ثابراتّ ن ـ ؤمازان يهوذا
1
سّلام
1 نكّين يهوذا، ئسمغ ن عيسى لمسيح، د-ؤماس ن يعقوب، دا تّاريخ تابرات-اد يي ميدّن نّا ئختار ربّي، ئبّاتنخ، أل تن ئتّيري أها لان ݣ لعار ن عيسى لمسيح.
2 أد-اون ئوش ربّي شايݣان ن رّحمت د لهنا د تايري.
لعيقاب ن-ئسالمادن ن-ئحلّالن
3 أيايتما ئعزّين، ريخ زݣ وول ئنو كول أد-اون سيولخ خف نّجا نّا ݣ-اخ ئلّا ؤمور كول نخ، والاينّي دغي، ئلازم غيفي أد-اون أريخ ݣ تابرات-اد ئس ئخصّا أت تجاهدم خف ليمان نّا ئوشا ربّي غاس يوت ن لمرت يي وينّا ئتّامن ئسّ أها ئقدّاسن خف دّوام.
4 علاحقّ ئتس ن ميدّن كشمن ئنݣراون س لخزين، ݣان ئمعصان، دا سّفراغن لمعنا ن نّعمت ن ربّي نّخ حما أد ݣين أينّا ئݣان لعار أها أر تنكارن باب نّخ أفرضي نّا ئݣان مولانا عيسى لمسيح. زݣ واهوّا، ئسّيول لكتاب ن ربّي خف لعيقاب نّسن.
5 واخا، كونّي نّا ئسّن مليح ئسكّين كول نّا دّيخ أد-اون ئنيخ، والاينّي ريخ أد-اون سّكتيخ: هان مولانا ئفوكّا شّعب نّس لّيݣ ت-ئسّوفغ زݣ تمازيرت ن مصر، فّيراس ئخلا وينّا ؤر رين أد-امن ئس.
6 تكتيم ألّو لمالايكا نّا ؤر رضين س تانباطّ نّا غورسن ئلّان أها فّغن زݣ وانسيون نّسن. داي ئݣرتن ربّي ݣ وابوض ن تالّست أها ئكرفتن س سنسلات أبدا، أر غيفسن ئحكم ݣ واسّ ن لحساب.
7 تكتيم ألّو لقيست ن تمدينت ن سدوم د عمورة د تمدينين نّا تن ئدجورنa. ئمزداغ نّسنت ݣان أينّا ؤر ئحلين أم لملايكات نّا، أل ؤرزّون أد فسدن أها ݣين أينّا ئݣان لعار. أياد أخف ئعاقب ربّي تيمدينين-اد س لعافييت ن وابدا حما أد ݣينت تاماتارت يي وييّاض.
8 ئمشيد أي ݣان ميدّن نّا ئكشمن ئنݣراون س لخزين. أود نيتني س تويرجا نّسن لا سّخنونوسن صّواحات نّسن، أر تحقّارن مايد ئݣان تانباطّ أها أر رݣمن وينّا مي ئخاتر وادّور ݣ-ئݣنّا.
9 أود ميخائيل، أخاتار ن لمالايكا ؤر ئري أد ئحكم خف شّيطان س ݣار أوال لّيݣ ئمعاساق أݣّيدس خف لݣنازت ن سيدنا موسى، ماشان ئنّاياس: «أك-ئعاقب مولانا».
10 والاينّي ميدّن-اد دا رݣمن كول أينّا ؤر سّين. دا تضفارن أينّا ترا دّات نّسن أم لوحوش وار لعقل، أياد أي سّن كول. هاتين أينّا أس دا ؤخلّون ئخفاون نّسن.
11 أويها نّسن! هاتين تفارن أبريد ن قايينb، أر تݣّين لخاطّا أم بلعامc حما أد ربحن لمال، غوّغن أم قورحd نّا ئغوّغن خف سيدنا موسى أها دّان أد مّتن أم نتّا.
12 هاتين دا تّامّون أݣّيدون أها أر سّروايان زّرادي نّون ن تاݣمات، ؤر دا تحشّامن دا تتّان أر سّان شيݣان، أها ؤر دا ت تّاوين غاس ݣ-ئخفاون نّسن. ݣان أم ئسݣناو وار أمان ئحريتن واضو. ݣان أم ئسكلا نّا ؤر دا ئتّارون لغلت، أود ݣ لخريف. سكوفنتن ئد بابين نّسن زݣ ئژوران هاتين مّوتن سنات ن لمرّات.
13 ݣان أم تمزازين تيموعارن. لفعايل نّسن نّا ئسحشامن ݣّان أم ؤفرار نّا ݣّارن تمزازين ݣ-ئميسّي ن لبحر. ݣان أم ئتران نّا يوشكان د ربّي يودجاسن يون ن وانسا ݣ تالّست تابخّانت أبدا.
14 ويد أخف ئسيول ياد نّبي أخنوخe نّا ئݣان زݣ لجيل ويس سبعا زݣ أدام، لّيݣ ئنّا: «هان مولانا ئدا أد د-ئدّو د والفيون ن والفيون ن لمالايكا
15 حما أد-ئحكم خف ميدّن كول. أها ئحاسب وينّا ؤرا ت توقّارن خف ݣار لفعايل نّا ݣان لّيݣ غوغن غيفس د خف ترݣام نّا س ترݣمن ميدّن-اد ئمعصان».
16 ميدّن-اد ؤر دجين فرحن. أر تشتكون دّيما، أر تتفارن ݣار شّهوات نّسن، أر سّاوالن س لكيبر أها أر تلّغن ميدّن نّا ݣ-اسن ئلّا نّفع.
لوصييت يي ئمومن
17 ئد كونّي أيايتما ئعزّين، كتييات أوال نّا نّان ئمازان ن مولانا عيسى لمسيح قبل.
18 نّان-اون: «ݣ-ؤسّان ئنݣّورا ن دّونييت، دّان أد ددّون ئتس ن ميدّن أد قبّضن س مولانا د ئسّون أها تفارن ݣار شّهوات نّسن».
19 ميدّن-اد أيدا ئتسبّابن ݣ بطّو ئنݣر ئمومن، دا ت تفارن شّهوات ن دّونييت أها ؤر غورسن رّوح ن ربّي.
20 والاينّي كونّي أيايتما ئعزّين، بنويات تودرت نّون خف لّساس ن ليمان نّون أزدّاݣ. أدّاي دا تژّالّام ئخصّا أت تادجم يي رّوح ن ربّي أد كون ئحري.
21 قّيمات ݣ تايري ن ربّي. أها تراجام رّحمت ن مولانا عيسى لمسيح حما أد غورون تيلي تودرت ن وابدا.
22 ئتّس ن ميدّن ئضعف ليمان نّسن غورسن شّك، ئوا حنّات ديكسن.
23 د-ئتس ئخصّا أت تن تفوكّام س-ؤحوّص زݣ لحكام س لعافييت. د-ئتس ياضن حنّات ديكسن. والاينّي أويات بعيتّ، أد ؤر تغيسات أود ئعبان نّسن نّا ئݣان أمّي خنونسن س ݣار لفعايل نّسن.
يهوذا دا ئتݣّا لعزّ يي ربّي