8
યેરુસાલેમોઅ ગોરીબ ખ્રીસ્તી લોકહોંન ભોલો મોનો કોઈન દાન આપાઅન બાબોતોમ
1 આમુ, માંઅ મેરાલો પાવોહ-બોંઅયોંહોં, માકેદોનીયા મોંડોળહોંઅ લોકહોંપોઅ પોરમીહેરો કોઅન્યો મેરબાન્યોઅ જો હારો પોરીણામ આલોહ, તીંહીંઅ બાબોતોમ માંય તુમહાંન આખાઅન માગોંહ. 2 તીંયહાંઅ ચારુ વેલ રેનારા ખ્રીસ્તી નોખા તેંહડો લોકહોં તીંયહાંન ભારી મુસીબોતી પાળન્યા, ઓનો તે પોતો ભારી ગોરીબ આહાય, તેબી તીંયહાં ભારી ખુસ વેયન ઓનો સુટો આથો બીજો વીસવાસહ્યોંન મોદોદ કોઅયીહ. 3 તે હોકીકોતુજ આહાય તે માંય જાંઓંહ. કેવકા, માંયોં પોતોજ દેખ્યોહ કા, તીંયહાંન બોંણ્યા તોતાહજ પોયસા તીંયહાં નાંહ આપ્યા, પોન પોતાઅ કામોઅ આથા તે પોયસા બી તીંયહાં આપી દેદાહ. તીંયહાંન એવ કોઈન પોયસા આપાઅન કોડા બી નાંહ આખ્યો તેબી, તીંયહાં પોતાઅ મેતોજ રાજી ખુસી તે પોયસા આપ્યાહ. 4 ઓનો યેહુદીયા વીસ્તારોઅ પોરમીહેરોઅ લોકહોંન પોયસા મોકનાઅન કામોમ તીંયહાંઅ બી ભાગ રેય તીંહીંઅ માટો, તે પોતો આમહાંન કાલાવાલા કોઅયા કોઅત્ના. 5 માંઅ ધાયાર્ કોઅતા બી વાદારુ પોયસાઅ તીંયહાં આપ્યાહ. પેલ્લોઅ તીંયહાં માલીખ ઈસુન આખ્યો, “આમું તુંન ગોમે તેંહડો કામ કોઆંન માગતેહ.” હાતીઅ તીંયહાં માંન આખ્યો, “તુંન ગોમે તેંહડો કામ આમહાંન આખ! એટલે, આમું તો કોઅહું.” એવ કોઈન આમાંઅ મારફોતો પોરમીહેર તીંયહાંન જેવ હોમોજ પાળે તેવ કોઆંન તે તીયાર વેયે. 6 એંહડા પોયસા એકઠાવાઅન કામ તુમાંઅહીં તીતુ ચાલુ કોઅયોહ તીંહીંઅ લીદો, માંયોં તીયાન કાલાવાલા કોઅયાહ કા, તો ઈયો કામોન ચાલુજ રાખે, ઓનો માંહાંહાં ભોલો મોનો કોઈન આપની ભેટ એકઠી કોઆંન એ ખાસ સેવા પુરી કોઆંન તુમહાંન મોદોદ કોએ. 7 પોરમીહેર ચોમોત્કારોઅ રીતો કામ કોઅનારુ આહાય એંહડો વીસવાહોમ, ઓનો તીયાઅ ગોઠ બીજહાંન આખાઅન બાબોતોમ, ઓનો સાદારોણ રીતો બીજે જાંઈ નેંય સેકે એંહડયા ગોઠી આખાઅન બાબોતોમ, ઓનો બીજહાંઅ મોદોદ કોઆંન માટો તુમાંઅ જે ઉંહ આહાય તીંહમેઅ, ઓનો આમાંપોઅ તુમું જે માયા રાખતેહ તીંહમેઅ, તુમું આગોલ પોળતે આહાય. તીંહીંઅ લીદો, માંય તુમહાંન કાલાવાલા કોઓંહ કા, યેહુદીયા વીસ્તારોમ મોકનાઅન માટો સુટો આથો પોયસા આપાઅન બાબોતોમ બી તુમું આગોલ પોળતે બોંણજા!
8 એવ કોઆંન માંય તુમહાંન હુકોમ નાંહ કોઅતુ, પોન બીજો જાગરેઅ વીસવાસી, પોતાઅ આર્યોઅ વીસવાસહ્યોંઅ મોદોદ કોઆંન કોંહડે ઉંહાલે આહાય તો તુમહાંન દેખાવીન, તુમું બી બીજહાંપોઅ તેંહડીજ હાચી માયા રાખતેહ કા નાંહ, તીંહીંઅ પારખો કોઆંનુંજ માંય એવ આખોંહ. 9 આપોઅ માલીખ ઈસુ ખ્રીસ્તો તુમાંપોઅ કોતીહ બાદી મેરબાની કોઅયીહ તો તુમું જાંઅતેહ. જુગ નો તોરત્યોપોઅરો બાદો તીયાઅજ આથો તેબી, તીયા તો બાદો સોળી દેદો, ઓનો ગોરીબ માંહુંઅ બોંણીન તો આય દુન્યામ આલુ, ઈંહીંઅ ખાતોર કા પોતાઅ ગોરીબાયો કોઈન તો તુમહાંન આત્મીક રીતો માલદાર બોંણાવી સેકે.
10 તીંહીંઅ લીદો, માલીખોઅ નોમુનું દેખાવીન, ઈયો દાનોઅ પોયસાહાંઅ બાબોતોમ તુમાંઅ કાય કોઅનુંઅ જોજવે તીંહીંઅ માંય તુમહાંન સાલાહ આપોંહ. તુમું જાંઅતેહ તેવ, યેહુદીયા વીસ્તારો વેઅનો પોરમીહેરોઅ લોકહોંઅ મોદોદ કોઆંન માટો, ગોયો વોરોહ તુમહાં મોરજી રાખની, ઓનો તીંહીંઅ માટો પોયસા એકઠા કોઆંન ચાલુ બી કોઅનો. 11 તીંહીંઅ લીદો, આમુ તુમહાં દાનોઅ પોયસા આપાઅન નોક્કી કોઅનો ઓનો તે એકઠાવાઅન ચાલુ કોઅનો તેંહડામ તુમાંઅ જે મોરજી ઓનો ઉંહ આથી, તેંહડીજ મોરજી નો ઉંહ રાખીન, તુમહાંન જો આપાય તો આપીન, તો કામ પુરો કોઅજા! 12 ઈયાદ રાખજા કા, તુમહાં વેઅનો કોડાન બી બીજહાંઅ મોદોદ કોઆંન ઉંહ વેય તા, તો તીયાન બોંણે તોતીહ મોદોદ કોએ. તોજ પોરમીહેરોન ગોમેહ. તીયાન જોતોહ આપી સેકાય તીંહીં કોઅતા વાદારુ તો આપે એંહડી પોરમીહેર કોડાપોઅ બી આસા નાંહ રાખતુ. 13 માંય એવ નાંહ આખાઅન માગતુ કા, બીજહાંઅ જુરુલી પુર્યા પાળાઅન માટો તુમું પોતો હાકોળ વેઠા. પોન ઉલટો, માંય એવ આખોંહ, તુમાંપોઅ નો બીજહાંપોઅ જુરુલીઅ પુરતો હારકોજ વેઆંન જોજવે. 14 આમુ તુમાંપોઅ તુમાંઅ જુરુલહીં કોઅતા વાદારુ આહાય, ઓનો યેહુદીયા વીસ્તારોઅ વીસવાસહ્યોંપોઅ તીંયહાંઅ જીવાઅન પુરતો બી નાંહ તાંહાંઅ તુમાંઅ દાનો કોઈન તીંયહાંઅ જુરુલી પુર્યા પાળનુંઅ જોજવે. એખું વોખોત તુમાંપોઅ પુરતો નેંય વેય, ઓનો તીંયહાંપોઅ તીંયહાંઅ જુરુલહીં કોઅતા વાદારુ વેય તા, તો દીહ તે તુમહાંન મોદોદ કોઈ સેકીઅ. એવ કોઈન, બાદહાંપોઅ પુરતો વેઅ રેઈ. 15 જો તુમું એવ કોઅહા તા, ઘોણો વોખોત પેલ્લાઅ પોરમીહેરો પોતાઅ લોકહોંન “માન્ના’ નામોઅ ખાણો આપનો તેંહડામ, જો પોરીણામ આલનો તેંહડો પોરીણામ આવીઅ. તીંહીંઅ બાબોતોમ પોવીતોર લેખાણહોંમ એંહડો લેખનો આહાય:
“જીયા પુસ્કોળ ખાણો એકઠો કોઅનો, તીયાપોઅ વાદી નેંય ગોયો. કેવકા, વાદી જાય એંહડો આથો તો તીયા, જીયાપોઅ ઓસો આથો તીયાન આપી દેદો. ઓનો જીયા ઓસો ખાણો એકઠો કોઅનો તીયાઅ બી પુરતો વેઅ રેયો. કેવકા, જીયા પોતાઅ જુરુલી કોઅતા વાદારુ એકઠો કોઅનો, તીયા પોતાઅ ખાણામ રેખ, ઓસો એકઠો કોઅનો તીયાન આપી દેદો.”
તીતુ ઓનો તીયાઅ આયાર્અ સેવોક
16 તીંહીંઅ લીદો, આમુ માંય તીતુન ફાચુ તુમાંઅહીં મોકનોંહ. તુમાંઅ માટો માંન જેંહડી ઉંહ આહાય, તેંહડીજ ઉંહ પોરમીહેરો તીયાન બી તુમહાંન મોદોદ કોઆંન ઓનો પોયસા એકઠાવાઅન આપીહ; તીંહીંઅ લીદો, માંય પોરમીહેરોઅ આબાર માનોંહ. 17 તીતુન તાંહીં તુમાંઅહીં આવાઅન આમહાં કાલાવાલા કોઅયા તીંહીંઅ લીદો ઓતોહજ નેંય, પોન તુમહાંન ફાચુ મીલાઅન તીયાઅ પોતાઅ બી ઉંહ આથી તીંહીંઅ લીદો, તો તુમાંઅહીં આવાઅન તીયાર વેયુહ. 18 તીતુઅ આરી એક ખ્રીસ્તી પાવહોન બી આમું તુમાંઅહીં મોકનુઅતાહ. તીયાન તુમું ઓઅખુઅતેહજ. તીયો પાવહો ખ્રીસ્તોઅ બાબોતોઅ હારી ગોઠ ફેલાવાઅન કામ કોઅયોહ; તીંહીંઅ પોરીણામો, તીયા બાદો મોંડોળહોંમ હારો નામ કાડયોહ. 19 ઓતોહજ નેંય, આમું દાનોઅ પોયસા નેયન યેરુસાલેમ જાજી તેંહડામ, આમાંઅ હોંગાત્યા તોરીકો બી તીયાન બીજો વીસ્તારહોંઅ મોંડોળહોંઅ લોકહોં નીમ્યુહ. એ દાનોઅ પોયસા આમું, માલીખોન મોડાય આપાઅન ખાતોર, ઓનો યેરુસાલેમ વીસ્તારોઅ ગોરીબ ખ્રીસત્યોહોંપોઅ આમહાંન લાગણી આહાય તો દેખાવાઅન ખાતોર, એકઠાવીન નેઅ જાતાહ. 20 પોરમીહેરોઅ લોકહોં સુટો આથો આપનો દાનોઅ વોહીવોટોઅ બાબોતોમ કોડો બી આમાંઅ ભુલ નેંય કાડે તીંહીંઅ કાલજી રાખાઅન માટો, આમું તીતુઅરી તીયો પાવહોન બી મોકનુઅતાહ. 21 એખનો માલીખોઅ નોજરોમ ઓતોહજ નેંય, પોન બીજો માંહાંહાંઅ નોજરોમ બી, જો હારો આહાય તો કોઆંનુંજ આમાંઅ ઈરાદુ આહાય. 22 ઓનો તીંયહાંઅ આરી-આરી બીજો એક ખ્રીસ્તી પાવહોન બી આમું તુમાંઅહીં મોકનુઅતાહ. આમહાં તીયાન ઘોણ્યો વોખોત ઓનો ઘોણ્યો રીતો પારખી હેઅયુહ. એટલે, આમુ આમહાંન ખોબોર આહાય કા, તો માલીખોઅ સેવા કોઆંન ઉંહાલુ આહાય. આમુ બીજો મોંડોળહોંઅ લોકહોંઅ ગાંઉં તુમું બી ઈં દાન આપાઅન મોરજી રાખતેહ તીંહીંઅ તીયાન પાકી ખાતરી આહાય. તીંહીંઅ લીદો, તો, તીતુ નો બીજો પાવહોઅ આરી આવાઅન પેલ્લા કોઅતા આમુ વાદારુ ઉંહાલુ આહાય. 23 તીતુઅ બાબોતોમ આખોં તા, માંયોં તીયાન પોસોંદ કોઅયુહ કેવકા, તો માંઅ હોંગાત્યુ આહાય, ઓનો તુમહાંન આત્મીક રીતો મોદોદ કોઆંન માટો માંય જે સેવા કોઓંહ તીંહમેઅ તો માંઅ આર્યુઅ સેવોક આહાય. તીયાઅરી જે બેન જાંઆં આવતાહ તીંયહાંઅ બાબોતોમ આખોં તા, માંયોં તીંયહાંન ઈંહીંઅ ખાતોર પોસોંદ કોઅયાહ કા, આય વીસ્તારહોંઅ મોંડોળહોંઅ લોકહોં તીંયહાંન પોતાઅ ખોબરી તોરીકો મોકન્યાહ. તે બેનું ખ્રીસ્તોઅ મોડાય વેય તેવી રીતો મેનોત કોઅનારા આહાય. 24 તીંહીંઅ લીદો, બાદો મોંડોળહોંઅ લોક જાંઈ સેકે તીયો રીતો, ઈયો તીનું માંહાંહાંપોઅ તુમાંઅ માયા દેખાવજા! ઓનો તુમાંઅ બાબોતોમ બીજો મોંડોળહોંમ આમહાં જો હારો આખનો તો હાચોજ આહાય તો બી, તુમું એવ કોઈન દેખાવજા!