Yoona 4

Ɨlɨpyana lya Mʉtwa ʉNgʉlʉve lɨkʉnkalasia ʉYoona

Ɨlɨpyana lya Mʉtwa ʉNgʉlʉve kʉ Vaninaawi lɨkankalasia kyongo ʉYoona. 2 Pe akingʼulasia akati, “Mʉtwa, nase sino nasaghagha ye nɨlɨ kʉ kaaja kuuti kyaghuvomba? Lwe lʉno lwamhelela nangʉpe kukɨmbɨlɨla kʉ Talishishi. Nɨkakagwile kuuti ʉve Ngʉlʉve ʉlɨ nʉ lʉghano nʉ lʉsʉngʉ nʉ lugudo, ʉlɨ nkoola kange jaatu ʉlɨ nya lɨpyana. 3 Lɨno ghwe Mʉtwa ʉNgʉlʉve, nɨkʉkʉsʉʉma ʉvʉsie ʉvwʉmi vwango, kʉba ʉne nɨfue!” 4 ɄMʉtwa ʉNgʉlʉve akati, “Yoona, naʉnoghiile kukalala!”

5 ɄYoona akavʉʉka mʉ lɨkaaja lɨla, akalʉta ʉlʉbale ʉlwa kʉvʉdibulo, ʉkuo akajenga ɨkyeve, akikala pa lusulua ʉlwa kyeve, pe akatendelagha lʉno kyaluvoneka kʉ Ninaawi. 6 ɄMʉtwa ʉNgʉlʉve akakʉsia ʉmmela ghʉno ghʉkampeela ʉYoona ʉlusulua neke ʉlʉjʉva lʉleke kʉkʉmʼbalɨla. Ʉmmela ghʉla ghʉkampelela ʉYoona kuuva nʉ lʉkeelo ʉlʉkome. 7 Ɨkɨghono ɨkya vʉvɨlɨ ye kuhenga, ʉMʉtwa ʉNgʉlʉve akasuungʼha ɨlɨngʼonyo, lɨkadumula ʉmmela, ʉmmela ghʉkʉʉma. 8 Ɨlɨjʉva ye lɨtoghile, ʉNgʉlʉve akasuungʼha ɨmhepo kuhʉma kʉvʉdibulo ɨnya lɨfuke, nalʉ lʉjʉva lʉkannyaanya ʉYoona, pe akajetʉka ʉlwa kʉsilika. ɄYoona akati, “Kʉba kufua.”

9 ɄNgʉlʉve akamʼbʉʉla akati, “Yoona, naʉnoghiile kukalala vwɨmɨla ʉmmela ghʉno ghwʉmile!” ɄYoona akamwamʉla ʉNgʉlʉve akati, “Ʉne nɨnoghiile kukalala kuhanga kufua.” 10 ɄMʉtwa ʉNgʉlʉve akamʼbʉʉla akati, “Ʉve ghuhangajɨka nʉ mmela, naʉvombile ɨmbombo ɨja kʉmesia nambe kukʉsia. Ʉmmela ghwamela ɨkɨlo jɨmo, na kukwʉma ɨkɨlo jɨmo. 11 Ɨlɨkaaja ɨlɨ ɨlya Ninaawi lɨvaha, mwevale avaanhu kukila imbilima kɨlʉndo ni mbilima fijigho fivɨlɨ vano navasitangʼhinie inono ni mbiivi, kange mwefili nafi fidɨmua finga. Ʉne nanɨnoghiile kʉkʉlɨhangajɨkɨla ɨlɨkaaja ɨlɨvaha ɨlɨ?”