ɄYosefu ilʉvʉlania injosi isa ntwa ʉghwa kʉ Misili
41
Ye ghakilile amaaka ghavɨlɨ, ʉFalao akaghonela injosi: Ɨmile palʉbale pa kɨkogha ɨkya Naili. 2 Akasaagha ingʼombe inono, inenefu lekelalʉbale sihʉma kʉ kɨkogha, kʉmo silia ɨlɨsoli. 3 Pe sikahʉma ingʼombe isingi lekelalʉbale kʉ kɨkogha ɨkio, mbiivi sighandile kyongo, sikɨɨma palʉbale pa kɨkogha piipi ni ngʼombe inenefu sila. 4 Ingʼombe lekelalʉbale sino sighandile kange mbiivi, sikasilia ingʼombe sila inono, inenefu lekelalʉbale. Bahapuo ʉFalao akasisimuka.5 ɄFalao akaghona kange, akaghonela injosi isingi: Akaghaagha amasoojo lekelalʉbale manono, ghabomile fiijo, ghakomile mʉ mmela ghʉmo. 6 Pambele akaghaagha amasoojo aghange lekelalʉbale, masekele ghapʉpiile. 7 Amasoojo amasekele lekelalʉbale, ghakaghagulubika amasoojo amanono ghano ghabomile. ɄFalao ye asisimwike, akakagʉla kuuti aveele ighonela njosi.
8 Palwakɨlo ʉFalao akahangajɨka kyongo mʉ mwojo ghwake, akavakemeela avaghanga vooni ava mʉ ɨɨsi ɨja Misili na vakagʉsi vooni. Akavapangɨla injosi saake, neke nakwealyale nambe jʉmo jʉno akaghelile kulʉvʉlania injosi saake.
9 Pe ʉmʼbaha ʉghwa kʉlɨngʼhania ʉlʉhʉʉje akamʼbʉʉla ʉFalao akati, “Ʉmʉsyʉghʉ pe nɨkʉmbwike ʉvʉsovi vwango! 10 Ʉnsiki ghʉla ye ʉkaliile vwɨmɨla ʉsue twe vavombi vaako, ʉne nʉ ntelesi ʉmʼbaha ʉghwa makate, ʉkatʉdindiile mʉ nyumba ɨja mʼbaha ghwa vasikali avaloleleli. 11 Ɨkɨghono kɨmonga pakɨlo, tʉkaghoniile injosi, nʉjʉnge injosi saake nʉ mʉlʉvo ghwake. 12 Mʉ nyumba mula tʉkaale nʉ nsoleka jʉmonga ʉMʉebulania, jʉno alyale mʼbombi ghwa mʼbaha ghwa vasikali avaloleleli. Tʉkampangɨla injosi siitu, ʉmwene akalʉvʉlania injosi sila nʉjʉnge kulɨngʼhana ni njosi saake. 13 Sino akalʉvʉlinie vwɨmɨla injosi sila, lweli sikavombeka: Ʉne nɨkagomosivua mʉ mbombo jango, ʉntelesi ʉmʼbaha ʉghwa makate akapaghɨkua mʉ mpiki.”
ɄYosefu iletua kwa Falao
14 Pepano ʉFalao akalamʉla kuuti vamʉleete ʉYosefu, vakamhʉmia ngʼhaningʼhaani mʉ ndinde. Akakeeta ɨlɨnyele lyake na kukwandʉla amenda, pe akalʉta kwa Falao. 15 ɄFalao akamʼbʉʉla ʉYosefu akati, “Ʉne nɨghoniile injosi, neke nakwale ʉmuunhu jʉno aghelile kulʉvʉlania. Nɨpʉliike imhola saako, kuuti ʉve vangakʉpangɨle injosi, ghulʉvʉlania.” 16 ɄYosefu akamwamʉla ʉFalao akati, “Ʉne nɨlɨ nsila vʉkagʉsi ʉvuo, looli ʉNgʉlʉve ɨkʉkʉpeela ʉmʉlʉvo ʉghwa kyangʼhaani ʉghwa njosi isio.”
17 ɄFalao akamʼbʉʉla ʉYosefu akati, “Mʉ njosi sango, naghonela nɨmile palʉbale pa kɨkogha ɨkya Naili. 18 Nasaagha ingʼombe lekelalʉbale inono, kange nenefu, sihʉmile kʉ kɨkogha kʉmo silia ɨlɨsoli. 19 Pe kange nasaagha ingʼombe isingi lekelalʉbale, sino sighandile kange mbiivi, sighandile fiijo. Mʉ ɨɨsi jooni ɨja Misili nanɨghelile pikʉsaagha ingʼombe ingaafu ndavʉle isio. 20 Pe ingʼombe sila lekelalʉbale sino sighandile kange mbiivi, sikasilia ingʼombe lekelalʉbale inono, inenefu sila. 21 Neke nambe sikasiliile ingʼombe inenefu, ʉmuunhu ghweni naale ikagʉla kuuti ingaafu sila sisiliile ingʼombe inenefu, ʉlwakʉva sijiighe sighandile ndavʉle ʉlʉtasi. Apuo pe nasisimuka mʉ tʉlʉ.
22 “Pe naghonela injosi isingi: Naghaagha amasoojo lekelalʉbale manono, ghabomile fiijo, ghakomile mʉ mmela ghʉmo. 23 Bahapuo naghaagha amasoojo aghange lekelalʉbale, masekele ghapʉpiile. 24 Amasoojo amasekele ghala ghaghagulubika amasoojo amanono lekelalʉbale. Injosi isio navapangɨla avaghanga, neke nakwale jʉno aghela kulʉvʉlania.”
25 Pe ʉYosefu akamʼbʉʉla ʉFalao akati, “Injosi saako sooni se ivɨɨlɨ, ʉmʉlʉvo ghwake ghwe ghʉmo. ɄNgʉlʉve amhʉfisie ʉFalao sino ilonda pivomba ʉnsiki nʼdebe ghʉno ghukwisa. 26 Ingʼombe lekelalʉbale inono, inenefu, ghe maaka lekelalʉbale, amasoojo lekelalʉbale amanono, ghoope ghe maaka lekelalʉbale. Injosi isio silʉngɨka ɨkɨɨnu kɨmo. 27 Ingʼombe lekelalʉbale imbiivi sino sighandile, sino siisa pambele, na masoojo lekelalʉbale masekele ghapʉpiile, ghe maaka lekelalʉbale agha njala.
28 “Ghwe Falao, ndavʉle nɨjovile, ʉNgʉlʉve akʉhʉfisie sino ilonda pivomba ʉnsiki nʼdebe ghʉno ghukwisa. 29 Ghikwisa amaaka lekelalʉbale agha mota mʉ ɨɨsi jooni ɨja Misili. 30 Pambele ghilikwisa amaaka aghange lekelalʉbale agha njala ɨngʼhali. Neke avaanhu vilisyemua lwoni amaaka ghala agha mota. Ɨnjala ɨjio jilinangania ɨɨsi jooni. 31 Avaanhu navilikʉmbʉka nambe padebe ɨmota jɨla, ʉlwakʉva ɨnjala jɨno jilikwisa pambele jiliiva ngʼhali kyongo. 32 ɄNgʉlʉve akʉpeliile injosi isio kavɨlɨ kusimilisia ɨmhola ɨjio. Ɨkʉkʉhʉfia kuuti alamwile kuvomba ʉluo, kange ivomba ngʼhaningʼhaani.
33 “Ghwe ntwa, lɨno lʉnoghiile ʉlonde ʉmuunhu ʉnya lʉhala nʉ vʉkagʉsi, ʉmpeele ɨmbombo ɨja kwɨmɨlɨla ɨɨsi jooni ɨja Misili. 34 Ʉvasalʉle avɨmɨlɨli avange ava ɨɨsi, ʉvasuungʼhe vakongʼhanie ɨkɨghavo kɨmo mʉ fighavo fihaano ifya mpeto ghwoni mʉ ɨɨsi ɨja Misili, mʉ maaka lekelalʉbale agha mota. 35 Mʉ maaka ghooni agha mota, vakongʼhaniaghe ʉmpeto ʉghuo, ghʉvisaghe mʉ vʉtavʉlɨlua vwako. Vavutaghe kɨkavisaghe kyakʉlia mʉ fikaaja fyoni ifya ɨɨsi. 36 Ɨkyakʉlia ɨkio, kiiva kya kʉtanga pambele ɨɨsi ɨja Misili, amaaka lekelalʉbale agha njala ghano ghikwisa, kuuti ɨɨsi jɨleke kunangɨka.”
ɄYosefu ivɨkua kuuva mwɨmɨlɨli ghwa fyakʉlia
37 Amasio ghano akajovile ʉYosefu ghakamhovosia ʉFalao na vatangɨli vaake vooni. 38 Pe ʉFalao akavaposia avatangɨli vaake akati, “Ʉmuunhu ʉjʉ alɨ nʉ Mhepo ghwa Ngʉlʉve, ndepoonu tʉkʉmwagha kʉʉghi ʉmuunhu ʉjʉnge ndavʉle ʉjʉ?”
39 Pepano ʉFalao akamʼbʉʉla ʉYosefu akati, “Ʉlwakʉva ʉNgʉlʉve ghwe jʉno akʉhʉfisie isio sooni, nakwale ʉmuunhu ʉjʉnge ʉnya vʉkagʉsi nʉ lʉhala ndavʉle ʉve. 40 Ʉve ghukwɨmɨlɨlagha ɨnyumba jango ɨja kɨtwa, kange avaanhu vango vooni vikʉkʉpʉlɨkagha ʉve. Jʉʉne ne ntwa, neene niiva mʼbaha kʉlyʉve.”
41 ɄFalao akava ifikʉmʼbʉʉla iiti, “Lɨno, nɨkʉkʉvɨɨka ʉvisaghe mwɨmɨlɨli ghwa ɨɨsi jooni ɨja Misili.” 42 Pe akafuula mʉ kyove kyake ɨpete ɨnya kɨvalɨlo kyake, akamfwasia ʉYosefu. Akamfwasia na menda amanono agha ndalama nyinga, palɨkɨmo nʉ nkufu ʉghwa sahabu mʉ singo. 43 Akampandɨsia mʉ gaale jaake ɨja vʉvɨli ɨja falaasi,a avaanhu vakalongola kwa Yosefu vijegheela nʉ lʉkeelo viiti, “Ɨma mʉlʉbale mʉ sɨla! ɄYosefu akile!” Fye enendɨɨkɨ ʉFalao alyamʼbɨkile ʉYosefu aave mwɨmɨlɨli ghwa ɨɨsi jooni ɨja Misili.
44 ɄFalao akamʼbʉʉla ʉYosefu akati, “Ʉne neene ntwa! Nijova niiti, mʉ ɨɨsi jooni ɨjɨ ɨja Misili, ʉmuunhu ghweni naangavombaghe kɨmonga nave nʉmwɨtɨkɨsie kuuti avombe.” 45 Pe akampeela ʉYosefu ɨlɨtavua ɨlya Kɨmisili ɨlɨ Safenati-Panea. Akantolesia ʉAsenati, ʉmwalɨve ghwa Potifela, ʉntekesi ʉghwa lɨkaaja ɨlya Oni. ɄYosefu akatengʉla kughendela ɨɨsi jooni ɨja Misili.
46 ɄYosefu ye atengwile kukwɨmɨlɨla ɨmbombo ɨja Falao ʉntwa ghwa Misili, alyale na maaka fijigho fitatu. Akahʉma mʉ nyumba ɨja Falao, akava ilʉta kughendela na kukwɨmɨlɨla ɨɨsi jooni ɨja Misili. 47 Mʉ maaka lekelalʉbale agha mota, ifiinu mʉ Misili fikamotoka, fikava finga. 48 Mʉ maaka aghuo lekelalʉbale, ʉYosefu akava ikongʼhania ʉmpeto ghwoni na kuvuta mʉ fikaaja ifya ɨɨsi ɨja Misili. Kɨla kɨkaaja, akava ivuta ifiinu fino fikapetwagha mʉ maghʉnda ghano ghalɨ mʉ fikaaja ifio. 49 ɄYosefu akavuta mʉ fihenge ifiinu finga fiijo, fikava finga hwene lɨhanga ɨlya kʉ nyanja. Akavuta kuhanga pambele akavʉhɨɨla kuvala, ʉlwakʉva filyale finga kyongo.
50 Ye ghakyale kufika amaaka agha njala, ʉYosefu akapaapa avaana vavɨlɨ avadɨɨmi, mwa mʉkɨjʉʉva ʉAsenati ʉmwalɨve Potifela ʉntekesi mʉ lɨkaaja ɨlya Oni. 51 ɄYosefu akampeela ʉmwanaake ʉmʼbele ɨlɨtavua ɨlɨ Manase,b akati, “ɄNgʉlʉve amheleliile nɨsyemue imhumuko sango sooni na sino silyanyaghile mʉ nyumba ja nhaata ghwango.” 52 Ʉmwanaake ʉghwa vʉvɨlɨ, akampeela ɨlɨtavua ɨlɨ Efulaimu,c akati, “ɄNgʉlʉve amheliile avaana mʉ ɨɨsi ɨja lʉpumuko lwango.”
53 Amaaka lekelalʉbale agha mota mʉ ɨɨsi ɨja Misili ghakakila. 54 Ghakatengʉla amaaka lekelalʉbale agha njala, ndavʉle alyajovile ʉYosefu. Ɨɨsi isingi sooni sikava nɨ njala ɨmbaha, looli ɨɨsi jooni ɨja Misili jɨkava nɨ kyakʉlia. 55 Avaanhu mʉ Misili vakatengʉla kuuva nɨ njala, vakamʉlɨlɨla ʉFalao avapeele ɨkyakʉlia. ɄFalao akavavʉʉla aVamisili vooni akati, “Mʉlʉte kwa Yosefu, kɨno ɨkʉvavʉʉla, mʉvombaghe.”