19
ईसु आने वेरो उगरावनारो झाखेयु
1 ईसु आने तीयाअ चेला येरीखो सेहेराम रीईन जाहला। 2 तींहीं झाखेयु नांवांअ एक आदमी आथो। तो वेरो उगरावनारांअ उपरी आथो आने मालदार बी आथो। 3 तीयांय ईसु केडो हाय तों हेरांअ कोसीस केअयी। पेन तो खुब बीटक्यो आथो आने तींहीं ईसुअ पाही लोकाहांअ खुब गोरदी बी आथी। तीयाअ लीदे, तो ईसुल हीअ नांय सेक्यो। 4 तीयाअ लीदे तो, ईसु जीयु वाटे जाहलो तीयु वाटे आजी थोळेक आगलांअ दोवळी गीयो आने ईसुल हेरांअ खातुर एक जोंगली ओंजीराअ चाळापेअ चोळी गीयो। 5 तीया चाळाअ एठा आवीन ईसुंय उचे हेअयों आने तीयाल आख्यों, “झाखेयु, तुं माहरी एठा उती आव! काहाका, पोरमेहेराअ एंहडी मोर्जी हाय * का, आज आंय तोअ कोअ र्युंव।” 6 तांहांअ झाखेयु माहरी-माहरी उती आलो, आने ईसुल सोताअ कोअ हादी गीयो आने खुस वीईन तीयाअ आवकार केअयो। 7 ईसुल झाखेयुअरी जाता हेअनारा मांहांहां बोळ-बोळ कीईन आख्यों, “तो एक पापी आदमीअ गोवारो रांअ तीयाअ कोअमें वीठोह।” 8 ते खाहला तांहांअ, झाखेयु उठ्यो आने मालीख ईसुल आख्यों, “मालीख, आंय मांअ मीलकोताअ आरदो भाग गोरीब लोकाहांन दीअ देहें। आने आंय जांअहुं का, मांयुं थोळाक लोकाहांन ठोग्याह। तीयाहांपेनेअ तेंहकींअ मांयुं जों पाळावी लेदोंह तों आंय तीयाहांन फाचो चार भाग वादारे देहें।” 9 तांहांअ ईसुंय तीयाल आख्यों, “आज पोरमेहेरांय तुल आने तोअ कोर्यांहन पापाअ सीक्सामेनेअ वाचाव्येंह। काहाका, तुंयुं बी आबराहामाअ होच पोरमेहेरापेअ वीसवास राख्योह। * 10 ईं ईत केअ! मांहांअ पोयरो, मोंजे आंय, टाकाअला घेटाहांन होदनारा भारवाळाअ होच, पोरमेहेराअहींनेअ पुलवाय गेहला लोकाहांन होदांअ आने पापाअ सीक्सामेनेअ तीयाहांन वाचावांअ आलोह।”
होनाअ सीक्काअ दाखलो
(माथी २५:१४-३०)
11 ईसु आने तीयाअ चेला येरुसालेमाअ पाही आवत्ला, आने तीयाअरी जानारा लोक तीयाअ ए गोठ्या उनाअया। ते धारत्ला का ईसु तुरुतुज तीयाहांअ राजा बोंणी जाय। 12 तीयाअ लीदे, ईसुंय तीयाहांन ओ दाखलो देदोः “एक खानदान कुटुंबुअ आदमी, तीयाल बादसा राजा बोंणावे तीयाअ खातुर, सेटे एक देस जांअ तीयार वीयो। हातींअ फाचे आवांअ तीयाअ मोर्जी आथी। 13 जाता पेअलांअ, तीयांय सोताअ दोह चाकोराहांन हादीन एक-एकाल, तीन मोयनाअ पागारुअ कींमोत आवे एंहडो होनाअ एक-एक सीक्को देदो। हातींअ तीयांय तीयाहांन आख्यों, ‘आंय फाचो आवुं तांव ईया सीक्कांहकींअ वेपार केअजा!’ हातींअ तो आदमी गीयो। 14 पेन तीयाअ सेहेराअ खुब लोक तीयाल नोफरोत केअत्ला। तीयाअ लीदे, तीयाहां तीयाअ फाचलांअ बादसाअहीं थोळाक खोबुर देनाराहांन मोकलीन बादसाल आखव्यों का, ‘ओ आदमी आमांअ राजा बोंणे ईं आमनेंह पोसोंद नांह।’
15 तेबी बादसांह तीयाल राजा बोंणाव्यो। हातींअ तो नोवो राजा फाचो आलो। तांहांअ तीयांय जीया चाकोराहांन होनाअ सीक्का देदला तीयाहांन तीयांय हादाव्या, आने तीया सीक्कांहन वेपारुम लागवीन तीयाहां कोतीअ-कोतीअ कामाणी केअयीह तों फुच्यों। 16 तांहांअ पेअला चाकोराहां तीयाअ आगलांअ आवीन आख्यों, ‘साहेब, तुंयुं मांन देदला होनाअ एक सीक्काकींअ मांयुं बीहरा दोह सीक्का कामाव्याह।’ 17 तांहांअ राजांय तीयाल आख्यों, ‘साबास, मांअ हारा चाकोर! तुं खुब हानींअ जोवाबदारीम ईमानदार रीयोह तीयाअ लीदे, आमी आंय तुल दोह सेहेराहांअ ओमोलदार बोंणावुंह।’ 18 बीहरा चाकोराहां आवीन आख्यों, ‘साहेब, तुंयुं मांन देदला होनाअ एक सीक्काकींअ मांयुं बीहरा पांच सीक्का कामाव्याह।’ 19 तांहांअ राजांय तीयाल आख्यों, ‘आमी आंय तुल पांच सेहेराहांअ ओमोलदार बोंणावुंह।’
20 आने तीजांह आवीन आख्यों, ‘साहेब, ओ रीयो तुंयुं मांन देदलो तो होनाअ सीक्को। मांयुं तीयाल रुंबालीम बांदीन थोवी देदलो। 21 काहाका, तुं कोळोक आदमी हाय आने बीहराहांअ थोवलों लीअ लेनारो आने बीहराहांअ पोअलों वाडी लेनारो हाय एंहडी मांन तोअ बीख आथी।’ 22 तांहांअ राजांय तीयाल आख्यों, ‘ओ खाराब चाकोर! तोअ आखली गोठीकींअज आंय तोअ नीयाय केअहें। आंय कोळोक आदमी हाय, आने आंय बीहराहांअ थोवलों लेनारो आने बीहराहांअ पोअलों वाडी लेनारो हाय तों तुं जांअत्लो। 23 तांहांअ तोअ ता मांअ नाणो एगाह सावकारुअहीं थोवी राखांअ जोजत्लों। तांहांअ फाचो आवीन हातींअ आंय तों वीयादाअरी मीलवी लेतो।’
24 हातींअ राजांय तींहीं पाही उबी रेहला बीहरा चाकोराहांन आख्यों, ‘तीयापेअ होनाअ जो सीक्को हाय तो लीअ ला, आने जीयापेअ दोह सीक्का हाय तीयाल तो दीअ दा।’ 25 तांहांअ तीयाहां आख्यों का, ‘साहेब। तीयापेअ ता पेअलांअज दोह सीक्का हायजकने!’ 26 तांहांअ राजांय तीयाहांन आख्यों, ‘आंय तुमनेंह नोक्कीज आखुंह: जीयाहां, मांयुं तीयाहांन पेअलांअ देदली जोवाबदारी हारकींअ पुरी केअयीह आने जीयाअ पोरीणामे तीयाहांपेअ वादारे जोवाबदार्या हाय, तीयाहांन आंय आजी वादारे जोवाबदार्या देहें। पेन जीयाहां मांयुं तीयाहांन पेअलांअ देदली जोवाबदारी हारकींअ नांह पुरी केअयी, आने जीयाअ पोरीणामे तीयाहांपेअ काय बी नांह, तीयाहांपेनेअ आंय पेअलांअ देदली जोवाबदारी बी लीअ लेहें। 27 पेन मांअ जीया दुसमोनुहुं मोर्जी नांह राखी का आंय तीयाहांअ राजा व्युंव, तीयाहांन आंय आकरी साज्या देहें। तीयाहांन ईंहीं लावा आने मांअ आगलांअ तीयाहांन माय टाका।’”
जीत मीलवुअला राजाअ होच ईसु येरुसालेमाम आवेह
28 ओ दाखलो आखीन हातींअ, ईसु तीयाअरी जानारांअ आगलांअ येरुसालेमाअ वेल जांअ नींग्यो। 29 ईसु ने तीयाअ चेला बेथफागे आने बेथानी गांवांअ पाही जेतुन चाळाहांअ डोगीअ नांवांअ डोगीअहीं आवी पोच्या तांहांअ, तीयांय बेन चेलाहांन एंहकींअ आखीन आगलांअ मोकल्या, 30 “तुमां आगलांअ देखाअहे तीया गांवांम जा! आने तींहमें वीहताज एक फुरक्याअ बोचों बांदलों तुमनेंह मीलीअ। तीयापेअ कीदीह बी केडों बी नांह बोठों। तीयाल सोळीन ईंहीं लीअ आवजा! 31 आने जो केडों बी तुमनेंह फुचे का ‘तुमां फुरक्याल काहाल सोळताह?’ ता, तीयाल आखजा, ‘मालीखाल तीयाअ जोरुल हाय।’”
32 तांहांअ ते बेनुं तीया गांवांम गीया, आने जेंहकींअ ईसुंय तीयाहांन आखलों तेंहकींअज बादों बोंण्यों। 33 ते फुरक्याल सोळत्ला तांहांअ फुरक्याअ धोणीहीं तीयाहांन फुच्यों, “तुमां फुरक्याल काहा सोळताह?”
34 तांहांअ तीया चेलाहां आख्यों, “माखीखुल तीयाअ जोरुल हाय।” तांहांअ फुरक्याअ धोणी मानी गीया। 35 हातींअ ते बेनुं चेला फुरक्याल ईसुअहीं लाला, आने तीयापेअ सोताअ पोतळें टाकीन ईसुल तीयापेअ बोहाव्यो। 36 आने ईसु फुरक्यापेअ बोहीन येरुसालेमाअ वेल जाहलो तांहांअ, लोकाहीं सोताअ पोतळें वाटीपेअ फाअत्यें।
37 आने ईसु येरुसालेमाअ पाही जेतुन चाळाहांअ डोगीअ उतुरतीअहीं आवी पोच्यो तांहांअ, तीयाअ चेलाहांअ आखो टोलो तीयाहां देखला ईसुअ चोमोत्कारुंअ लीदे खुस वीईन ने बोंबलीन पोरमेहेराअ गुणगान केरांअ टेक्यो। तीयाहां आख्यों का, 38 “मालीखाअ तोरफ्याअ आवनारा राजाल पोरमेहेर आसीरवाद दे! होरगाम सांती वेअ आने पोरमेहेराअ मोडाय वेअ!”
39 तांहांअ टोलामनेअ थोळाक फोरीसीहीं ईसुल आख्यों, “गुरुजी, तोअ चेला एंहड्या गोठ्या आखताह तीयाअ लीदे, तीयाहांन ठोपको दे!”
40 तांहांअ ईसुंय तीया फोरीसीहींन आख्यों, “आंय तुमनेंह आखुंह, जो ते मांअ गुणगान नांय केअ ता, ए ढोगळा मांअ गुणगान केरांअ चालु कीअ दीअ।”
येरुसालेमाअ खातुर ईसु रोळेह
41 ईसु येरुसालेमाअ पाही आलो तांहांअ तीयाल देखीन तीयांय रोळता-रोळता आख्यों, 42 “आज तेबी जो तुं पोरमेहेराअरी सांती केरांअ जों जोरुल हाय तों जांअतों ता, केंहडों हारों वेअतों! पेन आमी ता, तुं तों जांय नांह सेकतों। 43 काहाका, एंहडा दीह आवीअ का तोअ दुसमोन चारु वेलेनेअ पाल बांदीन तुल चीपलीअ। 44 आने ख्रीस्त तोअ मुलाकात लांअ आलोह तो वोखत तुंयुं नांह पारख्यो तीयाअ लीदे, तोअ दुसमोन तुल तोळी टाकीअ, आने तोअ माज रेनारा बादा लोकाहांन माय टाकीअ, आने एक ढोगळापेअ बीहरो ढोगळो नांय रांअ दीअ।”
ईसु मोंदीराम जाहे
(माथी २१:१२-१७; मार्क ११:१५-१९; योहान २:१३-२२)
45 हातींअ ईसु येरुसालेमाअ मोंदीराम गीयो। आने तींहीं तीयांय माल वेचनारांहन देख्यें आने तीयाहांन तींहींनेअ ओळी काड्यें। 46 आने तीयांय तीयाहांन आख्यों, “पोवीतोर लेखाणाहांम पोरमेहेराल एंहकींअ आखता नोंदलों हाय का: ‘मांअ मोंदीर एंहडो जागो रीअ का जींहीं लोक सोताअ जोरुलीहींअ खातुर मांन ओरुज कीअ।’ पेन तुमां तीयाल बांडुंअ दोबांअ गुफाअ होच बोंणावी देदोह।”