6
आरामाअ दीहाअ बाबोताम बोद
(माथी १२:१-८; मार्क २:२३-२८)
1 एक आरामाअ दीह, ईसु तीयाअ चेलाहांअरी ओनाजुंअ पोर्या खेताहांमेनेअ जाहलो। तांहांअ तीयाअ चेला कोंहेंअ तोळीन तीयाहांन सोताअ आथाहांम चोली-चोलीन खाहला। 2 तांहांअ फोरीसीहींमेर्याअ थोळाकाहीं तीयाहांन फुच्यों, “आपुअ नीयोमा पोरमाणे आरामाअ दीह जों काम आपुअ नांय केरांअ जोजे, तों काम तुमां काहा केअताह?”
3 तांहांअ ईसुंय तीयाहांन जोवाब देदो, “दावीद राजा आने तीयाअ आर्याअ पुखा वेअला तांहांअ दावीदांय केल्लों काम केअलों तीया बाबोताम लेखाअली गोठ तुमां वीहराय गीयाह का? 4 पोरमेहेराअ भोकती केरांअ तोंबुंम तो गेहलो तांहांअ, मोडा पुंजारांय तीयाल पुंजारांय पोरमेहेराल चोळवुअला मांडा देदला! मोसेंय देदला नीयोमा पोरमाणे ते मांडा खांअ सुट ता खाली पुंजाराहांनुंज हाय। पेन दावीदांय ते मांडा खादला आने तीयाअ आर्याअ लोकाहांन बी ते देदला।” 5 हातींअ ईसुंय तीयाहांन आख्यों, “मांहांअ पोयराल मोंजे मांन आरामाअ दीह मांअ चेलें केल्लों-केल्लों काम कीअ सेके तों नोक्की केरांअ आदीकार हाय।”
लोखवो वेअला आथावाला एक मांहांअल ईसु हारों केअहे
(माथी १२:९-१४; मार्क ३:१-६)
6 बीहरा एक आरामाअ दीह ईसु येहुदीहींअ एक भोकती मोंडोळाअ कोअमें जायन तींहीं बोद देहलो। तींहीं एक मांहुंअ आथों। तीयाअ हुदा आथाम लोखवो वीअ गेहलो। 7 नीयोम हीकवुअनारा थोळाक लोक आने बीहरा फोरीसी लोक तींहीं आथा। ते ईसुपेअ गुनो थोवांअ काय बी बानो होदी रेहला। तीयाअ लीदे ते तीयापेअ नोजुर राखत्ला का, आरामाअ दीह तो तीया मांहांअल हारों केअहे का नांह। जो तो तीयाल हारों केअ ता आरामाअ दीह नांय पालांअ बाबोताम ते तीयापेअ गुनो थोवी सेके। 8 पेन ते जो वीचार केअत्ला तो ईसु जांय गीयो। मोंजे तीयांय तीया लोखवावाला मांहांअल आख्यों, “ईंहीं आव आने बादें हीअ सेके एंहडा जागे उबी रे!” मोंजे तीया मांहांय तेंहकींअ केअयों। 9 हातींअ ईसुंय तीया धारमीक आगेवानाहांन फुच्यों, “आंय तुमनेंह एक सोवाल फुचुंह। आपुअ नीयोमा पोरमाणे आरामाअ दीह केडाअ भोलों केरांअ बोराबोर हाय का नुकसान केरांअ? तीदीह केडाअ जीव वाचावुलोंअ बोराबोर हाय का तीयाअ जीवुअ नास केरुलोंअ?” 10 हातींअ ईसुंय तीयाअ चारुवेल बोठला लोकाहांपेअ नोजुर टाकीन तीया लोखवावाला मांहांअल आख्यों, “तोअ आथ लांबो केअ!” तांहांअ तीया मांहांय सोताअ आथ लांबो केअयो आने तो आथ फाचो हारो वीअ गीयो। 11 पेन ते धारमीक आगेवान ता खुब खीजवाय गीया आने तीयाहां एक बीहराअरी चारचा केअयी, “ईसुल पोतावी टाकांअ आपुंह काय केअजी?”
ईसु बार खास चेलाहांन नीमेह
(माथी १०:१-१४; मार्क ३:१३-१९)
12 तीया दीहाहांम एक वोखत पोरमेहेराल ओरुज केरांअ खातुर ईसु एक डोगाअपेअ गीयो। तींहीं तीयांय पोरमेहेराल ओरुज केअता-केअता एक आखी रात काडी। 13 दीह उग्यो तांहांअ तीयांय सोताअ चेलाहांन हादया, आने तीयाहांमेनेअ बार आदमीहींन पोसोंद केअया, आने तीयाहांअ “खास खोबुर देनारा” नांव पाळ्यों। तीयाहांअ नांवें ईं हाय: 14 सीमोन जीयाअ नांव ईसुंय पीतोर पाळलों तो, सीमोनाअ पावुह आंदरीया, याकोब, योहान, फीलीप, बारथोलोमी, 15 माथी, थोमा, आलफीअ पोयरो याकोब, सीमोन जो रोम सारकाराअ वीरुद केअनारी टुकळीमेर्योअ आथो तो, 16 याकोबाअ पोयरो येहुदा, आने केरीयोत गांवांअ येहुदा जीयांय ईसुल तेरावी देदलो तो।
ईसु बोद देहे आने आजार्याहांन हारें केअहे
(माथी ४:२३-२५)
17 बार खास खोबुर देनाराहांअरी ईसु डोगापेअनेअ उत्यो आने तीयाअ बीहरा खुब चेलाहांअरी एक सापाटीम उबी रीयो। तींहीं बीहरें बी खुब मांहेंअ आथें। तें येरुसालेमामेनेअ, आने येहुदीया जील्लाअ बीहरा बादा जागाहांमेनेअ, आने दोरीयाअ तोळीपेर्याअ तुर आने सीदोन सेहेराहांमेनेअ आललें। 18 तें ईसुअ बोद उनायांअ आने तीयाहांअ आजाराहांमेनेअ हारें वेरांअ आललें। आने पुतळें लागलें तीयाअ लीदे जें आजार्यें आथें तीयाहांमेनेअ ईसुंय पुतळाहांन बी काड्यें।
19 आने बादेंज मांहेंअ तीयाल आथलांअ कोसीस केअत्लें। काहाका, तीयामेनेअ ताकोत नींगत्ली आने तीयुकींअ तो तीयाहांन बादाहांन हारें केअत्लो।
सुखी लोक आने दुखी लोक
(माथी ५:१-१२)
20 ईसुंय तीयाअ चेलाहांअ वेल हीईन आख्यों, “ओ सोताअ जीवोनाहांम आत्मीक बाबोतीहींअ जोरुल हाय तों जांअनाराहां, * तुमां खुब सुखी हाय! काहाका, पोरमेहेर तुमांअ जीवोनाहांम राज कीअ। * 21 पोरमेहेरापेनेअ वोस्तु मीलवांअ जोरुल हाय तों जांअनाराहां, * तुमां खुब सुखी हाय! काहाका, पोरमेहेर तुमनेंह तों जोतोंअ जोजे, तोतोंअ दीअ। ओ आमी रोळनाराहां, तुमां खुब सुखी हाय! काहाका, फाचलांअ नेअ तुमां ओहाह। 22 तुमां मांहांअ पोयराअ मोंजे मांअ चेलें हाय तीयाअ लीदे बीहरें मांहेंअ जांहांअ तुमनेंह नोफरोत केअ आने तीयाहांअ मोंडोळुंहमनेअ तुमनेंह काडी थोवे आने तुमांअ नींदा केअ आने तुमां खाराब हाय एंहकींअ आखे तांहांअ, तुमां खुब सुखी हाय!
23 तेंहडों बोंणे तांहांअ, तुमां आनोंद केरा! आंह, खुसालीम आवीन नाचा! काहाका, तीया ओनुभोवुअ लीदे पोरमेहेर तुमनेंह होरगाम मोडो बोदलो दीअ। ईत केरा का, तीया लोकाहांअ आगलेंअ डायें बी पोरमेहेराअ गोठ जाहेर केअनारा जुना जोमानाअ सेवोकुंअरी एंहकींअज कीईन वोरतुअलें।
24 पेन आमी जें मालदार हाय, तुमनेंह हाय-हाय! तुमां खुब दुख भोगवाह! काहाका, आमी तुमां बादी जातीअ सुखें भोगवी लेदेंह। फाचलांअ नेअ तुमनेंह काय बी नांह मीलनारों।
25 आमी तारायन डेरकाअ देनाराहां, तुमनेंह हाय-हाय! तुमां खुब दुख भोगवाह! काहाका, तुमनेंह आत्मीक बाबोतीहींअ खोट पोळीअ। * आमी ओहनाराहां, तुमनेंह हाय-हाय! तुमां खुब दुख भोगवाह! काहाका, तुमांअ रोळांअ वारी आवीअ।
26 जांहांअ बादें मांहेंअ तुमांअ गुणगान केअ तांहांअ होमजी जाजा का तुमां होकीकोतुम पोरमेहेराअ सेवोक नांह, आने तुमां खुब दुख भोगवाह! काहाका, तीयाहांअ ने तुमांअ आगलाअ डायाहां बी, सोताल पोरमेहेराअ गोठ जाहेर केअनारा हाय एंहकींअ झुटी रीते आखावनारांअ गुणगान एंहकींअज कीईन केअला।
दुसमोनाहांपेअ बी माया राखा!
(माथी ५:३८-४८; ७:१२)
27 पेन मांअ गोठ्या उनाअनारा तुमनेंह आंय आखुंह, तुमां तुमांअ दुसमोनाहांपेअ बी माया राखा, आने तुमनेंह नोफरोत केअनारांअ बी भोलों केरा! 28 तुमनेंह हाराप देनाराहांअ सुख-सांतीअ खातुर पोरमेहेराल ओरुज केरा! आने तुमांअरी खाराब रीते वोरतुअनारांअ भोलायाअ खातुर बी पोरमेहेराल ओरुज केरा। 29 जो केडों तोअ एक गालापेअ थापुळ ठोकीन तोअ ओपमान केअ ता, तीयाल तोअ बीहरा गालापेअ बी थापुळ ठोकांअ दे! आने जो केडों जोबोरजोस्ती तोअ उपर्योअ कोट बुअची ले ता, तीयाल तोअ डोगलो बी लीअ लांअ दे! 30 तोअपेअ जों हाय तों तोअपेअ मागनारा केडाल बी तों तुं दे! आने केडों बी तोअपेनेअ तोअ वोस्तु लीअ ले तांहांअ तुं ते फाचो मा मागतो! 31 बीहरें मांहेंअ तुमांअरी जेंहकींअ वोरते एंहकींअ तुमां मोर्जी राखतें वीअ, तेंहकींअज तुमां बी तीयाहांअरी वोरता!
32 तुमाहांपेअ माया राखनाराहांपेअ ओतीअज तुमां माया राखा ता, तीयाअ खातुर तुमनेंह पोरमेहेर काहाल आसीरवाद दे? एंहकींअ ता पापी मांहेंअ बी तीयाहांपेअ माया राखनाराहांपेअ माया राखतेंहज। 33 आने तुमांअ भोलों केअनारांअ ओतोंअज तुमां भोलों केरा ता, तीयाअ खातुर तुमनेंह पोरमेहेर काहाल आसीरवाद दे? एंहकींअ ता पापी मांहेंअ बी तीयाहांअ भोलों केअनारांअ भोलों केअतेंहज। 34 आने उसनो लेदलों फाचों दीअ सेकतेंह एंहडा मांहांहांन ओतोंअज तुमां उसनो दा ता, तीयाअ खातुर पोरमेहेर तुमनेंह काहाल आसीरवाद दे? एंहकींअ ता पापी मांहेंअ बी देदलों उसनो फाचों मीलवांअ खातुर बीहरा पापींहन उसनो देतेंहज। 35 पेन तीयाअ बोदले, तुमां तुमांअ दुसमोनाहांपेअ बी माया राखा आने तीयाहांअ बी भोलों केरा! आने उसनो देदलों फाचों मीलवांअ आस्या राख्या वोगुर उसनो दा! तांहांअज पोरमेहेर तुमनेंह मोडों ईनाम दीअ। आने ईयाकींअ ईं देखाय आवीअ का, तुमां खोरेखोर होरगामेर्याअ पोरमेहेराअ पोयरें हाय। ईत केरा का, तो ता तीयाअ आभार नांय माननारा आने खाराब मांहांहांपेअ बी दाया केअहे। 36 तीयाअ लीदे, जेंहकींअ तुमांअ पोरमेहेर बाहको लोकाहांपेअ दाया केअहे, तेंहकींअज तुमां बी तीयाहांपेअ दाया केरा!
बीहराहांअ नीयाय केरांअ बाबोताम
(माथी ७:१-५)
37 तुमां जोबोरजोस्ती बीहराहांअ कामाहांअ नीयाय कीईन तें कामें खोटें हाय एंहकींअ आखाह मा! तांहांअ पोरमेहेर बी जोबोरजोस्ती तुमांअ कामाहांअ नीयाय कीईन तें खोटें हाय एंहकींअ नांय आखे। तुमां बीहराहांन माफी दा, आने तांहांअ पोरमेहेर बी तुमनेंह माफी दीअ। 38 बीहराहांन जों जोरुल हाय तों सुटा आथे तीयाहांन दा! तीयाअ पोरीणामे, पोरमेहेर बी, तुमनेंह जों जोरुल हाय तों सुटा आथे तुमनेंह दीअ। सुटा आथे बीहराहांन देता तुमनेंह देखीन पोरमेहेर बी तुमनेंह पुरा मापे, दाबी-दाबीन आने उबराय जाय ओतोंअ तुमांअ फातला पोतळाम ठालवी दीअ। जीया मापे मापीन तुमां बीहराहांन देतेंह तीया मापे मापीन पोरमेहेर बी तुमनेंह दीअ।”
39 हातींअ, तीयाहांअ ता येहुदी धोरमाअ आगेवानाहांअ होच नांय, पेन तीयाअ होच बोंणांअ जोजे तों देखावांअ ईसुंय तीयाहांन एक दाखलो देदो का, “एक आंदलों मांहुंअ बीहरा आंदलाल तीईन लीअ नांह जाय सेकतों। जो तों तीईन लीअ जाय ता, बेनुं खाडाम पोळीअ। काहाका, वाटीम काय हाय तीयाअ तीयाहांन बेनुंहन खोबुर नांह। 40 चेलो तीयाअ गुरु केअता मोडो नांह। पेन सोताअ तालीम पुरी कीअ तांहांअ, तो तीयाअ गुरुअ होच बोंणीअ। तीयाअ लीदे, आंय जेंहकींअ बीहराहांअ नीयाय कीअहुं तीयाअ सीवाय बीहरी रीते तुमांअ बीहराहांअ नीयाय नांय केरांअ जोजे।”
41 जांहांअ आपनेंह आपुअ सोताअ भुलुंअ भान नांह तांहांअ आपुअ बीहराहांअ भुल नांय काडांअ जोजे तों देखावांअ ईसुंय तीयाहांन आख्यों, “तोअ पावुअ डोंआंमेर्योंअ हानोंअ कोचरों बी तुल देखाअहे, पेन तोअ डोंआंमेरीअ मोडी पाटळी तुल काहाल नांह देखाअती? 42 तोअ सोताअ जीवोनामुज खुब मोडी भुल हाय ते तुं नांह हेअतो तांहांअ, ‘दादा, तोअ जीवोनामेरीअ एकदोम हानीअ भुल आंय हुदारी दीहुं’ एंहकींअ तोअ पावुहल आखांअ तुल काय होक हाय? ओ ढोंगी! पेअलांअ तुं सोताअ जीवोनामेरीअ खुब मोडी भुल हुदारीन हातींअ, तोअ पावुअ जीवोनामेरीअ एकदोम हानीअ भुल हुदारांअ कोसीस केअ! तांहांअ बीहराहांअ जीवोनामेरीअ भुलुंअ रुप तुं हारकींअ होमजी जाहो।
जेंहडों चाळवों तेंहडों फोलवों
(माथी ७:१६-२०; १२:३३-३५)
43 मांहेंअ ता चाळाहांअ होच हाय। केल्ला बी मीठा चाळाअ कोळवों फोलवों नांह आवतों, आने केल्ला बी कोळवा चाळाअ मीठों फोलवों नांह आवतों। 44 दोरेक चाळ हारों हाय का कोळवों हाय तों तीयाअ फोलवापेनेअ ओअखाअहे। तेंहकींअज कीईन, मांहुंअ हारों हाय का खाराब तों तुमां तीयाअ जीवोन हीईन पारखी सेकतेंह। काटाला चेखरांहपनेअ तुमनेंह ओंजीर नांह मीलता, आने थेवर्यांअ चेखरांहपनेअ दाराखसें नांह मीलतें। 45 तेंहकींअज कीईन, हारों मांहुंअ हार्या बाबोत्या गोगेह आने हारें कामें केअहे। पेन खाराब मांहुंअ खाराब बाबोत्या गोगेह आने खाराब कामें केअहे। काहाका, मांहांअ मोनाम जेंहडा वीचार पोअला हाय तीयाअ पोरमाणेज तों मांहुंअ हार्या बाबोत्या का खाराब बाबोत्या गोगेह।
कोअ बांदनारें बेन मांहेंअ
(माथी ७:२४-२७)
46 चाकोराहांअ ता तीयाहांअ मालीख जों केरांअ आखे तोंज केरांअ जोजे! तांहांअ मांन तुमां ‘मालीख, मालीख’ आख्या केअतेंह, पेन आंय जों केरांअ आखुंह तों तुमां काहाल नांह केअतें? 47 जों मांहुंअ मांअहीं आवीन मांअ गोठ्या उनाअहे आने तीयाअ पोरमाणे चालेह, तों केडाअ होच हाय तों आंय तुमनेंह ईया दाखलाकींअ होमजावुंह। 48 तों एंहडा मांहांअ होच हाय का जीयांय उंडो पायो खोदीन खोळकापेअ पायो टाकीन पोंगों बांदयों। रेल आली तांहांअ पांय तीया पोंगाअरी ठोकाअयों, पेन तों तीया पोंगाल आलवी बी नांय सेक्यों; काहाका, तों उंडा पायापेअ हारकींअ बांदाअलों आथों। 49 पेन जों मांहुंअ मांअ गोठ्या उनायन तीयाअ पोरमाणे नांह चालतों तों एंहडा मांहांअ होच हाय का, जीयांय पायो टाक्या वोगुरुज पुंय पोंगों बांदयों। रेलाअ पांय तीया पोंगाअरी ठोकाअयों तांहांअ, तों पोंगों तुरुतुज पोळी गीयों, आने आखों बादों खालास वीअ गीयों।”