3
પાવુલ તીમોથ્યોન થેસ્સાલોનીકે મોકનેહ
1 ફાચી તુમાંઅ મુલાકાત નેયા વોગોર આમહાંન રેવાઅયો નેંય તીંહીંઅ લીદો, આખોર આમહાં એંહડો નોકકી કોઅનો કા, માંય પાવુલ એખનુંજ એથેન્સોમ રેમ; 2 ઓનો હાતીઅ માંયોં ઓનો સીલા, આપોઅ ખ્રીસ્તી પાવોહ ઓનો ખ્રીસ્તોઅ બાબોતોઅ હારી ગોઠ જાહેર કોઆંન કામોમ પોરમીહેરોઅ આમાંઅ આર્યુઅ કામદાર તીમોથ્યોન તુમાંઅહીં મોકન્યુ, ઈંહીંઅ ખાતોર કા, તો તુમહાંન વીસવાહોમ મોજબુત બોંણાવે, 3 ઓનો તુમહાંન ઉફ આપે, ઓનો એવ કોઈન, તુમાંપોઅ પોળનો આયો દુખહોંઅ લીદો તુમહાં વેઅનો કોડો બી વીસવાહોમ નોબલે નેંય બોંણે. તુમું પોતોજ જાંઅતેહ કા, પોરમીહેરોઅ મોરજ્યો પોરમાણોજ, આય દુખે આપોપોઅ પોળને. 4 કેવકા, આમું તુમાંઅરી આથા તેંહડામ, પેલ્લાઅ રેખ આમહાં તુમહાંન ચેતવુણી આપની કા, તુમાંપોઅ હોવારેજ દુખે પોળીઅ ઓનો તુમું બોરાબોર જાંઅતેહ તેવ, દુખે પોળને બી. 5 તુમહાંપોઅ દુખે પોળને તીંહીંઅ લીદો, માંયોં તીમોથ્યોન તુમાંઅહીં મોકન્યુ. તુમાંઅ બાબોતોઅ ખોબોર નેયા વોગોર માંન રેવાઅયો નેંય તીંહીંઅ લીદો, માંયોં તીયાન તુમાંઅહીં મોકનુઅનું, ઈંહીંઅ ખાતોર કા, તુમું વીસવાહોમ કેકેવ ટોકી રેતેહ તીંહીંઅ બાબોતોમ માંય જાંઈં સેકોં. માંન ભારી ચીંતા આથી કા, સેતાનો તુમહાંન પારખી હેઅયે વેય, ઈંહીંઅ ખાતોર કા, તુમું વીસવાહોમ રેખ પોળી જાયા ઓનો એવ કોઈન આમહાં તુમાંઅહીં કોઅની મેનોત નોક્કામી બોંણી જાય. 6 પોન આમુ તીમોથી તુમાંઅહીં રેખ ફાચુ આંહીં આલુહ ઓનો તો હારી ખોબોર દાલુહ કા, તુમું આજી બી પોરમીહેરોપોઅ વીસવાહ રાખતેહ ઓનો એક-બીજાપોઅ માયા રાખતેહ. ઓનો તીયા આમહાંન એવ બી આખ્યોહ, જેંહડામ બી તુમું આમહાંન ઈયાદ કોઅતેહ, તેંહડામ તુમહાંન ભારી હારો લાગેહ, ઓનો જેવ આમહાં તુમહાંન મીલાઅન ઘોણી મોરજી રાખીહ, તેવ તુમહાં બી આમહાંન મીલાઅન ઘોણી મોરજી રાખીહ. 7 તીંહીંઅ લીદો, મેરાલો દોસતારહોં, તુમાંઅ વીસવાહોઅ લીદો આમહાંન, આમાંઅ આયો ભારી દુખહોંઅ વોખોત બી ઉફ મીલ્યુહ. 8 ઓનો તુમું માલીખોઅ આર્યોઅ તુમાંઅ જીવોનોમ એકદોમ મોજબુત રેયેહ તો જાંઈંન, આમહાંન આત્મીક તાજગી મીલીહ.
9 આપોઅ પોરમીહેરોઅ હાજર્યોમ તુમાંઅ લીદો આમહાંન ઓત્તી બાદી ખુસી આહાય કા, તીંહીંઅ બોદલામ પોરમીહેરોઅ આબાર માનાઅન આમાંપોઅ પુરતા સોબ્દા નાંહ. 10 આમું આમાંઅ પુરો મોનો કોઈન રાત-દીહ પોરમીહેરોન ઓરોજ કોઅતાહ કા, તુમહાંન ઉરુ-બુરુ મીલાઅન, ઓનો વીસવાહોમ પાકે વેઆંન તુમહાંન આજી જો કાંય જુરુલ આહાય તો પુરો પાળાઅન, તો આમહાંન મોદોદ કોએ.
11 આપોઅ પોરમીહેર બાહકુ પોતો ઓનો આપોઅ માલીખ ઈસુ તુમાંઅહીં આવાઅન માટો આમહાંન મોદોદ કોએ! 12 ઓનો જેવ તુમાંપોઅ આમાંઅ માયા હોદ વોગોરોઅ આહાય, તેવુજ તુમાંઅ માયા બી એક-બીજાપોઅ ઓનો બાદો માંહાંહાંપોઅ ભારી વાદે ઓનો હોદ વોગોરોઅ વેય એંહડો માલીખ વેઆંન દેય! 13 તીંહીંઅ પોરીણામો, ખ્રીસ્ત તુમહાંન વીસવાહોમ પાકે બોંણાવીઅ, ઓનો આપોઅ માલીખ ઈસુ તીયાઅ બાદો સોંત લોકહોંઅરી ફાચુ આવીઅ તેંહડામ, પોરમીહેર જો આપોઅ બાહકુ આહાય તીયાઅ આગલાઅ તુમું દોસો વોગોરોઅ ઓનો પોવીતોર રેઅ સેકા એંહડો કોઈઅ.