تاوارجيت ن يوحنّا

ئݣنّا ؤجديد د واشال ؤجديد

‏1 داي أنّايخ ئݣنّا ؤجديد د واشال ؤجديد، ئدّخ ؤر ئقّيم ئݣنّا أمزْوارو د واشال أمزْوارو، د لبحر ؤر ياد ئقّيم.

‏2 نكّين يوحنّا أنّايخ تامدينت ن ربّي تامدينت توجديت ن لقدس. تضردّ زݣ-ئݣنّا. تݣ أم يوت ن تسليت ئشيْكن تحبّل ئخف نّس أت تدّو غر أرݣاز نّس.

‏3 أها سلّيخ يي يون ؤغويّي أخاتار ئدّاد زݣ ئݣنّا، أر ئتّيني: «دغي، ربّي ئݣا أزدّوغ نّس ئنݣر ن ميدّن. ئدّا أد-اݣّيدسن ئزدغ. ميدّن-اد دّان أد ݣين شّعب نّس د غاس نتّا أرا ئݣين ربّي نّسن.

‏4 أها ئدّا أد-اسن ئسفض مايد ئݣان ئمطّاون زݣ والّن نّسن. د لموت ؤسار ياد تّيلي، د-ؤر ياد ئتّيلي لحزن، ؤلا ئغويّان، ؤلا شا ئنقّان، ئدّخ ئسكين ئمزوورا ؤر قّيمن».

‏5 داي ئنّا ونّا ئقّيمن خف لكرسي: «ها نكّين أد ݣخ كو لحاشت توجديدت!» أها ئنّايي: «أرو، هان ئواليون-اد ستيتّ د لحقّ أيد ݣان».

‏6 داي ئنّايي: «هاتين ئجرا ؤينّا ئجران! نكّين أيد ئݣان لّيف د لييا، ݣيخ تيزويري د تينݣيرا. د ونّا ݣ-ئلّا ئريفي، نكّين أت تسّوخ زݣ ؤغبالو ن وامان ن تودرت أها ؤر ئتخلّاص والو.

‏7 د ونّا ئغلبن أد ئورت أياد كول، دّيخ أد ݣخ ربّي نّس، ئݣ نتّا ممّي.

‏8 ئد ئمدّولّا د وينّا ؤر يومينن د وينّا ؤر ئحلين د وينّا نقّانين د وينّا ئتفسادن د-ايت تحرݣا د وينّا ئتّعبادن لاصنام د-ايت ئحلّال كول، أد ييلي ؤمور نّسن ݣ-ؤݣلمام ئتّاغن س لعافيت د لكبريت، ئݣان لموت تيسّ سنات».

تامدينت توجديت ن لقدس

‏9 داي ئدّود غوري يون زݣ سبعا ن لمالايكا نّا غر لّان سبعا ن-ئغرّافن ئعمّرن س سبعا ن لمصيبات تينݣّورا أها ئسيولييي، ئنّاييي: «أورا أد-اش نعتخ تيسليت، نّا ئدّان أت تݣ تامطّوط ن-ؤعلّوش».

‏10 داي ياسيييي لمالاك غر يون ن عاري أخاتار ئعولّان س لجهد ن رّوح ن ربّي. ئنعتييي تامدينت ن ربّي ئݣان لقدس نّا ئلان ݣ ئݣنوان تضرد زݣ ئݣنّا زݣ غر ربّي.

‏11 دا تسفليلّي س لعزّ ن ربّي، د-ؤسفليلّي نّس ئݣا أمّ يون ن-ؤژرو ن لمعدن ئغلان شايݣان، تݣ أمّ يون ن-ؤژرو ن لمعدن ئغلان ئزدّيݣن أمّ لبلاّر.

‏12 أها ييلي غورس يون ن-ؤݣادير أخاتار ئعولّان غر لّان تناعش ن لباب، نّا خف عسّن تناعش لمالايكا. أها توارين خف لبيبان ئسماون ن تقبيلين ن-ايت إسرائيل س تناعش.

‏13 ئلين زݣ تانيلا ن-ؤنقّر ن تافوكت شارض ن لبيبان، ئلين زݣ تانيلا ن-ئديس أژلماض شارض ن لبيبان، ئلين زݣ تانيلا ن-ئديس أفاسي شارض ن لبيبان، ئلين زݣ تانيلا ن-ؤغلّوي ن تافوكت شارض ن لبيبان.

‏14 ئلين غر ؤݣادير أخاتار ن تمدينت تناعش ن-ئد لساس، ئتواري غيفسن ئسماون ن-ئمازان ن-ؤعلّوش س تناعش.

‏15 لمالاك نّا أر ئساوالن، ئلّا غورس يون ؤغانيم ن ؤرغ، حما أد ئعبر تامدينت د لبيبان نّس د-ئݣودار نّس.

‏16 تامدينت تلّا ت تّوسرس خف ربعا ن تاميوين ئمساسان، تݣ تاغزي نّس أنشت ن تيروت نّس، أها ئعبر تامدينت س-ؤغانيم، يوفا ديكس تناعش ن والف ستاديا معنى نّس ألفاين د ميتاين ن كيلوميتر، تمساسا تاغزي د تيروت د لعلو.

‏17 داي ئعبر أݣادير نّس يوفا ديكس ميا وبعا وربعين ئغيل معنى نّس أتّاين سبعين ميترو، ئݣ لعبار نّا س ئعبر لمالاك أنشت ن-ئغيل ن بنادم.

‏18 داي ئلّا ؤݣادير نّس أخاتار ئبنا س-وژرو ن لمعدن ئغلان ئسفليلّين، ئد تامدينت تبنا س ؤرغ ئصفان ئݣان أمّ لبنّار أزدّاݣ.

‏19 ئد لّساسات ن-ئݣودار ئخاتارن ن تمدينت زوّقن س مايد ئݣان لمعدن ئغلان. لّساس أمزْوارو ئزوّق س-ؤژرو ن لمعدن ئغلان ئسفليلّين د ويسّ سين ئزوّق س-ؤژرو ن لمعدن ئغلان أزݣزا د ويسّ شراض ئزوّق س جوهر أملّال د ويسّ ربعا ئزوّق س-ؤژرو ئݣان أم لبنّار أزيݣزا.

‏20 د ويس خمسا ئݣا أزݣّاغ أم ئدامّن، ويس ستّا ئزݣّاغ شيݣان، ويس سبعا ئݣا أزݣزا ئفسوسن، ويس تمانيا ئݣا أفانادي، ويس تسعا ئورّيغ، ويس عشرا ئݣا أوراغ ئشّورن س-ؤزݣزا، ويس حضاعش ئݣا أزݣاغ ئشّورن س ؤليموني، ويسّ تناعش ئزوّق س-ؤژرو ن لمعدن ئݣان أبرباش.

‏21 داي ݣين لبيبان س تناعش ن تالجوهرت، د كو لباب ئݣا يوت ن تالجوهرت، ئݣ لمراح ن تمدينت زݣ ؤرغ ئزدّيݣن ئݣان أمّ لبلاّر ئسفليلّين.

‏22 ماشان ؤر أنّايخ أود يوت ن تادّارت ن ربّي ݣ تمدينت، ئدّخ مولانا ربّي أخاتار د-ؤعلّوش أيد ئݣان تادّارت ن ربّي.

‏23 داي ؤر ياد تسّيدّ تافوكت د وايور ݣ تمدينت، ئدّخ ديكس ئݣا لعزّ ن ربّي أسيدّ أها ئݣ ؤعلّوش لفتّاشا نّس.

‏24 داي دّان أد دّون لݣنوس نّا ئفوكّان ݣ-ؤسيدّ نّس، أويندّ غورس ئݣلّيدن ن واشال لعزّ نّسن د لوقر نّسن.

‏25 أها ؤسار تقّنن لبيبان نّس س واسّ، ئدّخ ؤر ديكس ئتّيلي ييض.

‏26 داي دّان أد داوين غورس لعزّ ن لݣنوس د لوقر نّسن.

‏27 أها ؤسار ئكشّم غورس شا ؤر ئحلين نغد بنادم ئتݣّين أينّا ئݣان لعار د-ئحلّالن، ماشان غاس وينّا ئتّوارين ئسماون نّسن ݣ لكتاب ن تودرت ن-ؤعلّوش.