12
ढोंगुअ बाबोताम चेतवोंणी
(माथी १०:२६-२७)
1 ओताअमुज, हाजारु मांहेंअ ईसुअहीं टोलवाअलें आने ओतीअ बादी गोरदी वीअ गीयी का मांहेंअ एक-बीहराअरी डोठाटाअया केअत्लें। तांहांअ ईसुंय तीयाअ चेलाहांनुंज खास कीईन आख्यों, “फोरीसीहींअ होच तुमां बी ढोंगी नांय बोंणी जा तीयाअ खातुर चेतीन रेजा। 2 दोबावी राखली दोरेक बाबोत उगाळी पाळाय आने दोरेक भेद जाहेर केराय। 3 तीयाअ लीदे, तुमां जेबी गोठ आंदाराम आखताह ते भोर दीहाअ लोक उनाय। आने खोलीम जेबी गोठ तुमां कानुम पीपटीन आखताह ते पोंगाअ धाबापनेअ जाहेर केराय।
केडाल बीयुलोंअ?
(माथी १०:२८-३१)
4 मांअ दोस्दारुहुं! आंय तुमनेंह आखुंह, जें मांहेंअ तुमांअ सोरीलाल ता माय टाकी सेकतेंह पेन ईयाअ सीवाय बीहरों काय बी नांह कीअ सेकतें, तेंहडा मांहांहांन बीता मां! 5 पेन तुमांअ केडाल बीयांअ जोजे तों आंय तुमनेंह आखुंह: तुमांअ जीव लीअ लीईन हातींअ * तुमनेंह नोरकाम टाकांअ बी जीयाल आदीकार हाय तीया पोरमेहेराल बीया! आंह, आंय नोक्कीज आखुंह, तीयालुज तुमांअ बीयांअ जोजे।
6-7 एंहकींअ ता पांच चीळखुलें बेन पोयसांहम वेचाअतेंह। तेबी, तीयाहांमेर्याअ एकबी चीळखुलाल पोरमेहेर वीहराअतो नांह। खुब चीळखुलाहांअ केअता तुमां पोरमेहेराअ नोजराम खुब कींमोतुवाला हाय। तुमांअ मुंनकाम कोतेंअ चोट्यें हाय तों बी पोरमेहेराल खोबुर हाय। मोंजे मांहेंअ तुमनेंह कावींह कीअ एंहडी बीख मां राखता!
ईसुल मालीख तोरीके कोबुल केरुलोंअ
(माथी १०:३२-३३; १२:३२; १०:१९-२०)
8 आंय तुमनेंह आखुंह, जोबी ‘आंय ईसुअ चेलो हाय’ एंहकींअ बीहरा लोकाहीं अ आगलांअ कोबुल केअहे, तीया बाबोताम आंय बी पोरमेहेराअ दुताहांअ आगलांअ कोबुल केअहें। का, ‘तो मांअ चेलो हाय।’ 9 पेन जोबी बीहरा लोकाहीं अ आगलांअ ‘आंय ईसुअ चेलो नांह’ एंहकींअ आखेह, तीया बाबोताम आंय बी पोरमेहेराअ दुताहांअ आगलांअ आखेंह का, ‘तो मांअ चेलो नांह।’
10 जोबी मांहांअ पोयराअ मोंजे मांअ वीरुद खोटों गोगीअ, तीयाल पोरमेहेर माफ कीअ। पेन जोबी पोवीतोर आत्माअ वीरुद खोटों गोगीअ, तीयाल पोरमेहेर माफ नांय केअ।
11 तुमां मांअ चेला हाय तीया कारोणे तुमांअ दुसमोन तुमनेंह तीईन येहुदीहींअ भोकती मोंडोळाअ पोंगाहांम आने राजपालुंअ ने बीहरा ओमोलदाराहांअ आगलांअ लीअ जाय तांहांअ, तीयाहांन केंहकींअ जोवाब देवुलोंअ, नेता काय जोवाब देवुलोंअ, नेता काय आखुलोंअ, तीयाअ फीकोर मा कीअहा! 12 काहाका, तांहांअ तुमांअ काय आखांअ जोजे तों, तीयुज घेळी पोवीतोर आत्मा तुमनेंह हीकवीअ।”
मुरोख मालदारुअ दाखलो
13 एक मांहांय ईसुल आख्यों, “गुरुजी, वारसायुअ मांअ भाग मांन दांअ मांअ पावुहल आखेअ!”
14 तांहांअ ईसुंय तीयाल आख्यों, “मांअ दोस्त, तुमांअ मीलकोताअ केल्लो भाग केडाअ लागीअ तों नोक्की केरांअ, नेता तुमांअ मीलकोताअ भाग पाळी दांअ केडांय मांन नीम्योह?” 15 हातींअ ईसुंय टोलामेर्याअ बादाहांन आख्यों, “केल्ली बी जातीअ लोब तुमांअ मोनाहांम नांय आवे तीयाअ खातुर चेतीन रेजा! काहाका, आपुंहपेअ जे माल-मीलकोत वीअ तीयुकींअ आपनेंह हाची जीनगी नांय मीलीअ।” 16 हातींअ ईसुंय तीयाहांन एक दाखलो देदोः “एक मालदार मांहांअ खेताम खुब पाक आलो। 17 तांहांअ तों वीचार केरांअ टेक्यों का, ‘ओ बादो पाक पोय थोवांअ मांअपेअ पुरतो जागो नांह। आमी आंय काय क्युंव?’ 18 सेल्ले तीयांय आख्यों, ‘आंय एंहकींअ केअहें: मांअ हाटळें तोळी टाकीन तीयाहांअ केअता मोडें हाटळें वींआंवेंह, आने तींहमें मांअ बादों ओनाज आने मांअपेर्याअ बादया वोस्तु पोय थोवेंह। 19 हातींअ मांअ-मांअ आखेंह का: आंय खुब नोसीबदार मांहुंअ हाय। मांन जीयुबी हारी वोस्ताहांअ जोरुल हाय, ते बादया मांअपेअ हाय, आने ते खुब वोरसे लोगुंअ चालीअ। आमी आंय खाय-पीन मोज्या कीईन आराम केअहें।’ 20 पेन पोरमेहेरांय तीयाल आख्यों, ‘ओ मुरोख! आज रातींअज तुल तोअ जीव सोळी दांअ पोळीअ तांहांअ, तोअ खातुर तुंयुं राखी थोव्योंह तों बादों तुल काम लागीअ एंहकींअ तुल लागेह का?’”
21 हातींअ दाखलो पुरो केअता ईसुंय आख्यों, “जें मांहेंअ खाली सोताअज लीदे माल-मीलकोत टोलवुअतेंह, पेन पोरमेहेराअ नोजराम मालदार नांह, तीयाहांअ जीवोनाहांअ ओंत बी तीया मुरोख मालदारुअ जीवोनाअ ओंताअ होचुज आवीअ।”
पोरमेहेरापेअ भोरुचो राखा!
(माथी ६:२५-३४)
22 हातींअ ईसुंय तीयाअ चेलाहांन आख्यों, “तीयाअ लीदे, आंय तुमनेंह आखुंह, तुमां काय खाहा एंहकींअ तुमांअ जीवोनाहांअ जोरुलीहींअ बाबोताम, नेता तुमां काय पोवाह एंहकींअ तुमांअ सोरीलाहांअ जोरुलीहींअ बाबोताम चींता मां राखता! 23 काहाका, तुमां जों खाताह तीयाअ केअता तुमांअ जीनग्या वादारे कींमती हाय। आने जों पोतळों तुमां पोवताह तीयाअ केअता तुमांअ सोरीलें वादारे कींमती हाय! 24 कागळांअ वीचार केरा! तें नांह ता बीयारो पोअतें, का नांह वाडतें; तें नांह ता मोलीन हाटळाहांम पोअतें। तेबी, पोरमेहेर तीयाहांन मांडो पुरो पाळेह। तांहांअ तुमनेंह तो नोक्कीज खावावीअ। काहाका, तुमां केल्ला बी चीळाहांअ केअता वादारे कींमती हाय! 25 तुमाहांमेनेअ केडों चींता कीअ-कीईन सोताअ जीनगीअ एक काल्लाख बी वादावी सेकेह? 26 चींता कीईन तुमां ओतोंअ ना जेंहडों काम बी नांह कीअ सेकता ता, तुमां बीहरी बाबोतीहींअ चींता काहा राखताह? 27 फुलांअ सोळवा केंहडा वादताह तीयाअ वीचार केरा! ते नांह ता मेहनोत केअता, का नांह ता पोतळें बोंणावता। तेबी, आंय आखुंह, खुब मालदार सालोमोन राजापेअ बी तीया फुलांअ होच खुब हारें पोतळें नांय आथें। 28 ओ ओसा वीसवासावालाहां! आज खेताम हाय आने हाकाल चुलीम बाली टाकाअताह एंहडा सोडवांहन पोरमेहेर ओताअ सोबाला बोंणावेह ता, तो तुमनेंह तीयाहांअ केअता बी वादारे हारकींअ पोवावीअ ते, कोतीअ बादी खातरीवाली गोठ हाय?
29 तीयाअ लीदे, तुमां काय खाहा, काय पीयाह तीयाअ चींता मां राखता! 30 काहाका, दुन्याअ मांहेंअ जें पोरमेहेराल नांह ओअखुअतें, तेंज ईयु बादी बाबोतीहींअ चींता राखतेंह। होरगामेर्याअ तुमांअ पोरमेहेर बाहकाल खोबुरुज हाय का तुमनेंह ईयु बादी बाबोतीहींअ जोरुल हाय। 31 तीयाअ बोदले, तुमां तुमांअ जीवोनाहांम पोरमेहेराअ राज्याअ ओनुभोव केरांअज मोर्जी राखा! तांहांअ तो तुमनेंह तीया ओनुभोवुअरी ए बादया वोस्तु बी दीअ।
होरगामेन्याअ खुब आसीरवाद
(माथी ६:१९-२१)
32 ओ घेटाहांअ हानांअ टोलाअ होच हाय एंहडा मांअ चेलाहां! बीयाह मां! काहाका, तुमनेंह तीयाअरी राज केरावांअज पोरमेहेर बाहकाअ खुब मोर्जी हाय। 33 मोंजे, तुमाहांपेअ जेबी वोस्तु हाय ते बादया वेचीन जे पोयसा उबजे ते गोरीबाहांन दीअ दा। आने एंहकींअ कीईन तुमां होरगाम खुब आसीरवाद मीलवाह। तों ता तुमांअ पोयसा एंहडी जागे थोवांअ जेंहडों हाय का जींहीं ते घोटी नांय जाय। आने तींहीं बांड तीयु मीलकोताअ पाही जाय नांह सेकतो, आने कीळो तीयाअ नास नांह कीअ सेकतो। 34 ईत राखजा! जीयु वोस्ताहांन तुमां कींमती गोंअतेंह, तीयु वोस्ताहांअ वीचारुमुज तुमां कायोम रीहा। *
मालीख ईसु फाचो आवीअ तांहांअ तीयाल मीलांअ तीयार रेजा!
35-36 सोताअ सेट केंहडीवेल वोराळाअ जेवोंणामनेअ फाचो आवे तीयाअ वाट जोवनारा आने काम केरांअ तीयार रेनारा चाकोराहांअ होच, तुमां बी तीयार रेजा! ते चाकोर दीवा बोलता राखीअ आने तीयाहांअ सेट बांअणें ठोके तांहांअ, तें उगाळांअ तीयार रीअ आने काम केरांअ सोताअ कोंबुर बांदीन तीयार रीअ। 37 तांहांअ तो सेट फाचो आवे तांहांअ जागता रेनारा तीया चाकोराहांपेअ तो खुब राजी वीअ। आंय तुमनेंह आखुंह, तो सेट सोताअ कोंबुर बांदीन तीयाहांन खावावांअ तीयार वीअ आने तीयाहांन मांडो खांअ बोहावीअ आने आवीन तो तीयाहांन मांडो दीअ। 38 तो आरदी रातीं आवे का फाचलांअ आवे, पेन तीयाहांन तीयार वेअलाज देखे ता, तो तीया चाकोराहांपेअ खुब राजी वीअ।
39 पेन ओतोंअ जांअजा का, जो कोअ धोणील बांड केंहडीवेल आवनारो हाय तीयाअ खोबुर वेअती ता, तो जागतो रीईन कोअमें चोरी नांय वेरांअ देतो। 40 तेंहकींअज कीईन, तुमां बी तीयारीम रा! काहाका, तुमां नांय धाराह एंहडा वोखतुज मांहांअ पोयरो मोंजे आंय फाचो आवेंह।”
ईमानदार सेवोक आने ईमानदारी वोगुराअ सेवोक
(माथी २४:४५-५१)
41 तांहांअ पीतोरांय फुच्यों, “मालीख, तुं ओ दाखलो आमनेंह ओतोअज आखोह का बादाहांन आखोह?”
42 तांहांअ मालीखांय आख्यों, “आंय ईं तुमनेंह बी आखुंह आने बीहराहांन बी आखुंह, जें एंहडा ईमानदार आने ओकलीवाला चाकोराअ होच हाय। तीया चाकोराल तीयाअ सेटांय बादा चाकोराहांन टेमापेअ मांडो दांअ खातुर कोअ कारभारी बोंणाव्यो। हातींअ तो लांबी मुसाफोरीम गीयो। 43 तीया चाकोराअ सेट फाचो आवे तांहांअ, तीयाल सेटांय होपलों काम हारकींअ केअता देखे ता, तो तीया चाकोरापेअ खुब राजी वीअ। 44 आंय तुमनेंह नोक्कीज आखुंह: तो सेट तीया चाकोराल सोताअ बादी मीलकोताअ कारभारी बोंणावीअ। 45 पेन जो तो चाकोर सोताअ मोनाम एंहडो वीचार केअ का, ‘मांअ सेट ता आवता वाअ लागवेह’, आने एंहकींअ वीचारीन तो आर्याअ चाकोराहांन आने कामारींहन ठोकांअ टेके आने खाय-पीन साकटो वेअ ता, 46 तीयांय वीचार्यों बी नांय वीअ तीदीह, तीया चाकोराअ सेट आवी जाय, आने तीयाल, ईमानदारी वोगुराअ लोकाहांन जींहीं सीक्सा केअतेंह तीयु जागे मोकली दीअ, आने तीयाल कोळोक रीते सीक्सा कीअ।
47 जो चाकोर तीयाअ सेटुअ मोर्जी जांयन बी तीयाअ सेटांय तीयाल होपलों काम पुरों नांह केअतो, तीयाल खुब मार पोळीअ। 48 पेन सेटुअ मोर्जी जांअया वोगुर मार पोळे तेंहडों कांवींह केअनारा चाकोराल ओसो मार पोळीअ। आने जीयाल पोरमेहेरांय वादारे आवळोत्या देदयाह, तीयापेनेअ तो वादारे हीसाब मागीअ आने जीयाल वादाराम-वादारे आवळोत्या तीयांय देदयाह, तीयापेनेअ तो वादाराम-वादारे हीसाब बी मागीअ।
लोकाहांम फाट-फुट पोळीअ!
(माथी १०:३४-३६)
49 आंय दुन्याअ लोकाहांम पोरमेहेराअ राज्याअ बोदाहांअ रुपी आग लागवांअ आलोह। ते आग आमीज लागी जाय एंहडी मांअ मोर्जी हाय। 50 खुब दुखु रुपी ओनुभोव मांअ केरांअ जोजे। खुब मुस्कुल्या वेठीन बी आंय तों केअहें। 51 ईयु दुन्याअ लोक एक-बीहराअरी सांतीम रे तीयाअ लीदे आंय आलोह एंहकींअ तुमां धारताह का? आंय तुमनेंह आखुंह, तीयाअ खातुर नांह, पेन उलटों तीयाहांम फाट-फुट पाळांअ खातुरुज आलोह। 52 सोताअ जीवोनाहांम पोरमेहेराअ राज्याअ ओनुभोव केअनारांअ आने तों नांय केअनारांअ नीसमें आमीनेअ फाट-फुट पोळीअ। एक कोअमें पांच जांएं वीअ ता, तीयाहांमेनेअ बेन जांएं बीहरा तीन जांअहांअ वीरुद वीअ, आने तीन जांएं बीहरा बेन जांअहांअ वीरुद वीअ। 53 बाहको तीयाअ पोयराअ वीरुद वीअ, आने पोयरो तीयाअ बाहकाअ वीरुद वीअ; याहकी तीयुअ पोयरीअ वीरुद वीअ आने पोयरी तीयुअ याहकीअ वीरुद वीअ; हावुळी तीयुअ वोवळीअ वीरुद वीअ, आने वोवळीह तीयुअ हावुळीअ वीरुद वीअ।”
सेल्ला जोमानाल होमजी ला!
(माथी १६:२-३)
54 आने ईसुंय टोलामेर्याअ लोकाहांन बी आख्यों, “दीह बुडताअ वेल कालें-कालें वादलें चोळतें देखीन तुमां तुरुतुज आखताह का, ‘वोहरात पोळीअ।’ आने तीयाअ पोरमाणे झापटों पोळेह बी। 55 आने उनो वारो चालेह तांहांअ तुमां आखताह का, ‘लु आवीअ।’ आने तीयाअ पोरमाणे वेअहे बी। 56 ओ ढोंगीहीं! तोरतीअ ने जुगीअ देखावापेनेअ तुमां हावामानुअ भोवीसवाणी केअताह। तांहांअ ईया जोमानाम पोरमेहेर जों केअतो रीयोह तीयाअ ओर्थो तुमां काहाल नांह जांअता?
तोअ वीरुदुवालांअरी होमुजवाद काड!
(माथी ५:२५-२६)
57 काय केरांअ खेरों हाय तों तुं सोते, तोअपेअ आजी सोमोय हाय तांव, काहाल नांह नोक्की केअतो? 58 तोअ वीरुदुवालो तुल कोरुटाम लीअ जाय तांहांअ, वाटेज तीयाअरी होमजी जांअ कोसीस केअजे! जो तुं एंहकींअ नांय कीअहो ता, तोअ वीरुदुवालो तुल जोजाअहीं तांय जाय। आने जोज तुल पोलीसुल होपी दीअ, आने पोलीस तुल जेलाम पुरी दीअ। 59 आंय तुल नोक्कीज आखुंह, कोरजाअ एक पोयसो बी बाकी राख्या वोगुर तुं नांय पोव तांव तुं जेलाम नेअ सुटो नांह वेअनारो।”