<<    <     Vʉtengʉlɨlo     32     >    >> 
ɄYakovo ikulɨngʼhania kutangʼhana nʉ Esau
32
ɄYakovo ghwope akafilʉtagha mʉ lʉghendo lwake. Ye alɨ mʉ sɨla, akatangʼhana na vanyamhola va Ngʉlʉve. 2 ɄYakovo ye avaghile akati, “Ava vasikali va Ngʉlʉve!” Mʉ ʉluo, akapatambʉla pala Mahanaimu.a
3 ɄYakovo akavasuungʼha avaanhu vamʉlongolele kulʉta kwa nkʉlʉ ʉEsau kʉ Seili, mʉ ɨɨsi ɨja Edomu. 4 Akavavʉʉla akati, “Mʉmʼbʉʉle ʉtwa ghwango ʉEsau kuuti, ʉmʼbombi ghwako ʉYakovo iiti ndɨɨkɨ, ‘Nikalile kʉ vʉhesia kwa Labani kuhanga kufika lɨno. 5 Nɨlɨ ni ngʼombe, idogovi, ingʼholo, imhene na vakami avadɨɨmi na vahɨnja. Lɨno, nisuungʼha ɨmhola ɨjɨ kʉlyʉve ghwe ntwa ghwango kuuti, ʉnyʉpɨle tukalaghe nʉ lʉtengaano.’ ”
6 Avaanhu vala vakalʉta. Ye vagomwike, vakamʼbʉʉla ʉYakovo vakati, “Tʉfikile kwa nkʉlʉʉvo ʉEsau, ghwope alɨ mʉ sɨla ikwisa kʉkʉkwʉpɨla, alɨ na vakɨnhaata filʉndo fine.” 7 Pe ʉYakovo akoghopa fiijo na kuhangajɨka. Avaanhu vano alyale navo akavaghavania mapʉgha ghavɨlɨ, nafi fidɨmua fino alyale nafyo ingamɨla, ingʼholo, ni mhene soope akasighavania vʉle vʉle. 8 Akasaagha kuuti, “ɄEsau nave ikwisa kukwalʉkɨla ɨlɨpʉgha lɨmo, ɨlɨpʉgha ɨlɨngɨ lijigha.”
9 Pe ʉYakovo akansʉʉma ʉNgʉlʉve akati, “Ghwe Ngʉlʉve ghwa nkʉʉlʉ ghwango ʉAbulahamu, ghwe Ngʉlʉve ghwa nhaata ghwango ʉIsaka, ghwe Mʉtwa Ngʉlʉve ʉkambʉlile kuuti nɨgomoke mʉ ɨɨsi jango, kʉ vanyalʉkolo vango, neke ʉkambombele inofu. 10 Ʉne nanɨnoghiile kuvombelua inofu nambe padebe, inofu isi sino ʉmbombiile ʉne ne mʼbombi ghwako. Ye nɨlovoka ɨkɨkogha ɨkya Yolidani, nanɨlyale na kɨmonga, looli lʉ lʉkongooja, neke lɨno nɨlɨ na mapʉgha ghavɨlɨ agha. 11 Nɨkʉkʉsʉʉma ʉmhoke mʉ mavoko gha nkʉlʉvango ʉEsau, ʉlwakʉva nikwoghopa kuuti ikwisa kʉkʉnyalʉkɨla, na kʉkʉtʉbuda palɨkɨmo na vadala vango na vanango. 12 Ʉve ʉkandaghile kʉkʉmbombela inofu na kukwongelesia ʉmwoloko ghwango, kuuva ndavʉle ʉnsanga ʉghwa kʉ nyanja ghʉno naghuvalɨka.”
13 Ɨkɨlo jɨla, ʉYakovo akaghona pala. Pe akabaghʉla ɨkyʉma kyake kɨmonga ɨkya kʉmpeela ʉnkʉlʉ ʉEsau: 14 Akasalʉla imhene inhɨghano filʉndo fivɨlɨ ni mhongo fijigho fivɨlɨ, ingʼholo ingʼina filʉndo fivɨlɨ ni duuvi fijigho fivɨlɨ, 15 ingamɨla ingʼina fijigho fitatu palɨkɨmo ni nyaana saake, ingʼombe ingʼina fijigho fine ni ngʼhambako kɨjigho kɨmo, idogovi ingʼina fijigho fivɨlɨ ni ngoosi kɨjigho. 16 Ifio fyoni akavapeela avavombi vaake, nʉjʉnge ɨkɨpʉgha kyake, akavavʉʉla akati, “Mʉlongole kʉvʉlongolo kʉlyʉne, namʉngalʉtaghe palɨkɨmo, kɨla kɨpʉgha kɨvisaghe patali nɨ kɨngɨ.”
17 Pe akamʉlaghɨla ʉmʼbombi jʉno akalongwile kuuti, “Kyaghutangʼhana nʉ nkʉlʉvango ʉEsau, angakʉposie kuuti, ‘Ʉve, ʉntwa ghwako ghwe veeni? Ghulʉta kʉʉghi? Ifidɨmua ifio fyani?’ 18 Ʉve ʉmwamʉlaghe kuuti, ‘Ifidɨmua ifi fya mʼbombi ghwako ʉYakovo. Asungʼhile kuuti nɨkʉpeele ʉve ghwe ʉntwa ghwango Esau. Ghwope alɨ mʉmbele ɨkʉtʉvɨngɨlɨla.’ ”
19 ɄYakovo akamʉlaghɨla ʉmʼbombi jʉno akalongwisie ɨkɨpʉgha ɨkya vʉvɨli, nʉ ghwa kɨpʉgha kya vʉtatu, ni fipʉgha ifingi, akavavʉʉla akati, “Kyamutangʼhana nʉ Esau, mʉmʼbʉlaghe amasio ghaghaghuo. 20 Namʉngalekaghe kujova kuuti, ‘Ʉmʼbombi ghwako ʉYakovo alɨ mʉmbele ɨkʉtʉvɨngɨlɨla.’ ” ɄYakovo alyajovile enendɨɨkɨ, ʉlwakʉva akasaghagha kuuti, “Pano nɨlongwisie ifidɨmua ifya kʉmpeela, inyamala, neke kyande nitangʼhana naghwo mʉ maaso, ndepoonu ɨkʉnyɨtɨka.” 21 Enendɨɨkɨ fye akalongwisie ifya kʉmpeela ʉnkʉlʉ, neke ʉmwene ɨkɨlo jɨla akaghona pala pala.
ɄYakovo ighelana nʉ Ngʉlʉve
22 Ɨkɨlo jɨla jɨla ʉYakovo akasisimuka, akavatoola avadala vaake vavɨlɨ, na vakami vaake vavɨlɨ ʉSilipa nʉ Biliha na vanaake kɨjigho na jʉmo. Akavalovosia ɨmwambo ɨja kakogha aka Yaboki. 23 Akavalovosia palɨkɨmo ni fiinu fyake fyoni. 24 ɄYakovo akajigha mwene. Pe akiisa ʉmuunhu jʉmonga akalua nʉ Yakovo iyombwe kuhanga kwahenga. 25 Ʉmuunhu jʉla ye avwene kuuti naangantole ʉYakovo, akankola mʉ nyonga,b ʉYakovo akateluka ɨnyonga. 26 Pe ʉmuunhu jʉla akati, “Ʉndeke nɨlʉtaghe, ʉlwakʉva kʉkiile.”
Neke ʉYakovo akamwamʉla akati, “Nanɨngakʉleke ʉlʉte kɨsila kʉmheela inyifuunyo!”
27 Ʉmuunhu jʉla akamposia akati, “Ɨlɨtavua lyako veeve veeni?”
ɄYakovo akamwamʉla akati, “Neene Yakovo.”
28 Ʉmuunhu jʉla akamʼbʉʉla akati, “Naghutambʉlwagha kange Yakovo, looli ghutambʉlwagha Isilaeli,c ʉlwakʉva ʉgheliine nʉ Ngʉlʉve, kange ʉgheliine na vaanhu, neke ʉlefisie.”
29 Pe ʉYakovo akamʼbʉʉla akati, “Nɨkʉkʉsʉʉma ʉmbʉʉle ɨlɨtavua lyako.”
Neke ʉmuunhu jʉla akamwamʉla akati, “Kɨki ʉkʉmhosia ɨlɨtavua lyango?” Pe akamfuunya.
30 ɄYakovo akati, “Nɨtangʼhiine nʉ Ngʉlʉve mʉ maaso, neke nanɨfwile!” Mʉ ʉluo, apoonu pala akapatambʉla Penueli.d
31 Ɨlɨjʉva lɨkadibwile, ʉYakovo ye ivʉʉka pa Penueli pala, kʉmo ikʉngʉjʉka vwɨmɨla kutelʉka ɨnyonga jaake. 32 Fye nambe kuhanga ʉmʉsyʉghʉ, aVaisilaeli navilia ɨnyama ɨja mʉ lʉkole mʉ nyonga, ʉlwakʉva ʉmuunhu jʉla alyabasisie ɨnyonga ja Yakovo.