7
रोम सारकाराअ लोस्कोराअ एक सुबेदारुअ चाकोराल ईसु हारों केअहे
(माथी ८:५-१३)
1 लोकाहांन ए बादया गोठ्या आख्या हातींअ, ईसु फाचो तीयाअ चेलाहांअरी कापेरनाहुम सेहेराम गीयो। 2 तींहीं रोम सारकाराअ लोस्कोराअ एक सुबेदार आथो। तीया सुबेदारुअ एक खुब मेरालो चाकोर आथो। तो चाकोर खुब आजार्यें आथो आने मोरांअ तीयारीम आथो। 3 तो सुबेदार ईसुअ बाबोताम गोठ उनाअयो तांहांअ तीयांय, ईसु आवीन तीयाअ चाकोराल हारो केअ तीयाअ खातुर तीयाल कालावाला केरांअ ईसुअहीं मानुवाला थोळाक येहुदी आगेवानाहांन मोकल्या। 4 ते आगेवान ईसुअहीं आला आने तो तीयाहांअरी जायन तीया ओमोलदाराअ चाकोराल हारो केरांअ तीयाहां तीयाल खुब कालावाला केअया। तीयाहां आख्यों का, “तो सुबेदार तोअपेनेअ ओतीअ मोदोत मीलवांअ ता लायोक हाय। 5 काहाका, आपुअ येहुदी जातीअ मांहांहांपेअ तो माया राखेह। आने ईयांय सोताअ खोरचे आपुअ खातुर भोकती मोंडोळाअ एक कोअ बी बांदी देदोंह।”
6 तांहांअ ईसु तीया येहुदी आगेवानाहांअरी गीयो। तो तीया सुबेदारुअ कोअ पाही-पाही गीयो तांहांअ, तीया सुबेदारुंह तीयाअ थोळाक दोस्दाराहांन मोकलीन ईसुल आखव्यों का, “साहेब, तुं मांअ कोअ आवांअ तोकलीत मा केअतो। तुं मांअ कोअ आवो ओतोअ आंय लायोक नांह। 7-8 आने आंय सोते बी तोअहीं आवांअ सोताल लायोक नांह गोंअतों। आने आंय सोते बी मांअ उपरी ओमोलदाराहांअ आथाअ एठा काम कीअहुं, आने मांअ आथाअ एठा बी बीहरा सोयनीक काम केअताह। एक सोयनीकाल आंय जांअ हुकोम कीअहुं ता तो जाहे। आने बीहरा सोयनीकाल आवांअ हुकोम कीअहुं ता तो आवेह। आने मांअ गुलामाल ‘ईं केअ!’ एंहकींअ हुकोम कीअहुं ता तो गुलाम तेंहकींअ केअहे। मोंजे, मांन वीसवास हाय का तोअ सोब्दा खुब आदीकारुवाला हाय। तीयाअ लीदे मांअ चाकोराअ आजार नींगी जांअ तुं ईंहींनेअज एक हुकोम केअ आने तांहांअ मांअ चाकोर हारो वीअ जाय।”
9 ए बादया गोठ्या उनायन ईसुल खुब नोवाय लागी। तीयांय फाचलांअ फीरीन, तीयाअ फाचलांअ आवनारा मांहांहांन आख्यों, “आंय तुमनेंह आखुंह का मांअपेअ ओतोअ बादो वीसवास राखनाराल मांयुं ईसरायेल लोकाहांम बी नांह देख्यों!”
10 हातींअ तीया सुबेदारुअ मांहेंअ फाचें तीयाअ कोअ गीयें, आने तीयाहां तीयाअ चाकोराल पुरी रीते हारो वीअ गेहलो देख्यो।
एक रोंडेअ बायाअ पोयराल ईसु जीवतो केअहे
11 थोळाक वोखत हातींअ, ईसु तीयाअ चेलाहांअरी नाईन नांवांअ गांवांम गीयो। तीयाअरी लोकाहांअ मोडो टोलो बी आथो। 12 ते बादा गांवांअ हींवुंअहीं पोच्या तांहांअ गांवांअ मांहेंअ मांहण्यों लीअ जाहलें तें हुंबुरुज मील्यें। मोअनारों मांहुंअ तीयाअ याहकीअ एका-एकुज पोयरो आथो। ते रोंडेअ बाय आथी। 13 तीयु रोंडेअ बायुल देखीन मालीख ईसुल तीयुपेअ कींअवांअ कीअ आली, आने तीयांय तीयुल आख्यों, “रोळती मा!” 14 हातींअ ईसुंय तीया मांहण्याअ खाटलाअ पाही जायन तों तेअयों। तांहांअ मांहण्याअ उसलुअनारा उबी रीया। तांहांअ ईसुंय मोअला मांहांअल आख्यों, “ओ जुवान, आंय तुल आखुंह, उठ!” 15 तांहांअ मोअलों मांहुंअ उठीन बोठों आने गोठ्या केरांअ टेक्यों। आने ईसुंय तीयाल तीयाअ याहकील होपी देदों।
16 तों देखीन तीया बादा मांहांहांन खुब बीख लागी आने तीयाहां पोरमेहेराअ गुणगान केअता आख्यों, “पोरमेहेराअ गोठ जाहेर केअनारो एक मोडो सेवोक आपुअ नीसमें पोरगोट वीयोह। सोताअ लोकाहांअ मोदोत केरांअ पोरमेहेर सोतेज आलोह।”
17 आने ईसुअ तीया कामुअ गोठ आखा येहुदीया जील्लाम आने पाहल्याअ-पाहल्याअ वीस्तारुंहम फेलाय गीयी।
बापतीस्मा केअनारा योहानाअ चेला ईसुल मीलताह
(माथी ११:२-१९)
18-19 बापतीस्मा केअनारा योहानाल तीयाअ चेलाहां ईसुअ बाबोताम गोठ आखी। तांहांअ योहानांय तीयाअ बेन चेलाहांन ईसुअहीं एंहकींअ फुचांअ मोकल्या, “जीयाअ आवांअ वाट आमां जोव्या केअताह तो ख्रीस्त तुंज हाय का, नेता आमां बीहराअ वाट जोवजी?”
20 तांहांअ योहानाअ चेलाहां ईसुअहीं आवीन आख्यों, “तुल एंहकींअ फुचांअ योहानांय आमनेंह मोकल्याह का, जीयाअ आवांअ वाट आमां जोव्या केअताह तो ख्रीस्त तुंज हाय का, नेता आमां बीहराअ वाट जोवजी?”
21 योहानाअ चेला तीयाअहीं आला तेंहडामुज, ईसु खुब मांहांहांन तीयाहांअ रोगाहांमेनेअ आने सोरीलाअ बीहरा दुखाहांमेनेअ हारें केअत्लो, आने पुतळें लागला खुब मांहांहांमेनेअ पुतळाहांन काडत्लो, आने खुब आंदला मांहांहांन बी देखतें केअत्लो। 22 तांहांअ ईसुंय योहानाअ चेलाहांन जोवाब देदो, “ईंहीं तुमां जों-जों हेअयोंह आने उनाअयाह तों बादों जायन योहानाल आखजा! मोंजे का, आंय आंदलाहांन देखतें कीअहुं, लुलाहांन चालतें कीअहुं, बेरांहन उनाअतें कीअहुं, मोअलाहांन जीवतें कीअहुं, आने गोरीब लोकाहांन हारी गोठ जाहेर कीअहुं। 23 मांअ बाबोताम जीयाहांन जाराक बी सोंका नांह, तीयाहांपेअ पोरमेहेर खुब राजी हाय।”
बापतीस्मा केअनारा योहानाअ बाबोताम ईसुअ साक्सी
24 योहानांय मोकलुअला ते खोबुर देनारा गीया हातींअ, ईसु टोलामेर्याअ लोकाहांन योहानाअ बाबोताम आखांअ टेक्यो का, “तुमां उजाळाम केंहडा मांहांअल हेरांअ गेहलें? वाराअरी आलता बुरुअ होच घेळी-घेळी बोदलाअया केअनारा मांहांअल हेरांअ गेहलें का? 25 नेता, रेसमी पोतळें पोवला मांहांअल हेरांअ गेहलें का? रेसमी पोतळें पोवनारें आने जाहो-जालालीम रेनारें मांहेंअ ता राजाअ मेहेलुंहमुज रेतेंह। 26 नेता, पोरमेहेराअ गोठ जाहेर केअनाराल हेरांअ गेहलें का? आंह, पेन खोरेखोर ता, पोरमेहेराअ गोठ जाहेर केअनारा केअता बी मोडा मांहांअलुज हेरांअ गेहलें। 27 काहाका, योहानाअ बाबोतामुज पोवीतोर लेखाणाहांम एंहकींअ लेखलों हाय का,
‘पोरमेहेरांय आख्यों, “आंय मांअ खोबुर देनाराल तोअ आगलांअ मोकलेंह।
तो तोअ आगलांअ जाय आने मांहेंअ तुल आवकारे तीयाअ खातुर तीयाहांन तीयार कीअ।’” 28 आंय तुमनेंह आखुंह, मांहांहां तोरीके जोन्मुअलांहम योहानु केअता मोडों मांहुंअ आजी लोगुंअ पेदा नांह वीयों। तेबी, पोरमेहेराअ राज्यामेर्योंअ ओसा मानुवालों वीसवासी बी योहानु केअता मोडों हाय।”
29 वेरो उगरावनारा आने तींहींर्याअ बीहरा बादा लोक तों उनाअया तांहांअ, तीयाहां योहानुपेअ बापतीस्मा लेदों आने एंहकींअ कीईन तीयाहां मानी लेदों का, तीयाहांन तीयाहांअ पापाहांअ सीक्सामेनेअ वाचावांअ खातुर पोरमेहेरांय बोंणावली वाट बोराबोर हाय। 30 पेन फोरीसीहीं आने नीयोम हीकवुअनाराहां ता, तीयाहांअ खातुर पोरमेहेराअ जो ईरादो आथो तीयाअ नाकार केअयो आने योहानुपेअ बापतीस्मा लांअ ना पाळी।
31 टोलामेर्याअ लोकाहांन फाचों ईसुंय आख्यों का “योहान आने आंय जींयांअरी गोठ्या केअताह तीया लोकाहांअ हारकामोणी आंय केडा-केडाअरी कीअहुं तों उनाया! 32 ते ता बाजाराम बोहीन बेन टुकळ्या पाळीन रोवनारा हानांअ पोयराहांअ होच हाय। एक टुकळीअ पोयरें बीहरी टुकळीअ पोयराहांन आखे का, ‘आमां तुमांअ खातुर पावी वाजी। पेन तुमां ता तीयाअ चाले नाच्यें नांय। हातींअ आमां मोयुळीअ गीतें आख्यें। पेन तुमां ता तीयाअ पोरमाणे रोळ्यें नांय।’ आंय एंहकींअ आखांअ मागुंह का, तेंहकींअज कीईन ईया मांहांहांन बी नांय ता मांअ सेवा गोंवीं का नांय ता योहानाअ सेवा गोंवी। 33 बापतीस्मा केअनारो योहान आलो, आने तो बीहरें बादें मांहेंअ खातेंह तेंहडो हारो मांडो नांह खातो का नांह दाराख्साअ रोह पीतो। तांहांअ तुमां एंहकींअ आखीन तीयाअ नाकार केअयो का, ‘तीयाल पुतळों लाग्योंह।’ 34 पेन मांहांअ पोयरो मोंजे आंय आलोह, आने बीहरा लोकाहीं अ होच आंय खातोह ने पीतोह तांहांअ तुमां आखताह का, ‘ईया मांहांअल हेरा! तों कातवाअलों ने साकट्यों हाय, आने वेरो उगरावनारांअ आने बीहरा पापी मांहांहांअ सोबती हाय!’ 35 तेबी, जें होकीकोतुम पोरमेहेराअ पोयरें हाय, तें एंहकींअ मानी लेतेंह का, पोरमेहेर जों केअहे तों होकीकोतुमुज ओकलीवालों हाय।”
एक बाय ईसुअ पागुंहपेअ आस्तोर चोपळेह
36 एक वोखत, सीमोन नांवांअ एक फोरीसींह ईसुल तीयाअरी मांडो खांअ हादयो। तांहांअ ईसु तीयाअ कोअ गीयो आने खांअ बोठो। 37 तीया गांवांम एक बाय आथी। ते पेअलांअ वेस्या आथी। ते उनाअयी का ईसु फोरीसी मांहांअ कोअमें बोहीन खाहे। तांहांअ ते हारी गुंदीवाला आस्तोरुकींअ पोअली आरासुअ ढोगळाअ बोरनी लीईन तीया फोरीसीअ कोअ गीयी, 38 आने रोळती-रोळती आने रोज्यें पाळती-पाळती ईसुअ पागाहांअहीं उबी रीयी। तीयुअ रोज्यांहकींअ ईसुअ पाग पीजाय गीया। तीयुंय सोताअ चोट्यांहकींअ ते पाग नुसी टाक्या, आने पागुंहन चुबजीन तीयापेअ आस्तोर चोपळ्यों। 39 ईसुल हादनारा फोरीसींह तों देखीन सोताअ मोनाम वीचार्यों, “जो ईं मांहुंअ खोरेखोर पोरमेहेराअ गोठ जाहेर केअनारों वेअतों ता, ईयाल खोबुर पोळी जाती का ईयाल आथलुअनारी ए बाय केंहडी हाय, आने ते केंहडी पापी जीनगी जीवी रीयीह!”
40 तांहांअ ईसुंय तीयाल आख्यों, “सीमोन, मांअ तुल एक गोठ आखुलोंअ हाय।” तांहांअ सीमोनुंह आख्यों, “आखेअ, गुरुजी!”
41 तांहांअ ईसुंय आख्यों, “एक सावकारुअ बेन कोरजावाला आदमी आथा। एकापेअ पांच होव चांदीअ रुप्यांअ कोरजों आने बीहरापेअ पोचास चांदीअ रुप्यांअ कोरजों। 42 ते बेनुं तों कोरजों फाचों वाली नांय सेक्या तीयाअ लीदे, तीया सावकारुंह बेनुंअ कोरजों माफ केअयों। तांहांअ आंय आमी तुल फुचुंह, तीया बेनुं आदमींहमनेअ केडो सावकारुपेअ वादारे माया राखीअ? ओसा कोरजावालो का वादारे कोरजावालो?”
43 तांहांअ सीमोनुंह जोवाब देदो, “आंय धारुंह का जीयाअ वादारे कोरजों माफ वीयों तोज तीयापेअ वादारे माया राखीअ।”
तांहांअ ईसुंय तीयाल आख्यों, “तुं खेरोंज आखोह।” 44 हातींअ ईसु तीयु बायाअ वेल फीर्यो आने सीमोनाल आख्यों, “ईयु बायुल हीअहो, बोराबोरक्ने? आंय तोअ कोअ आलो तांहांअ, तुंयुं मांन पाग तुवांअ पांय सुदा नांह देदों। पेन ईयु बायुंय ता तीयुअ रोज्यांहकींअ मांअ पाग तुव्या आने तीयुअ चोट्यांहकींअ ते नुसी टाक्या। 45 आने तुंयुं मांन चुबजीन मांअ आवकार नांह केअयो। पेन आंय कोअमें आलोह तेदरीअ ते मांअ पागुंहन चुबज्याज केअहे। 46 आने तेंहकींअज कीईन, तुंयुं मांअ मुनकाम चोपळांअ तेल सुदा नांह देदों। पेन ईयुंय ता मांअ पागुंहपेअ आस्तोर चोपळ्योंह। 47 तीयाअ लीदे, आंय तुल आखुंह, तीयुंय केअला खुब पाप मांयुं माफ कीअ देदाह। ईयुंय जों काय मांअ खातुर केअयोंह तीयाकींअ तीयुंय देखाव्योंह का, ते मांअपेअ खुब माया राखेह। पेन जीया मांहांअ ओसा पाप मांयुं माफ केअयाह, तों मांअपेअ माया बी ओसीज राखीअ।”
48 हातींअ ईसुंय तीयु बायुल आख्यों, “आंय तोअ पाप पुरी रीते माफ कीअहुं।”
49 तांहांअ तीयाअरी खांअ बोठला ते वीचार केरांअ टेक्या का, “मांहांहांअ पाप माफ केअनारों ईं केंहडों मांहुंअ हाय?”
50 पेन ईसुंय तीयु बायुल आख्यों, “तुंयुं मांअपेअ वीसवास राख्योह तीयाअ लीदे, पोरमेहेरांय तुल वाचावी लेदीह। सुख-सांतीम जो!”