4
1 Sa pangaran nin Dios, ag ni Cristo Jesus na magibalikun otro, tanganing maghadi ag magiatolon sa manga boway pa ag sa manga guraan na, pisogo ko ika, 2 na ipangadal mo ana sasabiyun nin Dios, sa kapanaonan man o indi: binsirun, sawiun, ag pakusugun ana buut nya manga tao na agko pakatius sa pangangadal. 3 Ta niaboton ana panaon na indi na nira muyang runggun ana tamang katoroan; imbis sosonodon nira ana manga pima`wut nira ag nipiliun sira nin manga parapangadal na uda itotoro kindi ana manga bagay na muya sana nirang marungug. 4 Ikikiling nira ana sakandang talinga sa manga estoriya na uda kaostowan ag indi nira rurunggun ana kaostowan. 5 Piro ika, kinakaipowan na magin mapagpugul sa nga`min na oras. Pagtiusan mo ana manga kadipisilan na niabot saimo. Gibowun mo ana trabao nin usad na parapangadal nin Maraay na Barita. Otobon mo ana saimong responsibilidad bilang usad na paraserbi nin Dios.
6 Sa sa`kun na parti, baga ako usad na dolot na anda nang iatang, ta ominabot na yo oras na baba`yan ko na ana kina`ban na adi. 7 Ginibo ko yo nga`min kong magigibo sa pakikipagpariya. Natapos ko yo dapat kong dalaganun. Naingatan kong pirmi akong osto sa pagtood. 8 Aakoon ko na ana korona nin pagigin mapanggana, na itatao sa`kun nya Kagorangnan, iya ana matanos na okom sa aldaw nin pag-oosgar, piro bukung ako sana ana tata`wan kindi ana nga`min man na namumuya, ag maogmang niugat nya pagbalik niya otro.
9 Pag-ingowaun mong makaabot didi sa lalong madaling panaon. 10 Bina`yan na ako ni Demas pormedyo ta namuya na iya sa manga bagay na pangkina`ban, pominonta na iya sa Tesalonica. Pominonta naman si Cresente sa Galacia, mantang si Tito sa Dalmacia. 11 Si Lukas na sana ana kaiba ko. Pakianap mo si Marcos ag iiba mo didi, ta dakuu ana maitatabang niya sa`kun na manga gigibowun. 12 Si Tiquio pinaponta ko na sa Efeso. 13 Pagponta mo didi, daraun mo yo sa`kun na alikbuy na naobon adto kira Carpo, sa Troas. Daraun mo man dagos yo manga libro ko, orog na yo gibo sa anit.
14 Laraut nyo ginibo sa`kun ni Alejandrong parapanday. Ana Kagorangnan na ana nipadosaun sakanya basi sa ginibo niya. 15 Maglikay ika sakanya dail indi basang iya muya nya sa`tun na ipipangadal.
16 Uda basang ominiba sa`kun kaso primero akong omatobang sa osgado. Pinaba`yan sana ako nira nga`min. Patawarun logod sira nin Dios. 17 Pero inibanan ako nin Kagorangnan ag tina`wan niya ako nin kusug, tanganing maipaisi ko sa manga bukung Judio o Hentil ana Maraay na Barita, ag nakaligtas ako sa sigoradong kagra`nan. 18 Ana Kagorangnan ana magiligtasun sa`kun sa nga`min na kara`tan, ag iya man ana magiatudun sa sa`kun adto sa kanyang kahadian sa langit. Omawun logod iya magpakinaono pa man. Amen. 19 Ikomosta mo ako sa magsugud na Priscila ag Aquila, ag sa pamilya ni Onesiporo. 20 Si Erasto naobon na sa Corinto, iniobon ko man sa Mileto si Trofimo, ta agko iya ilang. 21 Ingowaun mong maray na makaabot didi bago omabot ana tigliputan.
Pikomosta ika ni Eubolo, Pudente, Lino, Claudia, ag iba pang manga ipatngod sa pagtood.
22 Mapasaimo logod ana Kagorangnan,
pati na ana sakanyang grasiya o karaayan nin buut.