ɄYakovo ihamɨla kʉ Beteli
35
Ɨkɨghono kɨmonga, ʉNgʉlʉve akamʼbʉʉla ʉYakovo akati, “Neene Ngʉlʉve jʉno alyakʉvonekiile ye ʉkʉnkɨmbɨla ʉnkʉlʉʉvo ʉEsau. Ʉvʉʉke apa, ʉlʉte ghukale kʉ lɨkaaja ɨlya Beteli. Ʉkuo ʉnjengele ɨkɨtekelelo apa kʉnhavʉlɨla ɨlɨtekelo.”2 Pepano ʉYakovo akavavʉʉla vooni ava mʉ nyumba jaake akati, “Mʉtaaghe amangʉlʉve ghooni agha kɨhesia ghano mʉlɨ nagho, muvalasie na kukwandʉla amenda ghiinu. 3 Pe tʉlʉtaghe kʉ Beteli, ʉkuo nɨkanʼjengele ʉNgʉlʉve ɨkɨtekelelo. ɄNgʉlʉve ʉjuo ghwe jʉno alyanhangile mʉ mhumuko sango, kange ghwe jʉno ɨkʉndongosia mwoni muno nilʉta.”
4 Pe vakakongʼhania amangʉlʉve ghooni agha kɨhesia ghano valyale nagho, palɨkɨmo na fino valyatogile mʉ mbulughutu saave, vakampeela ʉYakovo, ʉmwene akafisyɨla paasi pa mpiki ʉmʼbaha piipi nɨ lɨkaaja ɨlya Shekemu. 5 ɄYakovo na vaanhu ava mʉ nyumba jaake vakavʉʉka vilʉta. ɄNgʉlʉve akavapelela avaanhu ava mʉ makaaja ghano ghaale mʉlʉbale kʉkʉvoghopa. Mʉ ʉluo, vakakunua kukwalʉkɨla ɨkɨpʉgha kya Yakobo. 6 ɄYakovo na vaanhu vaake vooni vakafika mʉ lɨkaaja ɨlya Lusu, lɨno amasiki agha litambʉlua Beteli, mʉ ɨɨsi ɨja Kanaani. 7 Ʉkuo, akajenga ɨkɨtekelelo, akapatambʉla Eli-Beteli,a ʉlwakʉva apuo pepano ʉNgʉlʉve alihʉfisie kwa mwene, ye ɨkʉnkɨmbɨla ʉnkʉlʉ ʉEsau.
8 Ʉnsiki ʉghuo jʉno alyale yaaya ghwa Lebeka, jʉno akatambʉlwagha Debola, akafua. Vakansyɨla pa mpiki ʉmʼbaha ʉmualoni, piipi nɨ lɨkaaja lya Beteli. Apoonu apuo ʉYakovo akapatambʉla Aloni-Bakuti.b
9 ɄYakovo ye agomwike kuhʉma mʉ ɨɨsi ɨja Mesopotamia, ʉNgʉlʉve akamʼbonekela kange na kʉkʉmfuunya. 10 ɄNgʉlʉve akamʼbʉʉla akati, “Ɨlɨtavua lyako veeve Yakovo.c Neke naghutambʉlwagha kange ɨlɨtavua ɨlio, lɨno ghutambʉlwagha Isilaeli.”d Pe akava itambʉlua Isilaeli.
11 ɄNgʉlʉve akamʼbʉʉla kange akati, “Ʉne neene Ngʉlʉve Nyangʉfu Sooni. Ʉvisaghe nʉ mwoloko mwinga. Mʉlyʉve fihʉma ifisina finga. Mʉ fisina ifio mwevivisagha voope avatwa. 12 Ɨɨsi jɨno nɨlyampeliile ʉAbulahamu nʉ Isaka, je jɨno nɨkʉkʉpeela ʉve na vanyeenya vaako.”
13 ɄNgʉlʉve ye amalile kujova nʉ Yakovo, akamʉleka pala, akavʉʉka itogha kʉkyanya. 14 Pe ʉYakovo akɨmia ɨlɨvue apoonu pala kuuva kɨvalɨlo, kuuti ʉNgʉlʉve alyajovile naghwo. Akalɨkungʼilila ɨlɨvue ʉlʉhʉʉje na mafuta kʉkʉlyɨmɨka. 15 Apoonu pala ʉYakovo akapatambʉla Beteli.e
ɄBenyamini ipapua, ʉLaheli ifua
16 ɄYakovo na vaanhu vaake vakavʉʉka kʉ Beteli vilʉngama kʉ lɨkaaja lya Efulati. Ye valɨ piipi kufika kʉ Efulati, ʉLaheli vʉkamwagha ʉvʉvafi ʉvwa kʉpaapa, akava ipumuka kyongo. 17 Ye ajiighe nʉ vʉvafi ʉvuo, jʉno ipapɨsia akamʼbʉʉla akati, “Nʉngoghopaghe, ʉlwakʉva ʉpapile ʉmwana ʉjʉnge ʉnʼdɨɨmi.” 18 Ye ghukova, ihangajɨka, akampeela ʉmwana ʉjuo ɨlɨtavua ɨlɨ Benoni.f Neke ʉviise akampeela ɨlɨtavua ɨlɨ Benyamini.g
19 Pe ʉLaheli akafua, vakansyɨla mʉlʉbale mʉ sɨla ɨja kʉlʉta kʉ Efulati, ifighono ifi jitambʉlua Betelehemu. 20 ɄYakovo akɨmia ɨlɨvue pa mbiipa kuuva kɨvalɨlo kya mbiipa ɨjio. Kuhanga kufika ʉmʉsyʉghʉ ɨkɨvalɨlo ɨkio kihʉfia pano pwejɨlɨ ɨmbiipa ja Laheli.
Avasoleka va Yakovo
21 ɄYakovo jʉno ɨlɨtavua ɨlɨngɨ ghwe Isilaeli akafilʉtagha nʉ lʉghendo. Pe akasimika amaheema ghaake piipi nʉ mnala ghwa Edeli. 22 Ye ikukala mʉ ɨɨsi ɨjio, ʉmwanaake ʉLubeni akaghona nʉ Biliha, ʉnʼdala ʉnkami ghwa viise. ɄIsilaeli akapʉlɨka ɨmhola ɨjio.
ɄYakovo alyale na vaana avadɨɨmi kɨjigho na vavɨlɨ.
23 Avaana va Lea avadɨɨmi valyale, ʉLubeni jʉno ghwe mʼbele mwa Yakovo, ʉSimeoni, ʉLeevi, ʉYuuda, ʉIsakali nʉ Sabuloni.
24 Avaana va Laheli avadɨɨmi valyale ʉYosefu nʉ Benyamini.
25 Avaana avadɨɨmi ava Biliha ʉnkami ghwa Laheli valyale ʉDani nʉ Nafutali.
26 Avaana avadɨɨmi ava Silipa ʉnkami ghwa Lea valyale ʉGadi nʉ Asheli.
Avuo ve vaana va Yakovo avadɨɨmi vano valyaholilue mʉ ɨɨsi ɨja Mesopotamia.
ɄIsaka ifua
27 Pambele ʉYakovo akagomoka kʉ Mamule, kwa Isaka ʉviise, piipi nɨ lɨkaaja ɨlya Kiliati-Aliba, lɨno ɨlɨtavua ɨlɨngɨ litambʉlua Hebuloni. Apuo pepano valikalile ʉAbulahamu nʉ Isaka. 28 ɄIsaka alikalile amaaka kɨlʉndo kɨmo ni fijigho lekelekwoni. 29 Akava mʉghogholo fiijo, pambele akafua, avaana vaake ʉEsau nʉ Yakovo vakansyɨla.