16
हुस्यार कारभारी
1 हातींअ ईसुंय तीयाअ चेलाहांन आख्यों, “एक मालदार मांहुंअ आथों। तीयाअ एक कारभारी आथो। तीया कारभारीअ बाबोताम मालदारुअहीं फोरीयाद आली का, ‘तोअ कारभारी तोअ मीलकोत फावे तेंहकींअ उडवी टाकेह।’ 2 तीयाअ लीदे, मालदारुंह तीया कारभारील हादीन आख्यों, ‘मांअ मीलकोताअ तुं खोटी रीते कारभार कीअहो एंहकींअ तोअ बाबोताम आंय जों उनाअहुं तों काय हाय? आमी आंय तुल काडी थोवनारो हाय। तीयाअ लीदे तोअ कारभारुअ बादो हीसाब मांन दीअ दे!’ 3 तांहांअ तीया कारभारींह सोताअ मोनाम वीचार केअयो का, ‘आमी आंय काय क्युंव? मांअ सेट ता, मांन कारभारुमनेअ काडी थोवांअ हाय। खाड्डा खोदीन मोजरी केरांअ मांअपेअ गोती नांह, आने भीख मागता बी आंय नाजवाअहुं।’ 4 ओचींतोज तीयाअ मोनाम वीचार आलो। ‘मांअ सेट मांन कारभारुमनेअ काडी थोवे तांहांअ, लोक मांन सोताअहीं आसरो दे तीयाअ खातुर मांअ काय केरांअ जोजे तों आमी मांन हुज्योंह।’ 5 एंहकींअ वीचार कीईन हातींअ, तीयांय सोताअ सेटुअ कोरजावालांहन बादाहांन हादया, आने तीयाहांमेर्याअ पेअला कोरजावालाल तीयांय फुच्यों, ‘मांअ सेटुअ तुंयुं कोतोंअ कोरजों केअयोंह?’ 6 तांहांअ तीया मांहांय आख्यों, ‘एकहोव टीपळें * जेतुनाअ तेल।’ तांहांअ कारभारींह तीयाल आख्यों, ‘तोअ खाताअ चोपळी ले आने बोहीन माहरी-माहरी पोचास टीपळें लेखी दे!’
7 हातींअ तीयांय बीहराल फुच्यों, ‘तोअ कोतोंअ कोरजों हाय?’ तांहांअ तीया मांहांय आख्यों, ‘पांच होव खोतल्या गोंव।’ तांहांअ कारभारींह तीयाल आख्यों, ‘बोहीन तोअ खाताअ चोपळीम माहरी-माहरी एसीं खोतल्या लेखी दे।’ बीहरा बादा कोरजावालांअरी बी तीयांय एंहकींअज केअयों।
8 तो कारभारी खाराब कामें केअनारो आथो तेबी तीया सेटांय तीयाल साबासी देदी। काहाका, तीयांय हुच्यारी वापरीन सोताअ जोरुल्या पुर्या पाळल्या। मांअ एंहकींअ आखांअ ईं कारोण हाय का, पोरमेहेरापेअ हाची रीते वीसवास नांय केअनारें मांहेंअ, ईयु दुन्याअ वोस्ताहांअरी सोबोंद राखांअ बाबोताम, पोरमेहेराअ देखावली रीते चालनारा मांहांहांअ केअता वादारे हुच्यार हाय।”
9 हातींअ ईसुंय आख्यों, “तीयाअ लीदे, आंय तुमनेंह आखुंह, ईयु दुन्याअ मीलकोतुकींअ दोस्दार बोंणावी ला। तांहांअ तुमांअ ते मीलकोत पुरी वीअ तांहांअ, होरगाम तीयाहांन कोअ दीअ तींहीं तुमांअ ते दोस्दार तुमनेंह आवकार कीअ।
माल-मीलकोत्या आने पोरमेहेर
10 जोंबी मांहुंअ हानींअ बाबोतीहींअ कारभार बी ईमानदारीकींअ चालवेह, तों मोडी बाबोतीहींअ कारभार बी ईमानदारीकींअज चालवीअ। जोंबी मांहुंअ हानींअ बाबोतीहींअ कारभार बी ईमानदारीकींअ नांह चालवुअतों, तों मोडी बाबोतीहींअ कारभार बी ईमानदारीकींअ नांय चालवे। 11 तीयाअ लीदे, जो तुमां पोरमेहेरांय देदली ईयु दुन्यामेरीअ मीलकोतींअ कारभार ईमानदारीकींअ नांय चालव्यो वीअ ता, पोरमेहेर होरगामेरीअ खुब मोडी मीलकोतींअ कारभार तुमनेंह नांयज होपे।
12 आने जो तुमां ईयु तोरतीपेअ तुमनेंह होपला बीहरा लोकाहीं अ पोयसाहांअ कारभार ईमानदारीकींअ नांय चालव्यो वीअ ता, होरगामेरीअ हाची मीलकोतींहन पोरमेहेर तुमनेंह नांय दे।
13 केल्ला बी चाकोराल बेन सेटाहांअ चाकरी नांय केराय। जो तीयाल बेन सेटाहांअ चाकरी केराय ता, तो पेअला सेटाल नोफरोत कीअ आने बीहरा सेटुपेअ माया राखीअ, नेता पेअला सेटुपेअ माया राखीअ आने बीहरा सेटाल नोफरोत कीअ। तेंहकींअज कीईन, तुमां पोरमेहेराअ काम केरांअ आने पुसकोळ पोयसा टोलवांअ सोताल होपी नांह सेकतें।”
ईसुअ बीज्या गोठ्या
(माथी ११:१२-१३; ५:३१-३२; मार्क १०:११-१२)
14 ते गोठ्या उनायन फोरीसीहीं ईसुअ मोस्कुरी केअयी। काहाका, ते बादा पोयसाहांअ लोभी आथा। 15 तांहांअ ईसुंय तीयाहांन आख्यों, “तुमां सोताल बीहरा मांहांहांअ आगलांअ हाचा देखावताह। पेन पोरमेहेर जांअहे का, तुमां तीयापेअ जे माया राखताह तीयाअ केअता खोरेखोर पोयसापेअ वादारे माया राखताह। आंय होकीकोतुम तुमनेंह आखुंह, जीयु वोस्ताहांन मांहेंअ खुब कींमोतुवाल्या गोंअतेंह, तीयु वोस्ताहांन पोरमेहेर एकदोम नोफरोत केअहे।
16 मोसेअ नीयोम आने पोरमेहेराअ गोठ जाहेर केअनारांअ लेखल्या गोठ्या, बापतीस्मा केअनारा योहानाअ वोखतु लोगुंअ ओमोलुम आथ्या। तेहेअनेअ पोरमेहेराअ राज्याअ बाबोताअ हारी गोठ आंय जाहेर केअतो आलोह; आने तीयु गोठीपेअ वीसवास राखनारों दोरेक मांहुंअ तीया राज्याम जांअ तीयाल बोंणी सेके तोतोंअ कोसीस केअहे। तीयाअ ओर्थो ओ नांह का पोरमेहेरांय देदला नीयोम रोद वीअ गीयाह। 17 जुग आने तोरतीअ ता नास वीअ, पेन पोरमेहेरांय देदला नीयोमुंहमनेअ हानांम-हानींअ बाबोत बी रोद नांय वीअ।
18 दाखला तोरीके वोराळ, आदमी का बायुमनेअ गोंवें तों एक मोय तांव लोगुंअ, तें बेनुं एक-बीहराअरी जोळाअलें रे एंहकींअ पोरमेहेरांय वोराळ गोठव्योंह। तीयाअ लीदे, जोबी आदमी सोताअ बायुल सोळी दीईन बीहरी बायाअरी वोराळ केअहे, तो सीनालों केअहे एंहकींअ मानुलोंअ। आने तीयु सोळी थोवली बायाअरी जो आदमी वोराळ केअहे, तो बी सीनालों केअहे एंहकींअ मानुलोंअ।”
एक मालदार मांहुंअ आने लाझारोस नांवांअ एक गोरीब मांहुंअ
19 ईसुंय बोद दांअ चालु राख्यों आने तीयांय ए गांय आखी: “एक मालदार मांहुंअ आथों। तों कायोम खुब मोगें रेसमी ने दुदलें-फोट पोतळें पोवत्लों, आने रोददीह हारों-हारों खाय-पीन मोज-मोज्याम रेहलों। 20 तींहीं लाझारोस नांवांअ एक गोरीब मांहुंअ बी आथों। तों भीख मागांअ खातुर तीया मालदार मांहांअ पोंगाअ बांअणाअहीं रोददीह पोळी रेहलों। लाझारोसुअ आखा डीले चांदें वीअ उठलें। 21 आने तो मालदारुअ टेबोलुपनेअ मांडाअ वादला कुटका पोळत्ला ते खांअ मोर्जी राखत्लों। उपेअनेअ, हुंणें बी आवीन तीयाअ चांदें चाटया केअत्लें। 22 आखरीप तों गोरीब मांहुंअ मोय गीयों आने होरगाअ दुत आवीन तीयाल होरगाम आबराहामाअ पाही लीअ गीया। हातींअ तो मालदार बी मोय गीयो आने डाटाअयो। 23 आने मोअलांअ कोलीम खुब दुख भोगवुअता-भोगवुअता तीयांय उचे हेअयों, आने सेटेनेअ आबराहामाल आने तीयाअ बाजुम लाझारोसुल बोठलो देख्यो। 24 तांहांअ तीया मालदारुंह बोंबलीन आख्यों, ‘ओ मांअ बाहका आबराहाम, मांअपेअ दाया कीईन लाझारोसुल आखेअ का, तो सोताअ आकळीअ बेटकों पांअयांम पीजवीन ईंहीं आवे ने मांअ जीबुल हेलवे। काहाका, ईंहीं ईयु आगीम आंय खुब दुख भोगव्या कीअहुं।’
25 तांहांअ आबराहामुंह तीयाल आख्यों, ‘बेटा, तोअ जीनगीअ वोखताम तुल खुब सुख मीललों पेन तांहांअ लाझारोसुल ता खुब मुस्कुलींअ ओनुभोव वेअलो तों तुं ईत केअ। आमी तीयाल ईंहीं दीलासो मीलेह, पेन तुल खुब दुख मीलेह तों ता बोराबोरुज हाय। 26 आने उपेअनेअ तुं हाय ईया जागाअ ने आमां हाय ईया जागाअ नीसमें, उनखी नांय सेकाय एंहडी खाय हाय। तीयाअ लीदे, ईंहींनेअ जोंबी तुमांअहीं आवांअ मागे तों तींहीं आवी नांय सेके, आने तुमांअहींनेअ केडों आमांअहीं बी आवी नांय सेके।’ 27 तांहांअ तीया मालदारुंह आख्यों, ‘तांहांअ मांअ बाहका! आंय तुल कालावाला कीअहुं का, लाझारोसुल तुं मांअ बाहकाअ कोअ मोकलेअ। 28 तींहीं मांअ पांच पावुह हाय। तीयाहांन तो जायन ईया खुब दुखुवाला जागाअ बाबोताम चेतवोंणी दे, ईयाअ खातुर का, ते सोताअ पापाहांअ खातुर दुखी वीईन ते सोळी दे, आने ते मोय तांहांअ तीयाहांन ईंहीं आवांअ नांय पोळे।’ 29 तांहांअ आबराहामुंह आख्यों, ‘नांह! तीयाहांन चेतवांअ ता, मोसेअ नीयोम आने पोरमेहेराअ गोठ जाहेर केअनाराहां लेखल्या चोपळ्या हाय। तोअ पावुह ते उनाय ने तीयाअ पोरमाणे जीवे।’ 30 तांहांअ तीया मालदारुंह आख्यों, ‘एंहकींअ नांह, बाहका आबराहाम। पेन जो मोअलों केडों बी जीवतों उठीन तीयाहांअहीं जायन तीयाहांन चेतवे ता, ते कादास सोताअ पापाहांअ खातुर दुखी वीईन ते सोळीअ ने पोरमेहेराअ वाटे वोली आवीअ।’ 31 तांहांअ आबराहामुंह आख्यों, ‘नांह, जो मोसेंय आने पोरमेहेराअ गोठ जाहेर केअनारा बीहराहां जों आख्योंह, तों नांय उनाय आने माने ता, मोअलामेनेअ केडों बी जीवतों उठीन जाय आने तीयाहांन चेतवे तेबी, ते नांयज माने।’”