18
रोंडेअ बाय आने सोताअ जोवाबदारीअ पारवाअ नांय केअनारो जोज
1 पोरमेहेराल कायोम ओरुज केअयाज केरांअ जोजे आने माहरी तीयाअ जोवाब नांय मीले तेबी जीव-पाळांअ नांय जोजे तों हीकवांअ खातुर, ईसुंय तीयाअ चेलाहांन एक दाखलो देदो: 2 “ओमुक सेहेराम एक जोज आथो। तो पोरमेहेराल बी नांय बीहलो आने मांहांहांअ बी सोरोम नांय राखत्लो। 3 तीयाज सेहेराम एक रोंडेअ बाय बी आथी। ते तीया जोजाअहीं जायन तीयाल कालावाला केअया केअत्ली का, ‘मांअ वीरुदुवालांहपेअ मांन नीयाय देवाव!’ 4 थोळाक वोखत लोगुंअ ता, तो तीयुल नीयाय देवावांअ मागत्लोज नांय। पेन हातींअ तीयांय वीचार केअयो का, ‘आंय पोरमेहेराल नांह बीतो, ने मांहांहांअ बी सोरोम नांह राखतो। 5 तेबी, ए रोंडेअ बाय मांअहीं आवीन मांअ सोमोय लेया केअहे। तीयाअ लीदे, आंय तीयुल नीयाय देवावेंह। नेता ते घेळी-घेळी आवीन मांन थाकव्या कीअ।’”
6 हातींअ मालीख ईसुंय आख्यों, “तीया ओनुती केअनारा जोजुंह जों केरांअ नोक्की केअलों, तीयापेअ धीयान दा! 7 एंहडा खाराब जोजुंह तीयु रोंडेअ बायुल नीयाय देवाव्यो वीअ ता, हाचो पोरमेहेर रात-दीह तीयाल कालावाला केअनारा तीयाअ पोसोंद केअला मांहांहांन माहरीज नीयाय देवावीअ ए गोठ नोक्कीज हाय। तो जोवाब दांअ कादास वाअ लागवे तेबी तो तीयाहांन माहरीज नीयाय देवावीअ। 8 पेन आंय तुमनेंह आखुंह, मांहांअ पोयरो मोंजे आंय तोरतीम फाचो आवेंह तांहांअ, आंय तीयाहांन नीयाय देवावेंह एंहडो वीसवास राखनारें मांहेंअ एकदोम ओसेंज वीअ!”
बेन मांहांहांअ ओरुज्या
9 तींहीं ईसुअ गोठ्या उनाअनारांहमेर्येंअ थोळेंक मांहेंअ एंहकींअ वीचारत्लें का, ‘आमां हाचें हाय’ आने तें बीहराहांन नीचें गोंअत्लें। तेंहडा लोकाहांन ईसुंय ओ दाखलो देदो। 10 “बेन आदमी मोंदीराम पोरमेहेराल ओरुज केरांअ गीया। तीयाहांम एक फोरीसी पोंथाअ आथो आने बीहरो वेरो उगरावनारो आथो। 11 फोरीसींह उबी रीईन ओरुज केरांअ ढोंग केअता सोताअ मोनाम ओरुज केअता आख्यों, ‘पोरमेहेर, आंय बीहरा मांहांहांअ होच नांह। बीहरें मांहेंअ ता बीहराहांपनेअ पोयसा पाळावनारें, खाराब केअनारें, लुटारें का सीनालों केअनारें का बीहरें खाराब कामें केअनारें हाय। पेन आंय एंहडो नांह। आने आंय ईया वेरो उगरावनाराअ होच बी खाराब नांह। तीयाअ लीदे, आंय तोअ आभार मानुंह। 12 आंय आठवाळ्याम बेन वोखत उपास राखुंह, आने मांअ बादी आवोकुअ दोस्मो भाग धोरमाअ कामे दीहुं।’ 13 पेन तो वेरो उगरावनारो ता सेटे उबी रीयो, आने उपेअ पोरमेहेराअ वेल नोजुर केरांअ बी तीयाल हींमोत नांय चाली। पेन, तीयांय सोताअ साती कुटी-कुटीन आख्यों, ‘ओ पोरमेहेर, आंय पापी हाय! मांअपेअ दाया केअ!’ 14 आंय तुमनेंह आखुंह, तो फोरीसी नांय, पेन ओ वेरो उगरावनारोज पोरमेहेराअ नोजराम हाचो गोंणायन सोताअ कोअ गीयो। ईत केरा का, जें सोताल मोडें बोंणावतेंह, तीयाहांन पोरमेहेर गोरीबळें बोंणावीअ, आने जें सोताल गोरीबळें बोंणावतेंह, तीयाहांन पोरमेहेर मोडें बोंणावीअ।”
हानांअ पोयराहांन ईसु आसीरवाद देहे
(माथी १९:१३-१५; मार्क १०:१३-१६)
15 थोळेंक मांहेंअ तीयाहांअ हानांअ पोयराहांन ईसुअहीं लीअ आलें, ईयाअ खातुर का, तो तीया पोयराहांपेअ आथ थोवीन तीयाहांन आसीरवाद दे। तों देखीन चेलाहां तीया याहकी-बाहकांय न ठोपको दीईन आख्यों, “पोयराहांन तीयाअहीं मा लावतें!” * 16 पेन ईसुंय तीया हानांअ पोयराहांन सोताअ पाही हादीन चेलाहांन आख्यों, “हानांअ पोयराहांन मांअहीं आवांअ दा! तीयाहांन ओटकावता मा! काहाका, ईया हानांअ पोयराहांअ होच जें मांहेंअ गोरीबळें वीईन पोरमेहेरापेअ भोरुचो राखतेंह, तीयाहांअज जीवोनाहांम पोरमेहेर राज केअहे। 17 आंय तुमनेंह नोक्कीज आखुंह: जेंबी सोताअ जीवोनाहांम ईया हानांअ पोयराहांअ होच पोरमेहेराल राज केरांअ देतेंह, तेंज सोताअ जीवोनाहांम पोरमेहेराअ राज्याअ ओनुभोव कीअ सेकतेंह।”
एक मालदार येहुदी आगेवान ईसुल मीलेह
(माथी १९:१६-३०; मार्क १०:१७-३१)
18 एक येहुदी आगेवानुंह ईसुल फुच्यों, “हारा गुरुजी, कायोम जीवांअ मांअ काय केरांअ जोजे?” 19 तांहांअ ईसुंय तीयाल आख्यों, “तुं मांन हारो आखोह तीयाअ काय ओर्थो नींगेह तों तोअ कालजी राखीन वीचारांअ जोजे! काहाका पोरमेहेर एखलोज खोरेखोर हारो हाय! बीहरों केडों बी खोरेखोर हारों नांह! 20 पेन तोअ सावालुअ जोवाबुम आंय ईं आखुंह: ‘सीनालों कीअहो मां!’ ‘खुन कीअहो मां!’, ‘चोरी कीअहो मां!’, ‘केडाअ बी बाबोताम झुटी साक्सी दीहो मां!’, ‘तोअ याहकी-बाहकाल * मान दे!’ एंहडा जे हुकोम पोरमेहेरांय देदाह ते तुं जांअहोक्ने?”
21 तांहांअ तीया आगेवानुंह आख्यों, “ए बादा नीयोम ता आंय मांअ हानांअपेनेअ ज पालतो आलोह।”
22 ईं उनायन ईसुंय तीयाल आख्यों, “आजी तोअ एक बाबोत केरांअ जोरुल हाय। तोअपेअ जोंबी हाय तों बादों वेची दीईन तीयाअ पोयसा गोरीबाहांन दीअ दे! तांहांअ तुं होरगाम मालदार बोंणी जाहो। * मांयुं तुल जों केरांअ आख्योंह तों कीईन हातींअ मांअ चेलो बोंणीन मांअरी आव!” 23 पेन ईसुअ गोठ उनायन तो आगेवान खुब दुखी वीअ गीयो। काहाका, तो खुब मालदार आथो, आने बादों दीअ दांअ तो नांय मागत्लो।
24 तांहांअ ईसुंय तीयाल जाता देख्यों आने बीहराहांन आख्यों, “सोताअ जीवोनाहांम पोरमेहेराल राज केरांअ दांअ मालदार लोकाहांन खुब ओगरों हाय! 25 उटळों हुयुअ नाकलामेनेअ नींगे तों बीलकुल बोंणीज नांय सेके। लोगभोग तेंहकींअज, सोताअ जीवोनाम पोरमेहेराल राज केरांअ दांअ एक मालदार मांहांअल वादारे ओगरों हाय।”
26 तांहांअ ईसुअ ए गोठ उनाअनारा लोकाहीं ईसुल फुच्यों, “जो नोरकाअ सीक्सामेनेअ ते मालदार लोकुज नांय वाचाय सेके ता, तींहमेंनेअ बीहरों केडों वाचाय सेकीअ?”
27 पेन ईसुंय आख्यों, “आंह, एंहडें कामें केरांअ मांहांहांन ता बोंणेज नांय! पेन पोरमेहेर तीयाहांन वाचावी सेकेह!”
28 तांहांअ पीतोरांय आख्यों, “हेअ! आमां ता आमांअ बादों सोळी दीईन तोअरी आलाह। तांहांअ आमनेंह काय फायदो मीलीअ?”
29-30 तांहांअ ईसुंय तीयाहांन आख्यों, “आंय तुमनेंह नोक्कीज आखुंह: जोबी सोताअ कोअ-बाअ, का थेअ-पोयरें, का पावु-बोंअयांह, का याहकी-बाहकाल सोळी देहे, तीयाल, तीयांय जों सोळी देदोंह, तीयाअ केअता ईयु जीनगीम खुब भाग वादारे मीलीअ, आने आवनारा जोमानाम तो कायोम जीवीअ।”
ईसु सोताअ मोताअ बाबोताम आने फाचो जीवतो उठांअ बाबोताम तीजी वोखत भोवीसवाणी केअहे
(माथी २०:१७-१९; मार्क १०:३२-३४)
31 हातींअ ईसुंय तीयाअ बार चेलाहांन एक वेल हादीन तीयाहांन आख्यों, “उनाया! आपुंह येरुसालेम जाताह, आने मांहांअ पोयराअ मोंजे मांअ बाबोताम, पोरमेहेराअ गोठ जाहेर केअनाराहां जों लेख्योंह तों बादों तींहीं पुरों वीअ। 32 एगोंह मांन येहुदी जातीअ नांह तेंहडा लोकाहांअ आथाम होपी दीअ; आने ते लोक मांअ मोस्कुरी कीअ, नींदा कीअ आने मांअ मुंयुंपेअ थुपीअ, 33 आने चापकाहांअ मार दीअ आने हातींअ माय टाकीअ। पेन तीजे दीह आंय फाचो जीवतो उठेंह।”
34 पेन ईसुंय जे गोठ्या आखल्या, ते चेलाहांन उंडा भेदुवाल्या लाग्या। तीयुहुंमेरीअ एक बी गोठ ते नांय होमज्या। तो काय आखांअ मागत्लो, तों बी ते नांय होमज्या।
एक आंदला भीकारील ईसु देखतो केअहे
(माथी २०:२९-३४; मार्क १०:४६-५२)
35 ईसु ने तीयाअ चेला येरीखो सेहेराअ पाही आला तांहांअ, तींहीं वाटीअ एक वेल, एक आंदलो भीकारी भीख मागांअ बोठलो। 36 तीया आंदला भीकारींह खुब लोकाहांन तीयाअ पाहीनेअ जाता उनायन, जाहला तीयाहांन फुच्यों, “ईं काय वेअहे?”
37 तांहांअ टोलामेर्यांह तीयाल आख्यों, “नाझारेथावालो ईसु ईंहींनेअ जाहे।”
38 ते गोठ उनायन तो बोंबली उठ्यो, “ओ, दावीदाअ वोसुलामेर्याअ ईसु! मांअपेअ दाया केअ!”
39 तांहांअ आगलांअ आथा तीयाहां तीयाल खीजवायन आख्यों, “ठाको रे!” पेन तों ता उलटों वादारे जोरपेअ बोंबल्यो का, “ओ, दावीदाअ वोसुलामेर्याअ ईसु! मांअपेअ दाया केअ!”
40 तांहांअ ईसु उबी रीयो, आने तीयाल सोताअ पाही लावांअ लोकाहांन हुकोम केअयो। आने ते तीयाल ईसुअहीं लीअ आला तांहांअ, ईसुंय तीयाल फुच्यों, 41 “आंय तोअ खातुर काय क्युंव एंहडी तोअ मोर्जी हाय?”
तांहांअ तीयांय आख्यों, “साहेब, आंय फाचो देखतो व्युंव एंहडी मांअ मोर्जी हाय।”
42 तांहांअ ईसुंय तीयाल आख्यों, “तुं फाचो देखतो वे! तुंयुं मांअपेअ वीसवास केअयोह तीयाअ लीदे मांयुं तुल देखतो केअयोह।”
43 तांहांअ तुरुतुज, तो आंदलो भीकारी फाचो देखतो वीअ गीयो, आने पोरमेहेराअ गुणगान केअतो-केअतो, तो ईसुअ चेलो बोंण्यो आने तीयाअरी गीयो। तों देखीन बादा लोकाहीं पोरमेहेराअ गुणगान केअया।