21
गोरीब रोंडेअ बायाअ दान
(मार्क १२:४१-४४)
1 ईसु मोंदीराम आथो तांहांअ, तीयांय खुब मालदार मांहांहांन मोंदीराअ दानुअ पेटीम दान टाकतें देख्यें। 2 आने एक गोरीब रोंडेअ बायुल बी तीयांय तींहमें बेन तांबाअ होवाया* टाकती देखी। 3 तांहांअ तीयांय तीयाअ चेलाहांन आख्यों, “आंय तुमनेंह नोक्कीज आखुंह: बीहरा बादाहांअ केअता ईयु गोरीब रोंडेअ बायुंय वादारे दान टाक्योंह। 4 काहाका, तें बीहरें बादें मांहेंअ ता, सोतापेअ जे वादारे पोयसा आथा तींहमेंनेअ दान टाक्योंह। पेन ईयु बायुंय ता, सोते गोरीब हाय तेबी, जोंबी तीयुपेअ आथों तों बादोंज दानुम टाकी देदोंह।”
ईसु भोवीस्याअ बाबोताम भोवीसवाणी केअहे
(माथी २४:१-२; मार्क १३:१-२)
5 खुब हारा ढोगळाहांकींअ आने मांहांहां पोरमेहेराल ओरपोण केअली वोस्ताहांकींअ लोकाहीं मोंदीराल केंहडों सोबालों बोंणाव्योंह तीया बाबोताम ईसुअ थोळाक चेला गोठ्या केअत्ला तांहांअ, ईसुंय तीयाहांन आख्यों, 6 “तुमां ईं बादों हेअताहकने? एंहडा दीह आवीअ का जांहांअ येहुदी लोकाहांअ दुसमोन ईया बादा चोंणतोरुंहन एंहडों तोळी पाळीअ का तीयाअ एक बी ढोगळो बीहरा ढोगळापेअ नांय रीअ।”
आवनारा दुखाअ बाबोताम
(माथी २४:३-१४; मार्क १३:३-१३)
7 फाचलांअ नेअ चेलाहां ईसुल फुच्यों, “गुरुजी, तुं आखोह एंहडों केंहडीवेल बोंणीअ? आने तों बोंणीअ तीयाअ नीसाणी काय हाय?”
8 तांहांअ ईसुंय तीयाहांन आख्यों, “झुटो बोद दीईन ईयु बाबोताम तुमनेंह केडो बी ठोगे नांय, तीयाअ कालजी राखजा! काहाका, खुब लोक झुटी रीते आखावीअ का ते आंय हाय, आने तीयाहांमेर्योअ दोरेक आदमी आखीअ, ‘आंय पोरमेहेरांय नीमलो तो खास राजा हाय।’ आने ते एंहकींअ बी आखीअ, ‘दुन्याअ ओंताअ वोखत आवी गीयोह।’ तांहांअ तुमां तीयाहांअ गोठ मां मानता! 9 आने लोळायाहांअ आने धामालींअ गोठ्या तुमां उनाया तांहांअ बीता मां! काहाका, एंहडों बादों ता पेअलांअ बोंणांअज जोजे। पेन तीयाअ ओर्थो एंहडो नांह का, दुन्याअ ओंत पाही आवी गीयोह।”
10 ईसुंय तीयाहांन आखांअ चालु राखता आख्यों, “तांहांअ एक देसाअ लोक बीहरा देसाअ लोकाहांपेअ हुमलो कीअ। एक राज्याअ लोक बीहरा राज्याअ लोकाहांअ वीरुद लोळीअ। 11 आने मोडा-मोडा तोरतीकोंप वीअ। आने जेंहें-तेंहें काल पोळीअ, आने दुखणें फाटी नींगीअ। आने बीख लागे तेंहडया बाबोत्या आने मोडया-मोडया नीसाण्या जुगामेनेअ वीअ। 12 पेन ईं बादों बोंणीअ तीयाअ पेअलांअ, येहुदी धोरमाअ ओमोलदार तुमनेंह तीईन दुखें पाळीअ। हातींअ ते तुमांअमेर्याअ थोळाकाहांन भोकती मोंडोळाअ पोंगाहम जांअ फोरुज पाळीअ, आने तींहीं येहुदी पोंचाअ लोक तुमांअ गुनांअ तापास कीअ। आने हातींअ तुमनेंह जेलुंहम कोंडावीअ। आने तुमां मांअ ईमानदार चेला हाय तीयाअ लीदे, ते तुमनेंह राजांअ आगलांअ आने राजपालुंअ आगलांअ तीअ लीअ जाय। 13 आने तीयु वोखत तीयाहांन मांअ बाबोताम हारी गोठ आखांअ तुमांअ खातुर मोको वीअ। 14 तांहांअ तीयाहांन तुमांअ काय जोवाब देवुलोंअ तीयाअ तुमां जाराक बी पेअलांअनेअज चींता मां राखता! ईं तुमांअ मोनाहांम राखी लेजा! 15 काहाका, तांहांअज तुमनेंह आंय एंहडा गीयानाअ गोठ्या देहें का, तुमांअ वीरुद केअनारा तुमनेंह तीयाअ वीरुद बी आखी नांय सेके, आने जोवाब बी नांय दीअ सेके। 16 आने मांअपेअ वीसवास नांय राखनारें तुमांअ सोताअज याहकी-बाहको, आने पावुह, आने जातुलें, आने दोस्दार बी तुमनेंह तेरावी दीअ। आने तुमाहांमेनेअ थोळाकाहांन तें माय बी टाकावीअ। 17 आने तुमां मांअ ईमानदार चेला हाय तीयाअ लीदे, खुब लोक तुमनेंह नोफरोत कीअ। 18 पेन तुमांअ आत्माहांन काय बी नुकसान नांय वीअ। 19 तुमां दुखें वेठीन बी मांन ईमानदार रा ता, तुमनेंह खेरों जीवोन मीलीअ।”
येरुसालेम सेहेराअ नासाअ बाबोताम
(माथी २४:१५-२१; मार्क १३:१४-१९)
20 हातींअ ईसुंय आख्यों, “जांहांअ तुमां येरुसालेम सेहेराल चारु वेलेनेअ रोमुअ लोस्कोरुहुं घेरी लेदलों हीअहा तांहांअ जांअजा का ते तीयाल उजाळ कीअ टाकीअ। 21 तीयु वोखत, जें सेहेराअ माज वीअ, ते तींहींनेअ नींगीन नाहे। आने जें सेहेराअ बारे वेअ, तें सेहेराम फाचें आव्या वोगुर पादरेंज नाहे। एंहकींअ कीईन येहुदीया वीस्तारामेर्येंअ बादें मांहेंअ नासुमनेअ वाचायांअ खातुर डोगुंअ वेल नाहीन तींहीं दोबी जाय। 22 काहाका, जों पोवीतोर लेखाणाहांम लेख्योंह तों खेरों पोळे तीयाअ खातुर तो वोखत ता येहुदी लोकाहांन पोरमेहेर सीक्सा केरांअ वोखत वीअ। 23 तीयु वोखत जे बाया बेन-जीवाअ का आडुंण्या पोयरावाल्या वीअ, तीयुहुंअ हालोत दाया आवे एंहडी वीअ। पोरमेहेराल येहुदी लोकाहांपेअ खुब रोग चोळीअ तीयाअ लीदे आखा ईसरायेल देसाअ लोक खुब दुखें भोगवीअ। 24 थोळाक लोकाहांन लोस्कोराअ मांहेंअ तारवायुंहकींअ माय टाकीअ। आने बीहरा थोळाकाहांन गुलाम बोंणावीन खुब देसाहांम लीअ जाय। आने जांव लोगुंअ येहुदी जातीअ नांह तेंहडा लोकाहांअ राज केरांअ वोखत पुरो नांय वीअ तांव लोगुंअ येरुसालेम तीया लोकाहांअ आथाम रीअ।”
ईसु फाचो आवीअ तीया बाबोताम
(माथी २४:२९-३१; मार्क १३:२४-२७)
25 ईसुंय आखांअ चालु राख्यों: “दीह, चांद आने तारांहम पेअलांअ कीदीह बी नांय वीयों वीअ तेंहडों वीअ। आने तोरतीमॆन्यॆंअ मांहेंअ दोरीयाअ चुवांअ खुब मोडो आवाज उनायन गुचवाय जाय आने काबराय बी जाय। 26 तोरतीपेअ जों वेअनारों हाय तीयाअ बीख आने वीचारुअ लीदे मांहेंअ सुनसान वीअ जाय। काहाका, जुगामेरीअ मोडी-मोडी वोस्ताहांन पोरमेहेर तीयुहुंअ सोत-सोताअ जागेनेअ होरकावी टाकीअ। 27 हातींअ तें मांहेंअ, मांहांअ पोयराल, मोंजे मांन, खुब ताकोत आने मोडायाअ री वादलाम आवतो देखीअ। 28 मोंजे, ए बादा बोनाव बोंणांअ टेके तांहांअ, तुमां हींमोत राखीन तुमांअ सुटकाराअ वाट जोवजा! काहाका, तीयाअ वोखत पाही आवेह एंहकींअ जांय जाजा!”
ओंजीराअ चाळापेनेअ हीकामोण
(माथी २४:३२-३५; मार्क १३:२८-३१)
29 हातींअ ईसुंय तीयाअ चेलाहांन बीहरो एक दाखलो देदोः “पालाअ चाळाअ आने बीहरा चाळाहांअ वीचार केरा! 30 जांहांअ तीया चाळाअ डालख्या कोवल्या वेअत्याह आने तीयाअ पानठें फुठांअ टेकतेंह तांहांअ, तुरुतुज तुमां जांय जातेंह का, वोहरात पाही हाय। 31 तेंहकींअज कीईन, ते बादा बोनाव बोंणता हेरा तांहांअ जांअजा का पोरमेहेर राज केरांअ वोखत आवनारो हाय।
32 आंय तुमनेंह नोक्कीज आखुंह: मांयुं केअला चोमोत्कार हेअनारें ईं मांहेंअ मोय जाय तीयाअ पेअलांअ ए बादा बोनाव बोंणीअ। 33 जुग आने तोरती आने तींहमेर्याअ बादया वोस्तु एगु दीह जात्या रीअ, पेन मांयुं आखल्या गोठ्या कायोम हाच्याज रीअ।
मांहांअ पोयरो फाचों आवेह
34 तुमांअ मोनुंहन मोज-सोक, साकटाय, आने ईयु दुन्याअ जीवोनाअ चींतांहकींअ बेरजाय मां जांअ देता! नेता जेंहकींअ फांदो ओचींतोज चीळांहपेअ आवी पोळेह, तेंहकींअ मांहांअ पोयरो, मोंजे, आंय बी ओचींतोज फाचो आवी जाहें। तीयाअ लीदे, तुमां चेतीन रेजा! 35 काहाका, आंय आवेंह तांहांअ, तुमां आने तोरतीपेअ जीवनारा बीहरा बादा लोक कांहवांयज रीअ। 36 तीयाअ लीदे, ए जे बादा बोनाव बोंणनारा हाय तेंहडा वोखतुंहम बी तुमां मांअपेअ वीसवास राखांअ चालु राखा आने मांहांअ पोयराअ, मोंजे मांअ आगलांअ हारो नीयाय मीलवांअ खातुर उबी रांअ तुमाहांपेअ गोती वेअ तीयाअ खातुर, तुमां कायोम कालजी राखीन जीवा आने पोरमेहेराल ओरुज केअया केरा!”