ɄYosefu ilʉvʉlania injosi isa vakʉngua
40
Pambele, avavombi vavɨlɨ ava Falaoa vakamhoka ʉmʼbaha ghwave ʉFalao. Jʉmonga alyale mʼbaha ghwa kʉlɨngʼhania ʉlʉhʉʉje ʉlwa kʉnyua ʉFalao, ʉjʉnge alyale mʼbaha ghwa kʉteleka amakate agha kʉlia ʉFalao. 2 ɄFalao akavakalalɨla avavombi vaake avuo, 3 akavadindila mʉ ndinde mʉ nyumba ɨja mʼbaha ʉghwa vasikali avaloleleli muno akʉngilue ʉYosefu. 4 Ʉmʼbaha ghwa vasikali avaloleleli akansalʉla ʉYosefu kuuti avatengelelaghe. Voope vakava mʉ ndinde mula ʉnsiki nʼdebe.5 Ɨkɨghono kɨmonga pakɨlo, vooni ve vavɨɨlɨ, jʉno alyale mʼbaha ghwa kʉlɨngʼhania ʉlʉhʉʉje nʉ mʼbaha ghwa kʉteleka amakate gha Falao, vakaghonela injosi mʉ ndinde. Nʉjʉnge akaghonela injosi sino ʉmʉlʉvo ghwake naghʉlɨngʼhiine ni njosi sino aghoniile ʉjʉnge.
6 Palwakɨlo ʉYosefu ye ilʉta kʉ veene, avona vasukunile. 7 ɄYosefu akavaposia akati, “Kɨki ʉmʉsyʉghʉ muvoneka mʉsukuniile?” 8 Vakamwamʉla vakati, “Tʉghoniile injosi, neke napwale ʉghwa kʉlʉvʉlania injosi isio.” ɄYosefu akavavʉʉla akati, “Kulʉvʉlania injosi mbombo ja Ngʉlʉve. Mʉmbʉʉle sino mʉghoniile.”
9 Ʉmʼbaha ghwa kʉlɨngʼhania ʉlʉhʉʉje, akampangɨla ʉYosefu injosi saake akati, “Injosi sango, naghwagha ʉnsabibu pavʉlongolo palyʉne, 10 ghwava na mataafi ghatatu. Ʉnsiki ghʉghuo ghʉkatengʉla kulemba amatʉndʉ, ʉvʉlʉva vʉkavalalʉka, sikakoma isabibu imbesu. 11 Mʉ lʉvoko lwango nava nɨ kɨkombe ɨkya Falao. Nadonola isabibu sila, nahʉjɨla mʉ kɨkombe, pe nampeela ʉFalao.”
12 ɄYosefu akamʼbʉʉla ʉmʼbaha jʉla akati, “Ʉmʉlʉvo ghwa njosi saako ghwe ʉghʉ: Amataafi ghatatu fye fighono fitatu. 13 Mʉ fighono fitatu, ʉFalao ɨkʉkʉhʉmia mʉ ndinde, neke ɨkʉkʉgomosia mʉ mbombo jaako. Ghʉkʉmpelagha ʉFalao ʉlʉhʉʉje, ndavʉle ghwavombagha ʉlʉtasi. 14 Neke inongua saako siliiva silʉta vʉnofu, ʉngʼhʉmbʉkaghe. Nɨkʉkʉsʉʉma, ʉjovaghe inofu sango pamaaso gha Falao kuuti nɨhʉme mʉ ndinde muno. 15 Ʉne nɨlyatolilue kɨ ngʉfu kuhʉma mʉ ɨɨsi ɨja Vaebulania, nambe apa pa Misili nanɨvombile ʉlʉviivi lʉmonga ʉlwa kʉmhelela nɨdindilue mʉ ndinde.”
16 Ʉmʼbaha ʉghwa kʉteleka amakate ye avwene ʉmʉlʉvo ghwa njosi sino alʉvʉlinie ʉYosefu nnofu, akamʼbʉʉla ʉYosefu akati, “Na jʉʉne naghonela injosi: Nitwɨkile ihelo itatu isa makate. 17 Mʉ lʉhelo ʉlwa pakyanya, mwefyava ifyakʉlia ifya Falao fino fili papinga. Neke injuni saava silia ifyakʉlia ifio mʉ lʉhelo pa mutu ghwango.”
18 ɄYosefu akamʼbʉʉla akati, “Ʉmʉlʉvo ghwa njosi saako ghwe ʉghʉ: Ihelo itatu fye fighono fitatu. 19 Mʉ fighono fitatu ʉFalao ɨkʉkʉhʉmia mʉ ndinde, ɨkʉkʉpaghɨka mʉ mpiki na kudumula ʉmutu ghwako, injuni sikwisa kulia ʉmʼbɨlɨ ghwako.”
20 Ɨkɨghono ɨkya vʉtatu ye kɨfikile, kɨkava kɨghono kya kʉkʉmbʉka kuholua ʉFalao. ɄFalao akavalɨngʼhanɨkɨsia avavombi vaake vooni ɨkɨkulukulu. Akavahʉmia mʉ ndinde, ʉmʼbaha ʉghwa kʉlɨngʼhania ʉlʉhʉʉje palɨkɨmo nʉ mʼbaha ʉghwa kʉteleka amakate, akavaleeta pamaaso gha vatangɨli vaake. 21 Pe akanʼgomosia ʉmʼbaha ʉghwa kʉlɨngʼhania ʉlʉhʉʉje, mʉ mbombo jaake ɨja kʉmpeela ʉFalao ʉlʉhʉʉje. 22 Neke ʉmʼbaha ʉghwa kʉteleka amakate akampaghɨka mʉ mpiki, ndavʉle ʉYosefu vʉle alʉvʉlania injosi saake.
23 Palɨkɨmo nʉluo, ʉmʼbaha ʉghwa kʉlɨngʼhania ʉlʉhʉʉje, naakankʉmbʉka ʉYosefu, akansyemua.