28
ɄIsaka akankemeela ʉYakovo, akamfuunya, akamʉlaghɨla akati, “Nʉngatolaghe ʉmʉkɨjʉʉva ʉghwa mʉ ɨɨsi ɨja Kanaani. 2 Ʉlʉte mʉ ɨɨsi ɨja Mesopotamia, mʉ nyumba ɨja Betueli, ʉviise ghwa mama ghwako, ʉntoole ʉmo mʉ valɨve va mupwavo ʉLabani. 3 ɄNgʉlʉve ʉNyangʉfu Sooni akʉfuunye! Ʉvisaghe nʉ mwoloko, mʉvisaghe vinga, neke mʉʉve kɨsina kɨkome. 4 Akʉfuunye ʉve palɨkɨmo nʉ mwoloko ghwako, akʉpeele inyifuunyo sino alyalaghile kʉkʉmpeela ʉAbulahamu, kuuti ʉve ʉhaale ɨɨsi ɨjɨ muno ghukukala mʉ vʉgheesi, ɨɨsi jɨno alyalaghile kʉkʉmpeela ʉAbulahamu.”5 Pe ʉIsaka akansuungʼha ʉYakovo kulʉta kʉ Mesopotamia, kʉ nyumba ɨja Labani, ʉmwana ghwa Betueli, ʉMʉalamu. ɄLabani ʉjuo lʉmbʉ ghwa Lebeka, ʉngʼina ghwa Yakovo nʉ Esau.
ɄEsau itoola ʉnʼdala ʉjʉnge
6 ɄEsau akakagʉla kuuti ʉviise amfunyile ʉYakovo, na kʉkʉnsuungʼha atoole ʉnʼdala mʉ ɨɨsi ɨja Mesopotamia. Kange, akakagʉla kuuti, ʉIsaka ye ɨkʉmfuunya ʉYakovo, ankaana kutoola ʉmhɨnja ʉghwa mʉ ɨɨsi ɨja Kanaani. 7 Akakagʉla kange kuuti ʉYakovo avakʉndile ʉviise nʉ ngʼina, alʉtile kʉ Mesopotamia.
8 Pe ʉEsau akakagʉla kuuti ʉviise ʉIsaka naikeela avahɨnja ava mʉ ɨɨsi ɨja Kanaani. 9 Mʉ ʉluo, akalʉta kwa Isimaeli ʉmwana ʉmʼbaha ʉghwa Abulahamu, akatoola ʉmhɨnja jʉmonga mʉ vaana va Isimaeli kuuva nʼdala ghwake, akamʼbɨɨka palɨkɨmo na vadala vaake avange. Ʉnʼdala ʉjuo akatambʉlwagha Mahalati, ʉlʉmbʉ akatambʉlwagha Nebayoti.
ɄYakovo ighonela injosi
10 ɄYakovo akavʉʉka kʉ Beeli-Sheba, akalʉngama kʉ Halani. 11 Ye afikile pamonga, ɨlɨjʉva lɨkava lɨsemile, akalamʉla kughona apuo. Akatoola ɨlɨvue lɨmonga pala, akafigha kʉ mutu, akaghona. 12 Ye aghoneliile, akaghonela injosi. Akavona ʉntandalɨlo ghwɨmile kuhʉma paasi pa ɨɨsi kufika kʉkyanya. Avanyamhola va Ngʉlʉve vakava vitogha na kukwika mʉ ntandalɨlo ghʉla. 13 Mʉ njosi isio akamwagha ʉMʉtwa ʉNgʉlʉve ɨmile piipi nʉ mwene, ɨkʉmʼbʉʉla iiti, “Ʉne neene Mʉtwa Ngʉlʉve, Ngʉlʉve ghwa nkʉʉlʉ ghwako ʉAbulahamu, kange Ngʉlʉve ghwa nhaata ghwako ʉIsaka. Ɨɨsi jɨno ʉghonile, nɨkʉkʉpeela ʉve palɨkɨmo na vanyeenya vaako. 14 Ʉmwoloko ghwako ghuuva ndavʉle ʉlʉngʼhʉnde, vilikwɨla imbale sooni: kʉvʉdibulo na kʉvʉseemo, kʉvwehe na kʉmavemba. Kukilila ʉmwoloko ghwako, avaanhu vooni mʉ ɨɨsi vilifunyua. 15 Pʉlɨkɨsia! Ʉne nɨlɨ palɨkɨmo nuuve, nɨkʉkʉlolelelagha kwoni kʉno ghulʉta, na kʉkʉkʉgomosia mʉ ɨɨsi ɨjɨ. Nanɨngakʉleke kuhanga nɨkwɨlanɨsie sino nɨkʉlaghile.”
16 Pe ʉYakovo akasisimuka akati, “Kyangʼhaani, ʉMʉtwa ʉNgʉlʉve pwale apa! Nanɨveele nɨkagwile!” 17 Mʉ ʉluo, akoghopa kyongo akati, “Apoonu apa pikwoghofia fiijo! Luvoneka apa, nyumba ja Ngʉlʉve, kange mʉlyango ghwa kwingilila kʉkyanya.”
18 Ye kʉkiile, ʉYakovo akatoola ɨlɨvue lɨno afigha kʉ mutu, akalyɨmia hwene sɨmbɨlɨ kuuva kɨvalɨlo, akalɨkungʼilila amafuta kʉkʉlyɨmɨka. 19 Apoonu pala akapatambʉla Beteli,a ʉlʉtasi ɨlɨkaaja ɨlio lɨkatambʉlwagha Lusu.
20 Pe ʉYakovo akafinga akati, “Ghwe Ngʉlʉve, nave ghuuva palɨkɨmo nuune na kʉkʉndolelela mʉ lʉghendo lwango, ʉngamheele ɨkyakʉlia na menda, 21 na kʉkʉngomosia kʉ kaaja kwa nhaata ghwango vʉnofu, apuo Mʉtwa Ngʉlʉve, ghuuva Ngʉlʉve ghwango. 22 Nalɨ lɨvue ɨlɨ lɨno nɨmisie apa hwene sɨmbɨlɨ, pe pa kʉkwɨmɨka ʉve Ngʉlʉve. Kange, mʉ fiinu fyoni fino ghʉkʉmheela, kyangʼhaani nɨkʉkʉtavʉlɨlagha ɨkɨlʉndo kɨmo mʉ filʉndo kɨjigho.”