Ʉlufuunyo lwa Yoona
“Vwɨmɨla ʉlʉpumuko lwango,
nɨkakʉlɨlɨla, ʉve ʉMʉtwa ʉNgʉlʉve ʉkanyɨtɨkɨla.
Ye nɨlɨ mʉ lʉtalamu ʉlwa kufua,
nɨkasʉʉma ʉlʉtango ʉkamhʉlɨka.
3 Pano ʉkanhaghile mʉ kyogho ɨkɨtali ɨkya nyanja,
amalenga ghakamemile imbale sooni,
amavɨngo ghakakilagha pakyanya palyʉne.
4 Nasaghagha kuuti ʉnhaghile lwoni,
nɨleke kʉkʉjaagha kange ɨnyumba jaako ɨnyɨmɨke.
5 Amalenga ghakasyʉngʉtiile ʉne mʉ kyogho ɨkɨtali,
ifyogho fikasyʉngʉtiile ʉne imbale sooni,
amasoli gha mʉ nyanja ghakaniengeliile ʉne kʉ mutu.
6 Nalikile paasi mʉ nyanja pano fivʉmbʉkiile ifidunda,
nɨlyale hwene nɨdindilue mʉ ndinde ɨja jaatu kʉvʉlʉngʉ.
Neke ʉve ghwe Mʉtwa Ngʉlʉve, Ngʉlʉve ghwango,
ʉhʉmisie ʉne kuhʉma kʉvʉfue nɨjiighe mwʉmi.
7 Ye ghunoghanogha ʉmwojo nɨkakʉkʉmbʉka ʉve Mʉtwa Ngʉlʉve,
ʉlufuunyo lwango lʉkakʉfikila ye ʉlɨ mʉ nyumba jaako ɨnyɨmɨke.
8 Avaanhu vano vikufuunya kʉ mangʉlʉve amasila lʉtangɨlo,
vikuvɨɨka patali nuuve, navivʉmbʉlɨla ʉlʉsʉngʉ lwako.
9 Neke ʉne nɨkʉkwɨmbɨlagha ʉlwɨmbo ʉlwa kʉkʉhongesia,
palɨkɨmo na kutavʉla ɨlɨtekelo.
Nivombagha sino nɨfingiine nuuve.
Ʉvʉpoki vuhʉma kwa Mʉtwa ʉNgʉlʉve.”
10 ɄMʉtwa ʉNgʉlʉve akajɨvʉʉla ɨsamaki kuuti jɨnsyetʉle ʉYoona, pe jɨkansyetʉla kʉnji kʉ nyanja.