ɄYosefu na vakʉlʉ
37
ɄYakovo alikalile mʉ ɨɨsi ɨja Kanaani, jɨno ʉviise ghwope alikalile hwene mhesia. 2 Isi se mhola sa vaana va Yakovo.ɄYosefu, ʉmwana ghwa Yakovo, ye nsoleka alɨ na maaka kɨjigho na lekelalʉbale, akadɨmagha imhene ni ngʼholo palɨkɨmo na vakʉlʉ vaake vano valyapapilue nʉ Biliha nʉ Silipa avadala va viise. ɄYosefu akamʉletelagha ʉviise imhola isa vakʉlʉ vwɨmɨla ʉlʉveelo lwave ʉlʉviivi.
3 ɄYakovoa alyamʉghanile ʉYosefu kukila avanaake vooni, ʉlwakʉva alyampapile mʉ vʉghogholo vwake. Akamhonela ɨsopeka ɨnhali, jɨhonilue vʉnofu. 4 Avakʉlʉ ye vavwene kuuti ʉviise amʉghanile ʉYosefu kukila aveene, vakankalalɨla, vakava navijova naghwo vʉnofu.
5 Ɨkɨghono kɨmonga pakɨlo, ʉYosefu akaghonela injosi, akalʉta kʉkʉvapangɨla avakʉlʉ. Ye vapʉliike injosi isio, vakava vikʉnkalalɨla fiijo. 6 Akavavʉʉla akati, “Mʉpʉlɨkɨsie injosi sino nɨghoniile. 7 Nɨghoniile, ʉsue tweni tʉveele mʉ mʉghʉnda tupinya ifinyagha ifya ngano. Nakalɨngi ɨkɨnyagha kyango kyɨma vwɨma, ifinyagha fiinu fikakɨsyʉngʉtɨla ɨkɨnyagha kyango na kʉkʉkɨfughamɨla.”
8 Avakʉlʉ vakamposia vakati, “Asi, kwekʉti ʉsue tuuva mʉ mavoko ghaako? Ghulonda pikʉtʉvʉʉla kuuti ʉve ghuuva ntwa ghwitu?” Pe vakafikʉnkalalɨgha fiijo vwɨmɨla injosi na masio ghaake.
9 ɄYosefu akaghonela kange injosi isingi, akavapangɨla avakʉlʉ akati, “Mʉpʉlɨkɨsie, nɨghoniile injosi isingi. Nɨlyaghile ɨlɨjʉva, ʉmwesi ni nhondue kɨjigho na jɨmo fikʉfughamɨla ʉne.”
10 Akampangɨla ghwope ʉviise injosi isio, ʉviise akanʼdalɨkɨla, akamʼbʉʉla akati, “Njosi nyɨki isio sino ʉghoniile? Ʉnyakʉtisagha ʉne nʉ mama ghwako na vakʉlʉ vaako tulifughama pamaaso ghaako?” 11 Avakʉlʉ vakava nɨ kɨvini, looli ʉviise akava isaagha vwɨmɨla ɨmhola ɨjio.
ɄYosefu ighʉsivua na vakʉlʉ
12 Ɨkɨghono kɨmonga, avakʉlʉ va Yosefu vakalʉta kudɨɨma fidɨmua ifya viise piipi na kʉ Shekemu. 13 ɄYakovo akamʼbʉʉla ʉYosefu akati, “Ʉkagwile kuuti avakʉlʉ vaako valʉta kudɨɨma kʉ Shekemu. Lɨno, nilonda nɨkwomole ʉlʉte kʉ veene.” ɄYosefu akamʉla akati, “Eena, nilʉta.” 14 Ʉviise akamʼbʉʉla akati, “Lʉtagha ʉvalole avakʉlʉʉvo vighendelela ndaani palɨkɨmo ni fidɨmua. Pe ghwise ʉmbʉʉle imhola kuhʉma ʉkuo.” Pepano ʉYakovo akansuungʼha ʉYosefu kuhʉma mʉ lʉvonde lwa Hebuloni.
Ye afikile piipi na kʉ Shekemu, 15 ʉmuunhu jʉmonga akamwagha ʉYosefu ilʉʉla kʉ lɨhaka. Ʉmuunhu ʉjuo akamposia akati, “Ghulonda kɨki?” 16 ɄYosefu akamwamʉla akati, “Nɨkʉvalonda avakʉlʉ vango. Asi, ndepoonu ʉvaghile kʉno vidɨmɨla ifidɨmua fyave?”
17 Ʉmuunhu jʉla akamʼbʉʉla akati, “Vahʉmile apa, nɨvapʉliike vijova viiti vilʉta kʉ Dotani.” Pe ʉYosefu akavavɨngɨlɨla kuhanga akafika kʉ Dotani, akavaagha ʉkuo.
18 Avakʉlʉ vakamwagha ye ajiighe patali, vakapʉlɨngʼhana kʉkʉmʼbuda. 19 Vakavʉlana vakati, “Mʉlole, ʉmʉghonela njosi jʉʉla ikwisa. 20 Lɨno tʉmʼbude na kʉkʉntaagha mʉ liina, neke tʉkʉmʼbʉʉla ʉnhaata ghwitu kuuti, abudilue nɨ kɨkanu ɨkɨkali. Pe tʉlole luliiva ndaani vwɨmɨla injosi saake.” 21 Neke ʉLubeni ʉnkʉlʉ ghwave, ye apʉliike amasio aghuo, akalonda ɨsɨla ɨja kʉmpoka ʉYosefu. Akavavʉʉla avanuuna akati, “Tʉleke pikʉmʼbuda. 22 Mʉleke kukuungʼa ɨdanda jaake. Ʉlwene mʉntaaghe mʉ liina ɨlɨ kʉ lɨhaka kʉno, namʉngamʉlemasyaghe.” Alyajovile enendɨɨkɨ, ʉlwakʉva akalondagha kʉkʉmpoka ʉYosefu na kʉkʉnʼgomosia kwa viise.
23 ɄYosefu ye afikile pa veene, vakamwalʉkɨla, vakamfuula ɨsopeka jaake jɨno afwalile, ɨsopeka jɨno jɨlyahonilue vʉnofu. 24 Pe vakankola, vakantaagha mʉ liina. Ɨliina ɨlio nalɨlyale na malenga.
25 Ye vikukala kulia ɨkyakʉlia, vakalyagha ɨlɨpʉgha ɨlya Vaisimaelib vikyʉla, vahʉmile kʉ ɨɨsi ɨja Gileadi vilʉta kʉ ɨɨsi ɨja Misili. Ingamɨla saave sipɨndile ifiinu ifya ndalama nyinga, ifilʉngo na mafuta amanofu.
26 Pe ʉYuuda akavavʉʉla avanine akati, “Tuvʉmbʉlɨla kɨki tʉngamʼbude ʉnnunaviitu na kufisa ɨmhola ɨja kʉfua kwa mwene? 27 Kʉba tʉmʉghʉsie kʉ Vaisimaeli vala. Tʉleke pikʉmʼbuda, ʉlwakʉva ʉjʉ nnunaviitu, kange lɨdanda liitu.” Avanine vakɨtɨka.
28 Avaghʉsia fiinu vala aVaisimaeli ye vafikile pala, avakʉlʉ vakamhʉmia ʉYosefu mʉ liina, vakamʉghʉsia kʉ Vaisimaeli indalama fijigho fivɨlɨ. AVaisimaeli vakalʉta naghwo kʉ Misili.
29 ɄLubeni ye agomwike pa liina pala, akavona ʉYosefu namwale. Pe akademʉla amenda ghaake nʉ lʉsukunalo. 30 Akagomoka kʉ vanuuna, akavavʉʉla akati, “Ʉnnunaviitu namwale mʉ liina mula! Nisivombe kɨki?”
31 Pe vakahɨnja ɨmhene, vakatoola ɨsopeka ja Yosefu, vakasuvika mʉ danda ja mhene. 32 Pe vakatwala ɨsopeka jɨla kwa viise, vakati, “Ʉsue tʉholile ɨsopeka ɨjɨ. Ʉjɨlole vʉnofu, pamo ja nswambo.”
33 Ʉviise ʉYakovo akajɨkagʉla akati, “Ongo ɨjɨ je sopeka ja nswambango! Ɨkɨkanu ɨkɨkali kʉ lɨhaka kɨmʉliile! Kyangʼhaani ʉYosefu ʉmwanango, alɨ finyughunyughu!” 34 Pe akademʉla amenda ghaake nʉ lʉsukunalo, akafwala amagunilac na kulɨla ifighono finga vwɨmɨla ʉmwanaake. 35 Avaana vaake vooni avadɨɨmi na vahɨnja, vakalʉta kʉkʉnnyamasia, neke ʉmwene akakaana kunyamasivua akati, “Mʉndeke, ʉne nifilɨlagha vwɨmɨla ʉmwanango, kuhanga pano nilʉta kʉvʉfue kʉno kwale.” Fye enendɨɨkɨ ʉviise akalɨlagha vwɨmɨla ʉnswambe ʉYosefu.
36 Avaghʉsia fiinu valad vakafika kʉ Misili, vakamʉghʉsia ʉYosefu kwa muunhu jʉmonga jʉno akatambʉlwagha Potifa. ɄPotifa alyale ʉmo mʉ vatangɨli va Falao,e kange alyale mʼbaha ghwa vasikali avaloleleli va Falao.