ɄYakovo itangʼhana nʉ Esau
33
ɄYakovo ye avʉkile pala, akalola kʉvʉlongolo, akamwagha ʉEsau ikwisa na vaanhu filʉndo fine. Ʉnsiki ghʉghuo akavaghava avanaake, na vange nʉ ngʼina: ava Lea vakava nʉ Lea, ava Laheli vakava nʉ Laheli, na vakami ve vavɨɨlɨ voope vʉle vʉle. 2 Pe akalongosia avakami na vaana vaave, akiisa ʉLea na vanaake, neke ʉLaheli nʉ mwanaake ʉYosefu. 3 Pe ʉmwene akalongola kʉvʉlongolo, akafika piipi nʉ nkʉlʉ, akafughama na kʉkʉmwinamɨla kuhanga kufika paasi, akavomba ʉluo mala lekelalʉbale.4 Neke ʉEsau akavʉʉka lʉvɨlo kʉkʉmwʉpɨla ʉYakovo, akamʉghumbatɨla na kʉkʉnnonela kʉ singo, vooni ve vavɨɨlɨ vakatengʉla pilɨla. 5 Pe ʉEsau akavaagha avakɨjʉʉva na vaana, akamposia ʉYakovo akati, “Ava vano mʉlɨ lʉmo ve vaveeni?” ɄYakovo akamʉla akati, “Ava ve vaana vano ʉNgʉlʉve mʉ lʉsʉngʉ lwake amheliile ne mʼbombi ghwako.”
6 Pe avakami avahɨnja vala palɨkɨmo na vaana vaave, vakamʼbelelela ʉEsau, vakafughama na kʉkʉmwinamɨla. 7 Ghwope ʉLea na vanaake vakaveela, vakafughama na kʉkʉmwinamɨla. Kʉvʉsililo akiisa ʉLaheli nʉ mwanaake ʉYosefu, voope vakafughama na kʉkʉmwinamɨla.
8 Pe ʉEsau akamposia akati, “Amapʉgha ghooni agha ghano nitangʼhana nagho mʉ sɨla ghalɨ nʉ mʉlʉvo mʉki?” ɄYakovo akamʉla akati, “Ntwa ghwango, nilonda tʉpʉlɨngʼhanaghe vʉnono.” 9 Neke ʉEsau akati, “Nyalʉkolo ghwango, ʉne nɨlɨ nɨ kyʉma kinga. Ɨkyʉma kɨno ʉlɨ nakyo, kɨkʉtangaghe jʉʉve.”
10 ɄYakovo akamʼbʉʉla kange akati, “Ndali, nave lweli ghwɨtiike kʉkʉnyʉpɨla, ghwʉpɨle ifidɨmua ifi fiive fyako. Kyangʼhaani kutangʼhana nuuve mʉ maaso, nɨhwene nɨtangʼhiine nʉ Ngʉlʉve, ʉlwakʉva ʉnyʉpiile nʉ lʉkeelo. 11 Lɨno, nɨkʉkʉsʉʉma ghwʉpɨle ifidɨmua ifi fino nɨkʉletiile, ʉlwakʉva na jʉʉne ʉNgʉlʉve anhangile, nɨlɨ nɨ kyʉma kinga.” ɄYakovo fye alyamwʉmɨlisie ʉEsau, ghwope akʉpɨla ifidɨmua fila.
12 Pe ʉEsau akati, “Tʉvʉʉke tʉlʉtaghe, tʉvɨngɨsaniaghe.” 13 Neke ʉYakovo akamʼbʉʉla akati, “Ntwa ghwango, ʉkagwile kuuti avaana ava vajiighe vadebe, kange ifidɨmua ifi fikwongʼhelesia. Nɨngafikɨmbɨsie nambe mʉ kɨghono kɨmo, ndepoonu fifua fyoni. 14 Ghwe ntwa ghwango, ʉve ʉlongolaghe, ʉne nighenda lʉkelʉke kutetesia ifidɨmua ifi na vaana, kuhanga nifika kʉlyʉve kʉ ɨɨsi ɨja Seili.”
15 ɄEsau ghwope akati, “Kʉba nɨkʉlekele avaanhu vango vamo vakʉtange.” Neke ʉYakovo akamʉla akati, “Lwakɨki ʉvombe ʉluo? Ʉne lʉkwɨlile pano tʉpʉlɨngʼhiine vʉnofu nuuve ghwe ntwa ghwango.”
16 Ɨkɨghono kɨkio ʉEsau akatengʉla ʉlʉghendo kugomoka kʉ ɨɨsi ɨja Seili. 17 Neke ʉYakobo na vaanhu vaake vakalʉta kʉvʉnge, vakajenga ɨnyumba ni mbagha sa fidɨmua fyake. Fye nambe apoonu apuo ʉYakovo akapatambʉla Sukoti.a
ɄYakovo ikukala piipi nɨ Shekemu
18 ɄYakovo ye anʼdyeghile ʉLabani kʉ Mesopotamia, akafika vʉnofu mʉ lɨkaaja ɨlya Shekemu mʉ ɨɨsi ɨja Kanaani. Apuo akatengʉla pikukala piipi nɨ lɨkaaja ɨlio. 19 Akaghʉla apoonu apuo kʉ vaanhu va Hamoli, ʉnhaata ghwave ʉShekemu, ni ndalama kɨlʉndo kɨmo. 20 Kange, akajenga ɨkɨtekelelo, akakɨtambʉla Eli-Elohe Isilaeli.b