Avaana avange ava Abulahamu
25
ɄAbulahamu alyatolile ʉnʼdala ʉjʉnge, jʉno akatambʉlwagha Ketula. 2 ɄKetula akampapɨla ʉAbulahamu avaana, amatavua ghaave ghe agha: ʉSamulani, ʉYokishani, ʉMedani, ʉMidiani, ʉIshibaki nʉ Shua. 3 ɄYokishani ghwope akampaapa ʉSheba nʉ Dedani. ɄDedani alyale ghwe kɨvʉmbʉko kya Vaashulu na Valetushi na Valeumi. 4 ɄMidiani ghwope akampaapa ʉEfa, ʉEfeli, ʉHanoki, ʉAbida nʉ Elida. Avuo vooni ɨkɨvʉmbʉko kyave ghwe Ketula.5 ɄAbulahamu akamʉlekela ʉIsaka ʉvʉhaasi vwa kyʉma kyake kyoni. 6 Neke avaana vaake kuhʉma kʉ vadala vaake avakami, akavapeela ʉlʉvonolo. Ye ajiighe mwʉmi, ʉAbulahamu alyavabaghʉlinie avaana avuo nʉ mwanaake ʉIsaka. Avaana avange avuo alyavatwalile valʉte kukukala kʉ ɨɨsi isingi isa kʉvʉtali, ʉlʉbale ʉlwa kʉvʉdibulo.
Kufua kwa Abulahamu
7-8 ɄAbulahamu alikalile amaaka minga, ghamemile inyifuunyo. Alyaghosiipe fiijo, neke akafua ye alɨ na maaka kɨlʉndo kɨmo ni fijigho lekelalʉbale na ghahaano. Akafua ndavʉle avakʉʉlʉ vaake. 9 Avanaake ʉIsaka nʉ Isimaeli, vakansyɨla mʉ mbiipa, mʉ mhanga ɨja Makɨpela, ʉlʉbale ʉlwa kʉvʉdibulo ʉlwa kʉ Mamule, kʉ mʉghʉnda ʉghwa Efuloni, ʉmwana ghwa Sohali ʉghwa kɨsina kya Vahiti. 10 Ʉmʉghʉnda ʉghuo, ʉAbulahamu alyaghʉlile kʉ Vahiti. Ʉkuo kwe kʉno vakansyɨlile ʉAbulahamu nʉ nʼdala ghwake ʉSala.
11 ɄAbulahamu ye afwile, ʉNgʉlʉve akamfuunya ʉIsaka. Ʉnsiki ʉghuo ʉIsaka alyale ikukala piipi na kʉ Beeli-Lahai-Loi.
Ʉmwoloko ʉghwa Isimaeli
12 Ʉghʉ ghwe mwoloko ghwa Isimaeli ʉmwana ghwa Abulahamu, ʉngʼina alyale ghwe Hajili ʉMʉmisili, ʉnkami ghwa Sala. 13 Agha ghe matavua gha vaana va Isimaeli, vatavikue kulɨngʼhana nʉ vʉholua vwave: ʉmʼbele ghwe Nebayoti, neke ghwe Kedali, ʉAdibeeli, ʉMibusamu, 14 ʉMishima, ʉDuma, ʉMasa, 15 ʉHadadi, ʉTema, ʉYetuli, ʉNafishi nʉ Kedema. 16 Avuo ve vaana va Isimaeli kɨjigho na vavɨlɨ, vano vaale fivʉmbʉko va fisina kɨjigho na fivɨlɨ, nʉjʉnge alyale kɨvʉmbʉko kya kɨsina kulɨngʼhana ni mbale sino valikalile.a
17 ɄIsimaeli alyafwile na maaka kɨlʉndo kɨmo ni fijigho fitatu na lekelalʉbale. Akafua ndavʉle avakʉʉlʉ vaake. 18 Ɨkɨsina kya Isimaeli kɨlyale kikukala imbale isa pakate pa Havila kuhanga kufika kʉ Shuli. Imbale isio saale ʉlʉbale ʉlwa kʉvʉdibulo ʉlwa ɨɨsi ɨja Misili, kulʉngama kʉ Ashulu. Ɨkɨsina ɨkɨ kɨlyale kɨlʉgʉ ni fisina ifingi ifya vaana va Abulahamu.
Kuholua kwa Esau nʉ Yakovo
19 Isi se mhola sa kɨsina kya Isaka, ʉmwana ghwa Abulahamu. 20 ɄIsaka ye alɨ na maaka fijigho fine, akantoola ʉLebeka, ʉlʉmbʉ ghwa Labani. Ʉviise ghwave alyale ghwe Betueli ʉMʉalamub kuhʉma kʉ Mesopotamia. 21 ɄLebeka alyale mʉghʉmba, mʉ ʉluo ʉIsaka akansʉʉma ʉMʉtwa ʉNgʉlʉve vwɨmɨla ʉnʼdala ghwake. ɄMʉtwa ʉNgʉlʉve akʉpɨla ʉlufuunyo lwake, ʉLebeka akava nkunue. 22 Ʉvʉkunue ʉvuo vʉlyale na vaana mapasa. Avaana vakava vilua mʉ lɨleme. Pe ʉLebeka akamposia ʉMʉtwa ʉNgʉlʉve akati, “Kɨki lʉlɨ enendɨɨkɨ kʉlyʉne?”
23 ɄMʉtwa ʉNgʉlʉve akamwamʉla akati,
“Mʉ lɨleme lyako, mwefili ifisina fivɨlɨ.
Ifisina ifio filibaghʉlana.
Ɨkɨsina kɨmonga kiliiva ni ngʉfu fiijo kukila ɨkɨngɨ.
Ʉmwana ʉmʼbaha ɨkʉmʼbombelagha ʉnnuuna.”
24 Ye ghʉfikile ʉnsiki ʉghwa kʉpaapa, akapaapa amapasa. 25 Ʉmwana ʉmʼbele alyale mʉlangali, ʉmʼbɨlɨ ghwake ghwoni ghʉlyamemile ɨlyaghe. Fye nambe akatambʉlua Esau.c 26 Ʉmwana ʉghwa vʉvɨlɨ akaholua kʉmo ankolile ʉEsau ɨkɨsukuluuni. Fye nambe akatambʉlua Yakovo.d ɄEsau nʉ Yakovo ye viholua, ʉviise ʉIsaka alyale na maaka fijigho ntanda.
ɄEsau ighʉsia ʉvʉtavʉlɨlua vwake
27 Avaana avuo vakakʉla. ɄEsau akava mfwɨmi nnofu, kange akakelagha fiijo kukukala kʉ nyika. Neke ʉYakovo alyale nkoola, kange akakelagha fiijo kukukala kʉ kaaja. 28 ɄEsau akantwalɨlagha ʉviise ɨnyama jɨno afwɨmile, mʉ ʉluo ʉIsaka alyamʉghanile ʉEsau. Neke ʉLebeka alyamʉghanile ʉYakovo.
29 Ɨkɨghono kɨmonga, ʉYakovo ye alɨ piteleka idengu,e ʉEsau akava igomoka kuhʉma kufwɨma, jɨkʉmʼbava fiijo ɨnjala. 30 Akamʼbʉʉla ʉYakovo akati, “Sivuo, nifua nɨ njala, mheele ifyakʉlia ifilangali ifio nɨlie.” Fye nambe ɨlɨtavua lyake ɨlɨngɨ alyale ghwe Edomu, kwekʉti mʉlangali. 31 ɄYakovo akamwamʉla akati, “Taasi ʉngʉsɨkɨsie ʉvʉtavʉlɨlua vwako ʉvwa kuuva mʼbele, pe nɨkʉkʉpeela.” 32 Ghwope akati, “Ongo nitapifua nɨ njala! Ʉvʉtavʉlɨlua ʉvwa kuuva mʼbele vʉkʉnhanga kɨki?” 33 ɄYakovo akati, “Ʉjɨɨghe taasi.” ɄEsau akajɨɨgha, akamʉghʉsɨkɨsia ʉvʉtavʉlɨlua vwake ʉvwa kuuva mʼbele. 34 Pepano ʉYakovo akampeela ʉEsau ʉnkate ni dengu. ɄEsau akalia na kunyua, pe akavʉʉka ilʉta. Enendɨɨkɨ fye ʉEsau alyapunisie ʉvʉtavʉlɨlua vwake ʉvwa kuuva mʼbele.