ɄMʉtwa ɨkʉmfuunya ʉPotifa
39
AVaisimaeli vakafika nʉ Yosefu mʉ ɨɨsi ɨja Misili, vakamʉghʉsia kwa Mʉmisili jʉmonga, jʉno akatambʉlwagha Potifa. ɄPotifa alyale ʉmo mʉ vatangɨli va Falao, kange alyale mʼbaha ghwa vasikali avaloleleli va Falao.2 ɄMʉtwa ʉNgʉlʉve alyale palɨkɨmo nʉ Yosefu, akava ivomba ɨmbombo jaake vʉnofu. Akikalagha mʉ nyumba ɨja mʼbaha ghwake ʉPotifa ʉMʉmisili. 3 ɄPotifa akakagʉla kuuti ʉMʉtwa ʉNgʉlʉve alɨ palɨkɨmo nʉ Yosefu, kange ɨkʉntanga mʉ sooni sino ivomba. 4 ɄPotifa akankeela ʉYosefu, akamʼbɨɨka aave mwɨmɨlɨli ghwa nyumba jaake ni fiinu fyake fyoni. 5 Kuhʉma ʉPotifa ɨkʉmʼbɨɨka ʉYosefu kuuva mwɨmɨlɨli ghwa nyumba jaake ni fiinu fyake fyoni, ʉMʉtwa ʉNgʉlʉve akajɨfuunya ɨnyumba ja Potifa ʉMʉmisili vwɨmɨla ʉYosefu. Inyifuunyo sa Mʉtwa sikavoneka mʉ fiinu fyoni fino alyale nafyo, mʉ nyumba na mʉ mʉghʉnda. 6 Mʉ ʉluo, ʉPotifa akamʉlekela ʉYosefu ɨmɨlɨlaghe ifiinu fyake fyoni, apuo ʉmwene ʉPotifa naakasaghagha kange vwɨmɨla ifiinu fyake fyoni, ʉlwene akasaghagha ɨkyakʉlia kɨno ilonda kulia. ɄYosefu alyale muunhu nnono, akahovosyagha pa maaso.
ɄYosefu nʉ nʼdala ghwa Potifa
7 Ʉnsiki nʼdebe vʉvʉle ʉnʼdala ghwa Potifa akatengʉla kʉkʉnnoghelua ʉYosefu, akamʼbʉʉla akati, “Ghwise ʉghone nuune.”
8 Neke ʉYosefu akakaana, akamʼbʉʉla ʉmʉkɨjʉʉva jʉla akati, “Ʉmʼbaha ghwango naalɨ ni nganighani simonga nuune, vwɨmɨla kukwɨmɨlɨla ifiinu fyoni mʉ nyumba jaake. Fyoni fino alɨ nafyo andekiile nɨmɨlɨlaghe. 9 Mʉ nyumba muno, nakwale ʉmʼbaha kukila ʉne. Angʼhotoliile ifiinu fyoni, ʉlwene ʉve, ʉlwakʉva ʉlɨ nʼdala ghwake. Lɨno nitengʉla ndaani kuvomba imbombo imbiivi isio, nɨmhoke ʉNgʉlʉve?”
10 Ʉmʉkɨjʉʉva jʉla akava ifikʉnkofelesia ʉYosefu ifighono finga kuuti aghone naghwo, ʉYosefu naakamwɨtɨkagha nambe kuveela kwa mwene.
11 Ɨkɨghono kɨmonga, ʉYosefu akingila mʉnkate mʉ nyumba, kuvomba imbombo saake ndavʉle lwale lwiho lwake. Ʉnsiki ʉghuo napwealyale ʉmʼbombi nambe jʉmo mʉnkate ʉmuo. 12 Ʉnʼdala ghwa Potifa akankola ɨsopeka jaake, akamʼbʉʉla akati, “Ʉghone nuune!” Neke ʉYosefu akapukunyula, akajɨleka ɨsopeka mʉ mavoko ghaake, akakɨmbɨlɨla kʉnji.
13 Ʉmʉkɨjʉʉva jʉla ye avwene ʉYosefu ajɨlekile ɨsopeka mʉ mavoko ghaake na kukɨmbɨlɨla kʉnji, 14 akavakemeela avavomba mbombo mʉ nyumba jaake, akavavʉʉla akati, “Mʉlole ʉMʉebulania ʉjʉ jʉno vatʉletiile, ɨkʉtʉkosia isoni! Ingiile kʉlyʉne ilonda kughona nuune. Neke ʉne nɨkolile! 15 Ye avwene nikoola, akɨmbiile alʉtile kʉnji, ajɨlekile ɨsopeka jaake.”
16 Pe ʉmʉkɨjʉʉva jʉla akavɨɨka ɨsopeka jɨla kuhanga akagomoka ʉmʉghoosi ghwake kʉ kaaja. 17 Ʉmʉkɨjʉʉva jʉla akamʼbʉʉla ɨnongua jɨla akati, “ɄMʉebulania jʉla jʉno ʉkatʉletiile, iisa kʉlyʉne kʉkʉngʼhola! 18 Neke ye nɨkolile, ajɨleka ɨsopeka jaake akɨmbɨlɨla kʉnji!”
19 ɄPotifa ye apʉliike ɨmhola ɨjio vwɨmɨla ʉlʉveelo ʉlwa nkami ghwake ʉYosefu, akakalala fiijo. 20 Akankola, akanʼdindila mʉ ndinde muno mwevalyale avakʉngua vooni ava ntwa.
ɄYosefu mʉ ndinde
21 Neke mwope mʉ ndinde ʉMʉtwa ʉNgʉlʉve akava palɨkɨmo nʉ Yosefu, ɨkʉntanga kuhanga kʉkʉmpelela kuvombelua vʉnofu nʉ mʼbaha ghwa ndinde. 22 Ʉmʼbaha ʉjuo akamʼbɨɨka ʉYosefu ɨmɨlɨlaghe avakʉngua vooni mʉ ndinde, na kukwɨmɨlɨla sooni sino sikavombekagha ʉmuo. 23 Ʉmʼbaha ghwa ndinde naakava ivomba nambe kɨmonga mʉ fino akankotoliile ʉYosefu, ʉlwakʉva ʉMʉtwa ʉNgʉlʉve alyale palɨkɨmo nʉ mwene kuvomba vʉnofu sooni sino akavombagha.