ɄYakovo ifika kwa Labani
29
ɄYakovo akafilʉtagha kuhanga akafika kʉ vaanhu vano vikukala imbale isa kʉvʉdibulo. 2 Ʉkuo akakyagha ɨkɨtiimu kʉ lʉnyika, na mapʉgha ghatatu agha ngʼholo sifungile piipi nɨ kɨtiimu ɨkio. Ingʼholo isio silyale sighuula avaanhu vasinywelesie amalenga kuhʉma mʉ kɨtiimu ɨkio. Pakyanya pa kɨtiimu vakafunikagha ɨlɨvue ɨlɨvaha. 3 Ʉvʉtavɨke kʉ kɨtiimu ɨkio vʉlyale ndɨɨkɨ: Amapʉgha ghooni agha ngʼholo pano ghakakongʼhanagha apuo, avadɨɨmi vakavungulusyagha ɨlɨvue ɨlio pa kɨtiimu, neke vakanywelesyagha ingʼholo. Pano vamalile kʉnywelesia, vakafunikagha kange ɨkɨtiimu nɨ lɨvue ɨlio.4 Pe ʉYakovo akaposia avadɨɨmi akati, “Vanyalʉkolo vango, mʉhʉmile kʉʉghi?” Voope vakamʉla vakati, “Tʉhʉmile mʉ lɨkaaja ɨlya Halani.” 5 Akavaposia kange akati, “Asi, mʉmmanyile ʉmuunhu jʉmonga itambʉlua Labani ʉmʉsukulu Naholi?” Vakamʉla vakati, “Tʉmmanyile.” 6 Akavaposia kange akati, “Nkafu?” Voope vakamʉla vakati, “Nkafu, najʉ mwalɨve jʉno itambʉlua Laheli afiike ni ngʼholo.” 7 ɄYakovo akavavʉʉla akati, “Nivona jɨjiighe mwisi, mwangʉpiile kyongo kʉkongʼhania ingʼholo. Lɨno, mʉnywelesie, mʉlʉte kudɨɨma.” 8 Avadɨɨmi vala vakamwamʉla vakati, “Natʉnganywelesie kuhanga amapʉgha ghooni ghakongʼhaane palɨkɨmo, neke ɨlɨvue lɨbɨlʉsivue pa kɨtiimu, pe tʉnywelesie ingʼholo.”
9 ɄYakovo ye ajiighe ijova na vadɨɨmi vala, ʉLaheli akafika ni ngʼholo sa viise, ʉlwakʉva ghwe jʉno akadɨmagha. 10 ɄYakovo ye amwaghile ʉLaheli, ʉmwalɨve ghwa mupwave ʉLabani, palɨkɨmo ni ngʼholo sa Labani, akalʉta pa kɨtiimu, akabɨlʉsia ɨlɨvue lɨla, akanywelesia ingʼholo isa mupwave ʉLabani. 11 Pe akannonela ʉLaheli kʉkʉmhʉngɨla, akalɨla fiijo. 12 ɄYakovo akamʼbʉʉla akati, “Ʉne nɨlɨ nyalʉkolo ghwa nhaata ghwako! Ʉmama ghwango ghwe Lebeka!” ɄLaheli akakɨmbɨla kulʉta kʉ kaaja, akamʼbʉʉla ʉviise ɨmhola ɨja Yakovo.
13 ɄLabani ye apʉliike imhola isa mupwave ʉYakovo, akalʉta lʉvɨlo kʉkʉmwʉpɨla. Akamʉyayɨla, akannonela, akantwala kwa mwene. Apuo ʉYakovo akamwoleka sooni sino sikahʉmiile. 14 ɄLabani akamʼbʉʉla akati, “Kyangʼhaani ʉve ʉlɨ nyalʉkolo ghwango, lɨdanda lyango!”
ɄYakovo ɨkʉntoola ʉLea nʉ Laheli
ɄYakovo ye ikalile kwa Labani ʉmwesi ghʉmo, 15 ʉLabani akamʼbʉʉla ʉYakovo akati, “Ʉve ʉlɨ nyalʉkolo ghwango. Neke nalʉnoghiile ʉmbombelaghe ɨmbombo vʉvʉle. Lɨno, ʉmbʉʉle, nɨkʉpelaghe ʉlʉhombo lʉki?”
16 ɄLabani alyale na valɨve vavɨlɨ, ʉmʼbaha alyale itambʉlua Lea, ʉnʼdebe alyale itambʉlua Laheli. 17 ɄLea alyale na maaso amanono,a neke ʉLaheli alyale nnono pa maaso nʉ mʼbɨlɨ ghʉno ghuhovosia. 18 ɄYakovo alyamʉghanile ʉLaheli, akamʼbʉʉla ʉLabani akati, “Nivomba ɨmbombo kʉlyʉve amaaka lekelalʉbale, neke ʉmheele ʉmwalɨvo ʉnʼdebe ʉLaheli.” 19 ɄLabani akati, “Kʉba ʉntoole ʉve ʉLaheli, nanilonda ʉmuunhu ʉjʉnge antoole. Jighagha palyʉne apa.” 20 Mʉ ʉluo, ʉYakovo akamʼbombela ɨmbombo ʉLabani amaaka lekelalʉbale vwɨmɨla kʉkʉntoola ʉLaheli. Neke amaaka lekelalʉbale aghuo, ʉYakovo akavona hwene fighono fidebe vʉvʉle, ʉlwakʉva alyamʉghanile fiijo ʉLaheli.
21 Amaaka aghuo ye ghasilile, ʉYakovo akamʼbʉʉla ʉLabani akati, “Nɨmalile amaaka ghango kʉkʉkʉvombela ɨmbombo. Lɨno, ʉmheele ʉnʼdala ghwango, nikalaghe naghwo.”b 22 Pe ʉLabani akaghongoola avaanhu vooni ava pala, akatenda ɨkɨkulukulu ɨkya vʉtolani. 23 Neke ye vwilile, jɨfikile ɨngʼhiisi, ʉLabani akantoola ʉLea, ʉmwalɨve ʉmʼbaha, akantwalɨla ʉYakovo. ɄYakovo akaghona naghwo. 24 ɄLabani akampeela ʉLea ʉnkami ghwake ʉmhɨnja ʉSilipa, kuuti amʼbombelaghe ɨmbombo.
25 Ye kʉkiile, ʉYakovo akavona ghwe Lea, akadegha! Akalʉta kʉkʉmposia ʉLabani akati, “Ʉmbombiile kɨki? Nɨkakʉvombiile ɨmbombo neke nɨntoole ʉLaheli, lɨno ongo ʉsyangile?” 26 ɄLabani akamwamʉla akati, “Kʉlyʉsue, nalwiho kʉkʉntolesia ʉmhɨnja ʉnʼdebe, nave ʉmʼbaha naatolilue. 27 Lɨno, tʉmale ifighono ifi ifya kɨkulukulu ɨkya vʉtolani, pe nɨkʉkʉpeela ʉLaheli. Neke ghʉkʉmbombela ɨmbombo kange amaaka lekelalʉbale.”
28 ɄYakovo akɨtɨka. Akamala ifighono lekelalʉbale ifya vʉtolani ʉvwa Lea, pe ʉLabani akampeela ʉLaheli ghwope kuuva nʼdala ghwake. 29 ɄLabani akampeela ʉLaheli ʉnkami ghwake ʉmhɨnja ʉBiliha, kuuti amʼbombelaghe ɨmbombo. 30 ɄYakovo akaghona nʉ Laheli. Alyamʉghanile ʉLaheli kukila ʉLea. ɄYakovo akamʼbombela kange ʉLabani ɨmbombo amaaka lekelalʉbale vwɨmɨla ʉLaheli.
Avaana va Yakovo
31 ɄMʉtwa ʉNgʉlʉve ye avwene kuuti ʉLea nsʉʉle, akantanga kupaapa avaana, neke ʉLaheli akava mʉghʉmba. 32 ɄLea akava nʉ vʉkunue, akapaapa ʉmwana ʉnʼdɨɨmi, akampeela ɨlɨtavua ɨlɨ Lubeni.c Akati, “ɄMʉtwa ʉNgʉlʉve alwaghile ʉlʉpumuko lwango, lɨno ʉmʉghoosi ghwango ɨkʉnganagha.”
33 ɄLea akava nkunue kange, akapaapa ʉmwana ʉnʼdɨɨmi, akati, “ɄMʉtwa ʉNgʉlʉve amheliile kange ʉmwana ʉnʼdɨɨmi, ʉlwakʉva apʉliike kuuti nɨlɨ nsʉʉle.” Pe akampeela ɨlɨtavua ɨlɨ Simioni.d
34 Akava nkunue kange, akapaapa ʉmwana ʉnʼdɨɨmi, akati, “Ʉnsiki ʉghʉ, ʉmʉghoosi ghwango iiva palɨkɨmo nuune, ʉlwakʉva nɨmpapiile avaana vatatu avadɨɨmi.” Pe akampeela ɨlɨtavua ɨlɨ Leevi.e
35 Akava nkunue kange, akapaapa ʉmwana ʉnʼdɨɨmi, akati, “Ʉnsiki ʉghʉ nɨkʉmʉghinia ʉMʉtwa ʉNgʉlʉve.” Pe akampeela ɨlɨtavua ɨlɨ Yuuda.f Pe akɨɨma kupaapa.