2
Manga Togon Manunungud sa Pagpangadyi
1 O`na sa nga`min, ipipakiosip ko na paaboton ninyo sa Dios ana sainyong manga kama`wutan, manga piayat, pagpangadyi para sa iba, ag pasasalamat para sa nga`min na tao. 2 Arug man nyaan ana gibowun ninyo para sa manga hadi, ag sa manga nasa kapangyariyan tanganing makapamoway kita na toninung ag matoninung, agko onra ag kabanalan. 3 Ta amo aan ana maraay ag nakakapaogma sa sa`tun na Dios na Paraligtas, 4 na ana muya niya amo ana nga`min na tao maligtas ag makaisi nya kaostowan. 5 Ta uusad sana ana Dios ag uusad man sana ana nasa pagbitngaan nya Dios ag tao, si Cristo Jesus na nagpakangtao. 6 Na nagtao nya sakanyang boway tanganing balokatun ana nga`min. Iya ana kaostowan nya banal na katoyowan nya Dios na ipinaisi sa tamang panaon. 7 Pormedyo nyaan, pinili ako tanganing mangadal, magin apostol ag magin paratoro nin pagtood ag nya kaostowan na adi sa manga bukung Judio o Hentil. Kaostowan ana manga ipisabi ko, indi ako niambog.
8 Muya kong ana nga`min na lalaki sa`ri man na logar magpami`bi na agko malinig na konsensiya, uda inanakit o kaga`san sa poso maski kiisay man.
9 Muya ko man na ana manga babayi, kinakaipowan na pino ana manga iron, malikay ag osay ana sakandang pagbado ag bowuk, na ana sakandang pinakaalaas buku ana sakandang bolawan, perlas, o ana mamaalun na bado, 10 kindi ana manga maraay na gibo na angay sa manga nitood sa Dios.
11 Ana manga babayi kinakaipowan na magtoninung sa panaon nin pag-aadal ag biyong magpasakup. 12 Indi ko pitogotan na ana babayi amo ana magtoro o mamaala sa manga lalaki; kinakaipowan na tomoninung sana sira. 13 Rumrumun ninyong si Adan ana o`nang linalang bago si Eva. 14 Buku man si Adan kindi si Eva ana nadaya ag bominalga nya kasogoan nin Dios. 15 Piro maliligtas ana babayi pormedyo nya sakanyang pagmundag nin agin, ag kin padagos na mamoway na agko kaimbodan sa pagtood, pagkamuya, kabanalan ag tamang pag-ogali.