30
ɄLaheli ye avwene naampapiile ʉYakovo avaana, akatengʉla kuuva nɨ kɨvini kwa nkʉlʉ ʉLea. Akamʼbʉʉla ʉYakovo akati, “Na jʉʉne ʉmheele avaana! Nave naniiva na vaana, nifua!” 2 ɄYakovo akankalalɨla ʉLaheli akati, “Ʉne neene Ngʉlʉve jʉno akʉsighile kupaapa?” 3 ɄLaheli akamʼbʉʉla akati, “Ʉnkami ghwango ʉBiliha pwale, ʉghone naghwo apaape avaana, neke kukilila ʉmwene, na jʉʉne nɨɨve na vaana!” 4 Pe ʉLaheli akampeela ʉYakovo ʉnkami ghwake ʉBiliha aave nʼdala ghwake, ʉYakovo akaghona naghwo. 5 ɄBiliha akava nkunue, akampapɨla ʉYakovo ʉmwana ʉnʼdɨɨmi. 6 ɄLaheli akati, “ɄNgʉlʉve anhangile, apʉliike ʉlufuunyo lwango, amheliile ʉmwana ʉnʼdɨɨmi.” Pe akampeela ɨlɨtavua ɨlɨ Dani.a7 ɄBiliha, ʉnkami ghwa Laheli, akava nkunue kange, akampapɨla ʉYakovo ʉmwana ʉghwa vʉvɨlɨ, ʉnʼdɨɨmi. 8 ɄLaheli akati, “Nɨlwanile nʉ nkʉlʉvango, nɨntolile!” Pe akampeela ɨlɨtavua ɨlɨ Nafutali.b
9 ɄLea ye avwene ɨmile kʉpaapa, akantoola ʉnkami ghwake ʉSilipa, akampeela ʉYakovo kuuti aave nʼdala ghwake. 10 ɄSilipa akampapɨla ʉYakovo ʉmwana ʉnʼdɨɨmi. 11 ɄLea akati, “Lufuunyo lʉnofu!” Pe akampeela ɨlɨtavua ɨlɨ Gadi.c 12 ɄSilipa, ʉnkami ghwa Lea, akampapɨla kange ʉYakovo ʉmwana ʉghwa vʉvɨlɨ, ʉnʼdɨɨmi. 13 ɄLea akajova kange akati, “Nɨfunyilue! Avakɨjʉʉva avajango vikʉnhambʉlagha mfunyua.” Pe akampeela ɨlɨtavua ɨlɨ Asheli.d
14 Ɨkɨghono kɨmonga, ʉnsiki ʉghwa kʉbena ɨngano, ʉLubeni akalʉta kʉ mʉghʉnda, akafivona ifipeke ifya tunguja.e Akadonola, akamʉletela ʉngʼina ʉLea. ɄLaheli akamʼbʉʉla ʉLea akati, “Nisʉʉma ʉmheele itunguja sino ʉmwanaako adonwile.” 15 Neke ʉLea akamʉla akati, “Ghusaagha kuuti, kɨɨnu kɨdebe kukuunya ʉmʉghoosi ghwango, kange lɨno ghulonda kutoola nasi tunguja sa mwanango?” ɄLaheli ghwope akamwamʉla akati, “Ʉngamheele itunguja isa mwanaako, ʉYakovo ikwisa kughona kʉlyʉve ʉmʉsyʉghʉ.”
16 Pakɨvwilile ʉYakovo ye igomoka kuhʉma kʉ mʉghʉnda, ʉLea akalʉta kʉkʉmwʉpɨla, akamʼbʉʉla akati, “Ʉmʉsyʉghʉ, ghughona kʉlyʉne, ʉlwakʉva nɨkʉghʉlile ni tunguja isa mwanango.” Pe ʉYakovo akaghona kwa Lea ɨkɨlo jɨla.
17 ɄNgʉlʉve akapʉlɨka ʉlufuunyo ʉlwa Lea. Akava nkunue, akampapɨla ʉYakovo ʉmwana ʉghwa vʉhaano, ʉnʼdɨɨmi. 18 ɄLea akati, “ɄNgʉlʉve ambonwile, ʉlwakʉva nɨkampeliile ʉmʉghoosi ghwango ʉnkami ghwango kuuva nʼdala ghwake!” Pe akampeela ɨlɨtavua ɨlɨ Isakali.f
19 ɄLea akava nkunue kange, akampapɨla ʉYakovo ʉmwana ʉghwa ntanda, ʉnʼdɨɨmi. 20 Akati, “ɄNgʉlʉve amheliile ʉlʉvonolo ʉlʉnono! Ʉnsiki ʉghʉ ʉmʉghoosi ghwango ɨkʉmbɨkɨlagha mwojo, ʉlwakʉva nɨmpapiile avaana ntanda, avadɨɨmi.” Ʉmwana ʉjuo akampeela ɨlɨtavua ɨlɨ Sabuloni.g 21 Pambele ʉLea akapaapa ʉmwana ʉmhɨnja akantambʉla Dina.
22 ɄNgʉlʉve naakansyemua ʉLaheli. Akapʉlɨka ʉlufuunyo lwake, akampeela ingʉfu isa kʉpaapa. 23 ɄLaheli akava nkunue, akapaapa ʉmwana ʉnʼdɨɨmi. Akati, “ɄNgʉlʉve ambʉsɨkisie isoni!” 24 Akampeela ʉmwana ʉjuo ɨlɨtavua ɨlɨ Yosefu,h akati, “ɄMʉtwa ʉNgʉlʉve anyongelesie ʉmwana ʉjʉnge ʉnʼdɨɨmi.”
ɄYakovo iiva mmofu
25 ɄLaheli ye ampapile ʉYosefu, ʉYakovo akamʼbʉʉla ʉLabani akati, “Ʉnyɨtɨkɨsie nɨgomoke kʉ kaaja, mʉ ɨɨsi jango. 26 Ʉmheele avadala vango na vanango vano nɨpatile vwɨmɨla kʉkʉkʉvombela ɨmbombo. Ʉve ʉkagwile vʉle nɨkʉvombiile ɨmbombo vʉnofu.”
27 Neke ʉLabani akamʼbʉʉla akati, “Ʉmhʉlɨkɨsie, nɨkʉkʉsʉʉma ghukale nuune apa, ʉlwakʉva nɨkagwile kuuti ʉMʉtwa ʉNgʉlʉve afunyile ʉne vwɨmɨla ʉve. 28 Ʉmbʉʉle ʉlʉhombo lʉno ghulonda.” 29 ɄYakovo akamʼbʉʉla akati, “Ʉve ʉkagwile vʉle nɨkakʉvombiile, na vʉle fyolwike ifidɨmua fyako. 30 Ye nɨkyale kukwisa, ʉlyale nɨ kyʉma kɨdebe. Neke kuhʉma nikwisa ʉne, ʉMʉtwa ʉNgʉlʉve akʉfunyile, ɨkyʉma kyako kinga. Lɨno, nilonda ʉvweleefu ʉvwa kʉvomba ɨmbombo isa nyumba jango jʉʉne.”
31 ɄLabani akamwamʉla akati, “Ghulonda nɨkʉpeele kɨki?” ɄYakovo akamʉla akati, “Nʉngahombaghe kɨmonga. Ʉlwene nave ghʉkʉmbombela ɨkɨɨnu ɨkɨ kɨmo, nifidɨmagha na kulolelela ifidɨmua fyako. 32 Lɨno, ʉmʉsyʉghʉ ʉnyɨtɨkɨsie ningile mʉ fidɨmua fyako, nɨbaghʉle ifidɨmua ifinya madeeha, ingʼholo sooni inhiitu ni mhene sooni inya madeeha, isio luuva lwe lʉhombo lwango. 33 Mʉ fighono ifya kʉvʉlongolo ghuliiva ghukwisa kulola ʉlʉhombo lwango, ghulilola ʉvʉkoola vwango. Ʉngajaaghe ɨmhene jɨmonga ɨsila madeeha nambe ɨngʼholo jɨno nanhiitu sivoneka mʉ lʉvagha lwango, apuo ʉkagʉlaghe kuuti nɨhɨjile.”
34 ɄLabani akamʉla akati, “Lʉnofu, sooni sino ʉjovile nikwɨtɨka.” 35 Neke ɨkɨghono ɨkio, ʉLabani akalʉta kubaghʉla ifidɨmua. Akabaghʉla imhongo sooni inya vwolela na madeeha, ni mhene sooni inhɨghano sino sili na madeeha. Kwekʉti imhene sooni sino silyale nʉ vʉvalafu ni ngʼholo inhiitu sooni akabaghʉla. Ifidɨmua ifi fyoni akafivɨɨka mʉ vʉloleleli vwa vanaake. 36 Pe ʉLabani akamʉleka ʉYakovo, akalʉta pamonga pa vʉtali, pa lʉghendo ʉlwa fighono fitatu. ɄYakovo akajigha idɨɨma ifidɨmua ifya Labani fino fisighiile.
37 Pe ʉYakovo akadumula ingʼhwegho inyiighu isa mapiki ghatatu: ʉmlubuna, ʉntevele, ʉmwalamoni. Akabandʉla amabandu kuuti ʉvwolela ʉvʉvalafu vʉvoneke mʉnkate. 38 Pe akasimika ingʼhwegho sila mʉ malamba gha kʉnywelesia ifidɨmua, kuuti sivisaghe kʉvʉlongolo kʉ fidɨmua, pano finyua amalenga. Lɨno, ʉlwakʉva ifidɨmua fikapandanagha pano finyua amalenga, 39 fikava fipandana pano ingʼhwegho sili kʉvʉlongolo kʉ fyene. Mʉ ʉluo, ifidɨmua fikava filela inyaana inya vwolela na madeeha. 40 ɄYakovo akabaghʉla inyaana sila kuuva seene. Neke akasivɨɨka silʉngamaghe kʉ fidɨmua ifya Labani fino filyale nʉ vwolela nʉ vʉtiitu. Mʉ ʉluo, ifidɨmua fyake fikafikwongelelagha na kubaghʉla mʉ fidɨmua fya Labani.
41 Ifighono fyoni pano ghʉkafikagha ʉnsiki ʉghwa fidɨmua ifinenefu kupandua, ʉYakovo akavɨkagha ingʼhwegho sila mʉ malamba kʉvʉlongolo kʉ fidɨmua ifio, kuuti fipandue piipi ni ngʼhwegho sila. 42 Neke ifidɨmua ifivotevote, pano ghʉkafikagha ʉnsiki ʉghwa kʉpandua, naakavɨkagha ingʼhwegho sila. Mʉ ʉluo, ʉLabani akava ni fidɨmua ifivotevote, ʉYakovo akava ni fidɨmua ifinenefu. 43 Pambele ʉYakovo akava mmofu fiijo. Akava ni fidɨmua finga, ingamɨla ni dogovi, palɨkɨmo na vavombi avahɨnja na vadɨɨmi.