2 Timoteo
1
1 Alin ki Pablo na apostol ni Cristo Jesus basi sa kamu`yan nin Dios. Sinogo ako nin Dios tanganing mangadal manunungud sa ipinanogang boway na makokoko ta sa pakikipag-usad ki Cristo Jesus,
2 Pikomosta ko ika, Timoteo, na payaba kong agin sa pagtood.
Mapasaimo ana grasiya o karaayan nin buut, pagkairak, ag katoninungan na alin sa Dios na Ama ag ki Cristo Jesus na sa`tun na Kagorangnan.
Manga Pagpapakusug na Sasabiyun
3 Nipasalamat ako sa Dios na sa`kun na pinagiserbiyan na agko malinig na konsensiya, kapariyo nyo sa`kun na manga ginikanan. Nipasalamat ako sakanya kin pirumrum ko ika sa sa`kun na manga pami`bi sa aldaw ag sa ga`bi. 4 Narurumruman ko yo saimong manga pag-ibi kaso ominalin ako, kaya grabi ana sa`kun na pagkaidaw na makita ika, tanganing mabiyo ana sa`kun na kaogmaan. 5 Indi ko nalilingawan ana kaostowan nya saimong pagtood, arug nyo pagtood nyo saimong Lola Loida ag ni Eunice na saimong ina. Nasisigoro kong diyan man saimo ngowan ana pagtood na aan. 6 Pormedyo nyaan, ipiparumrum ko saimo na magin mas maigus ika pirmi sa paggibo sa katung`ran na inako mo alin sa Dios, kaso ru`nan ko ika nya sa`kun na kamut. 7 Ta bukung kataluwan ana itinao nin Espirito Santo sa`tun kindi tina`wan kita nin kapangyariyan, pagkamuya, ag pagpupugul sa sadiri.
8 Kaya indi mo ikasupug ana pagsabi manunungud sa sa`tun na Kagorangnan, o magin ana sa`kun na pagkakarsil dail sakanya. Imbis, makiusad ika sa kadipisilan pormidyo nya Maraay na Barita sa tabang nin Dios, 9 na amo ana nagligtas ag bomina`no sa sa`tun tanganing kita magin sakanyang banal na banwaan. Ginibo niya aan bukung dail nya sa`tun na manga naginibo, kindi dail nya sadiri niyang katoyowan ag grasiya o karaayan nin buut. Itinao niya ana grasiya o karaayan nin buut na adi sa paagi ni Cristo Jesus na itinagama na sa sa`tun bago pa lalangun ana kina`ban. 10 Piro naisiyan sana kaso ominabot si Cristo Jesus na sa`tun na Paraligtas. Nadaug niya ana kapangyariyan nya kagra`nan ag sa paagi nya Maraay na Barita ipinaisi niya ana boway na uda kapondowan. 11 Dail nya Maraay na Baritang adi, ako bina`nong parapangadal, apostol, ag paratoro. 12 Amo aan ana rason kin taynga ta agko ako manga kasakitan na bagadi. Piro indi ko ikinasusupug ana manga nangyayaring adi sa`kun, ta biyo ko kayang nabibisto ana sa`kun na pisarigan ag sigorado akong maiingatan niya anggan sa oltimong aldaw ana manga ipinagkatiwala ko sakanya.
13 Pangaputan mong maray yo manga katoroan na itinoro ko saimo, gibowun mo aan na usad na alimbawa, ag magpadagos ika sa pagtood ag sa pagkamuya na moan sa sa`tun dail nya sa`tun na pakikiusad ki Cristo Jesus. 14 Sa tabang nya kapangyarian nin Espirito Santo na niistar sa sa`tun, maanan mo ana nga`min na mararaay na bagay na manga pinagkatiwala saimo.
15 Bukung ilum saimo, bina`yan ako nyo alos nga`min na nasa Asia, pati na si Figelio ag Hermohenes.
16 Pagbendisyonan logod nin Dios ana pamilya ni Onisiporo; dakul na beses pinakusug niya ako, indi niya ako ikinasupug maski ako nakakarsil. 17 Ana kaostowan nyaan, kaso omabot iya sa Roma, maigut niya akong inanap anggan sa matorakan ako. 18 Kairakan logod iya nin Kagorangnan sa pagbalik niya otro! Isi mong maray kin paonong tinabangan niya ako adto sa Efeso.