5
Manga Responsabilidad sa Kapwa Paratood
1 Indi mo pagta`manan ana manga lalaking subang saimo, kindi pakiosipan mo sana sirang baga saimong ama. Ibilang mo man na baga ipatngod ana manga jobin na lalaki, 2 ibilang mong ina ana manga gorang na babayi, ag pakiibanan mong agko intirong kalinigan ana manga jobin na babayi na baga man saimong manga ipatngod.
3 Galangan mo ag tabangan ana manga babaying balo na uda na ibang pilaoman sa boway. 4 Kin ana usad na babaying balo agko manga agin o kaya makoapo, ana manga adi ana mag-asikaso sa sakandang gorang bilang pagta`naw nira nin otang na buut, ta amo aan ana nakakapaogma sa Dios. 5 Ana tonay na babaying balo amo adtong solo na sana sa boway. Ana Dios amo na sana niyang piasaan, kaya padagos iyang nipami`bi sa aldaw ag sa ga`bi. 6 Piro ana babaying balo na namomoway sa kalayawan pwedi nang ipamutang na guraan. 7 Ipasonod mo sa manga paratood ana manga bagay na sinabi ko tanganing indi sira matatsaran. 8 Ana siisay man na indi niasikaso sa sakanyang manga kaerensiya, lalo na sa mismong kapamilya, nitalikod sa pagtood ag mas maraut pa sa manga bukung paratood.
9 Uda balo na iiba sa listaan nya manga balo kin indi pa niabot sa idad na sisenta, ag kinakaipowan usad sanang beses nagsugud, 10 kinakaipowan bistado iya sa manga gibong maraay, napadakuu niyang osay ana sakanyang manga agin, nipadagos nin manga bisita sa sakanyang baguy, niserbi sa manga piniling serbidor nin Kagorangnan, nitabang sa manga agko pangangaipo, ag debotado sa paggibo nin manga karaayan.
11 Indi mo ipag-iba sa listaan ana manga jobin pang balo. Ta kin magkaagko pa sira nin pagmati na magsugud otro, mapapaba`yan nira ana pagserbi ki Cristo. 12 Sa paagin aan mararaut yo o`na nirang panoga na indi na magsugud otro. 13 Matutu`ran nirang mag-inogak ag magsayang nin panaon na makipangbaguybaguy. Ana mas maraut pa nyaan magigin sira parapakilabut sa iba ag tsismosa. 14 Kaya para sa`kun, mas maraay na magsugud sira otro, tanganing mangagin ag asikasowun ana sadiring pamilya, tanganing indi magkaagko oportonidad ana kalaban ta na masabiyan kita nin maraut. 15 Pisabi ko adi ta agko na nagkapirang balo ana nailiis na ni Satanas.
16 Kin ana usad na babaying paratood agko balo sa sakanyang pamilya, kinakaipowan na atamanun niya aan, tanganing indi aan magin pabu`gat sa simbaan, sa paaging aan ana simbaan makakatao nin maraay na atensiyon sa manga balong uda na talaga ibang pilaoman.
17 Ana namamayo sa simbaan kinakaipowan na ta`wan nin ataas na paggalang, ag tamang bayad orog na yo manga maigus sa pangangadal ag pagtoro. 18 Ta ana Banal na Kasoratan nagisabi, “Indi mo pagbosalan ana baka abang pigamit sa paggiuk.” Ag, “Ana trabaador angay nya sakanyang kabayaran.” 19 Indi mo pag-akoon ana ono man na sawut tomang sa usad na namamayo kin uda dowa o tolong testigo. 20 Pagsabiyan mo sa atobangan nya nga`min ana siisay man na namamayo na indi muyang pomondo sa paggibo nin kasa`lan, tanganing matakot ana iba.
21 Sa atobangan nin Dios ag ni Cristo Jesus ag nya sakanyang manga piniling anghel, ipisogo kong gibowun mo ana manga kasogoan na sinabi ko, na uda pipalain ag pipaboran.
22 Indi mo tolos iruun ana saimong kamut sakiisay man tanganing magin tagapamayo. Ingatan mong indi madamay sa kasa`lan nin iba. Magpadagos ikang uda katuyawan.
23 Buku sanang tobig ana saimong pag-inomon; mag-inom man ika nin agbay na alak ta makakatabang aan sa pagtunuw nya saimong kinaun ag nya saimong namamatian sa tuyan.