ɄSimeoni nʉ Leevi vivangɨla vwɨmɨla ʉlʉmbʉ
34
Ɨkɨghono kɨmonga, ʉDina ʉmwana ʉmhɨnja ʉghwa Yakovo, jʉno ʉngʼina ghwe Lea, akalʉta kughendela avahɨnja ava mʉ ɨɨsi ɨja Kanaani. 2 Ʉntwa ghwa ɨɨsi ɨjio ʉHamoli ʉMʉhivi, alyale nʉ mwana ʉnʼdɨɨmi, ɨlɨtavua lyake ghwe Shekemu. Lɨno, ʉShekemu ye amwaghile ʉDina, akankola kʉ ngʉfu, akaghona naghwo. 3 ɄShekemu akamʉghana fiijo ʉDina ʉmwalɨve Yakovo, akatengʉla kʉkʉnʼjofia na masio amanono. 4 Pe akalʉta kujova nʉ viise ʉHamoli akati, “Nhaata, sivuo nisʉʉma ʉmhɨnja ʉjʉ, ʉnjovele kwa viise kuuti aave nʼdala ghwango.”5 ɄYakovo akapata ɨmhola kuuti ʉShekemu avwafwike nʉ mwalɨve ʉDina, neke ʉlwakʉva avanaake valyale kudɨɨma, akajigha kɨmihe kuhanga avanaake vagomoka kudɨɨma.
6 Pepano ʉHamoli, ʉviise ghwa Shekemu, akalʉta kwa Yakovo kuuti vajove ɨmhola ɨjio. 7 Avaana va Yakovo vakagomoka kudɨɨma. Vakapʉlɨka kuuti ʉShekemu avwafwike nʉ lʉmbʉ ghwave, vakakalala na kulemala fiijo mʉ mwojo. Vakakalala, ʉlwakʉva kʉ Vaisilaeli kuvwafuka lwale mwiko, kange kɨnyasoni.
8 Neke ʉHamoli akavavʉʉla akati, “Ʉmwanango ʉShekemu amʉghanile fiijo ʉmwalɨviinu. Nɨkʉvasʉʉma, mʉmwɨtɨkɨsie antoole. 9 Mʉleke tʉtolanaghe. Ʉsue tʉtolaghe avalɨviinu, na jʉmue mʉtolaghe avalɨviitu. 10 Mukalaghe nusue, ɨɨsi ɨjɨ jiiva jiinu. Mukalaghe muno, mʉghʉsyaghe na kughʉla ifiinu, kuhanga muuva vamofu.”
11 Pe ʉShekemu jʉjuo akamʼbʉʉla ʉviise ghwa Dina na valʉmbʉ akati, “Nisʉʉma mʉnyɨtɨke! Kɨno mulonda, nikua. 12 Mʉmbʉʉle ɨkyʉma nʉ lʉvonolo fino filondua, nambe kɨɨve kinga ndaani nikua, neke nɨntoole ʉmwalɨviinu ʉjʉ.”
13 Neke avaana va Yakovo vakankalaliile fiijo ʉShekemu, ʉlwakʉva avwafwike nʉ lʉmbʉ ghwave ʉDina. Mʉ ʉluo, vakajovela mʉ giila kʉkʉmwamʉla ʉShekemu palɨkɨmo nʉ viise ʉHamoli 14 vakati, “Ɨmhola ɨjio natuvomba. Ʉlʉmbʉliitu natʉngantolesie kwa muunhu jʉno naavombilue ɨkɨvʉngo ɨkya kʉdumula ɨngola ɨja kɨdɨɨmi.a Kɨnyasoni kʉlyʉsue kuvomba ʉluo! 15 Tʉnoghiile kukwɨtɨngʼhana numue nave mʉvombe ɨkɨɨnu kɨmo kyene: Lulondua ʉmʉkɨnhaata ghweni pakate palyʉmue, avisaghe ndavʉle usue, mʉlwa kʉvombelua ɨkɨvʉngo ɨkya kʉdumula ɨngola ɨja kɨdɨɨmi. 16 Apuo pepano tʉkʉvatolesia avalɨviitu kʉlyʉmue, na jʉsue tutolagha avalɨviinu. Mʉ ʉluo, tuuva vʉmo. 17 Looli nave namukwɨtɨka kuvombelua ɨkɨvʉngo ɨkio, tuvʉʉka nʉ lʉmbʉliitu.”
18 ɄHamoli nʉ nswambe ʉShekemu ye vapʉliike amasio aghuo, vakɨtɨka. 19 Pe ʉnsoleka jʉla ʉmʉghanɨke fiijo mʉ nyumba ja viise, akavomba ngʼhaningʼhaani ndavʉle vajovile, ʉlwakʉva akamʉghanile fiijo mwalɨve ghwa Yakovo.
20 Pepano ʉHamoli nʉ mwanaake ʉShekemu vakafika pa lɨlyango lya lɨkaaja lyave apa kʉkongʼhanɨla, vakajova na vaanhu vaave vakati, 21 “Avaanhu ava, vamanyaani viitu. Tʉvɨtɨkɨsie vikalaghe palɨkɨmo nusue mʉ ɨɨsi jiitu, vaghʉsyaghe na kughʉla ifiinu. Tʉlɨ nɨ ɨɨsi ɨmbaha ɨja kʉkwɨla ʉsue na veene. Tʉnoghiile kutoola avalɨve, voope kutoola avalɨviitu. 22 Neke aveene vikwɨtɨka kukukala na kuuva vʉmo nusue nave avakɨnhaata viitu vivombelua ɨkɨvʉngo ɨkya kʉdumula ɨngola ɨja kɨdɨɨmi ndavʉle aveene. 23 Asi, namukagʉla kuuti ifidɨmua fyave ni fiinu fyave fyoni fiiva fiitu? Lɨno twɨtɨke, vikale nusue.”
24 Avakɨnhaata vooni ava mʉ lɨkaaja ɨlio vano valyakongʼhanile pa lɨlyango ɨlya lɨkaaja, vakɨtɨka sino ajovile ʉHamoli nʉ Shekemu, vooni vakavombelua ɨkɨvʉngo ɨkio.
25 Fikakila fighono fitatu, avakɨnhaata vano valyavombilue ɨkɨvʉngo, vakajiighe nʉ vʉvafi ʉvwa kʉdumulua ɨngola ɨja kɨdɨɨmi. Avaana vavɨlɨ ava Yakovo, ʉSimeoni nʉ Leevi avalʉmbʉ va Dina, vakatoola ibamba saave, vakalʉkɨla ɨlɨkaaja ɨlio na kubuda avakɨnhaata vooni. 26 Vakamʼbuda nɨ bamba ʉHamoli nʉ mwanaake ʉShekemu, pe vakampɨnda ʉDina mʉ nyumba ɨja Shekemu, vakalʉta naghwo.
27 Avaana avange ava Yakovo vakalʉta pa mafimba ghala, vakatoola ifiinu ifya mʉ lɨkaaja ɨlio, mʉlwa kʉvangɨla lʉno ʉShekemu avwafuka nʉ lʉmbʉ ghwave. 28 Vakatoola ingʼholo, imhene, ingʼombe, idogovi ni fiinu fyoni fino filyale mʉ lɨkaaja ɨlio na fino filyale kʉ maghʉnda. 29 Vakaghoma ʉvʉmofu vwave vwoni, palɨkɨmo na vaana na vakɨjʉʉva vooni, ni fiinu fyoni fino filyale mʉ nyumba saave.
30 ɄYakovo ye asivwene isio, akamʼbʉʉla ʉSimeoni nʉ Leevi akati, “Lolagha, lɨno mʉndetiile ʉlʉpumuko! Mʉpeleliile avaanhu va ɨɨsi ɨjɨ aVakanaani na Vapelisi vangʼhalalɨle. Ʉne nanɨlɨ na vaanhu vinga. Aveene vangakongʼhaane kulua nuune, vikʉtʉbuda ʉsue tweni!” 31 Neke aveene vakamwamʉla vakati, “Kɨki ʉmwene amʼbɨɨka ʉlʉmbʉliitu hwene mʉghendamwalu?”