3
Ana Manga Tagapamayo sa Simbaan
1 Osto ana kasabiyan na adi: Ana nima`wut na magin tagapamayo sa simbaan, nima`wut nin maray na trabao. 2 Kaya, kinakaipowan na uda iya katatsaran, usad sana ana sakanyang sugud, tataong magpugul sa sadiri, malinikay, kagalanggalang, ag bokas ana sakanyang baguy sa manga bisita, ag maostik na magtoro. 3 Kinakaipowan man na buku iyang boratsiro, bukung garugasuun, kindi mapinasensiya ag mamumu`yun sa katoninungan, bukung angap sa sintabo. 4 Kinakaipowan man na maraay iyang mamayo sa sadiring pamilya, ipigalang ag pisonod nya sakanyang manga agin. 5 Ta paono makakapamayo ana usad na tao nin osay sa simbaan nin Dios, kin ana sadiri ngani niyang pamilya indi niya kayang pamayowan? 6 Kinakaipowan na uguy na iyang paratood; ta kin indi baka iya magin maabaw, logod maosgaran arug nin Diyablo. 7 Kinakaipowan na ipigalang iya nya manga taong bukung miyembro sa simbaan tanganing indi iya matatsaran ag indi matikrag sa siud nin diyablo.
8 Kinakaipowan man na ana magigin dyakono sa simbaan angay sa pagrespito, agko usad na sasabiyun, bukung boratsiro, ag bukung paslu sa sintabo. 9 Kinakaipowan sirang osto sa pagtood sa manga kaostowan na ipinaayag sa sa`tun, ag uda ikatatsar sa sakanda. 10 Kinakaipowan na testingun na mo`na sira ag mapatonayan na uda katatsaran bago sira togotan na magin dyakono.
11 Kinakaipowan na ana sakandang sugud toltol, bukung tsismosa kindi mabuut, ag osto sa nga`min na bagay.
12 Ana diyakono kinakaipowan na ana sugud usad sana, ag maraay mamayo sa sadiring pamilya, maraay na magpasonod sa sakanyang manga agin. 13 Ana paraserbing osto sa katungran ipigalang nya nga`min, kaya agko sira intirong kaisugan na naipapaayag ana pagtood nira ki Cristo Jesus.
Ana Mesteriyo nya Sa`tun na Pagtood
14 Dakuu ana sa`kun na paglaom na makakaponta ako diyan sa inyo sa lalong madaling panaon, alagad sinorat ko man dayaday ana manga kasogoan na adi, 15 tanganing kin indi man ako makaabot tolos diyan maisiyan mo na ana kinakaipowan na ogaliun nya manga paratood bilang miyembro nya pamilya nin Dios. Kitang manga paratood amo ana simbaan nin boway na Dios, ana tugas ag pasu`naran nin kaostowan. 16 Indi pweding pagdowadowaan ana kadakuung mesteryo nya kaostowan nya sa`tun na pagtood:
Nagpakita iya bilang tao,
pinatonayan nin Banal na Espirito na iya matanos,
nakita iya nin manga anghel,
ipinangadal sa manga banwaan,
tinood nin manga tao,
ag inako sa langit.