ɄYuuda nʉ Tamali
38
Ʉnsiki ʉghuo, ʉYuuda akavaleka avakʉlʉ na vanuuna, akalʉta mʉ lɨkaaja ɨlya Adulami kukukala nʉ muunhu jʉmonga jʉno akatambʉlwagha Hila. 2 Ʉkuo ʉYuuda akamwagha ʉmhɨnja jʉmonga, ʉmwalɨve ghwa Shua ʉMʉkanaani, akantoola, akaghona naghwo. 3 Akava nkunue, akapaapa ʉmwana ʉnʼdɨɨmi, ʉYuuda akampeela ɨlɨtavua ɨlɨ Eli. 4 Akava nkunue kange, akapaapa ʉmwana ʉjʉnge ʉnʼdɨɨmi, akampeela ɨlɨtavua ɨlɨ Onani. 5 Kange, akapaapa ʉmwana ʉjʉnge ʉnʼdɨɨmi, akampeela ɨlɨtavua ɨlɨ Shela. Ʉnsiki ʉghuo valyale vikukala mʉ lɨkaaja ɨlya Kesibu.6 Pambele ʉYuuda akantolesia ʉEli ʉnswambe ʉmʼbele. Akantolesia ʉmʉkɨjʉʉva jʉno akatambʉlwagha Tamali. 7 Neke ʉEli alyale nʉ lʉveelo ʉlʉviivi pamaaso gha Mʉtwa ʉNgʉlʉve. ɄMʉtwa ʉNgʉlʉve akamʼbuda.
8 Pe ʉYuuda akamʼbʉʉla ʉOnani akati, “Ʉhaale ʉnʼdala ʉghwa nkʉlʉʉvo ʉnyakʉsila, ʉlwakʉva fye ʉnoghiile kuvomba, ʉmpapɨle avaana.”
9 Neke ʉOnani akakagʉla kuuti avaana avuo naviiva vaake. Mʉ ʉluo, pano akaghonagha nʉ nʼdala ghwa nkʉlʉ, akakungʼagha imbeju saake paasi, kuuti aleke kʉkʉmpapɨla nkʉlʉ avaana. 10 Ʉluo lʉkankalasia ʉMʉtwa ʉNgʉlʉve, ghwope akamʼbuda.
11 Pepano ʉYuuda akamʼbʉʉla ʉnkamwana ʉTamali akati, “Gomoka ʉlʉte ghukale kʉlyʉmue kwa nhaata ghwako, ʉjighaghe mfwɨle kuhanga ʉnsiki ghʉno ʉmwanango ʉShela iiva nʼgoyo.” ɄYuuda akasaghagha kuuti ʉShela ghwope ndepoonu ifua ndavʉle avakʉlʉ vaake. Pe ʉTamali akagomoka kʉ kaaja kwa viise.
12 Amaaka minga ghakakila, ʉnʼdala ghwa Yuuda jʉno aale mwalɨve ghwa Shua akafua. ɄYuuda ye amalile ifighono fyake ifya kʉlɨla ifua, akalʉta kʉ Timna kʉ vaanhu vano vakadumulagha ʉlwaghe ingʼholo saave. Akalongosinie nʉ mmanyaani ghwake ʉHila ʉmhʉma kʉ Adulami. 13 ɄTamali ye apʉliike kuuti ʉnkamwana alɨ mʉ sɨla ilʉta kʉ Timna kudumula ʉlwaghe ingʼholo saake, 14 akafuula amenda ghaake agha vʉfwɨle, akifwɨka ɨkɨtambala, akikupika kʉ maasoa kuuti aleke pikagʉlɨka. Akikala pa mʉlyango ʉghwa kwingila mʉ kɨkaaja ɨkya Enaimu, kɨno kyale mʉ sɨla ɨja kʉlʉta kʉ Timna. Alyavombile ʉluo, ʉlwakʉva akavwene ʉShela muunhu nʼgoyo, neke ʉmwene navankemelile kuhalua nʉ Shela.
15 ɄYuuda ye amwaghile ʉTamali ikupiike ɨkɨtambala kʉ maaso, akasaagha kuuti ʉmʉkɨjʉʉva jʉla mʉghendamwalu. 16 Pe akaveela pa mwene palʉbale pa sɨla, kɨsila kʉkagʉla kuuti ghwe nkamwana, akamʼbʉʉla akati, “Nilonda kughona nuuve.” ɄTamali akamposia akati, “Nɨngɨtɨke kughona nuuve, ghʉkʉmheela kɨki?” 17 ɄYuuda akamwamʉla akati, “Nɨkʉkʉpeela ɨnyaana mhene kuhʉma mʉ kɨpʉgha kyango.” ɄTamali akamʼbʉʉla akati, “Ʉkomekele kɨmonga kuhʉfia kuuti, kyangʼhaani ghʉkʉndetela ɨmhene ɨjio.”
18 ɄYuuda akamposia akati, “Ghulonda nɨkomekele kɨki?” Akamʼbʉʉla akati, “Ʉmheele ɨpete ɨnya lɨtavua lyako palɨkɨmo nʉ nkufu ghwake, ʉmheele nʉ lʉkongooja lwako.” ɄYuuda akampeela ifiinu ifio, akaghona naghwo. ɄTamali akava nkunue. 19 ɄTamali akavuja kʉvanave, akafuula ɨkɨtambala kɨno akikupiike kʉ mutu, akafwala kange amenda ghaake agha vʉfwɨle.
20 ɄYuuda akansuungʼha ʉmmanyaani ghwake ʉHila ʉmhʉma kʉ Mwadulami, alʉte kʉ Enaimu, antwalɨle ʉmʉkɨjʉʉva jʉla ɨnyaana mhene, neke anʼgomokesie ifiinu fino akomekela. ɄHila naakamwagha ʉmʉkɨjʉʉva jʉla. 21 Akavaposia avaanhu va pala akati, “Alɨ kʉʉghi ʉmʉkɨjʉʉva ʉmʉghendamwalu jʉno ikalagha apa palʉbale pa sɨla?” Avaanhu vala vakati, “Apa napwale ʉmʉkɨjʉʉva ʉmʉghendamwalu.”
22 ɄHila akagomoka kwa Yuuda, akamʼbʉʉla akati, “Nanɨmwaghile, avaanhu va pala vatiile, ‘Apa napwale ʉmʉkɨjʉʉva ʉmʉghendamwalu.’ ” 23 ɄYuuda akati, “Mʉleke atolaghe ifiinu ifio, tʉngajighe tʉkʉmʉlonda kyatʉsʉʉka. Jʉʉve ghwe mwene ʉlolile vʉle nɨkʉsungʼhile kʉkʉntwalɨla ɨnyaana mhene, nʉmwaghile.”
24 Ye ghakilile ameesi ghatatu, ʉYuuda akapʉlɨka kuuti, “Ʉnkamwanavo ʉTamali nkunue, akaale mʉghendamwalu!” ɄYuuda akati, “Mʉmhʉmie kʉnji, mʉnnyaanye nʉ mwoto kuhanga afue.”
25 Ye vikʉmhʉmia kʉnji, ʉTamali akasuungʼha ɨmhola kwa nkamwana akati, “Ʉnya fiinu ifi ghwe jʉno amheliile ʉvʉkunue. Ʉlole vʉnofu, ɨpete ɨjɨ nʉ nkufu ghwake, palɨkɨmo nʉ lʉkongooja, fiinu fyani?”
26 ɄYuuda akafimanya ifiinu fila akati, “ɄTamali muunhu mʉgholofu kukila ʉne, ʉlwakʉva nanɨkantolisie kwa mwanango ʉShela.” Kuhʉma apuo ʉYuuda naalyaghonile kange nʉ Tamali.
27 Ʉnsiki ʉghwa kʉpaapa ʉTamali ghʉkafika, lʉkakagʉlɨka kuuti alɨ nʉ vʉkunue ʉvwa mapasa. 28 Ye ipaapa, ʉmwana jʉmonga akahʉmia ʉlʉvoko, jʉno ipapɨsia akalʉpinya ʉlʉvoko lʉla nʉ lʉsalavua ʉlʉlangali akati, “Ʉjʉ ghwe jʉno alongwile kuholua.” 29 Neke ʉmwana ʉjuo akagomosia ʉlʉvoko mʉnkate, ʉnnine akatala kuholua. Jʉno ipapɨsia akati, “Ongo ʉve ʉhʉmile kʉ ngʉfu?” Akapelua ɨlɨtavua ɨlɨ Pelesi.b 30 Pe akaholua ʉnnuuna, alɨ nʉ lʉsalavua ʉlʉlangali mʉ lʉvoko, ʉmwene akapelua ɨlɨtavua ɨlɨ Sela.c