20
ईसुअ आदीकाराअ बाबोताम सोवाल
(माथी २१:२३-२७; मार्क ११:२७-३३)
1 तीया आठवाळ्याम एक दीह, ईसु मोंदीराअ चोवठांहम लोकाहांन बोद दीईन तीयाहांन पोरमेहेराअ बाबोताअ हारी गोठ जाहेर केअत्लो तांहांअ, मोडा-पुंजारा, नीयोम हीकवुअनारा आने बीहरा येहुदी आगेवान तींहीं आला, 2 आने तीयाहां तीयाल आख्यों, “केल्ला आदीकाराकींअ तुंयुं हाकाल मोंदीरामेनेअ तीया वेपारीहींन ओळी काडयें? ईं बादों केरांअ तुल केडांय आदीकार देदोह? तों आमनेंह आखेअ!”
3 तांहांअ ईसुंय तीयाहांन जोवाब देदो, “आंय बी तुमनेंह एक सावाल फुचुंह। तीयाअ जोवाब मांन दा! 4 लोकाहांन बापतीस्मा केरांअ आदीकार योहानाल केडांय देदलो? पोरमेहेरांय का लोकाहीं?”
5 तांहांअ तीयाहां तीया बाबोताम एक-बीहराअरी चारचा केअया का, “जो आपुंह ‘तो आदीकार पोरमेहेरांय देदलो’ एंहकींअ आखुंह ता, तो आपनेंह फुचीअ का, ‘तांहांअ योहानाअ गोठ तुमां काहा नांय मानी?’ 6 आने जो आपुंह ‘तो आदीकार लोकाहीं देदलो’ एंहकींअ आखुंह ता, बादा लोक ढोगळाहांकींअ आपनेंह दीअ। काहाका, तीयाहांन खातरी हाय का योहान पोरमेहेराअ गोठ जाहेर केअनारो आथो।” 7 तीयाअ लीदे, तीयाहां जोवाब देदो, “तो आदीकार तीयाल केडांय देदलो, तों आमनेंह खोबुर नांह।”
8 तांहांअ ईसुंय तीयाहांन आख्यों, “तांहांअ आंय बी तुमनेंह नांह आखनारो का ईं बादों आंय केल्ला आदीकाराकींअ कीअहुं।”
दाराख्साअ वाळीअ खेळुताहांअ बाबोताम दाखलो
(माथी २१:३३-४६; मार्क १२:१-१२)
9 हातींअ ईसुंय लोकाहांन ओ दाखलो देदोः “एक आदमींह दाराख्साअ वाळी बोंणावी। आने ते बीहरा खेळुताहांन गोंवांदी दीईन तो आदमी बीहरा देसाम गीयो आने तींहीं लांबो सोमोय रीयो। 10 दाराख्साअ सीजोन आली तांहांअ, वाळीअ धोणींह सोताअ एक चाकोराल खेळुताहांअही, दाराख्साअ सोताअ भाग लांअ मोकल्यो। पेन तीया खेळुताहां ता, तीया चाकोराल मार ठोकीन खाली आथे मोकली देदो। 11 तांहांअ वाळीअ धोणींह फाचो एक चाकोराल मोकल्यो ने तीया खेळुताहां तीयाल बी मार देदो आने तीयाअरी खोटी रीते वोरतीन भाग देया वोगुर मोकली देदो। 12 तांहांअ वाळीअ धोणींह सोताअ तीजा चाकोराल मोकल्यो, आने तीया खेळुताहां तीयाल बी मार ठोकीन रोगताअलो कीईन मोकली देदो। 13 तांहांअ दाराख्साअ वाळीअ धोणींह वीचार केअयो का, ‘आमी आंय काय क्युंव? आंय मांअ मेराला पोयराल मोकलेंह। कादास ते तीयाअ मान राखीन भाग दीअ।’ एंहकींअ वीचारीन तीयांय सोताअ पोयराल मोकल्यो। 14 पेन तीयाअ पोयराल देखीन तीया खेळुताहां एक-बीहराअरी गोठ्या केअया का, ‘ओ पोयरो ता ईयु वाळीअ वारोसदार हाय। आपुंह तीयाल माय टाकजी! तांहांअ मीलकोत आपुअ वीअ जाय।’ 15 हातींअ तीयाहां धोणीअ पोयराल वाळीअ बारे तांय जायन तींहीं तीयाल माय टाक्यो।
आमी तो दाराख्साअ वाळीअ धोणी तीया खेळुताहांन काय कीअ? 16 तो धोणी आवीन तीया खेळुताहांअ नास कीअ आने ते दाराख्साअ वाळी बीहराहांन गोंवांदी दीअ दीअ।”
तांहांअ तींहीं आथा तीया लोकाहीं ईं उनायन आख्यों, “एंहडों कीदीह बी नांय बोंणे!”
17 पेन ईसु तीयाहांन हीईज रीयो आने आख्यों,
“ ‘बोंगलो बांदनाराहां जीया ढोगळाल नोक्कामो गोंअलो,
तोज ढोगळो बोंगलाल मोजबुत राखनारो ढोगळो बोंण्योह’
एंहकींअ पोवीतोर लेखाणाहांम जों लेखलों हाय तीयाअ ओर्थो काय हाय? तीयाअ वीचार केरा! 18 तीया ढोगळापेअ जोंबी मांहुंअ पोळीअ तीयाल खुब ईजा वीअ। नेता जीयापेअ बी तो ढोगळो पोळीअ तीयाअ चुरे-चुरा वीअ जाय।”
सारकाराल वेरा पोरांअ बाबोताम
(माथी २२:१५-२२; मार्क १२:१३-१७)
19 नीयोम हीकवुअनारा आने मोडा पुंजारा जांय गेहला का, तो दाखलो ईसुंय तीयाहांअ बाबोतामुज आखलो। तीयाअ लीदे, तीयांय तीयाल तीयुज घेळी तेरांअ कोसीस केअयी। पेन ते लोकाहांन बीया। 20 तीयाअ लीदे, ते ईसुल तेरांअ बीहरो एगोह मोको होदत्ला। तीयाहां मोसेअ नीयोम खोरेखोर पालनारांअ तोरीके ढोंग केअनारा थोळाक बातमीदारुंहन तीयाअहीं मोकल्या, ईयाअ खातुर का, ते बातमीदार ईसुअ गोठीम तीयाअ भुल काडे, आने एंहकींअ कीईन ते येहुदी धोरमाअ आगेवान ईसुल रोम सारकाराअ राजपालुपेअ साज्या देवावांअ तीयाअ आथाम होपी दे। 21 तीया बातमीदारुहुं ईसुअहीं आवीन तीयाल फुच्यों, “गुरुजी, आमां जांअताह का तुं केडाअ बी सोरोम राख्या वोगुर खेरोंज आखी देनारो आने हीकवुअनारो हाय आने पोरमेहेराअ मोर्जी खेरी रीते हीकवुअनारो हाय। 22 तांहांअ आमनेंह आखेअ का, रोम सारकाराअ बादसाल आपुंह वेरो पोअजी तों खेरों हाय का नांह?”
23 तीयाहांअ चालाकी जांयन ईसुंय तीयाहांन आख्यों, 24 “मांन रोम सारकाराअ एक सीक्को देखावा! तीयापेअ केडाअ साप आने नांव हाय?”
तांहांअ तीयाहां आख्यों, “ तीयापेअ साप ने नांव ता बादसाअज हाय।”
25 तांहांअ ईसुंय तीयाहांन आख्यों, “तांहांअ जों बादसाअ लागेह तों बादसाल दा, ने जों पोरमेहेराअ लागेह तों पोरमेहेराल दा।” 26 ते आगेवान बीहरा लोकाहीं अ आगलांअ ईयु बाबोताम बी ईसुअ भुल नांय काडी सेक्या। तीयाअ जोवाब उनायन ते कांहवांयज रीया आने ठाकाज वीअ गीया।
मोअलामेनेअ मांहेंअ जीवतें उठीअ तीया बाबोताम सावाल
(माथी २२:२३-३३; मार्क १२:१८-२७)
27 मोअलें फाचें नांह जीवतें उठनारें एंहकींअ माननारा सादुकी पोंथाअ थोळाक लोकाहीं ईसुअहीं आवीन 28 तीयाल फुच्यों, “गुरुजी, मोसेंय आपनेंह एंहकींअ लेखी देदोंह का, जो केडों बी वोगुर पोयराअ मोय जाय आने तीयाअ कोअवाली जीवती वेअ ता, तीयाअ कोअवालील तीयाअ हानांअ पावुअ राखुलोंअ, आने सोताअ मोअनारा पावुअ वोसुलो चालु राखुलोंअ। 29 एक वोखत एक कोअमें सांत पावुह आथा। तीयाहांमेनेअ मोडो पावुह एक बायुल वोराळ कीअ लालो आने फाचलांअ नेअ वोगुर पोयराअ मोय गीयो। 30 हातींअ तीयाअ कोअवालील बीहरा पावुंह राखी। थोळाक वोखत हातींअ तो बी वोगुर पोयराअज मोय गीयो। 31 हातींअ तीजा पावुंह तीयुल राखी आने एंहकींअ कीईन ते सांतु पावुह तीयुल राखीन वोगुर पोयराअज मोय गीया। 32 हातींअ ते बाय बी मोय गीयी। 33 आमी मोअलें फाचें जीवतें उठीअ तीदीह, ते केडाअ कोअवाली गोंणाय? काहाका, सांतु पावुहुं तीयुल राखलीकने?”
34 तांहांअ ईसुंय तीयाहांन आख्यों, “ईयु दुन्यामेर्येंअ आदमी ने बाया एक बीहराअरी वोराळ केअतेंह। 35 पेन हाचें मांहेंअ मोअलामेनेअ फाचें जीवतें उठीअ तांहांअ तीयु नोवी दुन्याम जीवांअ जीया लोकाहांन पोरमेहेर लायोक गोंअहे ते लोक वोराळ नांय कीअ। 36 ते फाचा मोय नांय सेके। ते ता, होरगाअ दुताहांअ होच वीअ। आने मोअलामेनेअ फाचा जीवता उठ्याह तीयाअ लीदे, ते पोरमेहेराअ पोयरा हाय। 37 मोअलें फाचें जीवतें उठीअ तीया बाबोताम, मोसेंय बी पोवीतोर लेखाणाहांम, ‘काटाअ बोलता चेखरावाला’ भागाम लेख्योंह। तीया भागाम तीयांय पोरमेहेर मालीखाअ बाबोताम, ‘आबराहामाअ पोरमेहेर, ईसाकाअ पोरमेहेर, आने याकोबाअ पोरमेहेर’ एंहकींअ लेख्योंह। 38 पोरमेहेर ता मोअलांअ पोरमेहेर नांह, पेन जीवतांअ पोरमेहेर हाय। काहाका, पोरमेहेराअ गोंणतीम ते बादा जीवताज हाय।”
39 तांहांअ नीयोम हीकवुअनारा थोळाकाहीं आख्यों, “गुरुजी! तुंयुं बोराबोर आख्यों।” 40 तीयाअ हातींअ, ईसुल वादारे सावाल फुचांअ सादुकींअ हींमोत नांय चाली।
ख्रीस्त दावीदाअ वोसुलामेर्योअ ओतोअज नांह
(माथी २२:४१-४६; मार्क १२:३५-३७)
41 हातींअ ईसुंय, नीयोम हीकवुअनाराहांन आख्यों, “ख्रीस्त दावीदाअ वोसुलामेर्योअ वीअ एंहकींअ मांहेंअ केंहकींअ आखी सेकतेंह? तें एंहकींअ नांह आखी सेकतें। 42-43 काहाका, पोवीतोर गीतुंअ चोपळीम दावीद सोतेज लेखेह का,
‘पोरमेहेर मालीखांय मांअ मालीखाल आख्यों,
आंय तोअ दुसमोनाहांन हारवीन तोअ पागे नांय पोळावुं तांव लोगुंअ
तुं मांअ हुदी वेल बोह!’ 44 एंहकींअ कीईन, दावीद ता ख्रीस्ताल सोताअ मालीख आखेह। तीयाअ लीदे, तो तीयाअ वोसुलामेर्योअ ओतोअज नांयज वीअ सेके।”
नीयोम हीकवुअनाराहांअ बाबोताम चेतवोंणी
(माथी २३:१-३६; मार्क १२:३८-४०)
45 हातींअ बादा लोकाहांअ उनाअताज ईसुंय तीयाअ चेलाहांन आख्यों, 46 “नीयोम हीकवुअनाराहांअ से चेतीन रेजा! काहाका, लांबा-लांबा झोब्बा पोवीन फीरांअ आने बाजाराअ चोवठांहम सालाम लांअ आने भोकती मोंडोळाअ पोंगाहांम हाराम-हारी खुळसींहपेअ आने जेवोंणाम हाराम-हारा जागे बोंहांअ तीयाहांन गोंवेंह। 47 आने ते रोंडेअ बायाहांअ माल-मीलकोत्या चालाकीअ रीते पाळावी लेताह, आने उपेअनेअ ते पोरमेहेराल लांब्या-लांब्या ओरोज्या बी केअताह। ईयु बादी बाबोतीहींअ लीदे ते वादारे सीक्सा भोगवीअ।”