4
Manga Bukung Osto na Paratoro
1 Malinaw na pisabi nya Banal na Espirito na sa oltimong aldaw, baba`yan nya iba ana tamang pagtood sa Dios. Sosonoron nira ana madayang espirito ag manga katoroan na alin sa diyablo, 2 Ana manga katoroan na adi itotoro nya paratorong madadaya ag parasaginsagin, na ana sakandang konsensiya nasilyowan na nin pagigin oripun ni Satanas. 3 Ipibawal nira ana pagsugud ag ana pagkaun nin nagkapirang klase nin pagkaun, maski na linalang nin Dios ana manga pagkaun na adi, tanganing kaunun na agko pagpapasalamat nya manga agko pagtood, ag biyong nakakaintindi nya kaostowan. 4 Ana nga`min na linalang nin Dios maraay, ag indi pag-unaun na maraut kin piako na agko pagpapasalamat, 5 dail ta nalilinig aan nya sasabiyun nin Dios, ag pami`bi.
Ana Maraay na Serbidor ni Cristo Jesus
6 Magigin ika maraay na serbidor ni Cristo Jesus kin padagos mong ipapangadal sa manga ipatngod sa pagtood ana manga kasogooan na adi. Ag sa pangangadal mo sakanda, natata`wan mo man ana saimong sadiri nin pagtalobo pormedyo nya manga pagkaun na espiritwal ag ostong katoroan na saimong pisonod. 7 Indi mo pagsayangan nin panaon ana manga uda kaologan na alamat na sabisabi sana man nyo manga gorang. Imbis, tuurun mo sa kabanalan ana sadiri mo. 8 Dail ta kin agko pakinabang ana pagpakusug nin lawas, mas agko pakinabang ana pagpapatuud sa kabanalan ta aan agko panoga buku sana sa boway na adi, kindi maski sa boway na niaboton.
9 Masasarigan ana sasabiyun na adi ag kinakaipowan na tooron nya nga`min. 10 Ag amo adi ana dailan kin taynga ta niingowa ag nipagal kita sa pangangadal sa manga tao, ta nilaom kita sa Dios, ag Paraligtas nya nga`min na tao, lalo na nya manga nitood. 11 Itoro ag ipasonod mo ana manga bagay na adi.
12 Indi mo pagtogotan na agko magparatoyatoya saimo pormedyo ta obin pa ika, imbis, mag-ingowa ika na magin usad na arugan nin manga paratood: sa pagisabi, ogali, pagkamuya, pagtood, ag malinig na pamomoway. 13 Anggan indi pa ako nakakaponta diyan, gamitun mo ana manga oras mo sa pagbasa nin Kasoratan, sa pangangadal, ag pagtoro anggan sa omabot na ako. 14 Indi mo pagpaba`yan na di mo magamit ana kakayaan na regalo nya Espirito Santo basi sa inola saimo kaso iruun saimo yo kamut nyo manga namomoon sa simbaan.
15 Magin maigus ika sa paggibo nya manga bagay na sinabi ko saimo, ag ibutang mong biyo ana saimong sadiri sa manga bagay na adi tanganing makita nya nga`min ana saimong pag-asenso diyan ki Cristo. 16 Magmaan ikang maray sa saimong manga iron-iron ag pangangadal. Ipagpadagos mong gibowun ana manga bagay na adi tanganing maligtas ika ag ana manga nirungug saimo.