14
आथ-पाग हुजी गेहला मांहांअल ईसु हारों केअहे
1 एक आरामाअ दीह ईसु फोरीसीहींअ एक आगेवानाअ कोअ खांअ गीयो। तांहांअ बादा येहुदी आगेवान, ईसु कांवींह खोटों केअहे का नांह तों होदांअ, तीयाल हेअयाज केअत्ला। 2 तींहीं एक मांहुंअ तीयाअ आगलांअ आथों। तीयाअ आथ-पाग हुजी गेहला। 3 ईसुंय तींहीं आथा तीया फोरीसीहींन आने नीयोम हीकवुअनाराहांन फुच्यों, “आरामाअ दीह आजार्येंुल हारों केरांअ आपुअ नीयोमा पोरमाणे खेरों हाय का नांह?”
4 पेन ते काय बी नांय गोग्या। तांहांअ ईसुंय तीया मांहांपेअ आथ थोवीन तीयाल हारों केअयों, आने हातींअ तीयाल तीयाअ कोअ मोकली देदों। 5 हातींअ ईसुंय फोरीसीहींन आने नीयोम हीकवुअनाराहांन आख्यों, “तुमाहांमेनेअ एकाअ पोयरो का डोगरों आरामाअ दीह वेअयुम पोळे ता, तुमां तीयाल आरामाअ दीह वीअ तेबी बारे नांह काडता का?”
6 तांहांअ ते ईसुअ ईया सोवालुअ जोवाब नांय दीअ सेक्या।
गोरीबळो सोबाव आने गोवारा राखांअ बाबोताम
7 जेवोंणाम नोतरुअलें मांहेंअ केंहकींअ हाराम हारा जागा पोसोंद केअत्लें तों देखीन ईसुंय तीयाहांन बादाहांन एक दाखलो देदो का, 8 “तुमनेंह वोराळाम केडो बी नोतरों दे तांहांअ, तुमां हाराम-हारा जागे मां बोहतें। नेता तुमनेंह नोतरुअनारांह कादास तुमांअ केअता नांवांअता एगाह मांहांअल नोतर्यों वीअ ता, 9 तो आवीन तुमनेंह आखे का, ‘ईयाल ओ जागो दे!’ तांहांअ तुमनेंह नाजवायन एठाम-एठर्याअ जागे बोंहांअ पोळीअ। 10 पेन तीयाअ बोदले, तुमनेंह जो केडो नोतरों दे तांहांअ, तुमां नीचाम-नीचा जागे जायन बोहजा! आने तुमनेंह नोतरुअनारो आवीन आखे का, ‘दोस्त, उपेअ आवीन बोहेअ!’ तांहांअ तींहीं तुमांअरी खानारांअ आगलांअ तुमनेंह मान मीलीअ। 11 ईत केरा का, जोबी केडो सोताल बीहराहांअ केअता मोडो गोंअहे, तीयाल पोरमेहेर हानोअ बोंणावीअ। पेन जो सोताल बीहराहांअ केअता हानोअ गोंअहे, तीयाल पोरमेहेर बादाहांअ केअता मोडो बोंणावीअ।”
12 हातींअ ईसुंय तीयाल नोतरुअनाराल बी आख्यों, “तुं रातीं का दीहु जेवोंण राखो तांहांअ, तोअ दोस्दाराहांन ने तोअ पावाहांन ने तोअ जातुलांहन ने तोअ मालदार आहल्या-पाहल्याहांन ओतोंअज नोतरों मा देतो। काहाका, तें बी तुल नोतरों दीईन तीयाअ बोदलो वालीअ। 13 पेन उलटों, तुं जेवोंण राखो तांहांअ, गोरीबाहांन ने लुलाहांन ने खोळ्याहांन ने आंदलाहांन बी नोतरुअजे। 14 तांहांअ पोरमेहेर तोअपेअ खुब राजी वीअ। काहाका, तीयाहांअ खातुर तुंयुं जों काम केअयोंह तीयाअ बोदलो तें नांय वाली सेके। पेन हाचें मांहेंअ मोअलामेनेअ जीवतें उठीअ तीदीह, पोरमेहेर तुल तीयाअ बोदलो दीअ।”
मोडा जेवोंणाअ दाखलो
(माथी २२:१-१०)
15 ईसुअरी खांअ बोठला तीयाहांमेनेअ एकांय तीयाअ गोठ उनाअयी तांहांअ तीयांय ईसुल आख्यों, “पोरमेहेराअ राज्याअ जेवोंणाम खांअ मोको मीलवुअनारें मांहेंअ खुब नोसीबदार वीअ!”
16 तांहांअ ईसुंय तीयाल आख्यों, “एक मांहुंअ आथों तीयांय मोडों जेवोंण राख्यों। आने तींहमें खुब मांहांहांन नोतर्यें। 17 जेवोंणाअ वोखत वीयो तांहांअ तीयांय सोताअ चाकोराल मोकलीन तीया मांहांहांन आखाव्यों का, ‘मांडो तीयार हाय! खांअ आवा!’ 18 पेन नोतरुअला मांहांहांमेनेअ दोरेक मांहुंअ बानो काडांअ टेक्यों। पेअला मांहांय आख्यों, ‘मांयुं एक खेत वेचाअतों लेदोंह आने मांअ तीयाल हेरांअ जांअ पोळेह। मेरबानी कीईन मांन माफ केअजे!’ 19 तांहांअ बीहरा मांहांय आख्यों, ‘मांयुं पांच जोळ डोगरें लेदेंह आने आंय तीयाहांन फीरवी हेरांअ जाहुं। मेरबानी कीईन मांन माफ केअ!’ 20 तांहांअ बीहराहां आख्यों, ‘मांअ आमीज वोराळ वीयोंह। तीयाअ लीदे मांन नांय आवाय!’ 21 तांहांअ तीया चाकोराहां जायन सोताअ सेटाल बादया गोठ्या आखी देखाव्या। तांहांअ तीयाअ गोठ्या उनायन तीया सेटाल खुब रोग चोळी। काहाका, तीयाहां बादाहां खोटें-खोटें बाने देखावलें। मोंजे, तीयांय तीया चाकोराल आख्यों, ‘उतवाल कीईन सेहेराअ हेरीहींम आने वाटींहपेअ जो, आने गोरीबाहांन, लुलाहांन, आंदलाहांन ने खोळ्याहांन खांअ हादी लाव!’ 22 तांहांअ तो चाकोर माहरी-माहरी तीयाहांन हादी लालो आने सेटाल आख्यों, ‘सेट, तोअ आख्या पोरमाणे बादी जागे जायन आंय मांहांहांन हादी लालोह। तेबी आजी खुब जागो वादी गीयोह।’ 23 तांहांअ तीयाअ सेटांय फाचों तीयाल आख्यों, ‘सेहेराअ बारे मोडा मारगुम आने हाकळी हेरीहींम जायन मांहांहांन फोरोज पाळीन हादी लाव, ईयाअ खातुर का, मांअ कोअ गोवारांहकींअ पोराय जाय।’” 24 हातींअ ईसुंय येहुदीहींन आख्यों, “आंय तुमनेंह आखुंह, पेअलांअ मांयुं नोतरुअला मांहांहांमेनेअ एक बी मांहुंअ मांयुं तीयार केरावलो मांडो साकी हेअनारों नांय।”
ईसुअ चेला बोंणांअ चुकवांअ पोळे ते कींमोत
(माथी १०:३७-३८)
25 एक वोखत लोकाहांअ मोडा टोला ईसुअरी जाहला। तांहांअ तीयांय फाचलांअ फीरीन तीयाहांन आख्यों, 26 “जोबी मांअहीं आवे, तो सोताअ याहकी- बाहका, थेअ-पोयरा, पावु-बोंअयांह, आने सोताअ जीवु केअता बी मांअपेअ वादारे माया नांय राखे ता, तो मांअ चेलो बोंणी सेकतो नांह। 27 जीयु जागे मांहेंअ गुनेगाराल कुरुसापेअ जोळीन माय टाकतेंह, तीयु जागे तो गुनेगार सोताअ कुरुस उसली जाहे। ईयाअ होच जोबी मांअ लीदे दुखें वेठीन मोरांअ बी तीयार नांह वेअतो आने मांयुं देखावली वाटे नांह चालतो, तो मांअ चेलो गोंणायांअ लायोक नांह।
28 आंय तुमनेंह एक दाखलो दीहुं। तुमाहांमेनेअ केडो बी टावोर बांदांअ मागतो वीअ ता, पेअलांअ तो बोहीन तीयाअ कोतोअ खोरचो वीअ तों गोंईअ, आने तों काम पुरों केरांअ पुरता पोयसा सोतापेअ हाय का नांह तों हीअ। 29-30 नेता, तीयापेअ पुरता पोयसा नांय वेअ ता, तीयाअ पायो टाकीन हातींअ टावोर बांदांअ काम आरदों रीअ जाय। आने तों हेअनारें बादें मांहेंअ एंहकींअ आखीन तीयाअ मोस्कुरी कीअ का, ‘तों मांहुंअ बांदांअ ता टेक्यों, पेन तों काम पुरों नांह कीअ सेक्यों!’
31 नेता, एक राजा बीहरा राजाअ हुंबुर लोळाय केरांअ मागतो वीअ ता, पेअलांअ तो बोहीन वीचार कीअ का, ‘वीह हाजार सोयनीकाहांअ लोस्कोर लीईन आवनारा राजाल, आंय दोह हाजार सोयनीकुंहकींअ जीती सेकेंह का नांय।’ 32 जो तो तीयाल जीती नांय सेकाय एंहडों धारे ता, चोळी आवनारो राजा आजी सेटे वेअ तांहांअज तो तीयाअहीं खोबुर देनाराहांन मोकलीन, तीयाअरी होमजी जांअ गोठ फुचावीअ। 33 तेंहकींअज कीईन, तुमांअमेर्योअ केडो बी, तीयापेर्योंअ बादों मांअ लीदे नांय सोळे ता, तो मांअ चेलो नांह बोंणी सेकतो।
पोरमेहेराअ कामाम आवा!
(माथी ५:१३; मार्क ९:५०)
34 खारों ता हारों हाय। पेन जो तों सोताअ होवाद गोमावी दे ता, तीयाल केंहडाकींअ बी फाचों खारों नांय बोंणावी सेकाय। 35 तों खेताहांम बी नांय काम आवे आने खातोरुम बी काम नांय आवे; मांहेंअ तीयाल बारे फेकी दीअ। तुमां मांअ गोठ खोरेखोर होमजांअ मागतें वीअ ता, ते धीयान राखीन उनाया, आने तीयुल तुमांअ जीवोनाहांम उतावा!”