3
Manga Kara'tan sa manga Mawring Aldaw
1 Tandaan mo adi: magigin masakit ana manga mawring aldaw. 2 Dail ta ana manga tao magigin mamumu`yun sana sa sadiri, manga paslu sa sintabo, maabawun, maabla, parainsolto, pasawing maray sa manga gorang, indi tataong magrumrum nin otang na buut, ag magigin kontrang maray sa Dios. 3 Magigin sira maringis, uda pagkairak, pararaut nin rungug nin iba, maisug, magaga`sun, indi na muya sa maraay. 4 Buku sanang amo aan, kindi magigin pang manga traydor, uda maan, magigin mailig sa layaw imbis na mamuya sa Dios, 5 baga manga agko pagtood sa Dios piro indi man nira pibisto ana kapangyariyan nin Dios tanganing bagowun ana sakandang boway. Likayan mo ana manga taong bagaan.
6 Agko manga nagkapira sa sakanda na nigamitun nin pandadaya tanganing makaluug sa baguy nin manga babaying maloya ana buut, na pono nin kasalan, ag oripun nin manlainlain na pagma`wut sa kaosmakan. 7 Ana manga babaying adi pirming muyang makatuud nin ba`go pero indi man naiintindiyan ana kaostowan. 8 Kapariyo ni Janes ag Jambres na kominontra ki Moises, ana manga taong adi kontra man sa kaostowan. Uda na sira inisip na karaayan, kaya napatonayan na bukung tonay ana sakandang pagtood. 9 Pero indi makapagpapadagos ana sakandang pigibo, ta maiisiyan nya nga`min ana sakandang kapatalan, arug nyo nangyari ki Janes ag Jambres.
Manga Oltimong Kaatolan ni Pablo
10 Piro ika, sinonod mo yo sa`kun na manga katoroan, ogali ag katoyowan sa boway. Inarug mo ana sa`kun na pagtood, pakatius, pagkamuya, ag pagigin osto. 11 Nakita mo yo manga pag-osig sa`kun, pati yo manga tinius ko sa Antioquia, Iconio ag Listra, piro sa nga`min na adto ilinigtas ako nin Kagorangnan. 12 Sa kaostowan ana siisay man na muyang mamoway na agko kabanalan makamamati nin pag-osig. 13 Ana manga maraut mas orog na nipakarautun, ana manga madaya padagos na mandadaya, ag sira man madadaya. 14 Piro magpadagos ika sa manga katoroan na natu`ran mo, ag matibay mong pisarigan, mantang isi mo kin siisay ana nagtoro saimo nyaan. 15 Poon pa sa pagkaagin, isi mo na ana Banal na Kasoratan nitoro nya dagan nin kaligtasan, sa paagi nin pagtood ki Cristo Jesus. 16 Ana nga`min na Kasoratan alin sa Dios, ag mapapakinabangan sa pagtoro nin kaostowan, sa pagsawi, sa pagtotogyo nin manga sikong gibo, ag sa pagpatuud paponta sa matanos na pamomoway, 17 tanganing ana nagiserbi sa Dios, magin anda sa nga`min na manga gibong maray.