ɄYakovo ɨkʉnʼdyegha ʉLabani
31
ɄYakovo akapʉlɨka avaana va Labani vikʉngʼulasia viiti, “ɄYakovo atolile ifiinu fyoni ifya nhaata ghwitu, fye fino fimʼbɨkile kuuva mmofu.” 2 Kange, akakagʉla kuuti, ʉLabani naɨkʉmʼbɨkɨla mwojo ʉmwene ndavʉle ʉlʉtasi. 3 Pe ʉMʉtwa ʉNgʉlʉve akamʼbʉʉla ʉYakovo akati, “Ʉgomoke kʉ ɨɨsi ɨja nhaata ghwako na kʉ vanyalʉkolo vaako. Ʉne niiva palɨkɨmo nuuve.”4 Pe ʉYakovo akasuungʼha ɨmhola, kʉkʉvakemeela avadala vaake ʉLaheli nʉ Lea, kuuti vatangʼhane kʉ lʉnyika kʉno idɨɨma ifidɨmua fyake. 5 Ye vafikile, akavavʉʉla akati, “Nɨvwene ʉnhaata ghwinu naɨkʉmʼbɨkɨla mwojo ndavʉle ʉlʉtasi. Looli ʉNgʉlʉve ʉghwa nhaata ghwango alɨ palɨkɨmo nuune. 6 Mʉkagwile kuuti, ʉne nɨmʼbombiile ʉnhaata ghwinu ni ngʉfu sango sooni. 7 Neke ʉmwene asyangile. Andwile ʉlʉhombo lwango mala kɨjigho. Palɨkɨmo nʉluo, ʉNgʉlʉve naakɨtiike kuuti andemasie. 8 Ʉnhaata ghwinu pano atisagha, ‘Fingaholue ifidɨmua ifinya madeeha luuva lwe lʉhombo lwako,’ ifidɨmua fyoni fyalelagha ifinya madeeha. Angati, ‘Ifidɨmua fyoni ifinya vwolela, luuva lwe lʉhombo lwako,’ ifidɨmua fyoni fyalelagha ifinya vwolela. 9 Enendɨɨkɨ fye ʉNgʉlʉve atolile ifidɨmua ifya nhaata ghwinu, amheliile ʉne.
10 “Ɨkɨghono kɨmonga, mʉ masiki agha fidɨmua kupandua, nɨlyaghoniile injosi. Mʉ njosi isio, imhongo sooni sino silyapandile inhɨghano, simonga silyale nya vwolela, isingi nya madeeha. 11 Ʉnyamhola ghwa Ngʉlʉve alyajovile nuune mʉ njosi isio akati, ‘Yakovo!’ Nɨkɨtɨka nɨkati, ‘Eena, nɨlɨ apa!’
12 “Akambʉʉla akati, ‘Lola, imhongo sooni sino sipanda inhɨghano, sooni sili nʉ vwolela na madeeha. Lʉlɨ enendɨɨkɨ, ʉlwakʉva nɨlolile vʉle akʉvombiile ʉLabani. 13 Ʉne neene Ngʉlʉve ne jʉno nikihʉfisie kʉ Beteli, kʉno ʉkɨmisie ɨlɨvue na kʉkʉlɨkungʼilila amafuta na kufinga kʉlyʉne. Lɨno, ʉvʉʉke mʉ ɨɨsi ɨjɨ, ʉgomoke mʉ ɨɨsi jɨno ʉlyaholilue.’ ”
14 ɄYakovo ye oliike injosi saake, pe ʉLaheli nʉ Lea vakamwamʉla vakati, “Ʉsue tulʉta nuuve, ʉlwakʉva nakwekɨlɨ kange ɨkɨɨnu ɨkya kʉhaala mʉ nyumba ja nhaata ghwitu. 15 Ʉmwene ɨkʉtʉvonagha ʉsue hwene vahesia, ʉlwakʉva alyatʉtavwile na kulia ɨkyʉma kyoni kɨno ʉlyakwile. 16 Kyangʼhaani ʉvʉmofu vwoni vʉno ʉNgʉlʉve atolile kuhʉma kwa nhaata ghwitu, kyʉma kiitu ʉsue na vaana viitu. Lɨno, ʉvombe sooni sino ʉNgʉlʉve akʉvʉlile.”
17 Pe ʉYakovo akilɨngʼhania ʉlʉghendo, akavatosia avadala vaake na vanaake pa ngamɨla. 18 Akahwaga ifidɨmua fyake fyoni na kutoola ifiinu fyake fyoni fino alyakavile mʉ ɨɨsi ɨja Mesopotamia. Akatengʉla ʉlʉghendo kugomoka mʉ ɨɨsi ja Kanaani kwa viise ʉIsaka.
19 Ye vakyale kuvʉʉka, ʉLabani alyalʉtile kudumula ʉlwaghe lwa ngʼholo saake. Kʉmbele ʉLaheli akahɨɨja ifihwani ifya mangʉlʉvea agha viise. 20 Ghwope ʉYakovo naalyalaghile kwa Labani kuuti ivuja kʉvanave, akavʉʉka kɨsyefu. 21 Enendɨɨkɨ fye ʉYakovo alyadyeghile nɨ kyʉma kyake kyoni. Akalovoka ɨkɨkogha ɨkya Eufulati, akalʉngama kulʉta ʉlʉbale ʉlwa fidunda ifya Gileadi.
ɄLabani ɨdagɨla kʉkʉmʉlonda ʉYakovo
22 Ye fikilile ifighono fitatu, ʉLabani akavʉlua kuuti ʉYakovo adyeghile. 23 Pe ʉLabani akavakongʼhania avanyalʉkolo vaake, vakamʼbɨngɨlɨla ʉYakovo mʉmbele ifighono lekelalʉbale. Pe vakamwagha kʉ fidunda mʉ ɨɨsi ɨja Gileadi. 24 Neke ɨkɨlo jɨla, ʉNgʉlʉve akamʼbonekela ʉLabani ʉMʉalamu mʉ njosi akati, “Ghulolelelaghe, nʉngamʼbombaghe kɨmonga ʉYakovo!”
25 ɄLabani ye amwaghile ʉYakovo pano ikalile, asimiike ɨlɨheema lyake mʉ fidunda, mʉ ɨɨsi ɨja Gileadi, ghwope ʉLabani na vanyalʉkolo vaake vakasimika ɨlɨheema mʉ fidunda ifio.
26 Pe ʉLabani akamʼbʉʉla ʉYakovo akati, “Kɨki ʉvombile ʉlʉ? Ʉsyangile na kutoola avalɨvango hwene vaghomua kʉ vʉlʉgʉ! 27 Kɨki ghwadyegha, ghwaleka kʉkʉndagha? Kɨki naghwambʉʉla, neke nɨkʉlaghe nʉ lʉkeelo, ni nyɨmbo ni ngoma na magombo? 28 Kɨki naghwamheela ʉnsiki ʉghwa kʉvalagha avalɨvango na visukulu vango kuuti nɨvanonele? Ʉvombile isa kɨjasu! 29 Nɨlɨ ni ngʉfu isa kʉkʉlemasia, neke ɨkɨlo ɨja kʉsisimukila ʉmʉsyʉghʉ, ʉNgʉlʉve ʉghwa nhaata ghwako ambʉlile kuuti, ‘Ghulolelelaghe, nʉngamʼbombaghe kɨmonga ʉYakobo!’ 30 Nivona ʉlɨ nʉ vʉsyʉkue fiijo kugomoka kʉ kaaja kwa vaaso. Neke kɨki ʉhɨjile ifihwani ifya mangʉlʉve ghango?”
31 ɄYakovo akamwamʉla ʉLabani akati, “Nadyegha, ʉlwakʉva noghwopa kuuti ndepoonu ghukuunya avalɨvo kʉ ngʉfu. 32 Neke ʉngamwaghe ʉmuunhu jʉno alɨ na mangʉlʉve ghaako, abudue bahaapa! Pamaaso gha vanyalʉkolo viitu, ʉlole nave pwekɨlɨ kɨmonga kɨno kyako, ʉtoole.” Ʉnsiki ʉghuo, ʉYakovo naakakagwile kuuti ʉLaheli ahɨjile ifihwani ifya mangʉlʉve gha viise.
33 Pe ʉLabani akingila mulonda ifihwani fila mʉ lɨheema lya Yakovo nɨ lya Lea nɨ lya vakami vala vavɨlɨ, neke naakafyagha. Pambele akingila mʉ lɨheema lya Laheli. 34 ɄLaheli ghwe jʉno akapɨndile ifihwani ifio, akafisa paasi pa matandɨko gha ngamɨla, pe akikalɨla. ɄLabani akalonda mʉ lɨheema lyoni, naakafyagha. 35 Pe ʉLaheli akamʼbʉʉla ʉviise akati, “Nhaata ghwango, nʉngakalalaghe, ʉne nanɨngɨɨme pamaaso ghaako, ʉlwakʉva nɨlɨ mʉ fighono fyango.” ɄLabani akalonda ifihwani ifya mangʉlʉve ghaake aghuo, naakafyagha.
36 Pe ʉYakovo akakalala, akamposia ʉLabani akati, “Nɨhokile kɨki? Nɨvombile kɨki ɨkɨviivi kuhanga ghukundagɨla enendɨɨkɨ? 37 Ʉsambʉlinie ifikongʼholo fyango fyoni. Lɨno ʉkyaghile kɨki ɨkyako? Kɨvɨɨke apa pamaaso gha vanyalʉkolo vango na vanyalʉkolo vaako, pe vatʉlamʉlanie ʉsue twe vavɨɨlɨ!
38 “Nikalile nuuve amaaka fijigho fivɨlɨ. Ʉnsiki ghwoni ʉghuo, napalɨ mhene jaako nambe ngʼholo jɨno jɨholotwile, nambe kughela kulia ɨduuvi mʉ fidɨmua fyako. 39 Nave ɨkɨdɨmua kɨmonga kɨkakolilue nɨ kɨkanu kʉ lɨsoli, nakʉhombagha! Kange, nave ɨkɨdɨmua kɨmonga kɨhɨjilue pakɨlo nambe pamwisi, ghwatisagha nɨhombe.
40 “Navombagha ɨmbombo nʉ lʉpumuko: Pamwisi najetʉkagha nʉ lʉjʉva, pakɨlo napumukagha nɨ mhepo kuhanga nakunwagha kughona itʉlʉ. 41 Nɨkikalile kʉlyʉve amaaka fijigho fivɨlɨ: Nɨkakʉvombiile ɨmbombo amaaka kɨjigho na ghane vwɨmɨla kutoola avalɨvo vavɨlɨ. Kange, amaaka ntanda nɨkʉdɨmiile ifidɨmua fyako. Neke ʉve ʉkandwile ʉlʉhombo lwango mala kɨjigho.
42 “ɄNgʉlʉve ghwa nkʉʉlʉ ghwango ʉAbulahamu, ʉNgʉlʉve jʉno ʉnhaata ghwango ʉIsaka akamwɨmɨkagha, ale aleke piiva palɨkɨmo nuune, ghwale ghʉkʉndaga mavoko gheene. Neke ʉNgʉlʉve akalwaghile ʉlʉpumuko lwango nɨ mbombo ɨmbaha jɨno nɨkavombile na mavoko ghango, fye nambe akʉdalɨkiile ɨkɨlo ja mʉsyʉghʉ.”
ɄYakovo nʉ Labani vikwɨtɨngʼhana
43 ɄLabani akamwamʉla ʉYakovo akati, “Avahɨnja ava, valɨvango; avaana ava, visukulu vango; ifidɨmua ifi fyoni, fyango; kange fyoni fino ʉkʉfivona apa, fyango. Neke lɨno, nɨlɨ nsila kya kʉvomba pamaaso gha valɨvango na vaana vaave! 44 Isagha twɨtɨngʼhane, tʉfingane. Ʉlʉfingo ʉluo lʉvisaghe vwolesi pakate palyʉsue.”
45 Pe ʉYakovo akatoola ɨlɨvue, akalyɨmia hwene sɨmbɨlɨ kuuti mwe vakʉmbʉkɨlaghe. 46 Akavavʉʉla avanyalʉkolo vaake akati, “Mʉkongʼhanie amavue.” Vakakongʼhania amavue, kɨkava kɨlʉndo. Pe vakikala piipi nɨ kɨlʉndo ɨkio ɨkya mavue vilia ɨkyakʉlia kukangasia ʉlʉfingo. 47 Apoonu pala ʉLabani mʉ njovele jaake ɨja Kɨalamaiki akapatambʉla Yegali-Sahaduta, neke ʉYakovo mʉ njovele jaake ɨja Kɨebulania akapatambʉla Galedi. Amatavua agha ʉmʉlʉvo ghwake kwekʉti, kɨlʉndo ɨkya kʉtʉkʉmbʉsia.
48 ɄLabani akamʼbʉʉla ʉYakovo akati, “Ɨkɨlʉndo ɨkɨ ɨkya mavue, kɨkʉtʉkʉmbʉsyagha ʉlʉfingo lʉno tʉfingile ʉne nuuve ɨkɨghono ɨkya mʉsyʉghʉ.” Fye nambe pitambʉlua Galedi. 49 Kange, apoonu apuo pakatambʉlua Misipa,b ʉlwakʉva ʉLabani alyatiile, “ɄMʉtwa ʉNgʉlʉve aave mwɨmɨlɨli kʉkʉtʉlola ʉlʉveelo lwitu, pano nʉjʉnge alɨ kʉtali. 50 Nave ghulikʉvagasia avalɨvango ava, nambe kutoola avakɨjʉʉva avange, ʉkagʉlaghe kuuti nambe ʉne nɨlɨ kʉtali, ʉNgʉlʉve ghwe mwene ikwɨmɨlɨla ʉlʉfingo lwango nuuve.”
51 ɄLabani akamʼbʉʉla kange ʉYakovo akati, “Lolagha ɨkɨlʉndo ɨkɨ ɨkya mavue nɨ sɨmbɨlɨ jɨno nɨmisie vwɨmɨla ʉne nuuve. 52 Ɨkɨlʉndo ɨkɨ nɨ sɨmbɨlɨ ɨjɨ kɨvalɨlo, kange vwolesi kuuti, ʉne nanɨngakilaghe ɨkɨlʉndo ɨkɨ kukwisa kʉlyʉve kʉkʉkʉlemasia, na jʉʉve nʉngakilaghe ɨkɨlʉndo ɨkɨ nɨ sɨmbɨlɨ ɨjɨ kukwisa kʉkʉndemasia. 53 ɄNgʉlʉve ghwa Abulahamu, ʉNgʉlʉve ghwa Naholi, ʉNgʉlʉve ghwa vakʉʉlʉ viitu, ghwe aave mhɨghi pakate palyʉsue!” Pe ʉYakovo akajɨɨgha mʉ lɨtavua lya Ngʉlʉve jʉno ʉviise ʉIsaka akamwɨmɨkagha. 54 Pe ʉYakovo akahʉmia ɨlɨtekelo pa fidunda pala, akakuuta avanyalʉkolo vaake kuuti viise kulia ɨkyakʉlia palɨkɨmo. Ye vamalile kulia, vakaghona pala.
55 Ɨkɨghono ɨkɨvɨngɨlɨli ʉLabani akalavɨla, akalʉta kʉ valɨve na kʉ visukulu akavanonela, akavafuunya. Pe akavʉʉka igomoka kʉ kaaja.