1 Timoteo
1
1 Alin ki Pablo na apostol ni Cristo Jesus basi sa kasogoan nin Dios na sa`tun na Paraligtas ag ki Cristo Jesus na sa`tun na paglaom.
2 Namumu`yan kong Timoteo, osto kong agin sa pagtood:
Mapasaimo logod ana grasiya o karaayan nin buut, pagkairak, ag katoninungan alin sa Dios na Ama ag ki Cristo Jesus na sa`tun na Kagorangnan.
Patanid Tomang sa Manga Salang Katoroan
3 Kapariyo nyo pakiosip ko saimo kaso paponta ako sa Macedonia, muya kong pomirmi na mo`na ika sa Efeso ta agko nagkapirang tao adto na nitoro nin manga salang katoroan. Sogoon mo sirang pomondo sa pigibo nirang aan, 4 ag indi magsayang nin panaon sa manga sabisabi sanang manga bagay, ag sa pag-anap nin baga uda kapondowan na listaan kin isay-isay na manga ginikanan. Ta ana manga bagay na aan pipo`nan sana nin manga diriskotiran ag indi aan makakatabang sa ikakagibo nya plano nin Dios, plano na maisiyan nya manga tao sa paagi sana nin pagtood. 5 Ana katoyowan nya kasogooan na adi amo na ana nga`min na paratood magkaminuru`yan nin pagkamuyang alin sa malinig na poso, maraay na buut, ag uda pagsaginsagin na pagtood. 6 Agko manga nagkapira na tominalikod sa manga maraay na ogaling adi ag nag-abot sa manga uda kamutangan na pakikipagdiskotir. 7 Muya nirang magin paratoro nya Kasogoan ni Moises, mantang indi man nira naiintindiyan ana sakandang pisabi, maski ngani ana bagay na ipitoro nirang aan biyo nirang pisarigan.
8 Isi ta, na ana Kasogoan maraay, kin pigamit sa tamang paagi. 9 Rumrumun tang indi ginibo ana Kasogoan para sa mararaay na tao, kindi para sa manga taong indi muyang bomisto sa Kasogoan, sa manga kriminal, sa manga indi muyang bomisto sa Dios, sa manga parakasala, sa manga indi tataong gomalang, sa manga uda ilig sa kabanalan, sa manga niguraan nya sakandang gorang ag manga paraguraan nin tao.
10 Ana Kasogoan ginibo man dail sa mga mailig sa kaosmakan, parasambay, bakla, kidnaper, ambogon, manga nitestigo na bukung osto, ag sa manga parakontra sa tamang katoroan, 11 ana katoroan na adi basi sa Maraay na Barita, na alin sa makapangyariyan ag mapagbendisyon na Dios, ag pinagkatiwala man sa`kun tanganing ipangadal.
Pagbisto sa Pagkairak nin Dios
12 Nipasalamat ako ki Cristo Jesus na sa`tun na Kagorangnan, na tominao sa`kun nin kakusugan tanganing gibowun ana manga bagay na adi, dail ta pinagmaray niyang piliun akong magin serbidor niya.
13 Maski ngani nyadto ako nagparasabi nin tomang sakanya, pinili pa niya ako dayaday na magserbi sakanya. Usad pa nyaan inosig ag tinatsaran ko pa iya. Pero maski bagadto, kinairakan ako nin Dios pormedyo ta indi ko naiisiyan yo sa`kun na pigibo nyadto kaso indi pa ako nitood sakanya. 14 Itinao sa`kun nya Kagorangnan ana kadakul niyang grasiya o karaayan nin buut kaiba ana pagtood, ag pagkamuya na moan sa sa`tun dail nya pakikipag-usad ta ki Cristo Jesus.
15 Monadi ana usad na kaostowan na kinakaipowan na tooron nya nga`min: si Cristo Jesus pominadidi sa kina`ban tanganing iligtas ana manga makasa`lan, ag ako ana pinakamaraut sa nga`min. 16 Piro kinairakan ako nin Dios tanganing sa nangyari sa sa`kun maipakita ni Cristo Jesus kin bagaono iya kapasensiyoso, ag magin adi alimbawa adto sa nisarigun sa kanya ag tata`wan nin boway na uda kapondowan. 17 Pag-omawun ag pamorawayun anggan kinaono pa man ana uusad na Dios, Hading uda kapondowan, uda kagra`nan ag indi nakikita! Amen.
18 Timoteo, agin ko, ana manga bagay na adi ipitogon ko saimo basi adto sa uguy nang ipinagpropisiya saimo. Ana propisiyang adi magtao logod saimo nin kakusugan sa saimong pakikipaglaban sa kara`tan, 19 na agko pagtood ag malinig na konsensiya. Agko manga taong indi muyang somonod sa sakandang konsensiya, pormedyo nyaan piraut nira ana sakandang pagtood. 20 Kaiba diyan si Himeneo ag Alijandro; itinao ko na sira sa kapangyariyan ni Satanas tanganing matoroan na indi na makapagparasabi pa nin tomang sa Dios.