ɄIsaka ihamɨla kʉ Gelali
26
Ʉnsiki ghʉmonga jɨlyahʉmiile ɨnjala ɨmbaha mʉ ɨɨsi ʉmuo. Ɨnjala ɨjio naje jɨno jɨlyaghwile ʉnsiki ʉghwa Abulahamu.a ɄIsaka akalʉta kʉ lɨkaaja ɨlya Gelali, kwa Abimeleki, ʉntwa ghwa Vafilisiti.2 ɄMʉtwa ʉNgʉlʉve akamʼbonekela ʉIsaka, akamʼbʉʉla akati, “Nʉngalʉtaghe kʉ Misili, looli ghukalaghe mʉ ɨɨsi jɨno nɨkʉkʉvʉʉla. 3 Ghukalaghe mʉ ɨɨsi ɨjio, na jʉʉne nivisagha palɨkɨmo nuuve, kange nɨkʉkʉfuunya. Nikwɨlanɨsia ʉlʉjɨɨgho lʉno nɨlyajɨghile pamaaso gha vaaso ʉAbulahamu kuuti, nilikʉkʉpeela ʉve na vanyeenya vaako, imbale isi sooni.b 4 Nilikwongelesia ʉmwoloko ghwako ghuuva ndavʉle inhondue isa kʉkyanya, kange nilikʉvapeela imbale isi sooni. Kange, kukilila ʉmwoloko ghwako, avaanhu vooni mʉ ɨɨsi vilifunyua. 5 Nɨkʉkʉfuunya, ʉlwakʉva ʉAbulahamu alyale ɨkʉngʼhʉnda, akavɨngɨlɨlagha indaghɨlo sango, imbʉngo sango, nʉ vʉlamʉsi vwango.” 6 Pe ʉIsaka akikala kʉ Gelali.
7 Avaanhu va mʉ lɨkaaja ɨlio vakamposia ʉIsaka vwɨmɨla ʉnʼdala ghwake. Ʉmwene akavamʉla akati, “Ʉjʉ lʉmbʉlyango.” Akoghwipe kujova kuuti nʼdala ghwake, ʉlwakʉva avaanhu va lɨkaaja ɨlio vale vikʉmʼbuda vwɨmɨla ʉLebeka, ʉlwakʉva alyale nnono fiijo.
8 ɄIsaka alikalile kʉla ifighono finga. Ɨkɨghono kɨmonga, ʉntwa ghwa Vafilisiti ʉAbimeleki, akahʉngɨɨla pa lɨdiliisa, akavona ʉIsaka vaghumbatɨliine nʉ nʼdala ghwake ʉLebeka. 9 Pe ʉAbimeleki akankemeela ʉIsaka, akamposia akati, “Hɨmbe, ʉjuo nʼdala ghwako! Ongo ʉkatiile lʉmbʉlio?” ɄIsaka akamwamʉla akati, “Nɨkajovile ʉluo, ʉlwakʉva nɨkoghwipe kuuti, avaanhu kyavikʉmbuda vwɨmɨla ʉmwene.”
10 Pe ʉAbimeleki akamposia akati, “Se nyɨki isi sino ʉtʉvombiile? Ʉmuunhu ghweni pakate palyʉsue ale ighona nʉ nʼdala ghwako kɨsila kʉkagʉla, mʉ ʉluo ghwale ghʉkʉtʉhosia!” 11 Pe ʉAbimeleki akavakaana avaanhu vaake vooni kuuti, “Ʉmuunhu ghweni jʉno kyaɨkʉmwabasia ʉmuunhu ʉjʉ, nambe ʉnʼdala ghwake, ibudua!”
12 Ʉmwaka ʉghuo ʉIsaka akalɨma mʉ ɨɨsi ɨjio, akamota fiijo, ʉlwakʉva ʉMʉtwa ʉNgʉlʉve akamfunyile. 13 ɄIsaka akava mmofu, ɨkyʉma kyake kɨkava kifikwongelela kuhanga akava mmofu fiijo. 14 Alyale ni ngʼholo ni ngʼombe, na vakami vinga kuhanga aVafilisiti vakava nɨ kɨvini nʉ mwene. 15 Vakasyɨla ifitiimu fyoni fino valyagimile avakami va Abulahamu ʉviise. 16 Pe ʉAbimeleki akamʼbʉʉla ʉIsaka akati, “Ʉvʉʉke mʉ ɨɨsi jiitu, ʉlwakʉva ʉve ʉlɨ ni ngʉfu nyinga kukila ʉsue.”
17 Pepano ʉIsaka akavʉʉka pala, akalʉta akajenga ɨkyeve mʉ lʉvonde ʉlwa Gelali, akikala ʉkuo. 18 ɄIsaka akasyɨlʉla ifitiimu fino filyagimilue nʉ viise ʉAbulahamu ye mwʉmi. Ifitiimu ifio aVafilisiti valyasyɨlile ʉAbulahamu ye afwile. Ye asyɨlwile, akafitambʉla amatavua ghala ghala ghano ʉviise akatambʉlagha.
19 Ɨkɨghono kɨmonga, avakami va Isaka vakagima mʉ lʉvonde ʉluo, vakakɨvona ɨkɨnʼdwivu. 20 Avadɨɨmi va fidɨmua kʉ Gelali vakalua na vadɨɨmi va Isaka viiti, “Amalenga agha ghiitu!” Pe ʉIsaka akakɨtambʉla ɨkɨtiimu ɨkio ɨlɨtavua ɨlɨ Eseki,c ʉlwakʉva avadɨɨmi ava kʉ Gelali valyalwile na vadɨɨmi vaake. 21 Avadɨɨmi va Isaka vakagima ɨkɨtiimu ɨkɨngɨ, kyope ɨkio vakalwɨlanɨla. Ɨkio akakɨtambʉla ɨlɨtavua ɨlɨ Sitina.d 22 Pe ʉIsaka akalʉta kugima ɨkɨtiimu ɨkɨngɨ. Ɨkɨtiimu ɨkio navakalwɨlanɨla. Mʉ ʉluo, akakɨtambʉla Lehoboti,e akati, “Lɨno, ʉMʉtwa ʉNgʉlʉve atʉpeliile pa vweleefu, tutengaana mʉ ɨɨsi ɨjɨ.”
23 ɄIsaka akavʉʉka apuo, akalʉta kʉ Beeli-Sheba. 24 ɄMʉtwa ʉNgʉlʉve akamʼbonekela ɨkɨlo jɨjio, akamʼbʉʉla akati, “Ʉne neene Ngʉlʉve ghwa nhaata ghwako ʉAbulahamu. Nʉngoghopaghe, ʉlwakʉva ʉne nɨlɨ palɨkɨmo nuuve, nɨkʉkʉfuunya na kukwongelesia ʉmwoloko ghwako, vwɨmɨla ʉlʉfingo lwango lʉno nɨlyafingile nʉ Abulahamu ʉmʼbombi ghwango.” 25 Pe ʉIsaka akajenga ʉkuo ɨkɨtekelelo, akamwɨmɨka ʉMʉtwa ʉNgʉlʉve. Akajenga nɨ kyeve kyake, voope avakami vaake vakagima ɨkɨtiimu ɨkɨngɨ.
ɄIsaka ifingana nʉ Abimeleki
26 ɄAbimeleki akavʉʉka kʉ Gelali ilʉta kʉkʉmʉghendela ʉIsaka. Akalongosinie nʉ ntangɨli ghwake ʉAhusati, nʉ mʼbaha ʉghwa vasikali vaake ʉFikoli. 27 Ye vafikile, ʉIsaka akavaposia akati, “Mwisile kʉlyʉne kuvomba kɨki? Ongo mʉkangʼhalaliile na kʉkʉndaga kʉlyʉmue?”
28 Vakamwamʉla vakati, “Tʉvwene ʉMʉtwa ʉNgʉlʉve alɨ palɨkɨmo nuuve. Mʉ ʉluo, lʉnofu tʉpʉlɨngʼhane kuuva nʉ lʉtengaano. Tʉfingane 29 kuuti, ʉve nʉngatʉvombelaghe ʉlʉviivi lʉmonga, ndavʉle ʉsue vʉle natʉkakwabasisie ʉve. Tʉkakʉvombiile inofu, twakʉleka ghwavʉʉka nʉ lʉtengaano. Lɨno, ʉlɨ mfunyua ghwa Mʉtwa ʉNgʉlʉve.”
30 Pe ʉIsaka akavatelekela ifyakʉlia, vakalia na kunyua. 31 Palwakɨlo vakasisimuka, vakafinga aveene nʉ Isaka. Pe ʉIsaka akavahɨngɨlɨsia, vakavʉʉka nʉ lʉtengaano.
32 Ɨkɨghono kɨkio, avakami va Isaka vakiisa kʉkʉmpeela imhola isa kɨtiimu ɨkɨngɨ kɨno vagima, vakati, “Tʉghaghile amalenga!” 33 Ɨkɨtiimu ɨkio ʉIsaka akakɨpeela ɨlɨtavua ɨlɨ Sheba.f Enendɨɨkɨ kuhanga ʉmʉsyʉghʉ ɨlɨkaaja ɨlio litambʉlua Beeli-Sheba.
ɄEsau na vadala vaake aVahiti