2
Ana Maraay na Soldados ni Cristo Jesus
1 Kaya ika Timoteo agin ko, padagos ikang magpakakusug, ta tata`wan ika ni Cristo Jesus nin grasiya o karaayan nin buut dail nya pakikipag-usad ta sakanya. 2 Yo manga narungug mo sa`kun sa presinsiya nin dakul na tao, itoro mo man sa mapagkakatiwalaan mong makapagtoro man sa iba.
3 Bilang usad na ostong soldados ni Cristo Jesus, kinakaipowan makiparti man ika sa`mun sa manga kasakitan. 4 Ag bilang usad na soldados indi dapat ika nakikilabut sa manga bagay na uda koneksiyon sa pagigin soldados. Imbis, dapat na mag-ingowa na mapaogma ana sakanyang opisyal. 5 Usad pa, arug ika dapat sa usad na parayamun. Ana usad na parayamun indi nanggagana kin indi iya nisonod sa mga sosonodon manunungud nya yamun. 6 Ag kinakaipowan arug man ika sa usad na paratanum, na angay na mao`nang omako nin parti nya inani. 7 Urup-urupun mong maray ana manga bagay na pisabi ko ag ipapaintindi adi nga`min nin Dios sa saimo.
8 Pagurupurupun mo ana Maraay na Barita manunungud ki Cristo! Binoway iya otro nin Dios, ag alin iya sa pag-ererensiya ni David. Amo adi ana Maraay na Barita na sa`kun na ipipangadal, 9 ana Maraay na Baritang adi amo man ana dailan nya sa`kun na manga kasakitan anggan sa makadinaan na arug nin usad na kriminal. Piro maski kinaono pa man indi magugu`ran ana sasabiyun nin Dios. 10 Kaya pitius ko ana nga`min na bagay alang-alang sa manga pinili nin Dios, tanganing makoko man nira ana kaligtasan na alin ki Cristo Jesus, ag ana uda kapondowan na kamorawayan. 11 Moadi ana kasabiyan na osto:
“Kin kita magraan na kapariyo ni Cristo,
maboboway man kitang kaiba niya;
12 kin kita magtius nin manga kasakitan
sa kina`ban na adi,
magihadi man kitang kaiba niya,
kin ikasupug ta iya sa atobangan
nya manga tao
pag-abot nya aldaw na aan,
si Cristo pirming osto
ta indi niya pweding indi gibowun
ana sinabi niya.”
Ana Angay na Serbidor ni Cristo
14 Iparumrum mo pirmi sa manga paratood ana manga bagay na adi. Patanidan mo sira sa ngaran nin Dios na indi sira magparadiriskotiran nya manga uda kamutangan na bagay, ta uda aan maibobongang maray, imbis kapaamakan sana aan nya manga nirungug. 15 Ika man pag-ingowaun mong magin osto sa Dios, usad na paraserbing uda kinakaipowan na ikasupug ag osto na nagitoro nin kaostowan. 16 Likayan mo ana uda kamutangan ag manga osmak na orosipan, ta ana manga nigibo nyaan oroagbay na napaparayo, ag mas lalong napaparayo sa Dios. 17 Ana manga ipipangadal nira baga kanser na niukup sa intirong lawas. Kaiba na diyan si Heminio ag Fileto, 18 na naparayo na sirang maray sa kaostowan ag piraut nira ana pagtood nin iba. Ipitoro nirang nakaliis na ana pagkaboway otro nya manga guraan. 19 Piro padagos na masarig ana pasu`naran na ibinutang nin Dios, ag minarkaan nin bagadi, “Nabibisto nin Kagorangnan kin siisay ana sakanya.” ag “Ana siisay man na niba`no sa pangaran nin Kagorangnan kinakaipowan romayo sa kara`tan.” 20 Sa dakuung baguy, dakul ana manga kasangkapan ana iba gibo sa pilak ag bolawan, alagad ana iba gibo sa kawoy, ag lapok; ana iba gamit sa espisyal na okasiyon ana iba sa pang-oroaldaw. 21 Ana siisay man na nirayo sa kara`tan, mabibilang adto sa manga kasangkapan na gamit sa pang-espisyal ag pinakikinabangan, nakatoka iya sa sakanyang Kagorangnan, ag pirming anda sa onoman na maraay na gibo.
22 Kaya, maglikay ika sa manga mararaut na kaosowan nin usad na jobin. Pag-ingowaun mong magin matanos, mamumu`yun sa iba, ag matoninung, kaiba nya manga taong niba`no sa pangaran nin Kagorangnan na agko malinig na poso. 23 Maglikay ika sa manga uda kamutangan na diriskotiran ta niaboton sana aan sa karibokan ag roro`roan. 24 Ana serbidor nin Kagorangnan indi kinakaipowan na nakikipagro`ro; imbis, dapat iyang magin maray sa pakikiiba sa nga`min, maray ag matiyaga na parapangadal. 25 Matinius niyang ipitogyo ana siisay man na nikontra sa sakanya, tanganing tibaad sa arug nyaan na paagi ta`wan sira nin Dios nin oportonidad na maisiyan ana kaostowan, makapagsuwsuw ag tomalikod sira sa sakandang manga kasa`lan. 26 Kin mangyari ana manga bagay na aan, niliwanagun ana sakandang isip ag makadudulag sira sa siud nya diyablong nakasiud sa sakanda.