakapʉlɨngʼhana kuuti vabʉhɨɨle kulia mʉlwa kufuunya, vooni avavaha na vadebe vafwale ifikutula kuhʉfia ʉlʉlaato lwave. 6 Ʉntwa ʉghwa lɨkaaja ɨlya Ninaawi ye apʉliike ɨmhola ɨjɨ, akavʉʉka pa kɨtengo kyake ɨkya kɨtwa, akafuula amenda agha kɨtwa, akafwala ifikutula, pe akikala pa lɨpembo kuhʉfia ʉlʉlaato lwake. 7 Pepano ʉntwa akasuungʼha ɨnjanga mʉ Ninaawi kuuti, “Ʉne ne ntwa na vanjagɨla vango tulaghɨla kuuti, ʉmuunhu ghweni nangalisaghe nambe kunyua kɨmonga, nafi fidɨmua fyave nafingalisaghe nambe kunyua amalenga. 8 Avaanhu vooni vafwale ifikutula na kufwasia ifidɨmua fyave. Kange nʉjʉnge ifunyaghe nʉ mwojo ʉnya lʉlaato kwa Ngʉlʉve, apele na kʉkʉsileka inyɨvi saake. 9 Pamo ʉNgʉlʉve alatʉsaghɨla na pikwisia ɨngʼhalaasi jaake, neke ʉsue tʉkuluke.”
10 ɄNgʉlʉve akalwagha ʉlʉlaato lwa vaanhu vala pano vasilekile inyɨvi saave, pepano akisia ɨngʼhalaasi jaake akavasaghɨla, nakavatipula.