6
1 Sa manga paratood nang oripun, kinakaipowan na igalang nira ana sakandang among, tanganing uda masabi tomang sa pangaran nin Dios, ag sa sa`tun na ipipangadal. 2 Ag kin paratood man ana sakandang among, indi sira dapat mau`dan nin paggalang sa rason na mag-ipatngod sira sa pagtood. Imbis mas lalo pa nirang pakarayun ana sakandang pagserbi dail ta ana sakandang piserbiyan paratood man ag namumu`yan man nin Dios, na arug nira.
Ana Pagkamuya sa Sintabo
3 Siisay man na nitoro nin iba man sa katoroan na adi, bukung basi sa tamang toro nya sa`tun na Kagorangnan na si Jesu-Cristo, ag nya katoroan manunungud sa pagsonod sa Dios. 4 Ana taong aan nipaabaw-abaw alagad uda man naiisiyan. Muya sana niya na magparapanuyaw ag makipagdibate manunungud sa manga sasabiyun, bagay na niabot sana sa pagkaibug, ro`roan, panraraut, ag pananawut. 5 Mailig man iyang makipagdiskotiran sa manga siko ana pag-iisip, ag indi nibisto sa kaostowan. Piuna nirang ana kabanalan paagi nin pagpapayaman.
6 Kin sabagay, daug pa nya taong namomoway na banal ag nakokontento na sa presenteng kamutangan ana mayaman. 7 Ana kaostowan uda kita darang onoman sa kina`ban na adi, ag uda man kita madadara pag-alin ta didi. 8 Kaya makontento na kita kin agko kita pikaun ag piso`wut. 9 Ana manga taong nima`wut na yomaman sa ono man na paagi matitikrag sa tokso ag sa siud nya mapanraut ag uda pakinabang na pagma`wut na nitoglong sa sakanda sa kara`tan. 10 Ta ana pagkamuya sa sintabo amo ana pipo`nan nya nga`min na kara`tan. Ana sobrang pagma`wut nin kayamaman, among nagtoglong sa iba na tomalikod sa pagtood ag naglosbog sakanda sa kakulgan nin buut.
Sadiring Togon ni Pablo ki Timoteo
11 Alagad ika bilang serbidor nin Dios, maglikay ika sa manga bagay na sinabi ko. Piritun mong mamoway na matanos, banal, agko makusug na pagtood, tataong mamuya, matinius ag mabuut sa kapwa. 12 Ipaglaban mong maray ana pagtood. a Pangaptan mong maray ana boway na uda kapondowan, dail bina`no ika nin Dios para sa boway na adi kaso ipaayag mo sa atobangan nin dakul na testigo ana saimong pagtood. 13 Sa pangaran nin Dios na nitao nin boway sa nga`min, ag sa pangaran ni Cristo Jesus na nagpatonay sa atobangan ni Poncio Pilato, pisogo ko ikang, 14 pirmi mong gibowun ana manga kasogoan na sinabi ko saimo na uda katatsaran anggan na mag-abot ana Kagorangnan na si Jesu-Cristo. 15 Sa itinirminong panaon, ipapaisi iya nya mapagbendisyon na Dios, na amo ana makapangyarian na Hadi nin manga hadi, ag Kagorangnan nin manga kagorangnan. 16 Iya sana ana uda kagra`nan, ag niistar sa liwanag na indi maturukan. Indi iya nakita o makikita nin siisay man. Sa kanya ana onra ag ana uda kapondowan na kapangyarian. Amen.
17 Pagsabiyan mo ana manga mayaman sa kina`ban na adi na indi magin abawun, na indi sira maglaom sa kayamanan nirang madaling mauda. Imbis, maglaom sira sa Dios na nitao nin sobrasobra nya nga`min na bagay para sa sa`tun na ikaoogma. 18 Toroan mo sirang gomibo nin maraay, ag magpakayaman sa mararaay na gibo, magin bokas ana pagad ag matinabang sa kapwa. 19 Sa paagin aan nakakatipon sira nin kayamanan sa langit na indi mauuda, ag magkakaagko nin tonay na boway.
20 Timoteo, pagmaanan mo ana manga adal na ipinagkatiwala saimo. Likayan mo ana manga orosipan na uda kam`tangan, manga orosipan na una nya iba kadonongan, piro nikontra sa ipitoro ta. 21 Dail sa bagaan na pagdonongdonongan nin iba, nasala logod sira sa ostong pagtood.
Mapasaimo logod ana bendisiyon nin Dios.