YOONA
ɄYoona ɨkʉnʼdyegha ʉMʉtwa ʉNgʉlʉve
1
Ɨkɨghono kɨmonga ʉMʉtwa ʉNgʉlʉve akamʼbʉʉla Yoona ʉmwana ghwa Amitai akati, 2 “Yoona, vʉʉka ʉlʉte kʉ lɨkaaja lɨla ɨlɨvaha lɨno litambʉlua Ninaawi, ʉvapavɨle avaanhu vala, ʉlwakʉva nɨvwaghile ʉvʉhosi vwave.” 3 Neke ʉYoona ye apʉliike ɨmhola ɨjɨ naakakeela, akalamʉla kukɨmbɨlɨla kʉ lɨkaaja lɨno lɨkatambʉlwagha Talishishi, akaleka kuvomba ɨmbombo jɨno asungʼhilue nʉ Mʉtwa ʉNgʉlʉve. Akalʉta kʉ lɨkaaja lɨno lɨkatambʉlwagha Yopa, ʉkuo akajaagha ɨngalavaa jɨno jilʉta kʉ Talishishi. Pepano akahomba ɨnavʉli, akingila mʉ ngalava ilʉta kʉ lɨkaaja ɨlio palɨkɨmo na vange.Ʉlʉnjʉghanjʉgha mʉ nyanja vwɨmɨla ʉYoona
4 Ye valɨ mʉ nyanja, ʉMʉtwa ʉNgʉlʉve akasuungʼha ɨmhepo, kʉkava na mavɨngo amavaha ghano ghakaleeta ʉlʉnjʉghanjʉgha kʉ ngalava, jɨkava mʉlʉtalamu ʉlwa kʉnangɨka. 5 Avavombi ava mʉ ngalava vakoghopa, vakatengʉla pikufuunya nʉjʉnge kʉ mangʉlʉveb ghaake, vakataagha amasigho mʉ nyanja kuuti vakepʉsie ʉvʉsito mʉ ngalava. Ʉnsiki ʉghuo ʉYoona alyaghoneliile paasi mʉnkate mʉ ngalava. 6 Ʉmʼbaha ʉghwa mʉ ngalava akamʉlʉtɨla ʉYoona, akamposia akati, “Kɨki ʉve ghughona ʉnsiki ʉghʉ? Sisimuka ghufuunye kwa ngʉlʉve ghwako, pamo kyaɨkʉtʉsʉngʉkɨla tʉkuluke!”
7 Neke avavombi ava mʉ ngalava vakijovasyagha vakatisagha, “Tʉsodolele tʉnkagʉle jʉno ɨkʉtwambʉsia.” Vakansodolela ʉYoona. 8 Ye vansodoliile, vakamposia vakati, “Sivuo ʉtʉvʉʉle, kɨki ʉlʉtalamu ʉlʉ lʉtwaghile? Kange, ʉtʉvʉʉle ghuvomba ɨmbombo nyɨki? Ghuhʉma kʉʉghi? Ɨɨsi jɨlɨku? Kange ʉlɨ ghwa kɨsina kyani?” 9 Ʉmwene akavamʉla akati, “Ʉne nɨlɨ Mʉebulania, nɨkʉmwɨtɨka ʉMʉtwa ʉNgʉlʉve, ʉNgʉlʉve ʉghwa kʉkyanya jʉno apelile ɨɨsi nɨ nyanja.” 10 Akavavʉʉla kange akati, “Ʉne nɨnkɨmbiile ʉMʉtwa ʉNgʉlʉve.” Ye vapʉliike ʉluo, avaanhu vala lʉkavavona ʉlʉdwesi, vakajova vakati, “Kɨki ʉvombile ʉlʉ!” 11 Ye vavwene ɨnyanja jikwongelela pisambalʉka, vakamposia kange vakati, “Tʉkʉvombe kɨki neke ɨnyanja jɨlitame?” 12 ɄYoona akati, “Nɨlʉtangʼhinie kuuti ʉlʉtalamu ʉlʉ lʉvaghile vwɨmɨla ʉne, lɨno mʉnhaaghe mʉ nyanja apuo kyajilitama.”
13 Neke aveene vakafighesyagha kʉkʉjɨlʉngɨka ɨngalava mʉlʉbale mʉ nyanja, vakakunua, ʉlwakʉva ɨnyanja jɨkava jifisambalʉka. 14 Avavombi ava mʉ ngalava vakamʉlɨlɨla ʉMʉtwa ʉNgʉlʉve vakati, “Ghwe Mʉtwa, tʉkʉkʉsʉʉma ʉleke pikʉtʉtipula vwɨmɨla kufua kwa muunhu ʉjʉ, nambe nʉngatʉpelaghe ʉlʉtalamu nave ʉmuunhu ʉjʉ nsila nkole, ʉlwakʉva ʉve Mʉtwa ʉvombile mʉ vughane vwako.” 15 Pe vakankola ʉYoona, vakantosia mʉ nyanja, ɨnyanja jɨkalitama. 16 Ʉluo lʉkavapelela avaanhu vala kʉkʉmwoghopa kyongo ʉMʉtwa ʉNgʉlʉve, vakabuda ɨkɨdɨmua kɨɨve lɨtekelo kwa ʉMʉtwa ʉNgʉlʉve na kufinga kʉkʉmʼbombela.
17 ɄMʉtwa ʉNgʉlʉve akasuungʼha ɨsamaki ɨmbaha jɨno jɨkanʼgulubika ʉYoona. Ye jɨnʼgulubiike, akava mʉ lɨleme ɨlya samaki ifighono fitatu.