Ʉmwoloko ghwa Esau
36
Ʉghʉ ghwe mwoloko ghwa Esau, jʉno ɨlɨtavua lyake ɨlɨngɨ ghwe Edomu. 2 ɄEsau alyatolile avadala ava kʉ Kanaani, amatavua ghaave ghe agha: ʉAda ʉmwalɨve Eloni kuhʉma kʉ Hiti, ʉOholibama ʉmwalɨve Ana ʉnkina Sibeoni kuhʉma kʉ Hivi. 3 Akantoola ghwope ʉBasemati, ʉmwalɨve Isimaeli, ʉnkʉlʉ ghwake alyale ghwe Nebayoti. 4 ɄAda akampapɨla ʉEsau ʉmwana ʉnʼdɨɨmi, ɨlɨtavua lyake aale ghwe Elifasi. ɄBasemati ghwope akampapɨla ʉmwana ʉnʼdɨɨmi, ɨlɨtavua lyake aale ghwe Leueli. 5 ɄOholibama akampapɨla avaana vatatu: ʉYeushi, ʉYalamu nʉ Kola. Avuo ve vaana avadɨɨmi ava Esau vano valyapapilue mʉ ɨɨsi ɨja Kanaani.6 ɄEsau akatoola avadala vaake, avanaake avadɨɨmi na vahɨnja na vaanhu vooni ava mʉ nyumba jaake, ifidɨmua fyake fyoni, ni fiinu fyoni fino alyakavile mʉ ɨɨsi ɨja Kanaani, akavʉʉka ilʉta kukukala kʉ ɨɨsi ɨjɨngɨ jɨno jɨlɨ kʉtali nʉ nnuuna ʉYakovo. 7 Alyavombile ʉluo, ʉlwakʉva valyale ni fidɨmua finga kuhanga lʉkapelela kukunua kukukala pepamo. Ɨɨsi jɨno valikalile najaale jɨkʉvakwɨla vwɨmɨla ʉvwinga ʉvwa fidɨmua fyave. 8 Pe ʉEsau, jʉno ɨlɨtavua ɨlɨngɨ ghwe Edomu, akalʉta kukukala kʉ fidunda ifya mʉ ɨɨsi ɨja Seili.
9 Ɨjɨ je mhola ja mwoloko ghwa Esau jʉno ghwe kɨsina kya Vaedomu, avaanhu vano vikukala kʉ fidunda ifya mʉ ɨɨsi ɨja Seili. 10 Avaana va Esau avadɨɨmi ve ava: ʉElifasi alyaholilue nʉ nʼdala ʉAda, ʉLeueli alyaholilue nʉ nʼdala ʉBasemati.
11 Avaana avadɨɨmi ava Elifasi ve ava: ʉTemani, ʉOmali, ʉSefo, ʉGatamu nʉ Kenasi. 12 ɄElifasi alyale nʉ nʼdala ʉnkami, jʉno akatambʉlwagha Timna. Ʉmwene akampapɨla ʉmwana ʉnʼdɨɨmi ɨlɨtavua lyake ghwe Amaleki. Vooni avuo ve visukulu va Esau kwa nʼdala ghwake ʉAda.
13 Avaana avadɨɨmi ava Leueli ve ava: ʉNahati, ʉSela, ʉShama nʉ Misa. Vooni avuo ve visukulu va Esau kwa nʼdala ghwake ʉBasemati.
14 Avaana avadɨɨmi ava Esau mwa nʼdala ʉOholibama ʉmwalɨve Ana ʉnkina Sibeoni ve ava: ʉYeushi, ʉYalamu nʉ Kola.
15 Avavaha va fikolo fino filyahʉmile mwa Esau kwa nswambe ʉElifasi jʉno alyale mʼbele mwa Esau ve ava: ʉTemani, ʉOmali, ʉSefo, ʉKenasi, 16 ʉKola, ʉGatamu nʉ Amaleki. Nʉjʉnge alyale mʼbaha ghwa kɨkolo kyake mʉ ɨɨsi ɨja Edomu. Kange, vooni avuo valyale vaana va Elifasi jʉno ʉngʼina ghwe Ada.
17 Avavaha va fikolo fino filyahʉmile mwa Esau kwa nswambe ʉLeueli ve ava: ʉNahati, ʉSela, ʉShama nʉ Misa. Nʉjʉnge alyale mʼbaha ghwa kɨkolo kyake mʉ ɨɨsi ɨja Edomu. Kange, vooni avuo valyale vaana va Leueli jʉno ʉngʼina ghwe Basemati, ʉnʼdala ghwa Esau.
18 Avavaha va fikolo fino filyahʉmile mwa Esau kwa nʼdala ʉOholibama ve ava: ʉYeushi, ʉYalamu nʉ Kola. Nʉjʉnge alyale mʼbaha ghwa kɨkolo kyake mʉ ɨɨsi ɨja Edomu. Kange, vooni avuo valyale vaana va Esau mwa nʼdala ʉOholibama ʉmwalɨve ghwa Ana.
19 Avuo vooni ghwe mwoloko ghwa Esau jʉno ɨlɨtavua ɨlɨngɨ ghwe Edomu, palɨkɨmo na vavaha va fikolo fyave.
Ʉmwoloko ghwa Seili
20 Avavaha va fikolo fino filyahʉmile mwa Seili ʉMʉholi, vano vakikalagha mʉ ɨɨsi ɨja Edomu ve ava: ʉLotani, ʉShobali, ʉSibeoni, ʉAna, 21 ʉDishoni, ʉEseli nʉ Dishani. Ava ve vadɨɨmi vano valyahʉmile mwa Seili. Nʉjʉnge alyale mʼbaha ghwa kɨkolo kyake mʉ fikolo ifya Vaholi, mʉ ɨɨsi ɨja Edomu.
22 Avaana avadɨɨmi ava Lotani valyale ve ava: ʉHoli nʉ Hemani. ɄLotani alyale nʉ lʉmbʉ, akatambʉlwagha Timna.
23 Avaana avadɨɨmi ava Shobali valyale ve ava: ʉAlivani, ʉManahati, ʉEbali, ʉShefo nʉ Onamu.
24 Avaana avadɨɨmi ava Sibeoni valyale ve ava: ʉAya nʉ Ana. ɄAna ghwe jʉno alyakɨvwene ɨkɨnʼdwivu ɨkya malenga amapio kʉ lʉkʉve, ye idɨɨma idogovi isa nhaata ghwave ʉSibeoni.
25 Avaana ava Ana valyale ve ava: ʉDishoni nʉ lʉmbʉ ʉOholibama.
26 Avaana avadɨɨmi ava Dishoni ve ava: ʉHemdani, ʉEshibani, ʉItilani nʉ Kelani.
27 Avaana avadɨɨmi ava Eseli ve ava: ʉBilihani, ʉSavani nʉ Akani.
28 Avaana avadɨɨmi ava Dishani ve ava: ʉUsi nʉ Alani.a
29 Ava ve vavaha va fikolo ifya Vaholi: ʉLotani, ʉShobali, ʉSibeoni, ʉAna, 30 ʉDishoni, ʉEseli nʉ Dishani. Avaanhu ava nʉjʉnge alyale mʼbaha ghwa kɨkolo kyake kʉ Vaholi mʉ ɨɨsi ɨja Seili.
Avatwa va mʉ ɨɨsi ɨja Edomu
31 Ava ve vatwa vano valyatemile mʉ ɨɨsi ɨja Edomu, aVaisilaeli ye vakyale kuuva nʉ ntwa.
32 ɄBela ʉmwana ghwa Beoli alyale ntwa ghwa kwanda mʉ ɨɨsi ɨja Edomu. Ɨnyumba jaake ɨja kɨtwa jaale mʉ lɨkaaja ɨlya Dinihaba.
33 ɄBela ye afwile, ʉYobabu ʉmwana ghwa Sela akapyanɨla pa mwene kuuva ntwa. Ʉmwene alyale mhʉma mʉ lɨkaaja ɨlya Bosila.
34 ɄYobabu ye afwile, ʉHushamu akapyanɨla pa mwene kuuva ntwa. Ʉmwene alyale mhʉma mʉ ɨɨsi ɨja Vatemani.
35 ɄHushamu ye afwile, ʉHadadi ʉmwana ghwa Bedadi akapyanɨla pa mwene kuuva ntwa. Ɨnyumba jaake ɨja kɨtwa jaale mʉ lɨkaaja ɨlya Aviti. Aghelile kulua na Vamidiani mʉ ɨɨsi ɨja Moabu, akavatola.
36 ɄHadadi ye afwile, ʉSamla akapyanɨla pa mwene kuuva ntwa. Ʉmwene alyahʉmile mʉ lɨkaaja ɨlya Maseleka.
37 ɄSamla ye afwile, ʉShauli akapyanɨla pa mwene kuuva ntwa. Ʉmwene alyahʉmile mʉ lɨkaaja ɨlya Lehoboti, lɨno lɨlyale piipi nɨ kɨkogha ɨkya Eufulati.
38 ɄShauli ye afwile, ʉBaali-Hanani ʉmwana ghwa Akiboli, akapyanɨla pa mwene kuuva ntwa.
39 ɄBaali-Hanani ʉmwana ghwa Akiboli ye afwile, ʉHadadi akapyanɨla pa mwene kuuva ntwa. Ɨnyumba jaake ɨja kɨtwa jaale mʉ lɨkaaja ɨlya Pau. Ʉnʼdala ghwake akatambʉlwagha Mehetabeli. Ʉnʼdala ʉjuo ʉngʼina alyale ghwe Mateledi, ʉmwana ghwa Mesahabu.
40 Ava ve vavaha va fikolo fino filyahʉmile mʉ kɨsina kya Esau. Amatavua ghaave ghe matavua gha fikolo ni mbale sino vikukala avaanhu avuo. Avavaha avuo ve ava: ʉTima, ʉAliva, ʉYeteti, 41 ʉOholibama, ʉEla, ʉPinoni, 42 ʉKenasi, ʉTemani, Mibisali, 43 ʉMagidieli nʉ Ilamu. Avuo ve vavaha va fikolo ifya ɨɨsi ɨja Edomu. Amatavua gha fikolo ghe ghano ghalyapeleliile imbale sino vikukala sitambʉlue amatavua aghuo.
Avaanhu vooni avuo valyahʉmile mwa Esau, jʉno akava nkʉʉlʉ ghwa Vaedomu vooni.